1, 2. Sortu aparti sani o tyari wi kon na wán na ini 2018 èn fu san ede dati de so? (Luku a prenki na a bigin fu na artikel.)

TAPU 31 maart 2018, Gado en pipel nanga furu tra sma di wani leri sabi Gado, o kon makandra gi a Memrefesa di e hori ibri yari. Baka te son dongo, ala den sma disi o memre na ofrandi di Yesus tyari gi ibriwan fu wi. Ibri yari, a Memrefesa e tyari ala sortu sma na grontapu kon na wán, èn disi na wan tumusi aparti sani.

² A no de fu taki dati Yehovah nanga Yesus musu breiti te den e si fa milyunmilyun sma e tan go na a spesrutu konmakandra disi a dei dati, baka te sondongo. Bijbel ben taki fu ’wan bigi ipi sma di nowan sma ben o man teri. Den komoto na ala kondre, lo, pipel, nanga tongo.’ Den sma disi ben o bari: „Tangi fu wi Gado di e sidon na tapu a kownusturu èn tangi fu a Pikin Skapu, meki wi kisi frulusu” (Openb. 7:9, 10). A moi fu si taki ibri yari te a Memrefesa e hori, bun furu sma e gi grani na Yehovah nanga Yesus gi den bigi sani di den du!

3. Sortu aksi o kisi piki na ini na artikel disi?

 ³ Na ini na artikel disi wi o kisi piki tapu den fo aksi disi: (1) Fa wi kan sreka wisrefi gi a Memrefesa so taki wi kisi wini fu en? (2) Na sortu fasi a Memrefesa e yepi ala futuboi fu Gado fu de wán? (3) San mi kan du fu sorgu taki wánfasi de na mindri a pipel fu Gado? (4) Oiti wan dei o kon taki wi o hori a Memrefesa fu a lasti leisi? Efu dati de so, dan o ten dati sa de?

4. Fu san ede a prenspari taki wi e du ala san wi man fu de na a Memrefesa?

⁴ Fu san ede a prenspari taki wi de na a Memrefesa? Hori na prakseri taki wi e go na den konmakandra fu wi fu anbegi Yehovah. A no de fu taki dati Yehovah nanga Yesus e si suma e meki muiti fu de na a moro prenspari konmakandra disi. Fu taki en leti, wi wani sori den taki wi e du ala san wi man fu de na a Memrefesa. Te wi no e gi pasi taki wan sani tapu wi fu de na den konmakandra, dan Yehovah o abi moro reide fu poti wi nen na ini „a buku fu libi” di skrifi „fu memre” den wan di o kisi têgo libi.​—Mal. 3:16; Openb. 20:15.

5. Fa wi kan ’ondrosuku efu wi de na bribi’, na ini den dei fosi a Memrefesa?

⁵ Den dei syatu bifo a Memrefesa, wi kan teki ten fu begi Gado èn fu ondrosuku gi wisrefi efu wi abi wan bun matifasi nanga Yehovah. (Leisi 2 Korentesma 13:5.) Fu man du dati wi musu ’ondrosuku efu wi de na bribi’. Dati meki wi musu aksi wisrefi: ’Mi e bribi trutru taki mi de na ini a wan-enkri organisâsi di Yehovah e gebroiki fu du a wani fu en? Mi e du ala san mi man fu preiki a bun nyunsu fu a Kownukondre èn fu gi sma leri fu en? Den sani di mi e du e sori taki mi e bribi trutru taki wi e libi na ini den lasti dei èn taki a kaba fu a tiri fu Satan de krosibei? Mi e frutrow tapu Yehovah nanga Yesus na a srefi fasi fa mi ben e du dati di mi gi mi libi abra na Yehovah Gado?’ (Mat. 24:14; 2 Tim. 3:1; Hebr. 3:14) Te wi e denki dipi fu den piki tapu den aksi dati, dan dati o yepi wi fu tan buweisi sortu sma wi de.

6. (a) San na a wan-enkri fasi fa yu kan kisi têgo libi? (b) Fa wan brada di de owruman langa ten kaba e sreka ensrefi gi a Memrefesa ibri yari èn fa yu kan teki na eksempre fu en?

⁶ Wan fasi fa wi kan sreka wisrefi gi a Memrefesa, na fu leisi den artikel di e fruklari fu san ede na okasi disi prenspari so. Wi musu denki dipi tu fu den sani di wi e leisi. (Leisi Yohanes 3:16; 17:3.) A wan-enkri fasi fa wi kan kisi têgo libi, na te wi e „leri sabi” Yehovah èn te wi e „bribi” na ini Yesus, en wan-enkri Manpikin. Te yu e sreka yusrefi gi a Memrefesa, dan kande yu kan studeri wan tu artikel di o yepi yu fu kon moro krosibei na Yehovah nanga Yesus. Luku san wan brada di de owruman langa ten kaba e du. Na ini den yari di pasa, a poti Waktitoren artikel na wan sei di e taki fu a Memrefesa èn fu a lobi di Yehovah nanga Yesus sori gi wi. Na ini den wiki fosi a Memrefesa, a e leisi den artikel disi baka èn a e teki ten fu prakseri o prenspari na okasi disi de. Ten na ten, a e suku wan tu nyun artikel di a e studeri tu. Na owruman disi kon si taki te a e leisi den artikel disi baka èn te a e denki dipi fu den pisi fu Bijbel di wi musu leisi na a ten fu a Memrefesa, dan a e leri nyun sani ibri yari. Ma san moro prenspari, na taki a feni taki a lobi di a abi gi Yehovah nanga Yesus e kon moro tranga ibri yari. Te yu e studeri den sortu sani disi, dan dati o yepi yu fu kon abi moro lobi nanga warderi gi Yehovah nanga Yesus. Na so yu o kisi moro wini fu a Memrefesa.

7. (a) Gi sortu sani Yesus begi a fosi neti di na Avondmaal fu Masra hori? (b) San e sori taki Yehovah piki a begi fu en?

⁷ A neti di a fosi Avondmaal fu Masra hori, Yesus begi taki ala den bakaman fu en ben o de wán neleki fa en nanga en Papa de wán. (Leisi Yohanes 17:20, 21.) Yehovah piki a begi fu en lobi Manpikin èn now milyunmilyun sma e bribi taki Yehovah seni en Manpikin kon na grontapu. A Memrefesa e sori moro leki ala tra konmakandra fu a pipel fu Gado, taki Yehovah Kotoigi de wán. Sma fu difrenti kondre nanga ras e kon makandra na heri grontapu. Na ini son kontren, sma no gwenti si taki sma fu so furu difrenti ras e kon makandra fu anbegi Gado. Yu abi sma tu di feni taki a sani disi no fiti. Ma Yehovah nanga Yesus e si a wánfasi di de na wi mindri leki wan moi sani.

8. Sortu boskopu Yehovah gi Esekièl?

⁸ Wi leki a pipel fu Yehovah no e fruwondru taki wi de wán. Fu taki en leti, na ini a boskopu di Yehovah ben gi a profeiti Esekièl a ben taki dati disi ben o pasa. A ben taigi Esekièl fu teki tu tiki, wán „gi Yuda” èn wán „gi Yosef” èn fu tyari den kon na wan so taki den ben e tron wán tiki. (Leisi Esekièl 37:15-17.) Na artikel „Aksi fu leisiman” di ben skrifi na ini A Waktitoren fu yuli 2016, e taki: „Yehovah ben gi a profeiti Esekièl wan boskopu di ben e gi sma howpu. A ben pramisi taki baka te den Israelsma ben drai go baka na ini a Pramisi Kondre, den ben o tron wán pipel. A profeititori disi e sori tu taki na ini den lasti dei Gado pipel ben o tron wán pipel.”

9. Fa a Memrefesa e sori ibri yari taki a profeititori fu Esekièl kon tru?

⁹ Sensi 1919, Yehovah bigin orga den salfuwan baka èn a sorgu taki wánfasi de na den mindri. Den salfuwan disi e prenki a tiki „gi Yuda”. Te fu kaba moro nanga moro sma di abi a howpu fu libi na grontapu bigin horibaka gi den salfuwan. Den sma di abi a howpu fu libi na grontapu e prenki a tiki „gi Yosef”. Yehovah pramisi fu tyari den tu tiki disi kon makandra so taki den kan „kon de wán tiki” (Esek. 37:19). Now den salfuwan nanga den „tra skapu” tron „wán ipi” (Yoh. 10:16; Sak. 8:23). Tide na a dei, ala tu grupu de na ini wánfasi èn den ala tu e dini Yehovah makandra. Den abi wán Kownu, Yesus Krestes, di Gado e kari en „futuboi David” na ini a profeititori fu Esekièl (Esek. 37:24, 25). Ibri yari te wi e kon makandra fu memre a dede fu Yesus, dan wi e si a wánfasi fu den tu grupu disi di kari na ini a profeititori fu Esekièl. Ma san ibriwan fu wi kan du fu sorgu taki a wánfasi dati tan?

10. Fa wi kan sorgu taki a pipel fu Gado de wán?

¹⁰ Wán sani di o yepi wi leki a pipel fu Gado fu de wán, na te wi abi sakafasi. Di Yesus ben de na grontapu, dan a gi den disipel fu en a rai fu sori sakafasi (Mat. 23:12). Efu wi abi sakafasi, dan wi no o hei wisrefi neleki fa den grontapusma e du dati. Na presi fu dati, sakafasi o yepi wi fu saka wisrefi na ondro den wan di e teki fesi. Wi musu de klariklari fu gi yesi efu wi wani taki wánfasi de na ini a gemeente. Ma san moro prenspari, na taki Gado o breiti nanga wi te wi abi sakafasi, fu di a „e kakafutu gi den wan di abi heimemre, ma a e sori bun-ati gi den sma di abi sakafasi”.​—1 Petr. 5:5.

11. Te wi e poti prakseri na san a brede nanga a win wani taki, dan fa dati e yepi wi fu de wán?

¹¹ Wan tra fasi fa wi kan sorgu taki wánfasi  de, na te wi e poti prakseri na san a win nanga a brede di wi e gebroiki na a Memrefesa, wani taki. Wi musu du dati fosi a prenspari neti dati, èn spesrutu na a neti dati srefi (1 Kor. 11:23-25). A brede e prenki a skin fu Yesus di no ben abi sondu èn di a gi leki wan ofrandi. A win e prenki a brudu fu en. Ma awansi wi e frustan san den sani disi wani taki, toku dati a no ala ete. No frigiti taki a frulusu-ofrandi fu Krestes e sori taki Yehovah lobi wi fu di a gi en Manpikin fu a bun fu wi. A e sori tu taki Yesus lobi wi fu di a ben de klariklari fu dede gi wi. Tu moro prenspari buweisi fu lobi no de. Te wi e denki dipi fu a lobi di Yesus nanga Yehovah abi gi wi, dan dati musu gi wi deki-ati fu lobi den tu. Èn a lobi di wi nanga wi Kresten brada nanga sisa abi gi Yehovah de leki wan titei di e tai wi kon na wan èn a e tranga a matifasi fu wi.

12. Fa Yesus sori na ini na agersitori fu a kownu nanga den srafu fu en taki Yehovah wani taki wi gi trawan pardon?

¹² A di fu dri fasi fa wi kan sorgu taki wánfasi de na wi mindri, na te wi de klariklari fu gi trawan pardon. Te wi e gi pardon na den wan di du hati sani nanga wi, dan wi e sori taki wi e warderi en taki a lusu-paiman fu Krestes e gi wi na okasi fu kisi pardon fu den sondu fu wi. Luku wan fu den agersitori fu Yesus di skrifi na Mateyus 18:23-34. Aksi yusrefi: ’Mi de klariklari fu du san Yesus leri mi? Mi abi pasensi nanga mi Kresten brada nanga sisa èn mi e frustan fa den e firi? Mi de klariklari fu gi pardon na den wan di e sondu teige mi?’ A tru taki a wan sondu seryusu moro a trawan èn a no makriki ala ten gi sondu sma fu gi trawan pardon. Toku na agersitori disi e leri wi san Yehovah e fruwakti fu wi. (Leisi Mateyus 18:35.) Yesus sori krin taki Yehovah no o gi wi pardon te wi e weigri fu gi wi Kresten brada nanga sisa pardon te bun reide de fu du dati. A no de fu taki dati wi musu denki bun fu a sani disi. Te wi e gi trawan pardon neleki fa Yesus leri wi, dan wi o sorgu taki a wánfasi fu wi e tan.

13. Te wi lobi fu meki freide, dan fa dati e sorgu taki wánfasi de?

¹³ Te wi e gi trawan pardon, dan wi e sori  taki wi lobi fu meki freide. Memre a rai di na apostel Paulus gi wi fu ’libi bun nanga makandra èn fu du ala muiti fu tan abi a wánfasi di wi kisi nanga yepi fu a santa yeye’ (Ef. 4:3). Na a ten fu a Memrefesa èn spesrutu na a neti dati srefi, wi musu teki ten fu prakseri fa wi e libi nanga trawan. Aksi yusrefi: ’Mi e sori taki mi no e hori sma na ati? Sma sabi mi leki wan sma di e du muiti fu sorgu taki freide nanga wánfasi de?’ A bun fu poti prakseri na den seryusu aksi disi, te a Memrefesa de krosibei.

14. Fa wi kan sori taki wi e „frudrage makandra” èn taki wi e du dati nanga lobi?

¹⁴ A di fu fo fasi fa wi kan sorgu taki wánfasi de, na te wi e sori lobi gi makandra neleki fa Yehovah, a Gado fu lobi e du dati (1 Yoh. 4:8). Noiti wi musu denki: „Mi sabi taki den trawan na ini a gemeente na mi brada nanga sisa, ma mi no abi fu lobi den!” Efu wi ben o denki so, dan wi no e gi yesi na a rai di Paulus gi wi fu ’abi lobi, so taki wi man frudrage makandra’ (Ef. 4:2). A no taki nomo taki wi musu „frudrage makandra”, ma a taki dati wi musu „abi lobi” te wi e du dati. Na ini den gemeente fu wi, yu abi difrenti sortu sma di Yehovah hari kon na en (Yoh. 6:44). Fu di Yehovah hari den sma disi kon na en, dan a musu fu de so taki a lobi den. Sobun, fa wi kan taki dati wan Kresten brada noso sisa no warti fu wi lobi en? Wi musu de klariklari fu sori lobi gi trawan neleki fa Yehovah e taigi wi fu du dati.​—1 Yoh. 4:20, 21.

15. Fa wi du sabi taki wan dei o kon te a Memrefesa o hori fu a lasti leisi?

¹⁵ Wan dei o kon te wi o hori a Memrefesa fu a lasti leisi. Fa wi du sabi dati? Na ini a fosi brifi di Paulus ben skrifi gi den salfu Kresten fu Korente, a taki dati ibri yari te den e memre a dede fu Yesus, den e „meki sma sabi fu a dede fu Masra”. A e taki tu dati den ben o du dati „teleki [Masra] doro” (1 Kor. 11:26). Yesus ben taki tu fu a ten te ’a o doro’, na ini a profeititori di abi fu du nanga a ten fu a kaba. A ben taki fu a bigi banawtu di o kon heri esi: „A marki fu a Manpikin fu libisma o kon de fu si na hemel. Ala den lo na grontapu o sari èn den o si a Manpikin fu libisma e kon na tapu den wolku fu hemel nanga krakti èn nanga bigi glori. [Yesus] o seni den engel fu en go nanga a bigi babari fu trompeti èn den o tyari den sma kon na wán di Gado kari komopo fu noordsei, zuidsei, owstusei, nanga west-sei, iya, fu a wan uku fu hemel te na a tra uku” (Mat. 24:29-31). A tyari di den o „tyari den sma kon na wán di Gado kari” abi fu du nanga a ten te ala den salfuwan di de ete na grontapu o kisi a pai fu den na hemel. Disi o pasa baka te a bigi banawtu bigin, ma fosi Armagedon doro. Na a ten dati ala den 144.000 salfuwan o teki prati na a feti teige den kownu fu grontapu (Openb. 17:12-14). A lasti Memrefesa o hori syatu bifo Yesus „kon” fu tyari den salfuwan kon na wan na hemel.

16. Fu san ede yu o du ala san yu man fu de na a Memrefesa a yari disi?

¹⁶ Du ala san yu man fu de na a Memrefesa di o hori tapu 31 maart 2018. Aksi Yehovah fu yepi yu fu sorgu taki wánfasi de na mindri a pipel fu en. (Leisi Psalm 133:1.) No frigiti taki wan dei o kon te wi o hori a Memrefesa fu a lasti leisi. Ma teleki a ten dati doro wi musu du ala san wi man fu de na a Memrefesa èn wi musu warderi a wánfasi di wi e si na a okasi dati.