1. San Yesus o du heri esi?

 WI E libi na ini wan ten pe bigi kenki o psa. Heri esi Yesus o krutu ala sma di e libi na grontapu. Yesus e meki wi kon sabi san o psa na grontapu fosi a krutu libisma. A gi den disipel fu en wan „marki” di ben o sori taki a kon èn taki „a kaba fu a grontapu disi de krosibei” (Mat. 24:3). A profeititori disi skrifi na ini Mateyus kapitel 24 nanga 25 èn na ini Markus kapitel 13 nanga Lukas kapitel 21.

2. San wi o luku na ini na artikel disi èn fa disi o yepi wi?

² Yesus gebroiki dri agersitori fu yepi wi fu de srekasreka. Den agersitori disi de leki warskow gi wi. Wi o poti prakseri na a agersitori fu den skapu nanga den bokoboko, na a di fu den koni nyunwenke nanga den don nyunwenke, èn na a di fu den talenti. Ibriwan fu den agersitori disi e yepi wi fu ferstan taki na den sani di wan sma e du o bepaal fa Yesus o krutu a sma. Te wi o poti prakseri na den agersitori disi, dan wi o luku san wi kan leri fu den. A fosi agersitori di wi o luku, na a di fu den skapu nanga den bokoboko.

DEN SKAPU NANGA DEN BOKOBOKO

3. O ten Yesus o krutu libisma?

³ Na ini na agersitori fu den skapu nanga den bokoboko, Yesus ben sori fa a o krutu den sma di yere a bun nyunsu èn di e kisi na okasi fu horbaka gi den salfu brada fu en (Mat. 25:31-46). Na a ten fu a „bigi banawtu”, a o krutu libisma syatu fosi Armagedon bigin (Mat. 24:21). Neleki fa wan skapuman e poti den skapu aparti fu den bokoboko, na so Yesus o poti den sma di e horbaka gi den  salfu bakaman fu en aparti fu den sma di no e du dati.

4. Soleki fa Yesaya 11:3, 4 e sori, dan fu san ede wi kan de seiker taki Yesus o krutu libisma na wan reti fasi? (Luku na tapu a kafti.)

⁴ Bijbel profeititori e sori taki te Yesus o koti krutu gi Yehovah, a o krutu libisma na wan reti fasi ala ten. (Leisi Yesaya 11:3, 4.) A o luku bun san sma e du, fa den e denki, èn san den e taki. Disi wan taki dati a o luku tu fa sma e libi nanga den salfu brada fu en (Mat. 12:36, 37; 25:40). Yesus o sabi suma ben horbaka gi den salfu brada fu en èn gi a wroko di den e du. a Wan prenspari fasi fa wan sma kan horbaka gi den brada fu Yesus, na te a e yepi fu du a preikiwroko. Yesus o si den sma disi leki „reti-ati sma” èn den o man libi fu têgo na grontapu (Mat. 25:46; Openb. 7:16, 17). Disi na wan kfalek moi blesi di den sma disi o kisi. Efu den tan getrow na Gado na a ten fu a bigi banawtu èn baka dati sosrefi, dan a nen fu den o tan na ini „a buku fu libi”.​—Openb. 20:15.

5. San wi e leri fu na agersitori fu den skapu nanga den bokoboko èn suma kan kisi wini fu na agersitori disi?

⁵ Sori taki yu de getrow. Na agersitori fu den skapu nanga den bokoboko abi fu du moro furu nanga den sma di abi a howpu fu libi fu têgo na grontapu. Den sma disi e sori taki den abi bribi te den e yepi den brada fu Krestes na ini a preikiwroko èn te den e gi yesi na den rai fu a koni srafu di de fu fertrow èn di Yesus poti na wroko (Mat. 24:45). Ma den sma di abi a howpu fu libi na hemel musu poti prakseri tu na a warskow di de fu feni na ini na agersitori disi. Fu san ede? Fu di Yesus e luku san den e du, fa den e denki, èn san den e taki. Den musu sori tu taki den de getrow. Fu taki en leti, Yesus ben ferteri ete tu agersitori di abi warskow spesrutu gi den salfuwan. Den agersitori disi de fu feni tu na ini Mateyus kapitel 25. Meki wi go luku na agersitori fu den koni nyunwenke nanga den don nyunwenke.

DEN KONI NYUNWENKE NANGA DEN DON NYUNWENKE

6. Fa feifi fu den nyunwenke sori taki den koni? (Mateyus 25:6-10)

⁶ Na ini na agersitori fu den nyunwenke, Yesus ben taki fu tin nyunwenke di ben waka go miti wan trowmasra (Mat. 25:1-4). Ala den nyunwenke ben e howpu fu go na a trowfesa makandra nanga a trowmasra. Yesus ben taki dati feifi fu den ben „koni” èn taki den tra feifi ben „don”. Den koni nyunwenke ben de srekasreka èn den ben de na ai. Den ben de srekasreka fu wakti a trowmasra awansi o langa dati ben o teki. A no abi trobi efu a ben o doro latilati na neti. Dati meki den tyari oli-lampu nanga den fu man si na ini a dungru. Den tyari moro oli tu fu di a trowmasra ben kan kon moro lati. Sobun, den ben de srekasreka so taki den lampu fu den ben kan tan bron. (Leisi Mateyus 25:6-10.) Di a trowmasra doro, dan es’esi den koni nyunwenke go na insei na a trow-oso makandra nanga en. Na a srefi fasi salfu Kresten o sori taki den de srekasreka èn taki den de getrow na a ten te Krestes kon. Na a ten dati den o kisi den pai fu di den o mag go makandra nanga a  Trowmasra, Yesus, na ini en Kownukondre na hemel b (Openb. 7:1-3). Ma fa a de nanga den don nyunwenke?

7. San psa nanga den feifi don nyunwenke èn fu san ede?

⁷ Tra fasi leki den koni nyunwenke, den feifi don nyunwenke no ben de srekasreka di a trowmasra doro. A lampu fu den ben de fu dede èn den no ben tyari moro oli kon nanga den. Di den kon sabi taki a trowmasra ben de na pasi e kon, dan den ben musu go bai oli. Den no ben doro ete di a trowmasra doro. Na a ten dati „den nyunwenke di ben sreka densrefi go nanga en na a trow-oso na inisei. Ne a doro tapu” (Mat. 25:10). Bakaten di den don nyunwenke kon baka èn den ben wani go na ini a trow-oso, dan a trowmasra taigi den: „Mi no sabi unu” (Mat. 25:11, 12). Den nyunwenke dati no ben de srekasreka fu wakti a trowmasra awansi o langa den ben musu du dati. San den salfuwan e leri fu a tori disi?

8-9. San den salfuwan kan leri fu na agersitori fu den nyunwenke? (Luku a prenki.)

⁸ Sori taki yu de srekasreka èn taki yu de na ai. Yesus no ben taki dati tu difrenti grupu fu salfuwan ben o de, fu eksempre taki wan grupu ben de srekasreka fu wakti te na a kba fu a grontapu disi, ma taki dati no ben de so nanga a tra grupu. Na presi fu dati, a ben e sori san ben o psa nanga salfuwan te den no ben de srekasreka fu hordoro teleki Krestes kon. Efu den no ben de srekasreka, dan den no ben o kisi den pai (Yoh. 14:3, 4). Dati na wan seryusu tori. Awinsi wi abi a howpu fu libi na hemel noso na grontapu, wi alamala musu poti prakseri na den warskow na ini na agersitori fu den nyunwenke. Ibriwan fu wi musu tan na ai èn wi musu de srekasreka so taki wi kan hordoro te na a kba.​—Mat. 24:13.

⁹ Baka di Yesus ferteri na agersitori fu  den nyunwenke fu sori o prenspari a de fu de srekasreka èn fu de na ai, dan a ferteri na agersitori fu den talenti. Na agersitori dati e sori taki wi musu de fayafaya.

DEN TALENTI

10. Fa tu srafu ben sori taki den de getrow? (Mateyus 25:19-23)

¹⁰ Na ini na agersitori fu den talenti, Yesus ben taki fu tu srafu di ben de getrow na a masra fu den èn fu wán srafu di no ben de getrow (Mateyus 25:14-18). Den tu srafu ben sori taki den ben de getrow fu di den ben wroko tranga fu meki moro moni gi a masra fu den. Fosi a ben go na wan tra kondre, a gi den talenti noso bun furu moni. Den tu getrow srafu ben wroko tranga èn den gebroiki a moni na wan koni fasi. San ben de a bakapisi? Di a masra fu den drai kon baka, dan den ben meki tu tron so furu moni leki san a ben gi den. A masra prèise den èn a taki: „Prisiri nanga yu masra”. (Leisi Mateyus 25:19-23). Ma fa a de nanga a di fu dri srafu? San a du nanga a moni di en masra ben gi en?

11. San psa nanga a „lesi” srafu, èn fu san ede?

¹¹ A di fu dri srafu kisi wán talenti ma a ben „lesi”. A masra fu en ben ferwakti taki a ben o gebroiki a talenti dati na wan koni fasi. Na presi fu dati a beri a talenti na ondro gron. Di a masra drai kon baka, dan a srafu fu en gi en a wán talenti dati baka. A srafu no ben abi a yoisti denki fu sani. Na presi taki a aksi pardon taki a no ben man meki moro moni gi en masra, a krutu a masra taki a ben de „wan muilek man”, aladi dati no ben tru. A masra no ben feni a srafu disi bun. Boiti dati, a masra teki a talenti puru na a srafu disi anu èn a yagi en kmoto na ini en oso.​—Mat. 25:24, 26-30.

12. Suma den tu getrow srafu e prenki na ini a ten disi?

¹² Den tu getrow srafu e prenki den getrow salfu Kresten. A masra, Yesus, e kari den fu kon ’prisiri nanga a masra fu  den’. Den o kisi a grani fu go na hemel èn dati wani taki dati den o kisi a fosi opobaka (Mat. 25:21, 23; Openb. 20:5b). Ma a lesi srafu di no ben de wan bun eksempre de leki wan warskow gi den salfuwan. Fa so?

13-14. San den salfuwan e leri fu na agersitori fu den talenti? (Luku a prenki.)

¹³ Sori taki yu de fayafaya. Na ini na agersitori fu den talenti èn na ini na agersitori fu den nyunwenke, Yesus no ben e sori taki den salfuwan ben o kon lesi. Na presi fu dati a ben e sori wi san ben o psa efu den no ben de fayafaya moro. Den ben o lasi a grani fu de „wan fu den sma di Gado kari èn di a teki” èn den no ben o mag go na ini a Kownukondre na hemel.​—2 Petr. 1:10.

¹⁴ Na agersitori fu den nyunwenke èn a di fu den talenti, e sori krin taki ala salfu Kresten musu de srekasreka, den musu de na ai, èn den musu de fayafaya. Ma Yesus ben taki ete wan sani fu warskow den salfuwan? Iya, a du dati. Wi kan feni a warskow dati na Mateyus 24:40, 41.

SUMA GADO O ’TEKI TYARI GOWE’?

15-16. Fa Mateyus 24:40, 41 e yepi den salfuwan fu si taki den musu tan na ai?

¹⁵ Fosi Yesus ferteri den dri agersitori, a ben taki dati Gado ben o krutu den salfuwan so taki a ben kan kon na krin suma a ben feni bun fu tiri na ini a Kownukondre na hemel. Yesus ben taki fu tu man di ben e wroko na ini wan gron èn fu tu uma di ben e wroko nanga wan anumiri. Soleki fa a sori, dan den tu man ben du a srefi wroko èn na so a ben de tu nanga den tu uma. Ma Yesus taki dati Gado „o teki a wan tyari gowe, ma a o libi a trawan na baka.” (Leisi Mateyus 24:40, 41.) Baka dati a taigi den bakaman fu en: „Tan na ai, bika unu no sabi sortu dei un Masra o kon” (Mat. 24:42). Yesus ben taki wan srefi sortu sani di a kba ferteri na agersitori fu den nyunwenke (Mat. 25:13). Den sani di Yesus taki ben abi fu du nanga makandra? A sori so. Yesus o teki soso den Kresten di de trutru salfuwan èn di de getrow, ’tyari gwe’ fu tiri makandra nanga en na ini a Kownukondre.​—Yoh. 14:3.

¹⁶ Sori taki yu de na ai. Wan salfuwan di no de na ai no o kisi a grani fu de wan fu den sma „di Gado kari” (Mat. 24:31). Èn ala den sma di abi a howpu fu libi fu têgo na grontapu musu si den wortu fu Yesus tu leki wan warskow fu tan na ai èn fu tan getrow.

17. Fu san ede a no musu ferwondru wi te Yehovah besroiti fu salfu sma na ini a ten disi?

¹⁷ Fu di wi kon sabi Yehovah bun, meki wi abi a fertrow taki ala ten a e du san reti. Sobun a no e ferwondru wi te Yehovah e besroiti fu salfu son getrow Kresten na ini a ten disi. c Wi sabi ete san Yesus ben taki na ini na agersitori fu den wrokoman di ben kon wroko feifi yuru bakadina na ini a droifidyari (Mat. 20:1-16). Den sma di ben kisi a kari fu kon wroko na ini a droifidyari moro lati na ini a dei, kisi a srefi pai leki den wan di ben bigin wroko moro fruku. Na so a de tu taki awinsi o ten wan salfuwan kisi a kari, tòg den o kisi a grani fu go na hemel efu den e tan getrow.

GI YESI NA DEN WARSKOW

18-19. San wi leri fu den agersitori?

¹⁸ San wi leri na ini na artikel disi? Na  agersitori fu den skapu nanga den bokoboko e sori o prenspari a de taki den sma di abi a howpu fu libi fu têgo na grontapu e tan getrow na Yehovah. Den musu du dati now èn na a ten fu a bigi banawtu di o kon heri esi. Syatu fosi Armagedon, Yesus o gi den wan di tan getrow a grani fu kisi „têgo libi”.​—Mat. 25:46.

¹⁹ Wi poti prakseri tu na tu agersitori di de leki wan warskow gi den salfuwan. Na ini na agersitori fu den koni nyunwenke nanga den don nyunwenke, feifi fu den ben koni. Den ben de srekasreka èn den ben de na ai e wakti a trowmasra, awinsi o langa dati ben o teki. Ma den don nyunwenke no ben de srekasreka. Dati meki a trowmasra no gi den okasi fu kon na a trowfesa fu en. Wi musu de srekasreka tu fu wakti awinsi o langa, teleki Yesus tyari wan kba kon na a grontapu disi. Wi poti prakseri tu na a agersitori fu den talenti. Na agersitori disi e taki fu den tu getrow srafu di ben e wroko fayafaya. Den ben e wroko tranga gi a masra fu den èn a masra ben feni den bun. Ma a no ben feni a lesi srafu bun. San disi e leri wi? Wi musu tan wroko fayafaya na ini a diniwroko fu Yehovah teleki a kba kon. Leki lasti, wi luku fa den salfuwan musu tan na ai efu den wani taki Yesus ’teki den tyari gwe’ fu go libi na hemel. Den salfuwan e wakti fayafaya teleki den o „de nanga” Yesus na hemel. Baka a feti fu Armagedon, den o de a trowmisi fu Yesus na a trowfesa fu a Pkin Skapu.​—2 Tes. 2:1; Openb. 19:7, 9.

20. San Yehovah o du gi den wan di e gi yesi na den warskow fu en?

²⁰ Aladi a ten e doro taki Yesus o krutu libisma, tòg wi no abi fu frede. Efu wi e tan getrow, dan wi lob’ati P’pa na hemel o gi wi „a krakti di bigi pasa marki” so taki wi „kan tanapu na fesi a Manpikin fu libisma” (2 Kor. 4:7; Luk. 21:36). Awinsi wi abi a howpu fu libi na hemel noso na grontapu, wi P’pa o breiti nanga wi te wi e gi yesi na den warskow di de feni na ini den agersitori fu Yesus. Èn fu di Yehovah lobi wi so te, meki a o ’skrifi wi nen na ini a buku’ fu libi.​—Dan. 12:1; Openb. 3:5.