A tru taki den 70 disipel disi no ben de na a Avondmaal fu Masra. Ma disi no wani taki dati Yesus no ben feni den bun, noso taki den ben gwe libi en. Ma na a neti dati Yesus ben wani de soso nanga den apostel fu en.

Yesus ben feni den 12 apostel nanga den 70 disipel bun. A ben teki 12 man na mindri den tra disipel fu en èn a kari den apostel (Luk. 6:12-16). Di a ben de na ini Galilea, a „kari den twarfu apostel kon” èn „a seni den go fu preiki fu Gado Kownukondre èn fu meki sma kon betre” (Luk. 9:1-6). Bakaten di Yesus ben de na ini Yudea a „teki ete seibitenti sma èn a seni den tu na tu” fu go preiki (Luk. 9:51; 10:1). Sobun, na difrenti presi Yesus ben abi disipel di ben e ferteri sma fu en.

Dyu di ben tron disipel fu Yesus ben e tan hori a Paskafesa ibri yari èn a kan taki den ben e du dati makandra nanga den famiri (Eks. 12:6-11, 17-20). Syatu fosi den kiri Yesus, en nanga den apostel fu en go na Yerusalem. Ma a no aksi ala den disipel fu en na ini Yudea, Galilea nanga Perea fu go nanga en èn fu hori a Paskafesa makandra nanga en. A de krin taki na a okasi dati Yesus ben wani de soso nanga den apostel. A ben taigi den: „Mi ben angri trutru fu nyan a Paska-ofrandi disi nanga unu, fosi mi o pina”​—Luk. 22:15.

Yesus ben abi wan bun reide fu san ede a ben wani de makandra nanga den. A no ben o teki langa moro fosi a ben o dede leki „a Pikin Skapu fu Gado di e puru a sondu fu grontapu” (Yoh. 1:29). A ben o dede na ini Yerusalem, pe sma ben e tyari ofrandi gi Gado omeni yari kba. A pkin skapu di den Israelsma ben e srakti na a Paskafesa ben e memre den taki Yehovah ben ferlusu den fu Egepte. Ma na ofrandi fu Yesus ben o du moro leki dati. A ben o ferlusu ala libisma fu sondu nanga dede (1 Kor. 5:7, 8). Nanga yepi fu na ofrandi fu Yesus, den twarfu apostel ben o tron wan pisi fu a fondamenti fu a Kresten gemeente (Ef. 2:20-22). A moi fu sabi taki a santa foto Yerusalem abi „twarfu ston leki fondamenti”. Tapu den ston disi „den twarfu nen fu den twarfu apostel fu a Pikin Skapu” skrifi (Openb. 21:10-14). Iya, den getrow apostel ben o abi a prenspari frantwortu fu sorgu taki a wani fu Yehovah psa. Dati meki wi kan ferstan fu san ede Yesus ben wani taki den ben de nanga en na a lasti Paskafesa dati èn na a Avondmaal fu Masra di den hori baka dati.

Den 70 disipel nanga den tra disipel no ben de na a Avondmaal makandra nanga Yesus. Ma tòg ala den disipel di ben o tan getrow na en ben o kisi wini fu na Avondmaal fu Masra di a ben seti. Ala den disipel dati di tron salfu Kresten bakaten ben o de tu na ini a ferbontu di Yesus ben meki nanga den apostel gi wan kownukondre a neti dati​—Luk. 22:29, 30.