1. Fu san ede a ten disi de heri tra fasi leki iniwan tra ten?

WI E libi na ini wan ten di de heri tra fasi leki iniwan tra ten. Neleki fa Bijbel ben taki na fesi, Yehovah e tyari „wan bigi ipi sma” kon na wan di „komoto na ala kondre, lo, pipel, nanga tongo”. Den na „wan makti pipel” fu moro leki aiti milyun koloku sma di e „du santa wroko gi [Gado] dei nanga neti” (Openb. 7:9, 15; Yes. 60:22). Noiti ete so furu sma ben de di lobi Gado nanga tra sma.

2. Sortu lobi sma di no de mati fu Gado abi? (Luku a prenki na a bigin fu na artikel.)

² Ma Bijbel ben taki tu dati na ini a ten disi sma di no de mati fu Gado ben o abi wan tra sortu lobi. Den sma disi ben o lobi densrefi. Na apostel Paulus ben skrifi: „Na ini den lasti dei . . . , sma o lobi densrefi nomo. Den o lobi moni. . . . Den o lobi prisiri na presi taki den lobi Gado” (2 Tim. 3:1-4). A lobi disi de heri tra fasi leki a lobi di wi musu abi gi Gado. Sma di e denki densrefi nomo no de so koloku leki fa den ben fruwakti. Na fu di sma lobi densrefi tumusi meki a ten disi „tranga fu pasa”.

3. San wi o luku na ini na artikel disi, èn fu san ede wi o du dati?

 ³ Paulus ben sabi taki wan ten ben o kon taki furu sma ben o lobi densrefi tumusi èn a sani dati ben o tron wan tesi gi Kresten. Dati meki a warskow den fu „no bumui” nanga sma di lobi densrefi tumusi (2 Tim. 3:5). Ma wi no kan wai pasi krinkrin gi den sortu sma disi. Sobun, fa wi kan kibri wisrefi gi a denki fu den sma na wi lontu, aladi wi e meki muiti fu du san Yehovah, a Gado fu lobi, e aksi fu wi? Meki wi go luku san na a difrenti na mindri a lobi di Gado wani taki wi musu abi, nanga a lobi di 2 Timoteyus 3:2-4 e taki fu en. Dati o yepi wi fu ondrosuku wisrefi èn fu si fa wi kan sori a sortu lobi di o meki taki wi de koloku trutru.

4. Fu san ede a no fowtu fu lobi wisrefi?

⁴ Paulus ben skrifi: „Sma o lobi densrefi nomo.” A fowtu fu lobi wisrefi? Nôno, a fiti taki wi lobi wisrefi èn wi Gado wani tu taki wi du dati. Na so a meki wi. Yesus ben taki: „Un musu lobi tra sma leki fa un lobi unsrefi” (Mark. 12:31). Efu wi no lobi wisrefi, dan wi no o man lobi tra sma. Bijbel e taki tu: „Masra musu lobi den wefi leki den eigi skin. A man di lobi en wefi lobi ensrefi tu, bika nowan man abi bita-ati gi en eigi skin. Na presi fu dati, a e gi en nyanyan èn a lobi en” (Ef. 5:28, 29). Sobun, a de krin taki wi musu lobi wisrefi.

5. Sortu fasi sma di lobi densrefi tumusi abi?

⁵ A lobi di 2 Timoteyus 3:2 e taki fu en, a no wan lobi di fiti. A tekst disi e taki fu sma di lobi densrefi tumusi. Wan sma di lobi ensrefi tumusi, e denki moro fu ensrefi leki san de fanowdu. (Leisi Romesma 12:3.) So wan sma moro furu e broko en ede nanga ensrefi. A no e broko en ede nanga tra sma. Te sani no e waka bun, dan furu tron a e gi trawan a fowtu fu dati, na presi fu teki a frantwortu na en tapu. Den sortu sma disi no de koloku trutru.

6. San na a bakapisi te sma abi lobi gi Gado?

⁶ Son Bijbel sabiman e bribi taki Paulus ben e taki fosi fu sma di lobi densrefi tumusi, fu di a sortu lobi disi e meki taki sma e kisi den tra takru fasi di a e kari na ini a srefi tekst. Ma sma di lobi Gado abi heri tra fasi. Bijbel e sori taki sma di abi a lobi fu Gado abi prisiri, freide, pasensi, switifasi, bun-ati, bribi, safri-ati, èn den man dwengi densrefi (Gal. 5:22, 23). A psalm skrifiman ben taki: „Koloku fu den sma di abi Yehovah leki Gado!” (Ps. 144:15) Yehovah na wan koloku Gado èn den futuboi fu en de koloku tu. Èn tra fasi leki den sma di lobi densrefi tumusi èn e luku nomo san den man kisi, den futuboi fu Yehovah de koloku fu di den lobi gi trawan sani.​—Tori 20:35.

7. Sortu aksi o yepi wi fu kon sabi efu wi lobi Gado moro leki fa wi lobi wisrefi?

⁷ Fa wi kan kon sabi efu wi lobi wisrefi moro Gado? Luku a rai di skrifi na Filipisma 2:3, 4: „No strei nanga makandra èn no prakseri tumusi furu fu unsrefi, ma abi sakafasi èn si trawan moro hei leki unsrefi. No poti prakseri na un eigi afersi nomo, ma poti prakseri na den afersi fu trawan tu.” Wi musu aksi wisrefi: ’Mi e fiti a rai disi na ini mi libi? Mi e du muiti fu du san Yehovah e aksi fu mi? Mi e suku fasi fu yepi trawan na ini a gemeente èn na ini a preikiwroko?’ A no makriki ala ten fu gi wi ten nanga wi krakti fu yepi trawan. Kande wi o abi fu meki tranga muiti èn wi no o man du son sani di wi lobi. Ma wi o de koloku trutru  fu di wi sabi taki a Moro Hei Tiriman breiti nanga wi.

8. San son sma du fu di den lobi Gado?

⁸ Son Kresten di ben abi bun wroko, bosroiti fu libi a wroko dati fu go du moro gi Yehovah. Den teki a bosroiti disi fu di den lobi Gado. Ericka di e libi na Amerkankondre, na wan datra. A bosroiti fu pionier na presi fu gebroiki ala en ten gi a wroko fu en èn a pionier na difrenti kondre makandra nanga a masra fu en. A sisa disi e taki: „Den furu moi sani di wi ondrofeni na ini a kontren pe sma e taki wan tra tongo, sosrefi den bun mati di wi meki, meki taki wi e firi moro koloku. Mi e du datra wroko ete, ma now di mi man gebroiki mi ten moro furu fu yepi sma fu tron mati fu Gado èn fu de wan deki-ati gi den brada nanga sisa na ini a gemeente, mi de moro koloku.”

9. Fu san ede sma di lobi moni no o de koloku?

⁹ Paulus ben skrifi taki sma ben o „lobi moni”. Wan tu yari pasa, wan pionier na ini Ierland ben taki fu Gado nanga wan man. A man puru wan papira moni na ini en portmoni, a hori en na loktu èn sondro fu syen a taki: „Disi na mi gado!” Furu sma no ben o taki en so krin leki a man disi, ma toku den abi a srefi denki leki en. Den sma disi lobi moni nanga den sani di moni man bai. Toku Bijbel e warskow: „Solfru no o sari a sma di lobi solfru èn efu wan sma lobi gudu, dan a moni di a e meki no o sari en” (Preik. 5:10). Ala ten den sortu sma disi wani moro moni, den e feti fu kon abi en èn den e gi densrefi „furu pen”.​—1 Tim. 6:9, 10.

10. San Bijbel e taki fu gudu nanga pôtifasi?

¹⁰ A no de fu taki dati wi alamala abi moni fanowdu. Moni kan yepi wi nanga difrenti sani (Preik. 7:12). Ma fa a de te wan sma abi moni soso gi den moro prenspari sani di a abi fanowdu? Yu denki taki a kan de koloku trutru? Iya a kan! (Leisi Preikiman 5:12.) Agur, a manpikin fu Yakei ben skrifi: „No meki mi kon pôti èn no meki mi kon gudu tu. Meki mi nyan a nyanyan di mi abi fanowdu.” Wi kan frustan heri bun fu san ede a no ben wani pina tumusi. A taki tu taki a no ben wani taki a situwâsi dati ben o meki a fufuru sani, fu di dati ben o gi Gado porinen. Ma fu san ede a begi Gado fu no meki a kon gudu? A skrifi: „So taki mi no nyan mi bere furu èn drai mi baka gi yu èn taki: ’Suma na Yehovah?’” (Odo 30:8, 9) Kande yu sabi wan tu sma di poti ala den frutrow tapu den gudu fu den na presi fu frutrow tapu Gado.

11. San Yesus ben taki fu moni?

¹¹ Te wan sma lobi moni, dan Gado noiti no o breiti nanga a sma dati. Yesus ben taki: „Nowan sma kan dini tu masra leki srafu. Bika a o teige a wan masra èn lobi a trawan, noso a o horibaka gi a wan èn wisiwasi a trawan. Unu no kan dini Gado èn dini Gudu na a srefi ten.” Yesus ben taki tu: „No kibri yu gudu moro na grontapu pe woron nanga frustu kan pori en èn pe fufuruman kan kon fufuru en. Ma kibri yu gudu na ini hemel pe woron nanga frustu no man pori en èn pe fufuruman no man go fufuru en.”​—Mat. 6:19, 20, 24.

12. Fu san ede a moro makriki gi wi fu dini Gado te wi e libi sondro tumusi furu pranpran? Gi wan tu eksempre.

¹² Furu sma kon si taki te den e libi soso nanga den sani di den abi fanowdu  trutru, den e firi moro koloku èn den abi moro ten tu fu dini Yehovah. Jack di e libi na Amerkankondre ben seri a bigi oso nanga a bisnis fu en, fu di a ben sabi taki dati ben o gi en okasi fu go pionier makandra nanga a wefi fu en. A e taki: „A ben muilek gi mi fu seri a moi oso nanga dyari di wi ben abi na wan boitipresi. Ma furu yari langa mi no ben e prisiri te mi ben e kon na oso fu di mi ben e broko mi ede nanga den problema na wroko. Mi wefi di e pionier, ben e firi prisiri ala ten. A ben gwenti taigi mi: ’Mi abi a moro bun basi di de!’ Now di mi e pionier tu, dan wi ala tu e wroko gi a srefi sma, Yehovah.”

13. Fa wi kan kon sabi o prenspari moni de gi wi?

¹³ Te wi e ondrosuku o prenspari moni de gi wi, dan wi no musu kori wisrefi. A bun te wi e luku fa wi ben o piki den aksi disi: ’Mi e bribi san Bijbel e taki fu moni? A fasi fa mi e libi e sori dati? A de so taki moni na a moro prenspari sani gi mi? Den sani di mi abi prenspari moro a matifasi di mi abi nanga Yehovah èn nanga tra sma? Mi abi a frutrow taki Yehovah o sorgu gi mi?’ Wi kan de seiker taki noiti a o frigiti den sma di e howpu na en tapu.​—Mat. 6:33.

14. San na a yoisti fasi fa wi musu si prisiriten?

¹⁴ Soleki fa Bijbel ben taki na fesi, dan furu sma na ini a ten disi „lobi prisiri”. Neleki fa a no fowtu fu lobi wisrefi èn fu abi moni, na so a no fowtu tu fu abi prisiriten. Yehovah no wani taki wi e pina wisrefi noso taki wi no e du nowan enkri sani fu abi prisiri. Bijbel e gi reti-ati sma a deki-ati disi: „Go, nyan yu nyanyan nanga prisiri. Dringi yu win nanga wan prisiri ati.”​—Preik. 9:7.

15. San a wani taki fu de wan sma di „lobi prisiri”?

¹⁵ Na ini 2 Timoteyus 3:4 Paulus e taki fu den sma di e prakseri nomo fu abi prisiriten sondro fu broko den ede nanga Gado. Luku taki a vers dati no e taki dati sma ben o lobi prisiriten moro leki Gado, fu di dati ben o sori taki den lobi  Gado pikinso. Ma a tekst e taki „na presi taki” den lobi Gado. Wan sabiman ben skrifi: „A de krin taki a tekst disi no wani taki dati den lobi Gado pikinso. A tekst wani taki dati den no lobi Gado srefisrefi.” Disi na wan seryusu warskow gi den sma di e libi soso fu meki prisiri! Bijbel e taki dati ’sma di lobi prisiri’ musu luku bun, fu di ’den prisiri fu a libi kan meki den lasi pasi’.​—Luk. 8:14.

16, 17. Fa Yesus na wan eksempre gi wi te a abi fu du nanga prisiriten?

¹⁶ Yesus ben sori na wan heri moi fasi taki a no fowtu fu abi prisiri. A ben go na „wan trow-oso” èn wan tra leisi a ben de na wan „bigi fesa” (Yoh. 2:1-10; Luk. 5:29). Na a trow-oso, nofo win no ben de, sobun Yesus du wan wondru èn a kenki watra kon tron win. Na wan tra okasi, sma krutu Yesus fu di a ben e nyan èn ben e dringi na wan fesa. Dati meki a sori den sma dati krin taki den no ben e si sani na a yoisti fasi.​—Luk. 7:33-36.

¹⁷ Toku Yesus no ben e libi soso fu abi prisiriten. A ben e poti Yehovah na a fosi presi na ini en libi èn a ben e du ala san a ben man fu yepi trawan. A ben de klariklari fu dede na wan pina-postu so taki furu tra sma ben kan kisi libi. Yesus ben taigi den sma di ben o tron bakaman fu en: „Koloku fu unu te sma e gi unu porinen èn te den e frufolgu unu aladi den e lei èn e taki ala sortu ogri fu unu, fu di unu na mi bakaman. Un musu breiti èn prisiri pasa marki, fu di unu o kisi wan bigi pai na hemel. Bika na so sma ben frufolgu den profeiti di ben de fosi unu.”​—Mat. 5:11, 12.

18. Sortu aksi o yepi wi fu kon sabi o prenspari prisiriten de gi wi?

¹⁸ Fa wi kan ondrosuku gi wisrefi o prenspari prisiriten de gi wi? A bun te wi e aksi wisrefi: ’Mi lobi prisiriten moro leki mi lobi den konmakandra nanga a preikiwroko? Mi de klariklari fu libi wan tu sani di mi lobi, soso fu man dini Gado? Te mi wani abi prisiriten, dan mi e luku fosi efu den sani di mi o du na sani di Yehovah feni bun?’ Efu wi lobi Gado trutru, dan wi no o du sani di Gado no feni bun. Èn efu wi e tweifri efu Gado o feni wan sani bun, dan wi no o du en tu.​—Leisi Mateyus 22:37, 38.

19. Suma no kan de koloku noiti?

¹⁹ Sowan 6000 yari kaba a grontapu fu Satan e meki sma pina. Now di wi de na ini den lasti dei fu a sistema disi, grontapu lai nanga sma di e denki soso densrefi, den lobi moni, èn den lobi prisiri. Den sma disi e luku nomo san den man kisi èn den sani di den wani na den moro prenspari sani gi den. Den sortu sma dati no kan de koloku noiti. Na presi fu dati, Bijbel e taki: „Koloku fu a sma di abi a Gado fu Yakob leki en yepiman. Iya, a sma di e frutrow na tapu en Gado Yehovah.”​—Ps. 146:5.

20. Fa a lobi di yu abi gi Gado meki taki yu e firi koloku?

²⁰ Den futuboi fu Yehovah e kon lobi en moro nanga moro. Ibri yari furu tra sma e kon sabi Yehovah èn den e kon lobi en tu. Disi e sori taki Gado Kownukondre e tiri èn taki heri esi a o tyari blesi kon di wi no ben fruwakti srefi fu kisi! Na ini a tra artikel wi o luku wan tu fu den fasi di sma e kisi te den lobi densrefi tumusi èn wi o si tu fa den fasi dati e difrenti fu den bun fasi di den futuboi fu Yehovah abi.