1-2. San e meki taki den futuboi fu Gado de koloku? (Yakobus 1:22-25)

 YEHOVAH nanga en lobi Manpkin wani taki wi de koloku. A skrifiman fu Psalm 119:2 e taki: „Koloku fu den sma di e du san a taki èn di e suku en nanga den heri ati.” Yesus ben taki tu: „Koloku fu den sma di e yere a wortu fu Gado èn di e du san a wortu e taki!”​—Luk. 11:28.

² Den futuboi fu Yehovah de koloku. Fu san ede? Furu reide de, ma wán prenspari reide, na taki wi gwenti leisi Gado Wortu èn wi e meki muiti fu fiti san wi e leri.​—Leisi Yakobus 1:22-25.

3. Fa wi e kisi wini te wi e fiti den sani di wi e leisi na ini Gado wortu?

³ Furu fasi de fa wi e kisi wini te wi e „tron sma di e du san a wortu fu Gado e taki”. Te wi e fiti san wi leri fu Gado wortu, wi e meki Yehovah ati prisiri èn dati e meki wi de koloku (Preik. 12:13). Boiti dati, te wi e fiti den rai na ini Gado wortu, dan wi o man feni en moro bun nanga den sma na ini wi osofamiri èn wi o tron moro bun mati nanga den sma na ini a gemeente. A no de fu taki dati yu ondrofeni dati. Wan tra wini, na taki wi no o abi den problema di e miti den sma di no e gi yesi na den komando fu Yehovah. A de neleki fa Kownu David ben taki. Baka di David ben taki fu den wet, den komando, nanga den krutubosroiti fu Yehovah na ini wan singi, dan a taki: „Te [yu futuboi] e hori ensrefi na den, dan a e kisi furu blesi.”​—Ps. 19:7-11.

4. Fu san ede a no makelek ala ten fu fiti san wi e leisi na ini Bijbel?

 ⁴ A no makelek ala ten fu leisi Gado Wortu èn fu fiti sani wi e leri. Aladi wi abi furu fu du te dei opo, tòg wi musu meki ten fu leisi èn fu studeri Bijbel so taki wi kan ferstan san Gado e aksi fu wi. Dati meki wi o luku wan tu sani di kan yepi wi fu leisi Bijbel ibri dei. Wi o luku tu san o yepi wi fu denki dipi fu san wi e leisi èn fu kon sabi fa wi kan fiti den sani di wi e leri na ini wi libi.

POTI TEN NA WAN SEI FU LEISI GADO WORTU

5. Sortu frantwortu e teki furu fu wi ten?

⁵ Furu anbegiman fu Yehovah abi furu fu du te dei opo. Wi e gebroiki furu fu wi ten fu du prenspari sani. Fu eksempre, furu fu wi abi wan grontapuwroko fu man sorgu wisrefi èn wi osofamiri (1 Tim. 5:8). Furu Kresten brada nanga sisa e sorgu gi sikisma noso gi owrusma. Wi alamala musu sorgu taki wi srefi e tan gosontu, èn a sani dati e teki ten. Boiti den frantwortu disi, wi abi prenspari sani fu du na ini a gemeente. Wan prenspari frantwortu di wi abi, na fu du ala san wi man fu preiki a bun nyunsu. Te yu e luku ala den frantwortu di yu abi, dan fa yu kan feni ten fu leisi Bijbel, fu denki dipi fu san yu e leisi, èn fu fiti san yu e leri?

6. Fa yu kan sorgu taki yu e leisi Bijbel? (Luku a prenki.)

⁶ Wan fu den „den moro prenspari sani” di wi leki Kresten musu du, na fu leisi Bijbel. Dati meki wi musu sorgu taki wi e du dati tu (Fil. 1:10). Luku san a fosi psalm na ini Bijbel e taki fu a man di de koloku: „A lobi a wet fu Yehovah. Dei nanga neti a e leisi a wet fu Gado nanga wan safri sten” (Ps. 1:1, 2). Disi e sori krin taki wi musu poti ten na wan sei fu leisi Bijbel. San na a moro bun ten fu leisi Bijbel? Kande ibriwan fu wi e leisi na wan tra ten. Ma san prenspari, na taki wi e  leisi na wan ten di o meki en makelek gi wi fu leisi Bijbel ibri dei. Wan brada di nen Victor e taki: „Mi lobi leisi Bijbel te m’manten. Aladi mi no lobi opo fruku te m’manten, tòg dati na a moro bun ten gi mi. Mi de na ai èn a moro makelek gi mi fu hori mi prakseri na san mi e leisi.” Na so a de tu gi yu? Aksi yusrefi: ’San na a moro bun ten gi mi fu leisi Bijbel?’

DENKI DIPI FU SAN YU E LEISI

7-8. San kan meki taki wi no e kisi wini dorodoro fu den sani di wi e leisi? Ferklari dati.

⁷ Kande wi e leisi furu ibri dei, sondro taki wi e poti prakseri na san wi e leisi. Oiti yu leisi wan sani èn syatu baka dati yu no ben sabi moro san yu ben leisi? A sani disi psa nanga wi alamala. Ma a sari taki disi kan psa tu nanga wi te wi e leisi Bijbel. Kande wi wani leisi wan tu kapitel fu Bijbel ibri dei. Dati moi. Dati meki a prenspari taki wi e poti marki èn wi musu hori wisrefi na san wi besroiti (1 Kor. 9:26). Ma te wi e leisi Bijbel, dan dati na soso a bigin. Wi musu du moro efu wi wani kisi wini dorodoro fu den sani di wi e leisi na ini Gado Wortu.

⁸ Luku na eksempre disi: Yongu plantje abi watra fanowdu fu man gro. Ma efu na ini wan syatu pisi ten tumsi furu alen e fadon, dan a gron o abi tumsi furu watra. Te moro alen e fadon, dan a gron no o man teki a watra èn dati no bun gi den plantje. Te tumsi furu alen no e fadon, dan a gron o man teki a watra èn den plantje o gro moro bun. Na so a de tu taki wi no musu leisi Bijbel so esi taki wi no abi ten fu denki dipi fu san wi e leisi. Wi no o man memre san wi leisi, èn wi no o man fiti den sani dati tu.​—Yak. 1:24.

9. San wi musu du efu wi e si taki wi e leisi Bijbel tumsi esi?

⁹ Yu feni taki yu e leisi Bijbel tumsi esi son leisi? San yu musu du? Teki yu ten, so taki yu kan denki dipi fu den sani di yu e leisi. Noso te yu kba leisi, dan meki ten fu denki dipi fu den sani dati. Fa yu kan du dati? Yu kan besroiti fu studeri  moro langa so taki yu kan denki dipi fu den sani di yu leisi. Ma yu kan besroiti tu fu no leisi so furu vers èn fu gebroiki a ten di tan abra fu denki dipi fu den sani di yu leisi. Victor di wi ben kari kba, e taki: „Te mi e leisi Bijbel, dan mi no e leisi furu kapitel, kande wán kapitel nomo. Fu di mi e leisi te m’manten, meki mi man denki dipi heri dei fu den sani di mi leisi.” Awansi fa yu e leisi Bijbel, a prenspari fu teki yu ten so taki yu man denki dipi fu den sani di yu leisi.​—Ps. 119:97; luku a faki „ Prakseri den aksi disi”.

10. Gi wan eksempre fa yu kan fu fiti san yu leri. (1 Tesalonikasma 5:17, 18)

¹⁰ Te yu leisi wan tu vers, dan prakseri fa yu kan fiti den sani di yu leri. Te yu e leisi wan pisi fu Gado Wortu, dan aksi yusrefi: ’Fa mi kan gebroiki den sani disi tide noso na ini a ten di e kon?’ Fu eksempre, kow taki dati yu ben leisi 1 Tesalonikasma 5:17, 18. (Leisi en.) Baka di yu leisi den tu vers disi, dan yu kan stop fu prakseri o furu yu e begi èn efu yu e taigi Gado ala san de na tapu yu ati. Yu kan prakseri tu gi sortu sani yu de nanga tangi. Kande yu e besroiti fu taigi Yehovah tangi gi dri spesrutu sani. Awinsi yu e teki wan tu miniti nomo fu poti ala yu prakseri na san Bijbel e leri, tòg dati o yepi yu fu ferstan Gado Wortu èn fu du san a e taki. Èn efu ibri dei yu e fiti san yu leisi na ini Bijbel, dan yu o tron wan moro bun futuboi fu Gado te fu kba. Ma san yu musu du te a gersi leki yu musu wroko na furu sani?

POTI MARKI DI YU MAN DORO

11. Fu san ede yu kan las’ati son leisi? Gi wan eksempre.

¹¹ Te yu e leisi Bijbel, dan kande yu e las’ati son leisi fu di yu e si taki yu musu wroko na so furu sani. Kow taki dati wan dei yu e leisi wan pisi na ini Bijbel di e taki dati wi no musu lobi a wan sma moro a trawan (Yak. 2:1-8). Yu e si taki yu kan wroko na a sani dati, èn dati meki yu e besroiti fu tyari wan tu kenki kon. Dati bun. Ma a tamara fu en, yu e leisi wan pisi di e sori taki a prenspari fu luku bun san yu e taki (Yak. 3:1-12). Yu e si taki son leisi yu e taki sani di e meki sma firi brokosaka. Sobun, yu e besroiti fu du moro muiti fu taki sani di e gi sma dek’ati. A dei baka dati, yu e leisi na ini Bijbel taki yu musu luku bun fu no tron wan mati fu grontapu (Yak. 4:4-12). Yu e si tu taki yu musu luku moro bun san yu e leisi, san yu e luku, noso san yu e arki. Ma a kan taki a dei baka dati, yu feni taki a muilek tumsi fu tyari ala den kenki disi kon.

12. Fu san ede wi no musu las’ati te wi e si taki wi musu tyari kenki kon? (Luku a futuwortu.)

 ¹² Efu yu musu tyari wan tu kenki kon, noso efu yu musu du son sani moro bun, dan no las’ati. Disi e sori taki yu abi sakafasi èn taki yu e leisi Bijbel nanga a yoisti denki. Wan sma di abi sakafasi èn di de eerlijk nanga ensrefi e leisi Bijbel fu di a wani kon sabi sortu kenki a musu tyari kon. a No fergiti tu taki wi musu tan du muiti „fu kisi nyun fasi” (Kol. 3:10). San o yepi yu fu tan du san Gado Wortu e taki?

13. Fa yu kan poti marki di yu man doro? (Luku a prenki.)

¹³ Na presi taki yu e pruberi fu fiti ala sani di yu leisi wantewante, a moro bun fu poti wan tu marki di yu man doro (Odo 11:2). Kande yu kan pruberi fu du disi: Meki wan lijst fu den kenki di yu musu tyari kon, èn baka dati pruberi fu wroko na wán noso tu fu den sani dati fosi. Baka dati yu kan wroko na den tra sani. Pe yu kan bigin?

14. Na sortu sani yu kan bigin wroko?

¹⁴ Kande yu e besroiti fu bigin wroko na wan sani di o makelek gi yu fu kenki. Noso kande yu e besroiti fu bigin wroko na wan sani di yu feni taki a prenspari moro den tra sani. Te yu sabi na san yu wani wroko, dan ondrosuku sani moro fini na ini den buku fu wi. Kande yu kan gebroiki na Index van Wachttoren-publicaties noso a buku Ondrosuku Bijbel moro fini​—Gi Yehovah Kotoigi. Begi Yehovah fu yepi yu fu doro a marki di yu poti èn aksi en fu gi yu „a firi nanga a krakti fu du sani di e plisi en” (Fil. 2:13). Baka  dati, pruberi fu du san yu leri. Te yu e si taki yu e doro a marki di yu ben poti fosi, dan yu o abi moro dek’ati fu wroko na wan trawan. Fu taki en leti, te yu e si taki yu ben man tyari kenki kon noso taki yu ben man sori wan Kresten fasi moro bun, dan kande yu o feni en moro makelek fu tyari tra kenki kon.

MEKI GADO WORTU „ABI FURU KRAKTI” NA YU TAPU

15. Fa a pipel fu Yehovah e difrenti fu furu tra sma di e leisi Bijbel? (1 Tesalonikasma 2:13)

¹⁵ Son sma e taki dati den leisi Bijbel omeni leisi. Ma a de so taki den e bribi san skrifi na ini Bijbel? Den fiti den sani dati, noso den meki den sani dati abi krakti tapu den libi? A sari taki nofo tron den no du dati. Ma a pipel fu Yehovah de heri tra fasi. Neleki den Kresten fu a fosi yarihondro, wi e si Bijbel „leki a wortu fu Gado èn na dati a de trutru”. Boiti dati, wi e du ala san wi man fu fiti den rai fu Bijbel na ini wi libi.​—Leisi 1 Tesalonikasma 2:13.

16. San kan yepi wi fu tron sma di e du san Gado Wortu e taki?

¹⁶ A no makelek ala ten fu leisi Gado Wortu èn fu fiti san wi e leri. Kande wi no man feni ten fu leisi Gado Wortu, noso kande wi e leisi es’esi sondro fu denki dipi fu san wi e leisi. A kan tu taki wi e las’ati te wi e si omeni kenki wi musu tyari kon. Awansi san yu feni muilek, tòg dati no wani taki dati yu no man du en. Yehovah kan yepi yu fu du san de fanowdu. Meki wi du ala san wi man fu teki a yepi fu en èn fu no tron sma di e fergiti san wi e leri fu Bijbel. Na presi fu dati, wi musu tron sma di e du san Gado Wortu e taki. A no de fu taki dati o moro wi e leisi Gado Wortu èn e fiti en na ini wi libi, o moro wi o de koloku.​—Yak. 1:25.