1. Fa Petrus ben firi di Yesus yepi na wan wondru fasi fu fanga fisi?

 HERI neti Petrus ben suku fisi, ma a no fanga noti. A ben fruwondru di Yesus taigi en: „Go pe a watra dipi, dan un musu saka den fisinèt fu unu go na ini a watra, so taki unu kan kisi fisi” (Luk. 5:4). Petrus ben tweifri efu a ben o fanga fisi, ma a du san Yesus taigi en. Den nèt bigin priti fu di den ben fanga so furu fisi. Di den kon frustan taki na wan wondru Yesus du, dan Petrus nanga den wan di ben e wroko nanga en ben „fruwondru srefisrefi”. Petrus bari: „Mi Masra, mi no warti fu de krosibei fu yu, bika mi na wan sondu sma” (Luk. 5:6-9). A kan taki Petrus no ben feni ensrefi warti fu de nanga Yesus.

2. Fu san ede a bun fu poti prakseri na a eksempre fu Petrus?

² Petrus ben abi leti fu taki dati en na „wan sondu sma”. Bijbel e sori taki son leisi a ben taki sani èn a ben du sani di ben hati en bakaten. Yu e firi leki Petrus son leisi? Yu e feti nanga wan swakifasi noso wan maniri di yu e pruberi fu kenki so langa kaba? Efu dati de so, dan yu kan feni trowstu te yu e studeri na eksempre fu Petrus. Fa so? Prakseri a sani disi: Yehovah ben kan meki taki den fowtu fu Petrus no skrifi na ini Bijbel. Ma a poti den drape so taki wi kan leri wan sani fu den (2 Tim. 3:16, 17). Te wi e leri sabi a man disi di ben abi swakifasi nanga firi neleki wi, dan dati kan yepi wi fu si taki Yehovah no e fruwakti fu wi taki wi du sani sondro fowtu. A wani taki wi e horidoro èn taki wi e tan pruberi fu du bun awinsi wi abi swakifasi.

3. Fu san ede a prenspari fu horidoro?

 ³ Fu san ede a de fanowdu fu horidoro? Te yu e oefen wan sani furu leisi, dan yu o man du en bun te fu kaba. Fu eksempre: Te wan sma wani leri fu prei wan gitara, dan a kan teki furu yari fosi a sabi prei en bun. A kan taki a o meki furu fowtu, ma efu a e tan oefen, a o kon moro bun. Srefi te a tron wan bun pokuman, toku wanwan leisi a kan meki wan fowtu. Ma a no e gi abra. A e tan oefen so taki a kan kon moro bun. Na a srefi fasi wi kan meki wan fowtu srefi baka di wi wini wan swakifasi. Ma wi e tan meki muiti fu kon abi bun fasi. Wi alamala e taki sani noso e du sani di e hati wi bakaten. Ma efu wi e weigri fu gi abra, dan Yehovah o yepi wi fu go na fesi fu tron moro bun sma (1 Petr. 5:10). Meki wi poti prakseri na a eksempre fu Petrus di ben horidoro. A sari-ati di Yesus ben sori a man disi awinsi a ben meki fowtu, kan gi wi deki-ati fu tan dini Yehovah.

4. San Petrus ben taki fu ensrefi, soleki fa wi kan leisi na ini Lukas 5:5-10, ma fa Yesus trowstu en?

⁴ Bijbel no e taki fu san ede Petrus ben kari ensrefi „wan sondu sma” noso fu sortu sondu a ben taki. (Leisi Lukas 5:5-10.) Ma kande a meki wan tu bigi fowtu. Yesus ben sabi taki Petrus ben frede, kande fu di a ben firi leki a no warti nofo. Ma Yesus ben sabi tu taki Petrus ben man tan getrow. Sobun, na wan switi fasi Yesus taigi Petrus fu „no frede moro”. Yesus ben abi bribi na ini Petrus èn a sani dati kenki Petrus libi. Petrus nanga en brada Andreas tapu nanga a fisi bisnis fu den èn den tron furuten disipel fu a Mesias. A bosroiti disi tyari furu blesi kon gi den.​—Mark. 1:16-18.

5. Sortu blesi Petrus kisi fu di a no meki den swakifasi fu en tapu en fu tron wan bakaman fu Yesus?

⁵ Petrus ondrofeni someni moi sani di a ben de wan bakaman fu Krestes. A ben si taki Yesus meki sikisma kon betre, taki a puru ogri yeye na sma tapu, èn taki a meki dedesma kon na libi baka b (Mat. 8:14-17; Mark. 5:37, 41, 42). Na ini wan fisyun Petrus ben si taki Yesus ben o de Kownu fu Gado Kownukondre. A sani disi naki en ati trutru (Mark. 9:1-8; 2 Petr. 1:16-18). Iya, Petrus no ben o si den sani disi noiti efu a no ben tron wan bakaman fu Yesus. A no de fu taki  dati a ben breiti srefisrefi taki a no meki den fowtu denki fu en tapu en fu ondrofeni den moi sani disi!

6. Petrus ben wini den swakifasi fu en na ini wan syatu pisi ten? Fruklari dati.

⁶ Awinsi Petrus yere èn si someni sani, tòg a ben feti nanga den swakifasi fu en. Luku wan tu eksempre. Di Yesus fruteri taki a ben o pina èn dede soleki fa Bijbel profeititori taki, dan Petrus taigi en taki den sani dati no ben o pasa kwetikweti (Mark. 8:31-33). Ibri tron baka, Petrus nanga den tra apostel ben e haritaki nanga makandra suma moro bigi (Mark. 9:33, 34). Tapu a lasti neti fosi Yesus dede, dan sondro fu denki Petrus koti wan man yesi puru (Yoh. 18:10). A srefi neti dati, Petrus ben frede so te gi den sma taki a taigi den dri leisi taki a no sabi en mati Yesus (Mark. 14:66-72). A sani dati meki Petrus krei nanga bigi sari.​—Mat. 26:75.

7. Sortu okasi Petrus ben kisi baka di Yesus opo kon na libi baka?

⁷ Yesus no drai baka gi na apostel fu en di ben lasi-ati. Baka di Yesus opo baka, a ben gi Petrus na okasi fu sori taki a lobi en ete. Yesus ben aksi Petrus fu dini leki skapuman gi den skapu fu en (Yoh. 21:15-17). Petrus ben de klariklari fu du san Yesus taigi en fu du. A ben de na ini Yerusalem tapu a dei fu a Pinksterfesa èn a ben de wan fu den sma di Gado salfu nanga santa yeye.

8. Sortu bigi fowtu Petrus meki na ini Antiokia?

⁸ Srefi baka di Petrus tron wan salfu Kresten a ben musu feti teige den swakifasi fu en. Na ini a yari 36, Gado ben seni Petrus go na Kornelius di no ben de wan Dyu, èn Gado ben salfu a man dati nanga santa yeye. Dat ben de wan krin buweisi taki „Gado no lobi a wan sma moro a trawan” èn taki sma di no ben de Dyu ben kan tron memre fu a Kresten gemeente (Tori 10:34, 44, 45). Sobun, baka dati Petrus bigin nyan makandra nanga sma di no ben de Dyu. Fosi, dati ben de wan sani di a no ben o du noiti (Gal. 2:12). Ma son Dyu Kresten ben feni taki Dyu nanga sma di no ben de Dyu no ben musu nyan nanga makandra. Wan tu sma di ben abi a denki dati kon na Antiokia, dan Petrus tapu fu nyan nanga den brada fu en di no ben de Dyu, kande fu di a ben frede taki a ben o hati den firi fu den Dyu Kresten. Na apostel Paulus ben si a hoigrifasi disi èn a taigi Petrus na fesi ala sma taki a sani san a ben du no bun (Gal. 2:13, 14). Petrus meki wan fowtu, ma a horidoro. San ben yepi en?

9. Fa Yohanes 6:68, 69 e sori taki Petrus ben de getrow?

⁹ Petrus ben de getrow. A no ben meki nowan sani tapu en fu waka na Yesus baka. Wan leisi di Yesus ben taki wan sani di den disipel fu en no frustan, dan Petrus sori taki a ben de getrow. (Leisi Yohanes 6:68, 69.) Sondro fu wakti noso fu aksi san den wortu fu Yesus wani taki, furu fu den sma gwe libi Yesus. Ma Petrus no du dati. A ben frustan taki Yesus wawan abi „wortu di e gi sma têgo libi”.

10. Fa Yesus sori taki a ben abi bribi na ini Petrus? (Luku a prenki.)

¹⁰ Yesus no gwe libi Petrus. Tapu a lasti neti fu en libi na grontapu, Yesus ben sabi taki Petrus nanga den tra apostel ben o gwe libi en. Ma tòg Yesus taigi Petrus taki a ben abi a bribi taki Petrus ben o drai kon baka na en èn taki a ben o tai hori na en (Luk. 22:31, 32). Yesus ben frustan  taki „na ati wani, ma a skin swaki” (Mark. 14:38). Sobun, awinsi Petrus ben taki dati a no sabi Yesus, toku Yesus no drai en baka gi na apostel fu en. Baka di Yesus kisi wan opobaka, a sori ensrefi na Petrus di Petrus ben de en wawan (Mark. 16:7; Luk. 24:34; 1 Kor. 15:5). A no de fu taki dati a sani dati ben gi na apostel disi furu deki-ati di ben sari fu san a du.

11. Fa Yesus gi Petrus a dyaranti taki Yehovah ben o sorgu en?

¹¹ Yesus ben taigi Petrus taki Yehovah ben o sorgu gi en. Baka di Yesus opo baka, a du ete wan wondru pe a meki Petrus nanga den tra apostel fanga furu fisi baka (Yoh. 21:4-6). A no de fu taki dati a wondru disi ben gi Petrus a dyaranti taki a de wan makelek sani gi Yehovah fu gi en san a abi fanowdu. Kande na apostel ben memre den wortu fu Yesus taki Yehovah ben o sorgu den wan di e tan ’suku a Kownukondre fosi’ (Mat. 6:33). Ala den sani disi yepi Petrus fu no poti a fisi bisnis tapu a fosi presi, ma a preikiwroko. Sondro fu frede a preiki tapu a dei fu a Pinksterfesa fu a yari 33, èn dati yepi dusundusun sma fu teki a bun nyunsu (Tori 2:14, 37-41). Baka dati a yepi den Samariasma nanga sma di no ben de Dyu fu tron bakaman fu Krestes (Tori 8:14-17; 10:44-48). A de krin taki Yehovah gebroiki Petrus na wan tumusi moi fasi fu tyari ala sortu sma kon na in a gemeente.

12. Fa na eksempre fu Petrus kan yepi wi te wi e feti nanga wan swakifasi fu wan langa ten kaba?

¹² Yehovah kan yepi wi fu horidoro. A no makelek ala ten, spesrutu te wi e feti nanga wan swakifasi fu wan langa ten kaba. Son leisi a kan gersi leki den swakifasi fu wi bigi moro di fu Petrus. Ma Yehovah kan gi wi a krakti fu no gi abra (Ps. 94:17-19). Fu eksempre, wan brada ben e libi wan homolibi wan tu yari langa fosi a kon sabi waarheid. A tapu krinkrin nanga libi dati èn a bigin tyari ensrefi soleki fa Bijbel e leri. Ma tog son leisi a muilek gi en te fowtu denki e opo kon. San yepi en fu horidoro? A e fruteri: „Yehovah e gi wi krakti.” A e taki moro fara: „Nanga yepi fu a santa yeye fu Yehovah . . . , mi leri taki mi man tan go doro na tapu a pasi fu a tru bribi . . . Yehovah ben man gebroiki mi na ini en diniwroko, èn aladi mi abi swakifasi a e tan gi mi krakti.”

13. Fa wi kan teki na eksempre fu Petrus, soleki fa a skrifi na ini Tori fu den apostel 4:13, 29, 31? (Luku a prenki.)

 ¹³ Soleki fa wi si, Petrus ben meki wan tu bigi fowtu fu di a ben frede libisma. Ma di Petrus begi fu kisi deki-ati, a ben man horidoro sondro fu frede. (Leisi Tori fu den apostel 4:13, 29, 31.) Wi kan sorgu tu taki wi no frede moro. Luku san ben pasa nanga Horst, wan yongu brada di ben tan na Doisrikondre na ini a pisi ten fu a di fu tu Grontapufeti. Aladi a ben sabi taki a no bun, tog son leisi a ben taki den wortu „Hitler o frulusu wi!”, fu di a ben frede den skoromeester nanga skoropikin. Ma en papa nanga mama no ben piri-ai gi en. Na presi fu dati, den begi nanga en fu aksi Yehovah fu gi en deki-ati. Nanga yepi fu en papa nanga mama èn a frutrow na ini Yehovah, Horst kisi a krakti te fu kaba fu tanapu kánkan. Dati meki a ben kan taki bakaten: „Yehovah no gwe libi mi noiti.” c

14. Fa lobi-ati skapuman kan trowstu den wan di lasi-ati?

¹⁴ Yehovah nanga Yesus no o gwe libi wi. Baka di Petrus taki dati a no sabi Yesus, a ben musu teki wan bigi bosroiti. A ben o tapu fu de wan disipel fu Krestes noso a ben o tan waka na en baka? Yesus ben begi Yehovah fu yepi Petrus no lasi bribi. Yesus ben fruteri Petrus fu a begi dati èn a taigi Petrus taki a ben sabi seiker taki bakaten Petrus ben o man tranga a bribi fu den brada nanga sisa fu en (Luk. 22:31, 32). A no de fu taki dati den wortu fu Yesus tranga a bribi fu en! Te wi musu teki wan prenspari bosroiti na ini wi libi, Yehovah kan gebroiki lobi-ati skapuman  fu taki den yoisti wortu di wi abi fanowdu fu man tan getrow (Ef. 4:8, 11). Paul, wan brada di de wan owruman wan langa pisi ten kaba, e pruberi fu gi a trowstu dati. Te a e taki nanga den wan di e firi leki den wani gi abra, a e aksi den fu prakseri fa Yehovah hari den kon na ini waarheid. Dan a e fruteri den taki a lobi bun-ati fu Yehovah o meki taki a no o lusu den. Te fu kaba a e taki: „Mi si fa Yehovah yepi furu sma di ben lasi-ati, fu horidoro.”

15. Fa den eksempre fu Petrus nanga di fu Horst e sori taki Mateyus 6:33 tru?

¹⁵ Soleki fa Yehovah sorgu taki Petrus nanga den tra apostel ben kisi san den ben abi fanowdu, na so Yehovah o gi wi san wi abi fanowdu te wi e poti a preikiwroko na a fosi presi (Mat. 6:33). Baka a di fu tu Grontapufeti, Horst di wi ben kari na fesi, ben prakseri fu go pionier. Ma a ben pôti srefisrefi èn a ben tweifri efu a ben o man meki nofo moni fu tan na ini a furuten diniwroko. San a ben o du? A bosroiti fu luku efu Yehovah ben o sorgu en trutru. Sobun a go preiki a heri wiki di a kring-owruman ben de na ini a gemeente. Na a kaba fu a wiki a skreki di a kring-owruman langa en wan paki nanga moni, ma a no taigi en suma gi en. Nofo moni ben de na ini fu meki a du pionierwroko wan tu mun langa. Horst ben si a kado disi leki wan dyaranti taki Yehovah ben o sorgu en. A ben gebroiki en heri libi fu poti Kownukondre afersi na a fosi presi.​—Mal. 3:10.

16. Fu san ede a bun fu poti prakseri na a eksempre fu Petrus èn na den bijbelbuku di a skrifi?

¹⁶ A no de fu taki dati Petrus ben breiti taki Yesus no gwe libi en leki fa Petrus ben aksi en wan leisi. Krestes tan leri Petrus fa fu de wan getrow apostel nanga wan heri bun eksempre gi Kresten. Èn wi alamala kan teki furu leri fu den les dati. Petrus fruteri wi wan tu fu den leri dati, èn moro fu den de fu feni na ini tu brifi di a skrifi gi gemeente na ini a fosi yarihondro. Na artikel di e kon o taki fu wan tu fu den les di wi kan feni na ini den brifi disi èn fa wi kan fiti den na ini a ten disi.