1-2. Fu san ede a bun fu luku a tori fu Simson?

 SAN yu e prakseri wantewante te yu e yere a nen Simson? Kande yu e denki fa a man disi ben tranga srefisrefi. Dati tru. Ma Simson ben teki wan don bosroiti di tyari takru bakapisi kon gi en. Aladi dati de so, toku Yehovah ben poti prakseri na ala den sani di Simson ben du fu dini en. Èn Gado meki sma skrifi a tori fu Simson na ini Bijbel fu di a ben de wan getrow man.

² Yehovah gebroiki Simson fu du kefalek sani fu yepi den Israelsma, a pipel di Gado ben teki leki en pipel. Hondrohondro yari baka di Simson dede, Yehovah meki na apostel Paulus skrifi a nen fu Simson makandra nanga a di fu den man di sori trutru bribi (Hebr. 11:32-34). Na eksempre fu Simson kan gi wi deki-ati. Simson ben frutrow tapu Yehovah, srefi di a ben de na ini kefalek muilek situwâsi. Na ini na artikel disi, wi o luku san wi kan leri fu Simson èn fa na eksempre fu en kan gi wi deki-ati.

3. Sortu wroko Yehovah ben gi Simson?

³ Di Simson gebore, den Filisteasma ben e tiri a pipel Israel èn den ben e kwinsi den (Krut. 13:1). Na ogri-ati tiri fu den ben meki den Israelsma pina hebi. Dati meki Yehovah gebroiki Simson fu „frulusu Israel fu den Filisteasma” (Krut. 13:5). Ma dati ben de wan muilek wroko fu du! Fu man du a muilek wroko disi, Simson ben o abi fu frutrow tapu Yehovah.

4. Fa Yehovah yepi Simson fu kon fri fu den Filisteasma? (Krutuman 15:14-16)

 ⁴ Luku wan eksempre di e sori fa Simson ben e frutrow tapu Yehovah èn tapu a krakti di Yehovah ben o gi en. Wan leisi, wan legre fu den Filisteasma ben kon fu grabu Simson na Leiki, di ben de na ini Yuda kande. Den man fu Yuda ben e frede èn dati meki den bosroiti fu tyari Simson go gi a feanti. Simson en eigi pipel tai en steifi nanga tu nyun titei èn den tyari en go gi den Filisteasma (Krut. 15:9-13). Ma „a yeye fu Yehovah kon na en tapu” èn na so Simson ben man koti den titei puru fu en anu. Ne „a feni wan kakumbe fu wan manburiki di no ben dede so langa ete”, a teki en èn a gebroiki en fu naki 1000 Filisteaman kiri!​—Leisi Krutuman 15:14-16.

5. Fa Simson sori taki a ben e frutrow tapu Yehovah di a gebroiki a kakumbe fu a buriki fu feti?

⁵ A kakumbe fu wan manburiki no ben de wan fetisani. Ma fu san ede Simson gebroiki en? A no de fu taki dati Simson ben sabi taki Yehovah ben o yepi en fu kiri den Filisteasma, awinsi sortu fetisani a ben abi. A getrow man disi gebroiki san a ben man feni na a momenti dati fu du a wani fu Yehovah. A de krin taki Simson ben man kiri ala den man dati fu di a ben e frutrow tapu Yehovah.

6. San wi kan leri fu Simson, te wi musu du wan sani na ini a diniwroko?

⁶ Yehovah o gi wi a krakti tu di wi abi fanowdu fu du iniwan sani di a aksi wi fu du, srefi efu a gersi leki wi no o man du en. Gado kan yepi wi na wan fasi di kan meki wi fruwondru. Abi a bribi taki Yehovah, a Sma di gi Simson krakti, o yepi yu tu fu du a wani fu en, solanga yu abi a frutrow taki a o yepi yu.​—Odo 16:3.

7. Sortu eksempre e sori taki a prenspari fu suku a tiri fu Yehovah?

⁷ Furu brada nanga sisa di e yepi bow den presi pe wi e anbegi a Gado fu wi, sori taki den e frutrow tapu Yehovah. Na ini a ten di pasa, moro furu na den brada ben e meki bow-tekening èn ben e  bow nyun Kownukondre zaal nanga tra presi. Ma fu di moro nanga moro sma e kon na ini na organisâsi fu Yehovah, meki wan tu kenki ben musu kon. Den brada di e teki fesi ben begi Yehovah fu tiri den èn den pruberi fu du sani na wan tra fasi. Disi meki taki den bigin bai gebow èn den ben meki den gebow di den ben abi kaba kon nyun baka. Robert, wan brada di wroko na furu bow project na heri grontapu e taki: „Na a bigin a no ben makelek gi son sma fu du sani tra fasi.” Robert e taki tu: „Furu yari langa wi ben e du sani heri tra fasi. Ma den brada ben de klariklari fu fiti densrefi èn a de krin now taki Yehovah e blesi a nyun fasi fa den e du sani.” Disi na wán eksempre nomo di e sori fa Yehovah e tiri en pipel so taki a wani fu en pasa. A bun taki wi alamala e aksi wisrefi a sani disi: ’Mi e suku tiri na Yehovah te mi musu du wan sani èn mi de klariklari fu fiti misrefi na ini a diniwroko fu Yehovah?’

8. San Simson du wan leisi di watra ben e kiri en?

⁸ Kande yu kan memre tra kefalek sani di Simson ben du. A ben kiri wan lew èn bakaten a kiri 30 Filisteasma na ini Askelon (Krut. 14:5, 6, 19). Simson ben sabi taki a no ben o man du den sani dati noiti efu Yehovah no ben yepi en. Disi ben de krin fu si di watra ben kiri en baka di a kiri 1000 Filisteasma. San a du? Na presi taki a frutrow tapu ensrefi fu feni watra fu dringi, a begi Yehovah fu yepi en.​—Krut. 15:18.

9. San Yehovah du di Simson begi en fu yepi en? (Krutuman 15:19)

⁹ Yehovah piki a begi fu Simson èn a meki Simson feni watra na wan wondru fasi. Di Simson dringi a watra, „a kisi krakti baka”. (Leisi Krutuman 15:19.) Soleki fa a sori, dan a watra-olo disi ben de ete di Yehovah meki a profeiti Samuel skrifi a buku Krutuman furu yari baka dati. Te den Israelsma ben e si a watra-olo dati, dan a kan taki a ben memre den na wan prenspari sani. Dati na taki Yehovah e yepi den anbegiman fu en na ini muilek ten efu den e frutrow na en tapu.

10. San wi musu du te wi e suku yepi na Yehovah? (Luku a prenki.)

¹⁰ Wi musu suku yepi na Yehovah awinsi sortu koni wi abi noso awinsi san wi du kaba na ini a diniwroko fu en. Wi musu abi sakafasi èn agri taki wi kan du san Yehovah e aksi wi fu du soso te wi e frutrow na en tapu. Neleki fa Simson kisi krakti baka di a dringi a watra di Yehovah gi en, na so wi o kisi krakti baka na yeye fasi te wi e gebroiki ala den sani di Yehovah e gi wi.​—Mat. 11:28.

11. Fa wi kan kisi wini fu den sani di Yehovah e gi wi? Gi wan eksempre.

¹¹ Luku na eksempre fu Aleksey, wan fu den brada fu wi na ini Rosiakondre di e kisi hebi frufolgu. San yepi en fu tan tranga èn fu horidoro na ini muilek situwâsi? En nanga en wefi abi a gwenti fu studeri Bijbel ibri dei èn fu du sani na ini na anbegi fu den. A e taki: „Mi e pruberi fu tan studeri èn leisi Bijbel ibri dei. Ibri mamanten mi nanga mi wefi e taki fu a deitekst èn wi e begi Yehovah makandra.” San wi e leri fu disi? Na presi fu frutrow tapu wisrefi, wi musu frutrow tapu Yehovah. Fa wi kan du dati? Na te wi e studeri Bijbel, te wi e begi, te wi e go na den konmakandra èn te wi e go na ini a preikiwroko. Den sani dati e tranga wi  bribi. Yehovah fu en sei, o blesi a muiti di wi e du èn a o yepi wi fu tan dini en go doro. Gado ben tranga Simson èn a o tranga wi tu!

12. Sortu don bosroiti Simson teki èn fa a tori disi ben difrenti fu den tra leisi di a ben suku okasi fu feti nanga den Filisteasma?

¹² Simson ben de wan sondu sma, neleki wi. Sobun, ten na ten a ben teki bosroiti di no ben bun. Spesrutu wan fu den bosroiti di a ben teki meki taki a kisi takru bakapisi. Baka di Simson dini leki krutuman fu wan pisi ten, a „kon lobi wan uma di ben e libi na Sorek-lagipresi. Na uma ben nen Delaila” (Krut. 16:4). Wan pisi ten na fesi, Simson ben o trow nanga wan Filistea uma fu di „na Yehovah ben wani taki Simson du a sani disi”. Disi ben o gi en na okasi fu feti nanga den Filisteasma. Bakaten, Simson ben e tan na ini na oso fu wan huru-uma na ini a Filistea foto Gasa. Na a okasi dati, Gado gi Simson a krakti fu hari den doro fu a portu fu a foto puru èn syow den tyari gwe. Disi meki taki a foto no ben tranga moro (Krut. 14:1-4; 16:1-3). Ma a tori nanga Delaila ben de wan heri tra tori. Fu di Delaila no ben de wan Filisteasma ma kande wan Israelsma, meki a sani disi no ben o gi Simson na okasi fu feti nanga den Filisteasma. Boiti dati, na Simson srefi ben wani de nanga Delaila.

13. San Delaila du nanga Simson?

¹³ Delaila ben teki wan bigi moni fu den Filisteasma fu tori Simson. Na lobi Simson ben lobi Delaila so, taki a no ben man si san Delaila ben wani du? Awinsi fa a no fa, di Delaila tan dwengi Simson  fu taigi en fa a du kon taki a tranga so, dan Simson taigi en te fu kaba. A sari taki a fowtu di Simson meki, meki taki a lasi en krakti èn Yehovah no ben feni en bun moro fu wan pisi ten.​—Krut. 16:16-20.

14. San pasa nanga Simson di a frutrow Delaila?

¹⁴ Simson kisi takru bakapisi di a frutrow Delaila na presi fu frutrow Yehovah. Den Filisteasma grabu Simson èn den diki en ai puru. Den poti en na strafu-oso na Gasa, a srefi foto pe a ben puru den doro fu a foto. Now den sma meki a tron wan srafu di ben musu mara sani. Bakaten den Filisteasma tyari Simson go na wan fu den fesa fu den. Drape den tyari wan bigi ofrandi gi Dagon, a falsi gado fu den, fu di den ben bribi taki na a gado disi ben yepi den fu kisi Simson. Den puru Simson na strafu-oso, dan den tyari en go na a fesa fu meki den „lafu pikinso” èn fu meki spotu nanga en.​—Krut. 16:21-25.

15. Fa Simson sori taki a ben e frutrow tapu Yehovah baka? (Krutuman 16:28-30) (Luku a prenki na tapu a kafti.)

¹⁵ Simson ben meki wan seryusu fowtu, ma a tan dini Yehovah. Fu di a ben wani du san Yehovah ben wani a du, meki a suku wan okasi fu feti nanga den Filisteasma. (Leisi Krutuman 16:28-30.) Simson begi Yehovah: „Meki mi pai den Filisteasma gi san den du nanga mi.” A tru Gado piki a begi fu Simson èn a gi en na aparti krakti baka. Simson kiri moro Filisteasma a leisi disi leki oiti bifo.

16. San wi kan leri fu a fowtu di Simson meki?

¹⁶ Aladi Simson ben musu libi nanga den takru bakapisi fu a fowtu di a meki, toku a no tapu fu du a wani fu Yehovah. Awinsi wi meki wan fowtu èn kisi piri-ai noso awinsi wi lasi wan grani, toku wi no musu tapu fu du a wani fu Yehovah. No frigiti taki Yehovah de klariklari fu gi wi pardon (Ps. 103:8-10). Aladi wi e meki fowtu, Yehovah kan gi wi krakti fu du en wani, neleki fa a ben gi Simson krakti.

17-18. San yu feni moi na a eksempre fu Michael di gi yu deki-ati? (Luku a prenki.)

¹⁷ Luku na eksempre fu wan yongu brada di nen Michael. A ben abi furu fu du na ini a diniwroko fu Yehovah. A ben e dini leki dinari ini a diniwroko èn a ben  de wan gewoon pionier. Ma a sari taki a meki wan fowtu èn a lasi en grani na ini a gemeente. A e taki: „Mi ben abi furu fu du na ini a diniwroko fu Yehovah. Ne wantronso mi ben firi leki mi no man du noti na ini a diniwroko. Noiti mi no ben denki taki Yehovah gwe libi mi, ma mi ben aksi misrefi efu oiti mi ben o kon bun baka nanga Yehovah, noso efu mi ben o man dini en baka na ini a gemeente leki fosi.”

¹⁸ A moi fu si taki Michael no tapu fu du a wani fu Yehovah. A e taki tu: „Mi du ala san mi man fu meki a matifasi fu mi nanga Yehovah kon bun baka. Dati meki doronomo mi begi en nanga mi heri ati, mi studeri, èn mi denki dipi fu sani.” Baka wan pisi ten Michael kisi grani baka na ini a gemeente. Now a e dini leki owruman èn leki gewoon pionier. Michael e taki: „A yepi nanga deki-ati di mi kisi, spesrutu fu den owruman, yepi mi fu frustan taki Yehovah lobi mi ete. Mi kan dini baka na ini a gemeente nanga wan krin konsensi. A sani disi e leri mi taki Yehovah e gi pardon na iniwan sma di abi berow trutru.” Wi kan de seiker taki Yehovah o gebroiki wi ete èn taki a o blesi wi, srefi efu wi ben meki wan fowtu. Ma wi musu du ala san wi man fu tyari kenki kon èn wi musu tan frutrow na en tapu.​—Ps. 86:5; Odo 28:13.

19. Fa na eksempre fu Simson tranga yu?

¹⁹ Na ini na artikel disi, wi luku wan tu fu den span sani di pasa na ini a libi fu Simson. A tru taki a ben meki fowtu, ma toku a tan meki muiti fu dini Yehovah go doro, srefi baka a fowtu di a meki nanga Delaila. Èn Yehovah no drai baka gi Simson. A gebroiki Simson baka fu du kefalek sani. Yehovah ben si en leki wan man di abi bribi trutru, èn dati meki en nen skrifi tu makandra nanga den nen fu tra getrow man di kari na ini Hebrewsma kapitel 11. A e gi wi deki-ati trutru fu sabi taki wi e dini so wan lobi-ati Papa na hemel di e angri fu tranga wi, spesrutu te wi swaki. Sobun, neleki Simson, meki wi begi Yehovah: „Memre mi èn gi mi krakti.”​—Krut. 16:28.