1, 2. Fa Yehovah e gebroiki den gudu fu grontapu fu sorgu wi?

YEHOVAH na wan Gado di lobi gi sani. Ala san wi abi e komoto fu en. Na Yehovah abi ala a gowtu nanga a solfru sosrefi ala tra gudu fu grontapu. A e gebroiki den sani disi fu gi wi san wi abi fanowdu fu man tan na libi (Ps. 104:13-15; Hag. 2:8). Bijbel abi bun furu tori di e sori fa Yehovah gebroiki den gudu fu grontapu na wan wondru fasi fu sorgu gi a pipel fu en.

² Fotenti yari langa, Yehovah gi a pipel fu Israel mana nanga watra di den ben de na ini a gran sabana (Eks. 16:35). Dati meki „den no ben e mankeri noti” (Neh. 9:20, 21). Yehovah gi Elisa a krakti fu du wan wondru gi wan uma di no ben abi masra moro. A ben meki a pikinso oli di na uma ben abi kon moro furu. A kado di Gado gi en yepi en fu pai ala den paiman fu en èn baka dati a ben abi nofo moni fu sorgu ensrefi nanga den manpikin fu en (2 Kow. 4:1-7). Yehovah gi Yesus a krakti fu du wan wondru  so taki sma ben kan abi nyanyan nanga moni te dati ben de fanowdu.​—Mat. 15:35-38; 17:27.

3. San wi o luku na ini na artikel disi?

³ Yehovah kan gebroiki iniwan sani di a wani fu sorgu gi den futuboi fu en. Ma toku a e gi den na okasi fu gebroiki den sani di den abi fu horibaka gi a wroko di na organisâsi fu en e du. (Eks. 36:3-7; leisi Odo 3:9.) Fu san ede Yehovah wani taki wi e gebroiki den gudu fu wi fu horibaka gi na anbegi fu en? Fa den futuboi fu Yehovah na ini owruten ben e horibaka gi den wan di ben e teki fesi gi en? Fa na organisâsi e gebroiki a moni di sma e gi leki bijdrage na ini a ten disi? Wi o kisi piki tapu den aksi dati na ini na artikel disi.

4. San wi e sori Yehovah te wi e horibaka gi a wroko fu en?

⁴ Wi e gi sani na Yehovah fu di wi lobi en èn fu di wi e warderi den sani di a du gi wi. Te wi e prakseri ala den sani di Yehovah du gi wi, dan dati e naki wi ati. Di Kownu David ben taki fu den sani di ben de fanowdu fu bow a tempel, a ben frustan taki ala san wi abi e komoto fu Yehovah èn taki iniwan sani di wi e gi Yehovah na san en srefi ben gi wi.​—Leisi 1 Kroniki 29:11-14.

5. Fa Bijbel e sori taki anbegiman fu Yehovah musu de klariklari fu gi sani?

⁵ Wi e gi sani fu horibaka gi a wroko fu Yehovah, fu di dati na wan fasi fa wi e anbegi en. Na ini wan fisyun, na apostel Yohanes ben yere fa den futuboi fu Yehovah na hemel ben taki: „Na yu, Yehovah wi Gado, warti fu sma prèise yu gi a glori, a grani nanga a makti di yu abi, bika na yu meki ala sani. Na fu di yu ben wani, meki den sani disi kon de èn na yu meki den” (Openb. 4:11). A no de fu taki dati Yehovah warti fu kisi ala grani nanga glori, èn dati meki wi wani gi en den moro bun sani di wi abi. Yehovah ben meki Moses taigi a pipel fu Israel fu hori dri fesa na ini wán yari. Na den fesa disi di ben abi fu du nanga na anbegi, den Israelsma no ben musu „go na fesi [Yehovah] nanga leigi anu” (Deut. 16:16). Na ini a ten disi a prenspari tu taki wi e gi Yehovah sani nanga wi heri ati. Na so wi e sori taki wi e warderi a wroko di Yehovah en organisâsi e du èn taki wi e horibaka gi en.

6. Fu san ede a bun te wi lobi gi sma sani? (Luku a prenki na a bigin fu na artikel.)

⁶ A bun te wi lobi gi sma sani. Wi no musu de sma di e suku nomo fu kisi sani. (Leisi Odo 29:21.) Kande wi e prakseri wan pikin di e gebroiki a pikinso moni di en papa nanga mama e gi en fu bai wan kado gi den. A musu de so taki a papa nanga mama breiti nanga a kado disi! Kande wan manpikin noso wan umapikin di e pionier èn di e libi na oso e gi en papa nanga mama moni fu yepi pai den kostu fu na osofamiri. Aladi den papa nanga mama disi no e aksi dati fu den, toku den kan teki den sortu kado disi fu di a de wan bun sani taki pikin e sori taki den abi warderi gi ala den sani di den du gi den. Na so a de tu taki Yehovah sabi taki a e tyari wini kon gi wi te wi e gi sani fu horibaka gi na anbegi fu en.

7, 8. San wi kan leri fu a pipel fu Yehovah na ini Bijbel ten te wi luku fa den ben e gi bijdrage fu horibaka gi (a) spesrutu sani? (b) na anbegi?

⁷ Bijbel e sori taki a pipel fu Yehovah ben e gebroiki den gudu fu den fu gi bijdrage. Son leisi, den ben e gi bijdrage fu horibaka gi spesrutu sani. Fu eksempre, Moses ben aksi a pipel fu gi bijdrage gi a bow fu a tabernakel èn David ben du dati tu di a  tempel ben musu bow (Eks. 35:5; 1 Kron. 29:5-9). Na a ten di Kownu Yoas ben e tiri, dan den priester gebroiki moni di sma ben gi leki bijdrage, fu seti na oso fu Yehovah kon bun baka (2 Kow. 12:4, 5). Di den brada fu a fosi Kresten gemeente kon si taki brada nanga sisa ben abi yepi fanowdu di angriten ben de, dan den „bosroiti taki ibriwan fu den ben o seni san den man gi, fu yepi den brada di ben tan na Yudea”.​—Tori 11:27-30.

⁸ Na ini tra situwâsi, a pipel fu Yehovah gi bijdrage fu horibaka gi den wan di ben e teki fesi na ini a wroko. A Wet di Gado ben gi Moses ben e taki dati den Leifisma no ben e kisi wan pisi fu a kondre neleki fa den tra lo ben kisi dati. Na presi fu wan pisi gron, den Israelsma ben musu gi den Leifisma bijdrage fu sorgu densrefi, so taki den ben kan tan poti prakseri na a wroko di den ben musu du na ini a tabernakel (Num. 18:21). Na so umasma na ini Yesus ten gebroiki den gudu fu den fu sorgu Yesus nanga den apostel fu en.​—Luk. 8:1-3.

9. Pe den gudu ben e komoto di den anbegiman fu fosi ben e gi leki bijdrage?

⁹ A no de fu taki dati difrenti fasi de fa den Israelsma ben kon abi den sani di den ben e gi leki bijdrage. Di den ben e gi bijdrage fu bow a tabernakel na ini a gran sabana, dan a kan taki den ben gi den gudu di den ben tyari komoto fu Egepte (Eks. 3:21, 22; 35:22-24). Na ini a fosi yarihondro, son Kresten ben e seri sani soleki gron nanga oso èn den ben e tyari a moni gi den apostel. Den apostel ben e prati a moni dati gi den sma di ben de na nowtu (Tori 4:34, 35). Tra sma ben e poti moni na wan sei èn den ben e gi bijdrage doronomo fu horibaka gi na anbegi (1 Kor. 16:2). Sobun, ala sortu sma, pôtiwan nanga guduwan ben e gi bijdrage.​—Luk. 21:1-4.

10, 11. (a) Fa wi kan de leki den futuboi fu Yehovah na ini Bijbel ten di ben lobi gi sani? (b) Fa yu feni a grani di yu abi fu horibaka gi a Kownukondre wroko?

¹⁰ Na ini a ten disi, bijdrage de fanowdu tu son leisi fu du spesrutu sani. Kande yu gemeente wani seti a Kownukondre zaal kon bun baka noso den wani bow wan nyun zaal. Kande den brada e meki bekènti taki moni de fanowdu fu seti a bijkantoro kon bun baka, fu hori a kongres, noso fu yepi brada nanga sisa di kisi fu du nanga wan rampu. Wi e gi bijdrage tu fu horibaka gi den wan di e wroko na a edekantoro èn na den bijkantoro di de na difrenti presi na grontapu. Den bijdrage di wi e gi e horibaka gi zendeling, spesrutu pionier èn gi den wan di e du a kringwroko. Yu gemeente kan gi bijdrage doronomo tu fu yepi bow Kongreshal nanga Kownukondre zaal gi den brada nanga sisa di e libi na difrenti presi na grontapu.

¹¹ Wi alamala kan yepi fu horibaka gi a wroko di Yehovah e du na ini den lasti dei disi. Nofo tron te brada nanga sisa e gi bijdrage, dan den no e meki sma kon sabi dati. Te wi e poti bijdrage na ini den monikisi na ini a Kownukondre zaal noso te wi e gi bijdrage tapu Internet nanga yepi fu jw.org, dan wi no e meki sma kon sabi omeni moni wi gi. Kande wi feni taki a bijdrage di wi gi no warti furu fu di wi no gi furu. Toku a de so taki moro furu fu den bijdrage di na organisâsi e kisi na ini a ten disi, a no bigi bijdrage, ma na pikinpikin bijdrage di sma e gi. Den brada nanga sisa fu wi, srefi den wan di no abi so furu moni, de leki den Masedoniasma di ben „pôti srefisrefi”, ma di ben e begi fu kisi a grani fu gi sani èn di ben e du dati nanga den heri ati.​—2 Kor. 8:1-4.

12. Fa na organisâsi e du muiti fu gebroiki den bijdrage di den e kisi na wan koni fasi?

 ¹² Den brada fu a Tiri Skin de fu frutrow èn den e gebroiki den bijdrage na wan koni fasi (Mat. 24:45). Den e begi Gado fu yepi den fu teki bun bosroiti èn den e luku bun fa den o gebroiki a moni di sma e gi (Luk. 14:28). Na ini Bijbel ten, reti-ati man di ben abi a frantwortu fu a moni di sma ben e gi, ben e sorgu taki sma ben e gebroiki a moni soso gi na anbegi fu Yehovah. Fu eksempre, Esra ben teki pasi go baka na Yerusalem nanga den gudu di a ben kisi fu a kownu fu Persia. Dati ben de gowtu, solfru, nanga tra sani di warti moro leki 100 milyun Amerkan dala na ini a ten disi. Esra ben si den bijdrage disi leki wan kado di Yehovah ben kisi. Dati meki a seti sani bun fu sorgu taki te den ben e waka pasa na ini a kontren pe sma ben kan du ogri nanga den, dan fufuruman no ben o man fufuru den gudu disi puru na den anu (Esra 8:24-34). Na apostel Paulus ben tyari moni kon na wan fu yepi den brada nanga sisa na ini Yudea. A sorgu tu taki den sma di ben e tyari den moni disi go na Yudea ben e „du dati nanga wan krin ati na fesi Yehovah èn na fesi libisma”. (Leisi 2 Korentesma 8:18-21.) Na ini a ten disi, na organisâsi fu wi e teki na eksempre fu Esra nanga Paulus èn den brada e luku bun fa den e gebroiki den bijdrage.

13. Fa wi musu si den kenki di na organisâsi tyari kon na ini a ten di pasa?

¹³ Kande wan osofamiri e bosroiti fu no meki so furu paiman moro èn kande den tyari tra kenki kon tu so taki den man du moro gi Yehovah. Na so a de tu nanga Yehovah en organisâsi. Na ini den yari di pasa na organisâsi du furu nyun sani èn son leisi den ben e gebroiki moro moni leki san den ben e kisi leki bijdrage. Sobun, na organisâsi e suku fasi fa den kan du a wroko moro makriki so taki den no abi fu gebroiki tumusi furu moni. Na so den o man gebroiki a moni di wi e gi leki bijdrage na wan moro koni fasi.

14-16. (a) San na wan tu fu den sani di na organisâsi e du nanga den bijdrage fu wi? (b) Na sortu fasi yu kisi wini fu den seti dati?

¹⁴ Furu brada nanga sisa di e dini Yehovah bun langa kaba taki dati noiti den kisi so furu moi sani fu na organisâsi leki now. Denki a tori! Now wi abi jw.org nanga JW Broadcasting. A Bijbel​—Nyun-Grontapuvertaling kon na doro na ini moro tongo. Na ini 2014 nanga 2015, internationaal kongres hori dri dei langa na ini 14 foto èn na ini den moro bigi stadion. Den kongres disi ben nen, „Tan suku Gado Kownukondre fosi!” èn sma ben breiti srefisrefi fu de na den kongres disi.

 ¹⁵ Furu sma abi furu warderi gi den moi sani di den e kisi fu Yehovah en organisâsi. Fu eksempre, wan trowpaar di e dini na ini wan kondre na ini Asia e taki fu JW Broadcasting: „Wi e dini na ini wan pikin foto. Dati meki son leisi wi e firi leki wi de fara fu den tra brada nanga sisa èn a e pasa makriki taki wi e frigiti o bigi a wroko fu Yehovah de. Ma te wi e luku JW Broadcasting, dan dati e memre wi taki wi abi brada nanga sisa na heri grontapu. Den lobi brada nanga sisa fu wi na ini a kondre dyaso breiti srefisrefi nanga JW Broadcasting. Wi gwenti yere fa den e taki dati te den luku den programa fu ibri mun, dan a gersi leki den e kon sabi den brada fu a Tiri Skin moro bun. Now den breiti srefisrefi fu de na ini na organisâsi fu Yehovah.”

¹⁶ Na heri grontapu, pikinmoro 2500 Kownukondre zaal e bow now noso den e seti kon bun baka. Brada nanga sisa fu wan gemeente na ini Honduras di bigin gebroiki a nyun Kownukondre zaal fu den ben taki dati den ben e howpu fu abi den eigi Kownukondre zaal, èn now a winsi dati kon tru. Den ben skrifi: „Wi breiti taki wi de na ini na organisâsi fu Yehovah èn taki wi abi brada nanga sisa na heri grontapu di e anbegi Yehovah makandra nanga wi.” Furu sma ben taki den srefi sortu sani disi di den kisi Bijbel nanga tra publikâsi na ini den eigi tongo, di den kisi yepi baka wan rampu, noso di den si den moi bakapisi fu a preikiwroko di e du na presi pe furu sma e waka pasa.

17. Fa a fasi fa na organisâsi e drai na ini a ten disi e sori taki Yehovah e horibaka gi a wroko?

¹⁷ Furu sma di no de Yehovah Kotoigi, no man frustan fa wi kan du ala den sani di wi e du nanga soso den moni di wi e kisi leki bijdrage. Baka di wan driktoro fu wan bigi bedrijf kon luku wan fu den drukkerij fu wi, dan a no ben man bribi taki den sma di e wroko drape no e kisi pai gi a wroko di den e du èn taki na den bijdrage di sma e gi e pai gi den kostu fu a wroko dati. Boiti dati, na organisâsi fu wi no e orga sani fu man feni moni fu man du a wroko. A driktoro disi taki dati a fasi fa wi e du a wroko fu wi na wan wondru. Dati tru! Wi sabi taki wi man du dati soso fu di Yehovah e horibaka gi a wroko.​—Yob 42:2.

18. (a) Sortu blesi wi e kisi te wi e horibaka gi a Kownukondre? (b) Fa wi kan leri den pikin fu wi nanga nyun sma sosrefi fu teki prati na a wroko disi?

¹⁸ Yehovah e gi wi a grani nanga na okasi fu horibaka gi a Kownukondre wroko di prenspari srefisrefi. A e gi wi a dyaranti taki wi o kisi blesi te wi e horibaka gi a wroko disi (Mal. 3:10). Yehovah e pramisi taki te wi e gi bogobogo, dan sani o waka bun nanga wi. (Leisi Odo 11:24, 25.) Te wi e gi sani, dan wi o de koloku bika „wan sma sa de moro koloku te a e gi sani, leki te a e kisi sani” (Tori 20:35). Wi kan leri den pikin fu wi nanga nyun sma sosrefi fa den kan horibaka gi a wroko disi so taki den kan kisi furu blesi. Dati meki den sani di wi e taki èn e du musu de wan eksempre gi den.

19. Fa na artikel disi gi yu deki-ati?

¹⁹ Ala san wi abi wi kisi fu Yehovah. Te wi e horibaka gi na anbegi fu Yehovah, dan wi e sori en taki wi lobi en èn taki wi e warderi ala san a du gi wi (1 Kron. 29:17). Di a pipel fu Gado ben gi bijdrage fu bow a tempel dan den ’ben e prisiri, fu di den ben e du dati nanga den heri ati’ (1 Kron. 29:9). Meki wi tan gebroiki den sani di wi kisi fu Yehovah fu horibaka gi na anbegi fu en. Na so wi o de koloku èn wi o firi prisiri.