1. Sortu aksi sma kan poti gi wi na wroko noso skoro?

 FA YU e firi te wan sma na wrokope noso na skoro e aksi yu wan sani fu a bribi fu yu? Yu e senwe? Furu fu wi e senwe. Ma so wan aksi e yepi wi fu si fa a sma e denki noso san a e bribi. Na so wi kan abi na okasi fu fruteri en a bun nyunsu. Ma son leisi sma e poti aksi fu di den wani haritaki nanga wi. Dati no e skreki wi fu di wi sabi taki sma e yere sani fu Kotoigi di no tru (Tori 28:22). Boiti dati wi e libi na ini „den lasti dei” pe furu sma no wani meki „kruderi”nanga trawan èn den abi „ogri-ati” srefi.​—2 Tim. 3:1, 3.

2. Fu san ede a bun fu abi safri-ati?

² Kande yu e aksi yusrefi: ’Fa mi kan hori misrefi èn sori switifasi te wan sma wani haritaki nanga mi fu den sani di mi e bribi?’ Wán sani di o yepi yu na safri-ati. Wan sma di abi safri-ati no e atibron esi, ma a man hori ensrefi te trawan wani haritaki nanga en noso te a no sabi precies san a musu taki (Odo 16:32). Kande yu e denki: ’Ma dati no makelek.’ A tru, ma san kan yepi yu tog fu abi safri-ati? Fa yu kan sori safri-ati te wan sma wani haritaki nanga yu fu den sani di yu e bribi? Efu yu abi pikin, dan fa yu kan yepi yu pikin fu sori safri-ati te den e opo taki gi a bribi fu den? Meki wi go luku.

3. Fu san ede wi kan taki dati wan sma di abi safri-ati tranga, a no swaki? (2 Timoteyus 2:24, 25)

³ Wan sma di abi safri-ati, tranga, a no swaki. Yu musu tranga fu man hori yusrefi te wan trawan e tyar yu na dorai.  Safri-ati na wan fu „den fasi di a yeye e meki sma kisi” (Gal. 5:22, 23). Sma ben e gebroiki a Griki wortu di vertaal nanga „safri-ati” te den ben e taki fu wan wildri asi di sma tém. Pruberi fu si dati na yu fesi. Awinsi wan asi tém, dati no wani taki dati a kon swaki. Sobun fa wi kan kon abi safri-ati, aladi na a srefi ten wi tranga? Wi kan kon abi a fasi disi, ma no nanga wi eigi krakti. Wan prenspari sani di kan yepi wi na begi. Wi musu aksi Gado fu gi wi en santa yeye so taki a kan yepi wi fu kon abi a moi fasi disi. Ondrofenitori e sori taki disi kan. Furu Kotoigi sori safri-ati di sma suku fu haritaki nanga den. Disi meki taki son sma bigin denki bun fu Kotoigi. (Leisi 2 Timoteyus 2:24, 25.) Fa yu kan meki safri-ati tron wan fu den moi fasi fu yu?

4. San na eksempre fu Isak e leri wi?

⁴ Bijbel abi furu tori di e sori o prenspari a de fu abi safri-ati. Luku na eksempre fu Isak. Di a go libi na Gerar na ini a kontren fu den Filisteasma, den birtisma fu en di ben dyarusu na en tapu ben e tapu den watrapeti di den futuboi fu en papa ben diki. Isak no suku fu feti gi en reti, ma a froisi go na wan tra presi èn a diki tra peti (Gen. 26:12-18). Ma den Filisteasma ben feni taki a watra na ini a birti dati ben de fu den tu. Tog Isak no meki trobi nanga den (Gen. 26:19-25). San yepi en fu tan sori safri-ati aladi sma ben de nomonomo fu suku trobi nanga en? Wi kan de seiker taki a teki na eksempre fu en papa nanga mama. En p’pa Abraham ben e lusu trobi sondro fu meki dyugudyugu èn en m’ma Sara ben abi wan „tiri èn safri fasi”.​—1 Petr. 3:4-6; Gen. 21:22-34.

5. Sortu eksempre e leri wi taki Kresten p’pa nanga m’ma kan leri den pikin fu den fu abi safri-ati?

⁵ Kresten papa nanga mama, unu kan de seiker taki unu kan leri un pikin fu kon abi safri-ati. Luku na eksempre fu Maxence di abi 17 yari. A ben kisi fu du nanga faya-ati sma na skoro èn na ini a preikiwroko. Nanga furu pasensi en p’pa nanga m’ma yepi en fu kon abi safri-ati te den ben e wroko nanga en ini a preikiwroko. Den e taki: „Now Maxence kon frustan taki na pas te yu tranga yu o man hori yusrefi te sma e tyar yu na dorai, ma te yu swaki dan makelek yu o piki a sma nanga atibron.” Now Maxence leri fu abi a moi fasi, safri-ati.

6. Fa begi kan yepi wi fu sori safri-ati?

⁶ San wi kan du te wi de ini wan fruferi situwâsi, fu eksempre te sma e taki lei fu a Gado fu wi noso te den e spotu Bijbel? Wi musu aksi Yehovah fu gi wi en santa yeye nanga a koni fu man piki na wan safri fasi. San wi musu du efu wi si taki wi no piki na wan fasi san wi ben wani. Wi kan begi Yehovah fu a tori èn prakseri fa wi kan piki moro bun wan tra leisi. Te wi du dati, dan Yehovah o gi wi en santa yeye so taki wi man hori wisrefi èn sori safri-ati.

7. Te wi e prakseri son Bijbeltekst, dan fa dati kan yepi wi fu hori wisrefi na ini muilek situwâsi? (Odo 15:1, 18)

⁷ Son Bijbeltekst kan yepi wi fu hori wisrefi èn fu no piki nanga atibron te wi de na ini wan muilek situwâsi. Gado yeye kan meki wi memre den tekst dati (Yoh. 14:26). Fu eksempre, na ini a buku Odo wi e feni rai di kan yepi wi fu abi safri-ati. (Leisi Odo 15:1, 18.) A Bijbel buku dati e sori sortu wini wi e kisi te  wi e hori wisrefi na ini muilek situwâsi.​—Odo 10:19; 17:27; 21:23; 25:15.

8. Fu san ede a bun fu denki san na a reide fu san ede wan sma e poti wan aksi di abi fu du nanga den sani di wi e bribi?

⁸ Koni fu man si sani krin kan yepi wi tu (Odo 19:11). Wan sma di abi a koni fu man si sani krin, man hori ensrefi te sma e poti muilek aksi di abi fu nanga a bribi fu en. Den prakseri na ini na ati fu wan sma de leki dipi watra. Wan sma kan poti wan aksi, ma a no ala ten wi sabi a reide fu san ede a sma aksi a sani. Sobun, fosi wi gi wan piki wi musu hori na prakseri taki wi no sabi fu san ede a sma kon nanga na aksi.​—Odo 16:23.

9. Fa Gideon sori taki a ben abi a koni fu man si sani krin èn taki a ben abi safri-ati di a piki den man fu Efrayim?

⁹ Luku fa Gideon piki den man fu Efrayim. Den man ati ben bron fu di den ben feni taki Gideon no kari den di a go feti nanga den feanti fu Israel. Fu san ede den ben atibron so? Awinsi san ben de a reide, Gideon ben frustan fa den ben e firi èn a piki den na wan safri fasi. Fa sani waka? We „na atibron fu den man fu Efrayim kon kowru”.​—Krut. 8:1-3.

10. San o yepi wi fu sabi fa fu piki sma di e aksi wi sani di abi fu du nanga a bribi fu wi? (1 Petrus 3:15)

 ¹⁰ Kande wan sma na wrokope noso na skoro wani sabi fu san ede wi no e du son sani. Wi o du muiti fu opo taki gi a bribi fu wi èn wi o sori en san Bijbel e taki fu a tori, ma wi o lespeki a fasi fa a e denki. (Leisi 1 Petrus 3:15.) Wan sani san kan yepi wi na te wi e si na aksi fu a sma leki wan okasi fu kon sabi fa a e denki na presi fu si en leki wan aanval tapu wi bribi. A no abi trobi fu san ede wan sma poti wan aksi, ala ten wi musu piki na wan switifasi. A piki fu wi kan meki a sma go denki baka fu a tori. Awinsi a taki grofu nanga wi, wi musu piki na wan switifasi ala ten.​—Rom. 12:17.

11-12. (a) San wi musu hori na prakseri fosi wi piki wan muilek aksi? (Luku a prenki.) (b) Gi wan eksempre di e sori fa wan aksi di wan sma poti kan meki wan takimakandra bigin.

¹¹ Kande wan sma na wrokope aksi yu fu san ede wi no e hori friyari-oso. A kan taki a poti na aksi fu di a e prakseri taki wi no mag hori fesa. Noso a kan taki a e prakseri taki wi o tyari pratifasi kon na ini a bedrijf fu di wi no e hori den fesa dati. Disi na wan moi okasi gi wi fu prèise a sma taki a e broko en ede nanga den wrokoman èn fu sori en taki wisrefi wani wroko switi nanga trawan. Na so yu kan kisi na okasi fu fruteri en san Bijbel e taki fu friyari-oso.

¹² Wi kan du wan srefi sortu sani te sma e poti tra muilek aksi gi wi. Fu eksempre, wan pikin na skoro kan feni taki Yehovah Kotoigi musu kenki a fasi fa den e si homo. A kan taki na fu di a no e frustan fa Yehovah Kotoigi e si homolibi meki a taki a sani dati? Noso fu di a abi wan mati noso famiri di de homo? Na denki a e denki taki wi e teige homo? Kande wi o abi fu sori en taki wi lobi ala sma èn taki wi e lespeki a reti di sma abi fu teki den eigi bosroiti (1 Petr. 2:17). b Kande wi kan kisi na okasi fu fruteri en san Bijbel e leri èn sori en taki wi o de koloku te wi e du san Bijbel e taki.

13. Fa yu kan yepi wan sma di no e bribi ini Gado?

¹³ Te wi miti nanga wan sma di no e agri kwetikweti nanga wi, dan wi no musu de gaw fu denki taki wi sabi san a sma e bribi (Tit. 3:2). Kow taki dati wan pikin na skoro feni taki na don sma e bribi na ini Gado. Yu musu denki taki a e bribi tranga na ini evolutie èn taki a sabi furu fu a tori dati? A kan taki na san a yere sma e taki a e taki baka. Na presi fu bigin wan heri takimakandra abra evolutie, yu kan taigi en wan sani di kan meki taki a go denki. Yu kan sori en a pisi tapu jw.org di e taki fu sani di Gado meki. Kande bakaten a o wani taki fu wan artikel noso video di a feni drape. Iya, te wi e sori lespeki gi trawan na a fasi disi, dan kande den o wani sabi moro fu Bijbel.

14. Fa Niall gebroiki a website fu wi fu sori wan skoromati fu en taki den sani di son sma e taki fu Yehovah Kotoigi, no tru?

¹⁴ Wan yongu boi di nen Niall gebroiki a website fu wi fu sori taki son sani di sma e taki fu Yehovah Kotoigi, no tru. A e taki: „Wan pikin fu mi klas ben gwenti taigi mi taki mi no e bribi na ini den sani di sabiman e taki fu di mi e leisi Bijbel wan buku di lai anansitori.” A pikin disi no ben gi Niall na okasi fu fruteri en  san a e bribi, dati meki Niall meki a go na a website fu wi na a pisi „Bijbel èn san sabiman e taki”. Bakaten Niall ben man si taki a studenti ben leisi den artikel èn a ben man taki nanga en fu a tori disi. Yu kan ondrofeni wan srefi sortu sani.

15. Fa papa nanga mama kan yepi den pikin fu den fu piki na wan safri fasi te pikin na skoro e poti muilek aksi gi den?

¹⁵ Papa nanga mama kan leri den pikin fu den fa fu piki na wan safri fasi te sma e poti muilek aksi gi den (Yak. 3:13). Son papa nanga mama e oefen nanga den pikin fu den te den abi Osofamiri Anbegi. Den e luku sortu aksi sma kan poti na skoro, dan den e oefen fa den kan piki den aksi disi na wan safri fasi. Na so den e leri den pikin fu taki na wan switifasi te sma e poti aksi gi den.​—Luku a faki „“ Yu kan yepi yu pikin te yu e oefen nanga den.”

16-17. Fa yonguwan kan kisi yepi te den p’pa nanga m’ma e oefen nanga den?

¹⁶ Te osofamiri e oefen nanga makandra, dan dati e yepi yongu Kresten fu de moro seiker fu den sani di den e bribi èn fu fruteri trawan den sani dati. A pisi di nen „Yongusma e aksi” tapu jw.org abi artikel nanga video di kan tranga a bribi fu yongusma èn di e yepi den fu sreka densrefi so taki den kan taki fri fu a bribi fu den. Te osofamiri e studeri a pisi disi nanga makandra, dan den alamala e leri fu opo taki gi a bribi fu den na wan safri fasi èn wan switifasi.

¹⁷ Wan yongu boi di nen Matthew e fruteri sortu wini a kisi fu di den ben oefen leki osofamiri. Te Matthew nanga en p’pa nanga m’ma e hori Osofamiri  Anbegi, dan den lobi ondrosuku sani di sma na skoro gwenti taki. Matthew e taki: „Wi e prakseri sortu aksi pikin na skoro ben kan poti, dan wi e oefen fa wi kan piki den aksi dati nanga yepi fu den sani di wi ondrosuku. Te mi e frustan bun fu san ede mi e bribi wan sani, dan mi e firi switi. Mi no e senwe èn a e moro makelek gi mi fu taki nanga trawan na wan switifasi te den poti aksi gi mi.”

18. San de prenspari soleki fa Kolosesma 4:6 e sori?

¹⁸ Ma awinsi wi man fruteri trawan krin san wi e bribi, tog a no ala ten den o agri nanga wi. Ma te wi e taki na wan switifasi èn na wan safri fasi, dan dati kan yepi den. (Leisi Kolosesma 4:6.) Te wi e fruteri trawan san wi e bribi, dan a de neleki wi e fringi wan bal gi den. Wi kan fringi a bal rustig, ma wi kan bonk en bun tranga tu. Te wi e fringi a bal rustig, dan a sma o man fanga en èn a o wani plèi go doro. Na so a de tu taki te wi e taki na wan switifasi sondro fu mandi tapu sma, dan den o arki wi èn wi o man go doro nanga a takimakandra. A no de fu taki dati efu wan sma wani haritaki nanga wi noso spotu a bribi fu wi, dan wi no de fruplekti fu taki go doro (Odo 26:4). Ma a no ala sma de so, furu fu den o arki wi.

19. San meki taki wi e opo taki gi a bribi fu wi na wan safri fasi?

¹⁹ A de krin taki wi e kisi furu wini te wi e leri fu abi safri-ati. Begi Yehovah fu a gi yu a krakti fu tan sori safri-ati te sma e poti muilek aksi gi yu noso te den e krutu yu somaar. No frigiti taki safri-ati o meki taki yu no haritaki nanga sma te den no e agri nanga yu. Boiti dati te yu e sori lespeki gi sma èn yu e piki den na wan safri fasi, dan den kan kenki a fasi fa den e denki fu wi èn fu den san di Bijbel e leri. Sobun, „de srekasreka fu opo taki” gi a bribi fu yu, „ma du dati na wan safri fasi èn nanga bigi lespeki” (1 Petr. 3:15). Iya, sori taki yu tranga fu di yu abi safri-ati!