1, 2. Sortu problema a pipel fu Gado abi na ini a ten disi? (Luku den prenki na a bigin fu na artikel.)

FURU datra nanga sma di e sorgu gi sikisma e wroko nanga sma di abi siki di kan panya esi-esi. Den e sorgu gi den sikisma fu di den wani yepi den. Ma te den e du dati, den musu sorgu taki den srefi no kisi a siki fu den sma dati. Na so a de tu taki furu fu wi e libi èn e wroko nanga sma di abi fasi nanga denki di de heri tra fasi leki den fasi fu Gado. A sani disi kan de wan problema gi wi.

² Na ini den lasti dei disi, sma di no lobi Gado no e tyari densrefi na wan fasi di a feni bun. Na apostel Paulus ben taki fu den takru fasi di den sma disi abi, di a ben skrifi wan brifi gi Timoteyus. Paulus ben taki dati moro nanga moro sma ben o abi den fasi disi na ini den lasti dei. (Leisi 2 Timoteyus 3:1-5, 13.) Awansi wi feni taki den fasi disi no bun kwetikweti, toku a fasi fa sma na wi lontu e denki, e taki, èn e tyari densrefi kan abi krakti na wi tapu (Odo 13:20). Na ini na artikel disi wi o luku fa den fasi di den sma na ini den lasti dei disi abi, e difrenti fu den fasi di Gado en pipel abi. Wi o luku tu san wi kan du fu sorgu taki wi no kon abi takru fasi, aladi wi e yepi trawan fu kon sabi Yehovah.

3. Fu sortu sma 2 Timoteyus 3:2-5 e taki?

 ³ Na apostel Paulus ben skrifi: „Na ini den lasti dei muilek ten o de di tranga fu pasa.” Baka dati a kari 19 takru fasi di den sma fu a ten disi ben o abi. Den fasi di a e kari na den srefi sortu fasi leki den wan di kari na Romesma 1:29-31. Ma na ini a brifi di Paulus skrifi gi Timoteyus, a e gebroiki sosrefi Griki wortu di no de fu feni na tra presi na ini den Kresten Griki Buku fu Bijbel. Paulus e bigin nanga den wortu „bika sma o . . . ” Nanga dati a no ben wani taki dati ala sma ben o sori den fasi disi. Fu di tru Kresten de tra fasi.​—Leisi Maleaki 3:18.

4. San a wani taki te wan sma abi bigimemre?

⁴ Baka di Paulus taki dati furu sma ben o lobi densrefi èn taki den ben o lobi moni, dan a skrifi tu taki sma ben o lobi dyaf, den ben o abi heimemre èn den ben o abi bigimemre. Nofo tron sma di abi den fasi disi e denki taki den bun moro trawan fu di den moi, fu di den abi spesrutu koni, fu di den gudu, noso fu di den abi wan hei posisi na ini a libimakandra. Sma di abi den fasi disi lobi te sma e gi den grani. Wan sabiman ben skrifi disi fu a sma di abi bigimemre: „Na ini en ati a abi wan pikin altari pe a e boigi gi ensrefi.” Son sma taki dati bigimemre na so wan takru fasi taki srefi sma di abi bigimemre no lobi te trawan e sori a fasi disi.

5. Fa a du kon taki srefi reti-ati futuboi kisi heimemre?

⁵ A no de fu taki dati Yehovah no lobi sma di abi bigimemre noso heimemre. A e tegu gi „sma di e luku na wan heimemre fasi” (Odo 6:16, 17). Fu taki en leti, wan sma di abi heimemre no o wani tron wan mati fu Gado (Ps. 10:4). A fasi disi e komoto fu Didibri (1 Tim. 3:6). Ma a sari taki srefi wan tu reti-ati futuboi fu Yehovah kon abi heimemre. Usia, a kownu fu Yuda, ben e anbegi Gado nanga en heri ati furu yari langa. Ma toku Bijbel e taki: „Di a kisi furu makti, a kon abi bigifasi. Dati meki sani no waka bun gi en. A trangayesi Yehovah, a Gado fu en èn a go na a tempel fu Yehovah fu bron switismeri na tapu na altari pe sma ben gwenti bron switismeri.” Bakaten, Kownu Heskia kisi heimemre tu, aladi dati ben de fu wan syatu pisi ten.​—2 Kron. 26:16; 32:25, 26.

6. San ben kan meki taki David kisi heimemre, ma fa a du kon taki a no kisi a fasi dati?

⁶ Son sma e kisi heimemre fu di den moi, fu di den pôpi, fu di den man singi bun noso fu di den man prei poku, fu di den skin bow moi, noso fu di den abi wan hei posisi. David ben abi ala den sani disi, ma toku a ben sori sakafasi en heri libi langa. Baka di a kiri Goliat dan a kisi a grani fu trow nanga na umapikin fu Kownu Saul. Ma David taki: „Suma na mi èn suma na den famiri fu mi? Den sma na ini a famiri fu mi papa a no prenspari sma na ini Israel. Sobun, fa mi kan trow nanga na umapikin fu Kownu?” (1 Sam. 18:18) San yepi David fu tan sori sakafasi? David ben sabi taki den fasi di a ben abi, a koni fu en, nanga den grani di a ben kisi ben kon fu Gado di ben „saka ensrefi” fu poti prakseri na en (Ps. 113:5-8). David ben sabi tu taki ibriwan fu den bun sani di a ben abi, a ben kisi fu Yehovah.​—Luku 1 Korentesma 4:7.

7. San o yepi wi fu sori sakafasi?

⁷ Neleki David, a pipel fu Yehovah na ini a ten disi e du muiti fu sori sakafasi. A e naki wi ati fu sabi taki Yehovah, a Moro Hei Sma fu hemel nanga grontapu, e sori sakafasi (Ps. 18:35). Wi e pruberi fu fiti a rai disi di Bijbel e gi: „Un musu abi trutru sari-ati, bun-ati, sakafasi, safri-ati, nanga pasensi”  (Kol. 3:12). Wi sabi tu taki lobi „no e meki bigi èn a no abi heimemre” (1 Kor. 13:4). Te wi e sori sakafasi, dan wi e hari sma kon na Yehovah. A fasi fa wan wefi e tyari ensrefi kan meki taki en masra teki a tru bribi sondro taki a wefi taigi en wan sani. Na so a de tu taki te a pipel fu Gado e sori sakafasi, dan kande tra sma o wani kon sabi Gado moro bun.​—1 Petr. 3:1.

8. (a) Fa son sma na ini a ten disi e si en taki pikin e trangayesi den papa nanga mama? (b) Sortu rai Bijbel e gi pikin?

⁸ Paulus ben skrifi tu fa sma na ini den lasti dei ben o libi nanga makandra. A skrifi taki na ini den lasti dei, pikin ben o trangayesi papa nanga mama. Na ini a ten disi, furu buku, felem, nanga telefisi programa e meki a gersi leki a fiti taki pikin e trangayesi den papa nanga mama. Ma te pikin e tyari densrefi na a fasi dati, dan na osofamiri e kon swaki èn a sani disi abi krakti tu tapu a libimakandra. Sma sabi langa ten kaba taki a sani disi tru. A moi fu sabi taki na ini Grikikondre fu owruten, a ben de so taki efu wan man ben naki en papa noso mama, dan a ben o lasi ala den reti di a ben abi leki borgu. A wet fu Rome ben e sori tu taki te wan man ben naki en papa, dan dati ben ogri neleki te a ben o kiri wan trawan. Den Hebrew Buku fu Bijbel nanga den Kresten Griki Buku fu Bijbel e gi pikin a rai fu gi grani na den papa nanga mama.​—Eks. 20:12; Ef. 6:1-3.

9. San o yepi yongusma fu gi yesi na den papa nanga mama?

⁹ San kan yepi pikin fu gi yesi na den papa nanga mama awansi trawan na den lontu no e du dati? Te pikin e prakseri ala den bun sani di den papa nanga mama du gi den, dan den musu de nanga tangi èn den musu de klariklari fu gi yesi na den. Ma yonguwan musu frustan tu taki Gado, di de a Papa fu wi alamala, e fruwakti taki den e gi yesi na den papa nanga mama. Te yonguwan e taki bun fu den papa nanga mama, dan den kan yepi tra yonguwan fu denki bun tu fu den eigi papa nanga mama. A no de fu taki dati efu papa nanga mama „no lobi” den pikin fu den, dan a kan muilek gi den pikin dati fu gi yesi na den nanga den heri ati. Ma te wan yonguwan e firi taki en papa nanga mama lobi en trutru, dan dati o yepi en fu gi yesi na den awansi a muilek gi en fu du dati. Austin e taki: „Nofo tron mi ben wani du san mi srefi ben wani, ma mi papa nanga mama poti wet gi mi di no ben hebi tumusi, den taigi mi fu san ede den ben poti den wet èn den gi mi na okasi ala ten fu taki fri nanga den fu iniwan sani. A sani disi yepi mi fu gi yesi na den. Mi ben kan si taki den ben lobi mi èn fu dati ede mi ben wani du san den ben aksi fu mi.”

10, 11. (a) Sortu takru fasi e sori taki sma no lobi makandra? (b) O furu lobi tru Kresten abi gi tra sma?

¹⁰ Paulus ben taki fu tra takru fasi di e sori taki sma no abi lobi gi makandra. Baka di Paulus taki dati sma o „trangayesi papa nanga mama”, dan a e taki dati sma no o de nanga tangi. Wi kan frustan dati, fu di sma di no de nanga tangi no e warderi den bun di trawan e du gi den. Boiti dati, sma no ben o tai hori na trawan. Den no ben o wani meki kruderi, èn na so den ben o sori taki den no wani meki sani bun baka nanga trawan. Sma ben o taki ogri fu trawan èn den ben o tori trawan. Den ben o pori sma nen èn den o pori Gado nen srefi. Boiti dati, sma ben o fruteri ogri-ati lei fu trawan fu pori a bun nen fu den sma dati. *

 ¹¹ Den futuboi fu Yehovah de tra fasi leki furu fu den sma na ini a grontapu disi, fu di den abi trutru lobi gi trawan. Disi ben de so ala ten kaba. Fu taki en leti, Yesus ben taki dati a wan-enkri komando di prenspari moro a komando di Gado gi wi fu lobi trawan, na a komando di wi kisi fu lobi Gado (Mat. 22:38, 39). Yesus ben taki tu taki sma ben o sabi tru Kresten leki sma di lobi makandra. (Leisi Yohanes 13:34, 35.) Tru Kresten ben o lobi den feanti fu den tu.​—Mat. 5:43, 44.

12. Fa Yesus sori lobi gi tra sma?

¹² Yesus ben abi furu lobi gi sma. A ben e go fu a wán foto na a trawan fu fruteri sma bun nyunsu fu Gado Kownukondre. A dresi den breniwan, den lanwan, den sma di ben abi gwasi, nanga den dofusma. A wiki den dedewan (Luk. 7:22). Yesus gi en libi srefi fu a bun fu libisma, aladi furu fu den no ben lobi en. A lobi fu Yesus ben e sori soifri fa en Papa lobi wi. Na heri grontapu, Yehovah Kotoigi e sori lobi gi trawan.

13. Fa a lobi di wi e sori gi trawan kan hari den kon na Yehovah?

¹³ A lobi di wi e sori gi trawan e hari sma kon na wi hemel Tata. Fu eksempre, wan man na ini Thailand di ben go na wan kongres drape, ben lobi a fasi fa brada nanga sisa ben sori lobi gi makandra. Di a drai go baka na oso, dan a aksi fu kisi Bijbelstudie tu leisi wan wiki. A preiki gi ala den famiriman fu en èn siksi mun baka a kongres, a ben mag du a Bijbel leisipisi fu a fosi leisi na ini a Kownukondre zaal. Fu kon sabi efu wi e sori lobi gi trawan, dan wi musu aksi wisrefi: ’Mi e du muiti fu yepi sma na ini mi famiri, na ini mi gemeente, èn na ini a preikiwroko? Mi e meki muiti fu si trawan soleki fa Yehovah e si den?’

14, 15. Sortu takru fasi furu sma abi? Ma fa den kenki den fasi fu den?

¹⁴ Na ini den lasti dei, sma ben o sori tra takru fasi di wi leki Kresten no musu abi. Fu  eksempre, furu sma no lobi san bun. Den no man dwengi densrefi èn den e du ogri-ati sani. Son sma e du san densrefi wani, noso den no e denki fosi den du sani èn den no e broko den ede tu nanga den bakapisi di dati o abi gi trawan.

¹⁵ Furu sma di ben abi den sortu fasi disi fosi, kenki den fasi fu den. Bijbel ben taki dati na ini wan profeititori. (Leisi Yesaya 11:6, 7.) Drape wi e leisi fu busimeti soleki busidagu nanga lew di e libi na ini freide nanga meti soleki pikin skapu nanga pikin kaw. Fa a du kon taki den e libi na ini freide? Bijbel e taki: „Fu di heri grontapu o furu nanga a sabi fu Yehovah” (Yes. 11:9). Fu di meti no man leri sani fu Yehovah, meki a de krin taki a profeititori disi no abi fu du nomo nanga a freide di o de na mindri libisma nanga meti na ini a nyun grontapu, ma a abi fu du tu nanga libisma di o kenki den fasi fu den.

16. Fa Bijbel yepi sma fu kenki den fasi fu den?

¹⁶ Furu sma ben e du ogri-ati sani fosi, ma now den e libi na ini freide nanga trawan. Yu kan leisi wan tu ondrofenitori fu den brada nanga sisa disi na ini den artikel di nen „Bijbel e kenki sma libi”, di de fu feni na ini A Waktitoren gi a preikiwroko. Den sma di kon sabi Yehovah èn e dini en no de leki den sma di e du neleki den e dini Gado fayafaya, aladi den e libi na wan fasi di e sori taki dati no de so. Na presi fu dati, sma di ben abi ogri-ati fosi kon abi „nyun fasi”. Den „tron sma di de leki fa Gado wani, sobun, reti-ati sma di e gi yesi na Gado ala ten” (Ef. 4:23, 24). Te sma e leri sani fu Gado, dan den e kon si taki den musu hori densrefi na den wet fu en. Dati meki den e poti bribi na ini den tru tori fu Bijbel, den e kenki a denki fu den, èn a fasi fa den e tyari densrefi. Aladi a no makriki fu tyari den kenki dati kon, toku sma man kenki fu di a yeye fu Gado e yepi den wan di e angri fu du a wani fu Gado.

17. Fa wi kan sorgu taki den wan di no abi den fasi fu Gado no abi krakti na wi tapu?

¹⁷ A difrenti na mindri sma di e dini Gado èn den wan di no e du dati de fu si krin moro nanga moro. Wi musu luku bun taki den takru fasi fu sma di no e dini Gado no abi krakti na wi tapu. Dati meki wi wani gi yesi na a rai di Bijbel e gi taki wi no musu bumui nanga den sortu sma di 2 Timoteyus 3:2-5 e taki fu den. A no de fu taki dati wi no kan wai pasi krinkrin gi sma di no abi den fasi fu Gado. Kande wi musu wroko nanga den, kande wi e go na skoro nanga den, noso kande wi e libi nanga den. Ma wi kan sorgu taki wi no e kon abi a srefi denki leki den èn taki wi no e sori den srefi fasi leki den. San kan yepi wi? Wi o man tranga a matifasi di wi abi nanga Yehovah te wi e studeri Bijbel èn te wi abi demakandra nanga den wan di bosroiti fu dini Yehovah.

18. Fa den sani di wi e taki èn e du e yepi trawan fu kon sabi Gado?

¹⁸ Wi musu du muiti tu fu yepi trawan fu kon abi wan bun matifasi nanga Gado. Suku okasi fu preiki èn aksi Yehovah fu yepi yu fu taki den yoisti sani na a yoisti ten. Wi musu meki sma kon sabi taki wi na Yehovah Kotoigi. Te wi e tyari wisrefi na wan bun fasi, dan wi no o gi grani na wisrefi, ma wi o gi grani na Gado. A leri wi fu „kakafutu gi ogridu èn gi den lostu fu grontapu. A e leri wi tu fu libi nanga krin frustan, fu de reti-ati sma èn fu dini Gado fayafaya na ini a ten disi” (Tit. 2:11-14). Te wi e tyari wisrefi soleki fa Gado wani, dan trawan o si dati èn kande sonwan fu den o taki: „Wi wani go nanga unu, bika wi yere taki Gado de nanga unu.”​—Sak. 8:23.