1-2. Fu san ede Yehovah meki wi na so wan fasi taki wi e firi koloku te wi e gi sma sani?

 WI DE moro koloku te wi e gi sma sani leki te wi e kisi sani fu sma. Na so Yehovah meki wi (Tori 20:35). Disi wani taki dati wi no e firi bun te wi e kisi sani fu trawan? Nôno. Wi alamala e firi bun te wi e kisi sani fu sma. Ma wi e firi moro bun te wi e gi sma sani. Fu taki en leti, a bun taki Yehovah meki wi na so wan fasi. Fu san ede?

² Fu di Yehovah meki wi na so wan fasi, meki wi srefi kan du sani di e meki wi firi moro koloku. Wi kan de moro koloku te wi e suku okasi fu du bun gi trawan. Yu no breiti taki Yehovah meki wi na so wan fasi?​—Ps. 139:14.

3. Fu san ede wi kan taki dati Yehovah na „a koloku Gado”?

³ Fu di Bijbel e taki dati den wan di lobi gi sma sani de koloku, meki a no e ferwondru wi te Bijbel e taki dati Yehovah na „a koloku Gado” (1 Tim. 1:1). Na Yehovah fosi gi trawan sani èn nowan sma man gi moro leki san Yehovah man gi. Bika na en „meki taki wi de na libi, taki wi e buweigi èn taki wi de”, soleki fa na apostel Paulus skrifi (Tori 17:28). A tru, „ibri bun presenti nanga ibri kado di bun dorodoro” e kon fu Yehovah.​—Yak. 1:17.

4. San o yepi wi fu de moro koloku?

⁴ A no de fu taki dati wi alamala wani gi sma sani so taki wi kan de moro koloku. Dati meki wi wani teki na eksempre fu Yehovah di lobi fu gi sma sani (Ef. 5:1). Na ini a artikel disi, wi o poti prakseri na a eksempre fu en èn wi o luku san wi kan du te wi feni taki trawan no de nanga tangi gi san wi du gi den. Disi o yepi wi fu tan gi sma sani èn fu de koloku.

 LOBI FU GI SMA SANI NELEKI YEHOVAH

5. San na wan tu sani di Yehovah e gi wi?

⁵ San na wan tu sani di Yehovah de klarklari fu gi wi? Luku wan tu eksempre. Yehovah e gi wi san wi abi fanowdu. Kande a no e gi wi ala san wi wani, ma ala ten a e gi wi san wi abi fanowdu. Fu eksempre, a e sorgu taki wi abi n’nyan, krosi, nanga wan presi fu tan (Ps. 4:8; Mat. 6:31-33; 1 Tim. 6:6-8). Ma Yehovah no e gi wi den sani disi fu di a feni taki a de ferplekti fu du dati. Sobun, fu san ede Yehovah e du disi gi wi?

6. San wi e leri fu Mateyus 6:25, 26?

⁶ Yehovah e gi wi san wi abi fanowdu fu di a lobi wi. Luku san Yesus e taki na Mateyus 6:25, 26. (Leisi en.) Yesus gebroiki na eksempre fu pkin fowru èn a taki: „Den no e sai siri, den no e koti nyanyan èn den no e kibri nyanyan na ini maksin.” Ma luku san a e taki baka dati: „Un Tata na hemel e gi den n’nyan.” Ma luku san Yesus e taki now: „Unu no warti moro den?” San a ben wani leri wi? Gi Yehovah, den anbegiman fu en warti omeni tron moro den meti di a meki. Efu Yehovah e sorgu gi den meti, dan wi kan de seiker taki a o sorgu gi wi tu. Neleki fa wan p’pa e broko en ede nanga en pkin, na so Yehovah e sorgu gi en famiri fu di a lobi den.​—Ps. 145:16; Mat. 6:32.

7. San na wán fasi fa wi kan sori taki wi lobi fu gi sma sani neleki Yehovah? (Luku a prenki.)

⁷ Neleki Yehovah, wi kan gi sma sani tu fu di wi lobi den. Fu eksempre, yu sabi wan brada noso wan sisa di abi krosi noso n’nyan fanowdu? Yehovah kan gebroiki yu fu yepi a brada noso a sisa dati. A pipel fu Yehovah no e draidrai fu du bun gi trawan te wan rampu psa. Fu eksempre, na a ten fu a COVID-19 siki di ben panya na heri grontapu, brada nanga sisa prati n’nyan, krosi, nanga tra sani nanga trawan di ben de na nowtu. Furu fu den gi furu moni sosrefi fu horbaka gi a wroko di wi e du na heri grontapu. Den du san skrifi na Hebrewsma 13:16: „Un no musu fergiti fu du bun èn fu prati san unu abi nanga trawan, bika Gado e prisiri nanga den sortu ofrandi dati.”

8. Na sortu fasi Yehovah e gi wi krakti? (Filipisma 2:13)

⁸ Yehovah e gi wi krakti. Yehovah abi  krakti psa marki èn a de klarklari fu gi den getrow futuboi fu en a krakti di den abi fanowdu. (Leisi Filipisma 2:13.) Oiti yu begi Gado fu gi yu krakti fu man kakafutu gi tesi noso fu man hordoro na ini wan muilek situwâsi? Kande yu begi Yehovah tu fu gi yu a krakti fu man du den sani di yu ben musu du na ini a pisi ten dati. Di Yehovah piki a begi fu yu, dan a no de fu taki dati yu ben e firi neleki na apostel Paulus di ben skrifi: „Mi man du ala sani nanga yepi fu a sma di e gi mi krakti.”​—Fil. 4:13.

9. San na wan tu fasi fa wi kan gebroiki a krakti fu wi fu yepi trawan? (Luku a prenki.)

⁹ Aladi wi na sondu sma, tòg wi kan gebroiki a krakti fu wi fu yepi trawan, neleki fa Yehovah e du dati. Wi no abi krakti psa marki neleki Yehovah èn wi no man gi trawan krakti neleki fa en e du dati. Ma neleki Yehovah wi kan gebroiki a krakti fu wi fu yepi trawan. Fu eksempre, kande wi kan du wan tu sani gi wan brada noso wan sisa di owru noso di siki, noso kande wi kan go na wenkri gi den. Efu a kan, dan wi kan yepi fu krin a Kownukondre zaal èn fu hori en bun. Te wi e gebroiki wi krakti fu du den sani disi, dan dati na wan bigi yepi gi wi brada nanga sisa.

10. Fa wi kan gi trawan dek’ati nanga den sani di wi e taki?

¹⁰ No fergiti tu taki wi kan gi trawan dek’ati nanga den sani di wi e taki. Yu sabi wan sma di ben o firi moro bun te yu e taigi en taki yu e warderi san a e du? Yu sabi wan sma di abi trowstu fanowdu? Efu dati de so, dan meki a sma sabi taki yu e broko yu ede nanga en. Yu kan go luku a sma, yu kan bel en, noso kande yu kan seni wan karta, wan e-mail, noso wan app gi en. No broko yu ede tumsi nanga san yu o taki. Te yu e taki wan tu san di e sori taki yu lobi yu brada noso sisa, dan dati kan gi en dek’ati kba fu tan hordoro noso fu no las’ati na ini a situwâsi fu en.​—Odo 12:25; Ef. 4:29.

11. Fa Yehovah e gebroiki a koni fu en?

¹¹ Yehovah e gi sma koni. A disipel Yakobus ben skrifi: „Efu wan fu unu e mankeri koni, dan meki a tan aksi Gado fu dati, bika te Gado e gi sma sani, a e du dati nanga en heri ati èn sondro fu suku fowtu na den” (Yak. 1:5). Den wortu disi e sori taki Yehovah no gridi fu gi sma a koni fu en. A de klarklari fu prati en nanga trawan. Luku tu taki te Yehovah e gi sma koni, dan a e du dati „sondro fu suku fowtu na den”. Noiti a wani taki wi  e syen fu aksi en san na a moro bun sani fu du. Fu taki en leti, a e gi wi dek’ati fu du dati.​—Odo 2:1-6.

12. Sortu okasi wi abi fu prati a koni fu wi nanga trawan?

¹² Fa a de nanga wi? Wi kan prati a koni fu wi nanga trawan neleki fa Yehovah e du dati? (Ps. 32:8) A pipel fu Yehovah abi furu okasi fu ferteri trawan san den leri. Fu eksempre, wi gwenti wroko makandra nanga nyun preikiman fu sori den fa den musu du a preikiwroko. Owruman e teki den ten fu leri dinari ini a diniwroko nanga dopu brada fa fu du den toewijzing di den e kisi na ini a gemeente. Boiti dati, den wan di sabi fa fu du bow-wroko èn fa fu hori den presi fu na organisâsi bun, e yepi fu leri trawan fa fu du den wroko dati.

13. Fa wi kan train trawan neleki fa Yehovah e du dati?

¹³ Pruberi fu teki na eksempre fu Yehovah te yu e train trawan. Memre taki Yehovah de klarklari fu prati a koni fu en. Neleki en wi wani de klarklari fu prati a koni fu wi nanga den wan di e leri ete. Wi no e hori sani na baka gi trawan soso fu di wi e frede taki a sma di wi e train o teki a wroko fu wi abra wan dei. No denki: ’Nowan sma train mi. Meki en srefi go leri.’ Nowan enkri futuboi fu Yehovah musu denki so. Na presi fu dati, te wi e train trawan, dan wi de klarklari fu meki den kon sabi ala san wi sabi (1 Tes. 2:8). Wi e howpu taki den sma disi „srefi o kon koni nofo fu gi tra sma leri” (2 Tim. 2:1, 2). Efu wi alamala de klarklari fu prati a koni fu wi, dan wi nanga trawan o kon moro koni èn wi o de moro koloku.

TE A GERSI LEKI SMA NO E WARDERI SAN WI DU GI DEN

14. San furu sma e du te wi du wan bun gi den?

¹⁴ Te wi lobi du bun gi trawan, spesrutu gi wi brada nanga sisa, dan nofo tron den e taigi wi tangi gi dati. Kande den e seni wan karta gi wi noso kande den e sori na tra fasi taki den e warderi san wi du gi den (Kol. 3:15). Te sma e taigi wi tangi fu di wi du wan sani gi den, dan wi e firi moro koloku srefi.

15. San wi musu hori na prakseri te son sma no e taigi wi tangi gi san wi du gi den?

¹⁵ Ma a tru taki son leisi son sma no e taigi wi tangi gi den sani di wi du gi den. Kande wi gebroiki wi ten, wi krakti, noso wi moni fu yepi wan sma, ma bakaten wi e aksi wisrefi efu a sma disi e warderi a sani di wi du gi en. Efu dati psa, dan fa wi kan sorgu taki wi no e firi wan fasi? Memre den wortu fu Tori fu den apostel 20:35, a thema tekst fu wi. Awinsi wan sma no e sori warderi gi san wi du gi en, tòg a no dati e meki taki wi de koloku. Wi kan tan gi sma sani nanga prisiri awinsi a gersi leki den sma no de nanga tangi. Fa wi kan du dati? Meki wi go luku wan tu sani di wi kan du.

16. San wi musu hori na prakseri te wi e gi sma sani?

¹⁶ Hori na prakseri taki yu wani teki na eksempre fu Yehovah te yu e du bun gi trawan. Yehovah e du bun gi sma awinsi den no e warderi dati (Mat. 5:43-48). Yehovah e pramisi taki te wi e du bun gi trawan „sondro fu howpu taki [wi] o kisi wan sani fu den baka”, dan wi „o kisi wan bigi pai” (Luk. 6:35). Kande wi ben ferwakti taki den ben o taigi wi tangi gi san wi du gi den. Awinsi den no e du dati, tòg Yehovah ala ten o pai wi baka fu di wi du  bun gi trawan èn fu di wi „gi sani nanga prisiri”.​—Odo 19:17; 2 Kor. 9:7.

17. San na wan tra fasi fa wi kan teki na eksempre fu Yehovah te wi e du bun gi trawan? (Lukas 14:12-14)

¹⁷ Wan tra fasi fa wi kan teki na eksempre fu Yehovah, na te wi e du a sani disi di Yesus taki na Lukas 14:12-14. (Leisi en.) Kande yu lobi kari sma fu kon nyan na yu oso noso kande yu lobi yepi sma na tra fasi. A no fowtu efu disi na sma di man du den srefi sortu sani baka gi yu. Ma fa a de te wi e si taki nofo tron wi e gi sma sani soso fu di wi e ferwakti taki den o man du wan sani baka gi wi? A bun te wi e pruberi fu fiti a rai di Yesus ben gi. A moro bun fu du bun gi wan sma di no o man gi wi noti baka. Te wi e du dati dan wi o de koloku fu di wi e teki na eksempre fu Yehovah. Èn efu wi no e ferwakti noti baka fu sma te wi du wan bun gi den, dan wi o de koloku ala ten, awinsi den no e taigi wi tangi gi san wi du gi den.

18. San wi no musu du èn fu san ede?

¹⁸ No denki takru fu trawan (1 Kor. 13:7). Efu tra sma no e taigi wi tangi gi den sani di wi du gi den, dan wi kan aksi wisrefi: ’Na warderi den no abi gi san mi du gi den, noso na fergiti den fergiti fu taigi mi tangi?’ Kande tra reide de fu san ede den no sori warderi soleki fa wi ben ferwakti. Son sma kande de nanga tangi trutru, ma den no sabi fa fu sori dati. Kande den e syen fu teki a yepi di trawan e gi den, spesrutu efu na den ben gwenti yepi trawan fosi. Ma efu wi lobi wi brada nanga sisa trutru, dan wi no o denki takru fu den èn wi o prisiri fu du bun gi den.​—Ef. 4:2.

19-20. Sortu tra sani kan yepi wi fu prisiri fu du bun gi trawan? (Luku a prenki.)

¹⁹ Abi pasensi. Wan leisi, a koni Kownu Salomo ben skrifi: „Trowe yu brede go na tapu a watra, bika baka wan heri pisi ten yu o feni en baka” (Preik. 11:1). Den wortu disi e leri wi taki son leisi a kan taki sma  e taigi wi tangi „baka wan heri pisi ten”. Luku san wan sisa ben ondrofeni.

²⁰ Furu yari psa, a wefi fu wan kring-owruman ben seni wan brifi gi wan sisa di no ben dopu so langa ete. A ben wani gi en dek’ati fu tan getrow na Yehovah. Sowan aiti yari baka dati, a sisa disi skrifi wan brifi baka gi a wefi fu a kring-owruman. A brifi ben taki: „Mi wani taigi yu fa yu yepi mi na ini den yari di psa sondro taki yu sabi dati.” A brifi ben taki moro fara: „Den sani di yu skrifi naki mi ati èn noiti mi fergiti a Bijbeltekst di yu kari.” a Baka di e sisa disi ferteri sortu tesi ben miti en, dan a taki: „Son leisi mi ben wani gwe libi waarheid, fu di den frantwortu ben hebi tumsi gi mi. Ma mi ben e tan memre a Bijbeltekst di yu skrifi gi mi èn a yepi mi fu no gi abra.” A sisa e taki moro fara: „Na ini den aiti yari di psa, nowan-enkri sani gi mi so furu dek’ati leki a brifi fu yu èn a Bijbeltekst di yu skrifi gi mi.” Yu kan ferstan fa a wefi fu a kring-owruman ben breiti fu kisi a brifi disi „baka wan heri pisi ten”. Te wi du bun gi trawan, dan a kan psa tu taki baka wan heri pisi ten den e taigi wi tangi gi san wi du gi den.

21. Fu san ede yu o tan meki muiti fu du bun gi trawan neleki fa Yehovah e du dati?

²¹ Soleki fa wi ben taki kba, Yehovah meki wi na so wan fasi taki wi o de moro koloku te wi e gi sma sani leki te wi e kisi sani fu sma. Wi e firi bun te wi man yepi wi Kresten brada nanga sisa. Èn wi de koloku te den e sori taki den e warderi san wi du gi den. Ma awinsi sma no e sori warderi gi a bun di wi du gi den, tòg wi kan de nanga prisiri taki wi du san reti. Noiti no fergiti taki awinsi san yu e gi, „Yehovah man gi yu moro leki dati srefi” (2 Kron. 25:9). Noiti wi o man gi trawan moro leki san Yehovah man gi wi. Èn te Yehovah e pai wi, dan dati na a moro bun pai di wi kan kisi. Dati meki wi musu tan du bun gi trawan neleki fa wi Tata na hemel e du dati.