1. Na ini sortu muilek situwâsi Yoas, Usia nanga Yosia ben kon de?

 FA YU leki yonguwan noso pikin ben o feni en fu tron kownu fu Gado pipel? Fa yu ben o gebroiki a makti fu yu? Bijbel e fruteri wi fu wan tu yonguwan di ben tron kownu fu Yuda. Fu eksempre, Yoas ben abi 7 yari nomo, Usia ben abi 16 yari, èn Yoas ben abi 8 yari. A ben musu fu muilek gi den. Ma awinsi a situwâsi no ben makelek, toku Yehovah nanga trawan yepi den fu du furu bun sani na ini den libi.

2. Fu san ede wi musu luku na eksempre fu Yoas, Usia nanga Yosia?

² Wi no e tiri leki kownu noso umakownu, ma toku wi kan leri moi sani fu den dri sma disi di Bijbel e taki fu den. Den ben teki koni bosroiti, ma den teki don bosroiti tu. Na eksempre fu den o yepi wi fu si fu san ede a prenspari fu suku bun mati, fu tan abi sakafasi, èn fu tan du muiti fu kon krosibei na Yehovah.

3. Fa Yoyada yepi Kownu Yoas fu teki koni bosroiti?

³ Teki den srefi koni bosroiti leki Yoas. Di Kownu Yoas ben yongu, en papa kon dede. Granpriester Yoyada kweki en èn a leri en sani fu Yehovah. Yoas ben koni fu di a ben arki den rai di Yoyada ben gi en. Fu di Yoyada ben de wan bun eksempre, meki Yoas bosroiti fu dini Yehovah èn fu yepi a pipel fu Yehovah fu dini en tu. Yoas seti sani srefi fu meki a tempel fu Yehovah kon bun baka.​—2 Kron. 24:1, 2, 4, 13, 14.

4. Sortu wini wi e kisi te wi lobi Yehovah èn te wi e gi yesi na en? (Odo 2:1, 10-12)

⁴ Efu wan sma e leri yu fu lobi Yehovah èn fu libi soleki fa en wani, dan dati na wan bigi kado. (Leisi Odo 2:1,  10-12.) Yu papa nanga mama kan gi yu leri na difrenti fasi. Luku fa a papa fu wan sisa di nen Katya yepi en fu teki bun bosroiti. Ibri dei te en papa ben e tyari en go na skoro, a ben e taki nanga en fu a deitekst. A sisa e taki: „Den takimakandra dati yepi mi fu du a yoisti sani te problema ben opo kon a dei dati.” Ma fa a de efu a gersi leki den Bijbel rai di yu papa nanga mama e gi yu, e tapu yu fu du san yu wani? San kan yepi yu fu gi yesi na den? Wan sisa di nen Anastasia kan memre ete taki en papa nanga mama ben e teki ten fu fruteri en fu san ede den ben poti son wet gi en. A e taki: „Na a sani dati yepi mi fu frustan taki den no ben poti den wet dati fu basi mi, ma fu kibri mi fu di den lobi mi.”

5. Fa yu papa, yu mama nanga Yehovah o firi te yu e du san bun? (Odo 22:6; 23:15, 24, 25)

⁵ Te yu e gi yesi na Bijbel rai, dan yu papa nanga mama o breiti nanga yu. Ma san moro prenspari, na taki Gado o breiti nanga yu èn a matifasi di yu abi nanga en o kon moro tranga. (Leisi Odo 22:6; 23:15, 24, 25.) Yu no feni taki disi na bun reide fu teki den srefi koni bosroiti di Yoas ben teki di a ben yongu?

6. Suma Yoas ben arki baka di Yoyada dede èn san ben de a bakapisi? (2 Kroniki 24:17, 18)

⁶ Leri wan sani fu den don bosroiti di Yoas ben teki. Baka di Yoyada dede, den mati fu Yoas meki taki a du sani di no bun. (Leisi 2 Kroniki 24:17, 18.) Yoas bosroiti fu arki den edeman fu Yuda di no ben lobi Yehovah. Kande yu o taki dati Yoas ben musu tan fara fu den man dati di ben e du san ogri (Odo 1:10). Ma na presi fu du dati, a arki na ogri rai fu den. Srefi di Yoas en neef Sakaria pruberi fu piri-ai gi en, Yoas meki sma kiri en (2 Kron. 24:20, 21; Mat. 23:35). Dati ben de wan ogri-ati èn don sani fu du! Yoas bigin en libi bun, ma a sari taki bakaten a fadon komoto na bribi èn a tron wan kiriman. Te fu kaba en eigi futuboi kiri en (2 Kron. 24:22-25). En libi no ben o waka so efu a ben tan gi yesi na Yehovah èn na den sma di lobi Yehovah. San yu e leri fu a tori disi?

7. Suma yu musu teki leki mati? (Luku a prenki.)

⁷ Wan sani di wi kan leri fu a don bosroiti di Yoas ben teki, na taki wi musu suku mati di lobi Yehovah èn di wani prisiri en ati. Den sortu mati disi o yepi wi fu du bun sani. Wi kan de mati fu sma di moro  owru noso moro yongu leki wi. Hori na prakseri taki Yoas ben yongu moro en mati Yoyada. Sobun, te a abi fu du nanga den mati di yu e suku, dan aksi yusrefi: ’Den e yepi mi fu tranga mi bribi na ini Yehovah? Den e gi yesi na Gado èn den e gi mi deki-ati fu du a srefi tu? Den e taki fu Yehovah èn fu den sani di den e leri fu Bijbel? Den e taigi mi san mi wani yere noso den no e frede fu gi mi rai te mi abi dati fanowdu?’ (Odo 27:5, 6, 17) Eigenlijk, efu den mati fu yu no lobi Yehovah, dan yu no abi den fanowdu. Ma efu yu abi mati di lobi Yehovah, dan tai hori na den fu di den o yepi yu ala ten.​—Odo 13:20.

8. San wi musu hori na prakseri efu wi e gebroiki social media?

⁸ Na ini a ten disi wi kan gebroiki Internet, noso social media fu taki nanga den famiri nanga mati fu wi. Ma furu sma e gebroiki social media fu post fowtow nanga felem fu san den bai noso fu san den du, soso fu sori trawan fa den kefalek. Efu yu e gebroiki social media, dan aksi yusrefi: ’Na meki mi wani meki trawan si taki mi kefalek? Mi wani prati wan bun sani nanga trawan noso mi wani taki den prèise mi? Mi e meki a denki fu trawan abi krakti tapu a fasi fa mi e denki, a fasi fa mi e taki èn tapu den sani di mi e du?’ Brada Nathan Knorr, di ben e dini leki memre fu a Tiri Skin, ben gi a rai disi: „No pruberi fu plisi libisma. Te yu du dati, yu no o plisi nowan sma te fu kaba. Plisi Yehovah, dan yu o plisi ala sma di lobi Yehovah.”

9. Fa Yehovah yepi Usia? (2 Kroniki 26:1-5)

⁹ Teki den srefi bun bosroiti leki Usia. Di Kownu Usia ben yongu, a ben abi sakafasi. A leri „fu abi lespeki gi a tru Gado”. Èn Yehovah blesi en na ini bijna ala den 68 yari di a ben de na libi. (Leisi 2 Kroniki 26:1-5.) Usia wini furu feanti èn a meki Yerusalem kon tranga (2 Kron. 26:6-15). A no de fu taki dati Usia ben breiti srefisrefi nanga ala den sani di Gado ben yepi en fu du.​—Preik. 3:12, 13.

10. Fa sani waka gi Usia?

¹⁰ Leri wan sani fu den don bosroiti di Usia ben teki. Kownu Usia ben gwenti taki trawan du san a taki. A kan taki na a sani disi meki taki a ben denki taki a man du ala san a wani? Wan dei Usia bosroiti fu go na ini Yehovah en tempel èn a go bron switismeri na tapu na altari, aladi den kownu no ben mag du dati (2 Kron. 26:16-18). Granpriester Asaria pruberi fu tapu Usia, ma Usia atibron srefisrefi. A sari taki Usia no tan getrow na Yehovah èn Yehovah strafu en nanga gwasi siki (2 Kron. 26:19-21). Usia en libi no ben o waka so efu a ben tan abi sakafasi.

11. San kan yepi wi fu tan abi sakafasi? (Luku a prenki.)

¹¹ Di Usia kisi moro makti, dan a frigiti taki na Yehovah ben de a Sma di ben meki ala sani waka bun gi en. San disi e leri wi? Wi no musu frigiti taki na Yehovah e gi wi den blesi nanga den grani di wi abi. Na presi fu meki bigi fu den sani di wi du, wi musu gi Yehovah ala grani b (1 Kor. 4:7). Wi musu abi sakafasi èn frustan taki wi na sondu sma di musu kisi piri-ai te dati de fanowdu. Wan brada di abi sowan 60 yari ben skrifi: „Mi leri fu no firi wan fasi noso fu no lasi-ati te trawan si den fowtu fu mi. Te mi e kisi piri-ai gi den lawlaw fowtu di  mi e meki son leisi, dan mi e pruberi fu no meki den fowtu dati moro èn mi e go doro fu du ala san mi man gi Yehovah.” Te wi e gi yesi na Yehovah èn te wi tan abi sakafasi, dan sani o waka bun na ini wi libi èn wi o de koloku.​—Odo 22:4.

12. Fa Yosia suku Yehovah di a ben yongu? (2 Kroniki 34:1-3)

¹² Teki den srefi bun bosroiti leki Yosia. Yosia ben abi 16 yari di a bigin suku Yehovah. A ben wani leri sani fu Yehovah èn du a wani fu En. Ma a libi no ben makelek gi a yongu kownu disi. Na a ten dati furu sma ben e anbegi falsi gado. Dati meki Yosia ben musu abi deki-ati fu man kenki a sani dati. Yosia no ben abi 20 yari ete di a bigin puru falsi anbegi na ini a kondre. Iya, Yosia ben abi deki-ati trutru.​—Leisi 2 Kroniki 34:1-3.

13. Te yu gi yusrefi abra na Yehovah, dan fa dati o abi krakti tapu yu libi?

¹³ Srefi efu yu yongu, yu kan kon krosibei na Yehovah neleki Yosia. Yu kan du dati te yu e leri moro fu den moi fasi fu Yehovah. Te yu du disi, dan yu o wani gi yusrefi abra na en. Te yu gi yusrefi abra na Yehovah, dan fa dati o abi krakti tapu yu libi? Luke, di dopu di a ben abi 14 yari, e taki: „Vanaf now, mi poti Yehovah na a fosi presi na ini mi libi èn mi o pruberi fu meki a breiti nanga mi” (Mark. 12:30). A o de wan bigi blesi gi yu efu yu wani du a srefi tu!

14. Fruteri fu wan tu yonguwan di e teki na eksempre fu Kownu Yosia.

¹⁴ Na ini sortu muilek situwâsi yu leki yonguwan kan kon? Johan, di dopu di a ben abi 12 yari, e taki fa den pikin na skoro e druk en fu smoko electrisch sigaret, noso fu vape. Johan e memre ensrefi ibri tron baka taki vapen kan pori en gosontu èn en matifasi nanga Yehovah. Na a sani disi e gi en krakti fu feti teige a druk na skoro. Rachel, di dopu di a ben abi 14 yari, e fruteri san e yepi en nanga den problema di a e miti na skoro. A e taki: „Te wan sani e pasa na skoro, dan mi e pruberi fu si fa a sani dati abi fu du nanga  Bijbel. Fu eksempre, wan geschiedenis les kan memre mi na wan Bijbel tori noso wan profeititori. Son leisi te mi e taki nanga wan sma na skoro, dan mi e pruberi fu denki fu wan Bijbeltekst di mi kan taki nanga en fu dati.” Kande yu no e kisi den srefi problema leki Kownu Yosia, ma yu kan koni èn yu kan de getrow tu neleki en. Te yu sabi san fu du te tesi e miti yu leki yonguwan, dan dati e sreka yu gi tra tesi di yu o kisi bakaten te yu kon bigi.

15. San yepi Yosia fu dini Yehovah getrow? (2 Kroniki 34:14, 18-21)

¹⁵ Di Kownu Yosia ben abi 26 yari, a bigin seti a tempel kon bun baka. Na a ten di den ben e du a wroko dati, sma feni „a wètbuku di Yehovah ben meki Moses skrifi”. Di den leisi a buku disi gi a kownu, a sani dati naki en ati so te taki wantewante a du san ben skrifi na ini a buku èn a tyari kenki kon. (Leisi 2 Kroniki 34:14, 18-21.) Yu ben o wani leisi Bijbel ibri dei? Kande yu e pruberi fu dati kaba. Fa yu feni en? Yu lobi en? Yu e skrifi den tekst di kan yepi yu? Luke, di wi ben kari kaba, e skrifi den moi tori di a feni na ini wan schrift. Kande yu kan du dati tu. Efu yu e skrifi den vers nanga den moi penti di yu feni, dan dati kan yepi yu fu memre den. O moro yu e kon sabi èn lobi Bijbel, o moro yu o wani dini Yehovah. Èn neleki fa Gado Wortu yepi Yosia fu du san bun, na so a o yepi yu tu.

16. Fa a du kon taki Yosia meki wan seryusu fowtu, èn san wi kan leri fu dati?

¹⁶ Leri wan sani fu a don bosroiti di Yosia ben teki. Di Yosia ben abi sowan 39 yari, a meki wan fowtu di meki taki a dede. A frutrow tapu ensrefi na presi fu suku rai na Yehovah (2 Kron. 35:20-25). Wi kan leri wan sani fu disi. Awinsi o owru wi de noso awinsi o langa wi studeri Bijbel kaba, wi musu tan du muiti fu kon krosibei na Yehovah. Disi wani taki  dati wi musu abi a gwenti fu begi, fu studeri Bijbel, èn fu arki a rai fu lepi Kresten. Dan a no o pasa so makelek taki yu meki bigi fowtu èn yu o de moro koloku.​—Yak. 1:25.

17. Sortu prenspari sani wi e leri fu a tori fu den dri kownu fu Yuda?

¹⁷ Te yu yongu, dan furu moi sani de di yu kan du. A tori fu Yoas, Usia, nanga Yosia e sori taki yonguwan kan teki koni bosroiti èn libi na wan fasi di Yehovah feni bun. A tru taki den yongu kownu disi meki fowtu di ben abi takru bakapisi gi den. Ma efu yu e teki na eksempre fu den bun sani di den kownu disi ben du èn efu yu e wai pasi gi den fowtu di den ben meki, dan yu kan abi wan koloku libi.

18. Sortu eksempre na ini Bijbel e sori taki yu kan abi wan koloku libi? (Luku a prenki.)

¹⁸ Bijbel abi tori fu tra yonguwan tu di ben kon krosibei na Yehovah èn di Yehovah ben feni bun. Den yonguwan disi ben abi wan koloku libi. David ben de wan fu den. Di a ben yongu, a bosroiti fu dini Gado èn bakaten a tron wan kownu di ben tai hori na Yehovah. A tru taki wanwan leisi a ben meki fowtu, ma Gado ben si en leki wan getrow man (1 Kow. 3:6; 9:4, 5; 14:8). Te yu e studeri a tori fu David, dan na eksempre fu en o gi yu deki-ati fu dini Yehovah getrow. Noso yu kan ondrosuku a tori fu Markus noso a di fu Timoteyus. Yu o si taki den ben e dini Yehovah sensi di den ben yongu èn den tan dini en go doro. A bosroiti di den teki fu dini Yehovah, meki taki Yehovah ben breiti nanga den èn den ben de koloku tu.

19. Fa yu libi kan waka?

¹⁹ A fasi fa yu e bosroiti fu libi now, o abi krakti tapu a fasi fa yu libi o de na ini a ten di e kon. Efu yu e frutrow tapu Yehovah èn yu no e frutrow tapu yu eigi frustan, dan a o yepi yu fu teki koni bosroiti (Odo 20:24). Yu kan abi wan koloku èn span libi. No frigiti taki Yehovah e warderi ala san yu e du gi en. Wan moro bun fasi fu libi no de, leki fu dini wi lobi-ati Papa Yehovah.