1. Syatu bifo na apostel Petrus dede, dan san Yehovah meki a du?

 NA APOSTEL Petrus ben sabi taki a no ben o libi langa moro. Na ini ala den yari di a du a diniwroko fu en, a waka nanga Yesus, a preiki gi sma di no ben de Dyu, èn a dini leki wan memre fu a tiri skin. Ma a wroko fu en no ben kaba ete. Na a ten fu a yari 62-64, Yehovah meki a skrifi tu brifi. Dati na den Bijbel buku 1 Petrus nanga 2 Petrus. Petrus ben taki dati a ben howpu taki den brifi disi ben o yepi den Kresten baka te a dede.​—2 Petr. 1:12-15.

2. Fu san ede den brifi di Petrus skrifi ben de fanowdu?

² Petrus skrifi den brifi fu en na wan ten di den brada nanga sisa fu en „ben de nanga sari” fu di den ben e „kisi difrenti tesi” (1 Petr. 1:6). Ogri man ben e pruberi fu kon nanga falsi leri na ini a gemeente èn den ben e gi brada nanga sisa deki-ati fu libi na ala sortu fasi di no krin (2 Petr. 2:1, 2, 14). A no ben o teki langa fosi den Kresten na ini Yerusalem ben o ondrofeni „a kaba fu ala sani”. Dati wani taki dati den Rome srudati ben o pori Yerusalem nanga a tempel (1 Petr. 4:7). A no de fu taki dati den brifi fu Petrus yepi den Kresten fu sabi fa den ben kan pasa den tesi fu a ten dati èn fa den ben kan sreka densrefi gi den tesi di ben o kon ete. b

3. Fu san ede wi musu ondrosuku den brifi fu Petrus?

³ Aladi Petrus skrifi den brifi fu en gi den fosi Kresten, toku Yehovah meki den brifi disi tron wan pisi fu en Wortu. Dati meki wi kan kisi wini now fu den brifi dati (Rom.  15:4). Neleki den fosi Kresten, wi e libi na ini wan grontapu pe sma no e libi wan krin libi èn disi kan meki en muilek fu dini Yehovah. Boiti dati, heri esi a bigi banawtu o kon, di bigi moro a wan di ben pori Yerusalem nanga a tempel. Den tu brifi fu Petrus e memre wi na wan tu prenspari sani. Den o yepi wi fu tan fruwakti a dei fu Yehovah, fu no frede libisma èn fu abi trutru lobi gi makandra. Den sortu sani disi kan yepi owruman tu fu si fa den kan yepi den brada nanga sisa na ini a gemeente fu den fu tan abi wan tranga bribi.

4. Soleki fa 2 Petrus 3:3, 4 e sori, dan san kan swaki wi bribi?

⁴ Furu sma na wi lontu no e bribi na ini Bijbel profeititori. Gensman kan spotu wi fu di wi e preiki so furu yari kaba taki a kaba e kon. Son sma e taki dati a no o kon noiti. (Leisi 2 Petrus 3:3, 4.) Efu wan ososma, wan sma na wroko, noso wan famiriman e taigi wi den sortu sani dati, dan wi bribi kan kon swaki. Petrus e taki san kan yepi wi.

5. San o yepi wi fu tan wakti nanga pasensi teleki a grontapu disi kon na wan kaba? (2 Petrus 3:8, 9)

⁵ Gi son sma a kan gersi leki Yehovah e draidrai fu tyari wan kaba kon na a ogri grontapu disi. Den sani di Petrus skrifi kan yepi wi fu si sani na a yoisti fasi. Petrus e memre wi taki a fasi fa Yehovah e si ten de heri tra fasi leki fa libisma e si dati. (Leisi 2 Petrus 3:8, 9.) Gi Yehovah, wán dusun yari de leki wán dei. Yehovah abi pasensi fu di a no wani taki wan sma lasi libi. Ma te a dei fu en doro, dan a o tyari wan kaba kon na a grontapu disi. A de wan bigi grani gi wi fu gebroiki a ten di de ete fu preiki gi sma na heri grontapu.

6. Fa wi kan „tan hori bun na prakseri” taki a dei fu Yehovah e kon? (2 Petrus 3:11, 12)

⁶ Petrus e gi wi a deki-ati fu „tan hori bun na prakseri” taki a dei fu Yehovah e kon. (Leisi 2 Petrus 3:11, 12.) Fa wi kan du dati? Pruberi fu denki dipi ibri dei fu den blesi di wi o kisi na ini a nyun grontapu. Ala sani o de moi èn krin, srefi a loktu o krin. Yu kan si kaba fa yu e nyan gosontu nyanyan? Yu e si fa yu e gi wan switikon na den lobiwan fu yu di kisi wan opobaka? Prakseri fa a o de te yu e leri sma di ben libi hondrohondro yari pasa fa Bijbel profeititori kon tru. Te yu e denki dipi fu den sani disi, dan dati o yepi yu fu tan fruwakti a dei fu Yehovah èn fu tan de seiker taki a kaba o kon heri esi. Fu di wi „sabi den sani disi na fesi”, meki falsi leriman no o man kori wi nanga den lei fu den.​—2 Petr. 3:17.

7. San kan pasa te wi e frede libisma?

⁷ Fu di wi sabi taki a dei fu Yehovah o kon heri esi, meki wi wani du ala san wi man fu prati a bun nyunsu nanga trawan. Ma son leisi wi kan frede fu taki wan sani. Fu san ede? Fu di wi kan frede san sma o denki fu wi noso san den o du nanga wi. A sani disi pasa nanga Petrus. Na a neti di den krutu Yesus, Petrus ben frede fu taki dati en na wan fu den disipel fu Yesus èn wan tu leisi a taki dati a no sabi Yesus srefi (Mat. 26:69-75). Ma na a srefi apostel disi, ben man taki bakaten: „No frede san tra sma e frede èn no bruya tu” (1 Petr. 3:14). Den wortu fu Petrus e gi wi a dyaranti taki wi kan de sma di no e frede trawan moro.

8. San kan yepi wi fu no frede libisma? (1 Petrus 3:15)

 ⁸ San kan yepi wi fu no frede libisma? Petrus e taigi wi: „Na ini un ati un musu sabi taki Krestes na Masra.” (Leisi 1 Petrus 3:15.) Wi kan du dati te wi e denki dipi fu a posisi nanga a makti di wi Masra èn Kownu Yesus Krestes abi. Efu wi e senwesenwe noso efu wi e frede fu taki te wi kisi wan okasi fu prati a bun nyunsu nanga trawan, dan prakseri a Kownu fu wi. Si fa a e tiri na ini hemel aladi milyunmilyun engel de na en lontu. Memre taki a „kisi ala makti na ini hemel èn na grontapu” èn taki a o „de nanga [yu] ala dei te na a kaba fu grontapu” (Mat. 28:18-20). Petrus e gi wi a deki-ati fu „de srekasreka” ala ten fu opo taki gi a bribi fu wi. Yu ben o wani preiki gi wan sma na wroko, na skoro, noso na wan tra presi? Denki na fesi o ten yu o man preiki gi wan sma èn sreka na fesi san yu o taki. Begi Yehovah fu gi yu deki-ati èn abi a frutrow taki Yehovah o yepi yu fu no frede libisma.​—Tori 4:29.

9. Fa Petrus no sori lobi wan leisi? (Luku a prenki.)

⁹ Petrus leri fa fu sori lobi. A ben de drape di Yesus ben taki: „Mi e gi unu wan nyun komando, taki un musu lobi makandra. Neleki fa mi lobi unu, na so un  musu lobi makandra tu” (Yoh. 13:34). Aladi Petrus ben yere dati, toku bakaten a ben weigri fu nyan nanga den brada nanga sisa di no ben Dyu, fu di a ben frede den Dyu Kresten. Na apostel Paulus ben taki dati Petrus ben e „hoigri” (Gal. 2:11-14). Petrus ben teki a piri-ai dati èn a leri wan sani fu en. Na ini ala tu brifi fu en, a sori krin taki wi no musu firi lobi gi wi brada nanga sisa nomo, ma wi musu sori a lobi dati tu.

10. San e yepi wi fu ’lobi wi brada sondro fu hoigri’? (1 Petrus 1:22)

¹⁰ Petrus e taki dati wi musu ’lobi wi brada nanga sisa sondro fu hoigri èn wi musu lobi makandra nanga wi heri ati’. (Leisi 1 Petrus 1:22.) Wi o abi a lobi disi te wi e „gi yesi na a tru leri”. Wan fu den sani di wi leri na taki „Gado no lobi a wan sma moro a trawan” (Tori 10:34, 35). Wi no kan taki dati wi e gi yesi na san Yesus taki efu wi e sori lobi gi son sma na ini a gemeente wawan, ma wi no e sori a lobi dati gi trawan. A no de fu taki dati wi de moro bun mati fu son sma leki fu trawan, neleki fa a ben de nanga Yesus (Yoh. 13:23; 20:2). Ma Petrus e memre wi taki wi musu du muiti fu lobi ala wi brada nanga sisa fu di den de na ini a bigi famiri fu wi tu.​—1 Petr. 2:17.

11. San a wani taki fu lobi trawan nanga wi heri ati?

¹¹ Petrus ben gi wi a deki-ati fu ’lobi makandra nanga wi heri ati’. Na ini a vers disi, „lobi makandra nanga un heri ati” wani taki dati wi musu sori lobi gi wan sma srefi te a muilek fu du dati. Fu eksempre, san wi o du efu wan brada du wan hati sani nanga wi? A fosi sani di wi ben o wani du kande, na fu du wan hati sani baka nanga en, na presi fu sori lobi gi en. Ma Petrus leri fu Yesus taki Gado no lobi en te wi e pai ogri fu ogri (Yoh. 18:10, 11). Petrus ben skrifi: „No pai ogri nanga ogri, noso no kosi sma te den e kosi unu. Na presi fu dati un musu taki nanga den na wan switi fasi” (1 Petr. 3:9). Te yu lobi trawan nanga yu heri ati, dan yu o abi switifasi gi den, srefi te den du wan hati sani nanga yu.

12. (a) San wi o du tu te wi lobi trawan nanga wi heri ati? (b) San yu wani du soleki fa a kon na krin na ini a felem Meki muiti so taki wi kan tan abi wánfasi?

¹² Na ini a fosi brifi fu Petrus, a ben taki dati te wi lobi trawan nanga wi heri ati, dan dati o yepi wi fu gi den pardon. A lobi dati no e tapu wan tu sondu nomo, ma a „e tapu bun furu sondu” (1 Petr. 4:8). Kande Petrus ben memre taki Yesus ben leri en wan tu yari na fesi omeni leisi a musu gi trawan pardon. Na a ten dati a kan taki Petrus ben si ensrefi leki wan bun sma di a taki dati a ben o gi en brada pardon „seibi tron”. Ma Yesus leri en, èn a leri wi tu, taki wi musu gi pardon „te nanga seibitenti na seibi tron”, noso ala ten (Mat. 18:21, 22). Efu yu feni en muilek fu du a sani disi, dan no lasi-ati. Ala den futuboi fu Yehovah di abi sondu feni en muilek son leisi fu gi pardon. Ma san prenspari now, na taki yu du san yu man fu gi yu brada noso sisa pardon èn meki freide nanga en. c

13. San kan meki en muilek gi owruman fu feni ten fu gi den brada nanga sisa deki-ati?

¹³ Petrus noiti no frigiti san Yesus taigi en baka di a opo baka: „Luku den pikin  skapu fu mi” (Yoh. 21:16). Efu yu na wan owruman, yu sabi taki a rai dati na gi yu tu. Ma a no makelek gi wan owruman fu feni ten fu tyari a prenspari frantwortu disi. Owruman musu sorgu fosi taki den osofamiri abi ala san den abi fanowdu fu man tan libi, taki den firi a lobi, èn den musu yepi den osofamiri fu kon krosibei na Yehovah. Den owruman e teki fesi tu na ini a preikiwroko, den e sreka èn hori lezing na den gemeente konmakandra, kring konmakandra nanga kongres. Sonwan fu den owruman abi frantwortu tu na ini na Ati-oso Kontakti Komte noso na a Bow-kantoro na ini a kondre. Owruman abi furu fu du trutru!

14. San kan yepi owruman fu luku den skapu bun? (1 Petrus 5:1-4)

¹⁴ Petrus ben taigi den tra owruman: „Luku den skapu fu Gado.” (Leisi 1 Petrus 5:1-4.) Efu yu na wan owruman, wi sabi taki yu lobi yu brada nanga sisa èn yu wani yepi den. Ma kande yu e denki son leisi taki yu abi so furu fu du noso taki yu weri so te taki yu no man tyari a frantwortu dati. San yu kan du? Fruteri Yehovah ala den broko-ede fu yu èn fa yu wani yepi den brada nanga sisa. Petrus ben skrifi: „Efu wan sma e dini trawan, dan meki a frutrow tapu a krakti di Gado e gi” (1 Petr. 4:11). Kande den brada nanga sisa fu yu abi problema di no kan lusu dorodoro na ini a sistema disi. Ma hori na prakseri taki „a gran skapuman”, Yesus Krestes, kan yepi den moro bun leki iniwan tra sma. A kan du dati now èn na ini a nyun grontapu. Gado wani taki owruman lobi den brada nanga sisa, taki den e go luku den fu gi den deki-ati, èn taki den „tron eksempre gi den”.

15. Fa wan owruman e sorgu gi den skapu? (Luku a prenki.)

¹⁵ William, wan brada di de owruman langa ten kaba, e frustan o prenspari a de fu luku den skapu. Di a COVID-19 siki bigin panya na heri grontapu, en nanga den tra owruman fu a gemeente du ala san den man fu meki kontakti ala wiki nanga ibri sma na ini den grupu. A e taki fu san ede den du dati: „Furu fu den brada nanga sisa ben de den wawan na oso  èn a ben kan pasa makelek taki den bigin denki sani di ben kan meki den lasi-ati.” Te wan brada noso sisa abi problema, William e arki bun fu man sabi san na den broko-ede fu a sma èn san a abi fanowdu. Baka dati, a e pruberi fu feni wan buku noso wan felem fu wi website di a kan gebroiki fu gi a brada noso a sisa dati deki-ati. A e taki tu: „Moro leki oiti bifo a de fanowdu fu luku den skapu bun. Wi e wroko tranga fu yepi sma fu kon leri sabi Yehovah. Wi musu meki a srefi tranga muiti dati fu luku den skapu fu Yehovah èn fu yepi den brada nanga sisa fu tan na ini a waarheid.”

16. Na sortu fasi wi kan fiti den rai na ini den brifi fu Petrus?

¹⁶ Wi taki fu wan tu sani nomo di wi kan leri fu den tu brifi fu Petrus. Kande yu si wan sani di yu wani du moro bun. Fu eksempre, yu ben o wani denki moro fu den blesi di wi o kisi na ini a nyun grontapu? Yu poti en leki marki fu preiki na wroko, na skoro, noso na wan tra presi? Yu si tra fasi fa yu kan sori moro bun taki yu lobi yu brada nanga sisa nanga yu heri ati? Owruman, yu de klariklari fu sorgu gi den skapu fu Yehovah nanga prisiri? De eerlijk nanga yusrefi efu yu si taki yu abi wan tu swakifasi, ma no lasi-ati. No frigiti taki „Masra bun” èn taki a o yepi yu fu wroko na den sani dati (1 Petr. 2:3). Petrus e gi wi a dyaranti disi: „Gado . . . gi unu leri dorodoro. A o meki unu tanapu kánkan, a o meki unu kon tranga.”​—1 Petr. 5:10.

17. Efu wi e tan waka baka Krestes èn wi e meki Yehovah gi wi leri dorodoro, dan san o de a bakapisi?

¹⁷ Fosi, Petrus ben e firi taki a no ben warti nofo fu de nanga Gado Manpikin (Luk. 5:8). Ma fu di Yehovah nanga Yesus yepi Petrus, meki a tan du tranga muiti fu waka baka Krestes. Fu dati ede Yehovah meki Petrus „go na ini a têgo Kownukondre fu wi Masra nanga wi Frulusuman Yesus Krestes” (2 Petr. 1:11). Dati na wan kefalek bigi grani! Efu yu e tan du muiti fu waka baka Krestes neleki Petrus èn efu yu e meki Yehovah tan gi yu leri dorodoro, dan yu tu o kisi a grani fu libi fu têgo. ’A bribi fu yu o meki taki yu kisi frulusu.’​—1 Petr. 1:9.