1-2. (a) San Yehovah e si te a e luku den milyunmilyun sma di e kon na a Memrefesa? (Luku a fowtow tapu a kafti.) (b) San wi o luku na ini na artikel disi?

PRAKSERI san Yehovah e si te milyunmilyun sma na heri grontapu e kon makandra fu hori a Memrefesa. A no e si a bigi grupu wawan, ma a e luku ibri sma di de drape. Fu eksempre, a e si den sma di e kon ala yari. Sonwan fu den sma dati e kon na a Memrefesa aladi den e kisi hebi frufolgu. Tra sma no e kon na ala den konmakandra, ma den e si en leki wan prenspari sani fu go na a Memrefesa. Yehovah e si den sma tu di e kon fu a fosi leisi fu di den wani sabi fa wi e hori a konmakandra disi.

² A musu fu de so taki Yehovah breiti te a e si so furu sma na a Memrefesa (Luk. 22:19). Ma Yehovah no e broko en ede tumusi nanga a nomru fu sma di e kon. A e luku fu san ede den e kon. Na ini na artikel disi wi o poti prakseri na wan prenspari aksi: Fu san ede wi e go ala yari na a Memrefesa, èn na den konmakandra di Yehovah e seti ala wiki gi den wan di lobi en?

3-4. (a) Fu san ede wi e go na den konmakandra? (b) San wi e sori te wi e go na den konmakandra? (c) Te wi e luku san 1 Korentesma 11:23-26 e taki, dan fu san ede wi no musu misi a Memrefesa?

³ A moro prenspari reide fu san ede wi e go na den konmakandra, na fu anbegi Yehovah. Wi e go na den konmakandra tu fu kisi leri fu Yehovah. Sma di abi heimemre feni taki den no abi fu leri noti (3 Yoh. 9). Ma wi lobi fu kisi leri fu Yehovah nanga na organisâsi fu en.​—Yes. 30:20; Yoh. 6:45.

 ⁴ Te wi e go na den konmakandra, dan dati e sori taki wi abi sakafasi èn taki wi de klariklari fu teki leri. Wi e go na a Memrefesa fu di wi e si en leki wan prenspari konmakandra. Ma wi e go tu fu di wi wani saka wisrefi na ondro Yesus di taigi wi: „Tan du disi fu memre mi.” (Leisi 1 Korentesma 11:23-26.) A konmakandra dati e tranga wi bribi na ini den pramisi fu Yehovah èn a e memre wi o furu Yehovah lobi wi. Ma Yehovah sabi taki wán konmakandra na ini a yari no sari fu gi wi a deki-ati di wi abi fanowdu. Dati meki a sorgu taki wi abi konmakandra ala wiki èn a wani taki wi go na den. Te wi abi sakafasi, dan wi o gi yesi na en. Ibri wiki wi e gebroiki furu ten fu sreka wisrefi gi den konmakandra èn fu go na den.

5. Fu san ede sma di abi sakafasi e teki a kari fu Yehovah?

⁵ Ibri yari Yehovah e gi sma wan kari fu kon teki leri fu en, èn furu nyunwan di abi sakafasi e teki a kari disi (Yes. 50:4). Den lobi go na a Memrefesa èn den e bigin go tu na den tra konmakandra (Sak. 8:20-23). Den sma disi makandra nanga den wan di e dini Yehovah furu yari langa lobi fu kisi leri fu Yehovah, a sma ’di e yepi wi èn di de wi Frulusuman’ (Ps. 40:17). Nowan tra sani de so prenspari èn nowan sani e gi so furu prisiri leki fu kisi leri fu Yehovah nanga en Manpikin Yesus di a lobi so te!​—Mat. 17:5; 18:20; 28:20.

6. Fa sakafasi meki taki wan man go na a Memrefesa?

⁶ Ibri yari wi e du furu muiti fu gi so furu sma leki wi man wan kari fu kon na a Memrefesa. Furu sma di abi sakafasi kisi wini di den kon. Luku wan eksempre. Wan tu yari pasa wan man kisi wan kari fu kon na a Memrefesa, ma a taigi a brada di gi en a kari taki a no ben o man kon. Ma a neti fu a Memrefesa a brada skreki di a si a srefi man dati na ini a Kownukondre zaal. A fasi fa den brada nanga sisa ben kon gi a man disi odi ben naki en ati so te, taki a bigin kon na den konmakandra ala wiki. Fu taki en leti, a fosi yari di a bigin kon na den konmakandra a misi dri konmakandra nomo. Fu san ede a bosroiti fu kon na ala den konmakandra? Fu di a abi sakafasi. Bakaten a brada di ben gi en wan kari taki: „A man disi abi sakafasi trutru.” A no de fu taki dati Yehovah hari a man disi kon na ini a tru anbegi èn now en na wan dopu brada.​—2 Sam. 22:28; Yoh. 6:44.

7. Fa den sani di wi e leri na den konmakandra èn den sani di wi e leisi na ini Bijbel kan yepi wi fu abi sakafasi?

⁷ Den sani di wi e leri na den konmakandra èn di wi e leisi na ini Bijbel kan yepi wi fu abi sakafasi. Den wiki fosi a Memrefesa, den konmakandra fu wi e taki furu fu na eksempre fu Yesus èn fa a sori sakafasi di a dede leki wan lusu-paiman. Den dei fosi a Memrefesa a bun fu leisi den pisi na ini Bijbel di e taki fu den sani di pasa na a ten di Yesus dede èn di a kisi wan opobaka. Ala den sani disi e meki wi kisi moro warderi gi na ofrandi fu Yesus. Wi wani sori sakafasi neleki en èn wi wani du a wani fu Yehovah, awinsi a no makriki gi wi.​—Luk. 22:41, 42.

8. Fa Yesus sori deki-ati?

⁸ Wi e pruberi tu fu sori deki-ati neleki Yesus. Prakseri fa a sori deki-ati na ini den dei fosi a dede. A ben sabi heri bun taki den feanti fu en ben o gi en syen, taki den ben o fon en èn taki den ben o  kiri en (Mat. 20:17-19). Toku a ben de klariklari fu dede. Di a ten dati doro, a taigi den apostel fu en di ben de nanga en na Getseimanei: „Opo, meki wi gowe. Luku! A sma di o tori mi, doro kaba” (Mat. 26:36, 46). Di wan grupu sma kon teki en nanga fetisani, a waka go miti den èn a taigi den krin taki en na a sma di den e suku. A taigi den srudati tu fu meki den apostel fu en gowe (Yoh. 18:3-8). Yesus sori trutru deki-ati! Na ini a ten disi den salfu Kresten nanga den tra skapu e pruberi fu sori deki-ati neleki Yesus. Fa den e du dati?

9. (a) Fu san ede wi musu abi deki-ati fu man go na den konmakandra doronomo? (b) Fa na eksempre fu wi kan de wan deki-ati gi den brada nanga sisa di de na strafu-oso?

⁹ Son leisi wi musu abi deki-ati fu man go na den konmakandra doronomo, spesrutu te wi e kisi problema. Wan tu fu den brada nanga sisa fu wi e go na den konmakandra aladi wan sari sani miti den, aladi den lasi-ati noso den siki. Trawan e go na den konmakandra awinsi den e kisi gens fu famiriman noso fu lanti. Prakseri fa na eksempre fu wi de wan deki-ati gi den brada nanga sisa di de na strafu-oso fu a bribi fu den ede (Hebr. 13:3). Te den e yere fa wi e tan dini Yehovah awinsi wi e kisi tesi, dan dati e tranga a bribi fu den èn a e gi den deki-ati fu tan gi yesi na Yehovah. Na apostel Paulus ben ondrofeni a srefi sani. Di a ben de na strafu-oso na ini Rome, dan ibri leisi a ben breiti te a ben yere fa den brada nanga sisa ben e tan dini Gado go doro (Fil. 1:3-5, 12-14). Syatu fosi den lusu en noso syatu baka dati, Paulus skrifi en brifi gi den Hebrewsma. Na ini a brifi dati a gi den reti-ati Kresten deki-ati fu „tan lobi makandra leki brada” èn fu no misi den konmakandra.​—Hebr. 10:24, 25; 13:1.

10-11. (a) Suma wi musu kari kon na a Memrefesa? (b) Te wi e luku san Efeisesma 1:7 e taki, dan fu san ede wi musu du dati?

¹⁰ Wi e sori deki-ati te wi e kari famiri, sma na wrokope nanga birtisma kon na a Memrefesa. Fu san ede wi e du dati? Wi de nanga so furu tangi gi san Yehovah nanga Yesus du gi wi, taki wi e du ala san wi man fu kari tra sma kon na a Memrefesa. Wi wani taki den kon sabi tu fa den kan kisi wini fu a „bun-ati” di Yehovah sori nanga yepi fu a lusu-paiman.​—Leisi Efeisesma 1:7; Openb. 22:17.

¹¹ Boiti taki wi e sori deki-ati te wi e go na den konmakandra, wi e sori wan tra moi fasi di Gado nanga en Manpikin e sori tu.

12. (a) Fa den konmakandra e yepi wi fu kon abi moro lobi gi Yehovah nanga Yesus? (b) Sortu sani di Yesus du wi musu du tu, soleki fa 2 Korentesma 5:14, 15 e sori?

¹² Fu di wi lobi Yehovah nanga Yesus, meki wi e go na den konmakandra. Na a  tra sei, den sani di wi e leri na den konmakandra e meki wi kon abi moro lobi gi Yehovah nanga en Manpikin. Na den konmakandra wi e yere doronomo o furu den du gi wi (Rom. 5:8). Spesrutu a Memrefesa e memre wi o furu lobi den abi, srefi gi den wan di no e frustan ete o prenspari a lusu-paiman de. Fu di wi de nanga tangi, meki wi e meki muiti fu teki na eksempre fu Yesus ibri dei. (Leisi 2 Korentesma 5:14, 15.) Boiti dati, lobi e meki taki wi wani prèise Yehovah fu di a gi wi a lusu-paiman. Wan fasi fa wi kan prèise en, na te wi gi piki na den konmakandra.

13. Fa wi kan sori o furu wi lobi Yehovah nanga en Manpikin? Fruklari dati.

¹³ Wi kan sori o furu wi lobi Yehovah nanga en Manpikin te wi de klariklari fu du furu muiti fu go na den konmakandra. Furu sma musu go na den mindriwiki konmakandra te den komoto na wroko. Nofo tron tapu den dei dati wi weri. Tra konmakandra e hori tapu satra nanga sonde èn furu sma e rostu tapu den dei dati. A de so taki Yehovah e si taki wi e go na den konmakandra awinsi wi weri? Iya, seiker! Fu taki en leti, o moro muiti wi e meki, o moro Yehovah e warderi a lobi di wi e sori gi en.​—Mark. 12:41-44.

14. Fa Yesus sori lobi sondro fu denki ensrefi nomo èn fa wi kan teki na eksempre fu en?

¹⁴ Yesus sori wi fa wi kan sori lobi sondro fu denki wisrefi nomo. A ben de klariklari fu dede gi den disipel fu en. Boiti dati, ibri dei a ben e libi na wan fasi di e sori taki a no ben e suku en eigi bun, ma a ben e broko en ede nanga den disipel fu en. Fu eksempre, a ben e gi den bakaman fu en leri awinsi a ben weri noso awinsi a ben abi broko-ede (Luk. 22:39-46). A ben e luku san a ben kan du gi trawan, na presi fu luku san den ben kan du gi en (Mat. 20:28). Te wi abi so wan tranga lobi gi Yehovah èn gi wi brada nanga sisa, dan wi o du ala san wi man fu go na a Memrefesa èn na ala den tra konmakandra fu wi.

15. Suma wi wani yepi?

¹⁵ Wi de na ini a tru Kresten bribi èn wi lobi gebroiki wi ten fu gi sma wan kari fu kon na den konmakandra fu wi. Ma wi e  broko wi ede spesrutu nanga „den wan di abi a srefi bribi leki wi”, ma di no e preiki moro èn di no e kon moro na den konmakandra (Gal. 6:10). Wi e sori taki wi lobi den te wi e gi den deki-ati fu kon na den konmakandra, spesrutu na a Memrefesa. Neleki Yehovah nanga Yesus, wi e breiti srefisrefi te wan fu den brada nanga sisa disi e drai kon baka na Yehovah, wi lobi-ati Papa nanga Skapuman.​—Mat. 18:14.

16. (a) Fa wi kan gi makandra deki-ati èn fa den konmakandra e yepi wi? (b) Fu san ede disi na wan bun ten na ini a yari fu memre san Yesus taki na Yohanes 3:16?

¹⁶ Na ini den wiki di e kon, pruberi fu kari so furu sma leki yu man fu kon na a Memrefesa di o hori tapu freidaneti, 19 april 2019. (Luku a faki „ Yu o gi den wan kari?”) A heri yari wi wani gi makandra deki-ati fu kon doronomo na den konmakandra di Yehovah seti gi wi. Fu di a kaba fu a grontapu disi de krosibei, meki wi musu go na den konmakandra. Drape wi e kisi leri di e yepi wi fu abi sakafasi, deki-ati nanga lobi (1 Tes. 5:8-11). Meki wi sori taki wi lobi Yehovah nanga en Manpikin nanga wi heri ati, fu di den sori furu lobi gi wi!​—Leisi Yohanes 3:16.