1-2. (a) Fa a boskopu di skrifi na ini Yesaya 41:10 yepi wan sisa di nen Yoshiko? (b) Suma kan kisi wini fu a boskopu di Yehovah meki Yesaya skrifi?

WAN dei wan sisa di nen Yoshiko kisi takru nyunsu. En datra taigi en taki a siki seryusu èn a o libi wan tu mun nomo. San a sisa disi du? Yoshiko prakseri wan tekst di a ben lobi srefisrefi. Dati na Yesaya 41:10. (Leisi en.) Baka dati a taigi en datra taki a no e frede, bika Yehovah e hori en na en anu. * A tekst disi trowstu a lobi sisa fu wi èn a yepi en fu frutrow tapu Yehovah nanga en heri ati. A tekst disi kan yepi yu tu fu no bruya te hebi tesi e miti yu. Fu yepi yu fu frustan disi, wi o luku fu san ede Gado ben meki Yesaya taki a sani disi.

² Yehovah ben meki Yesaya skrifi den wortu disi fu trowstu den Dyu di ben o go bakaten na ini katibo na Babilon. Ma Yehovah no skrifi a boskopu disi soso fu trowstu den Dyu na ini katibo, ma a poti en na ini en Wortu so taki en pipel na ini a ten disi kan kisi wini fu en tu (Yes. 40:8; Rom. 15:4). Na ini a ten disi wi e libi na ini ’muilek ten di tranga fu pasa’. Dati meki wi abi a trowstu fanowdu di skrifi na ini a buku Yesaya.​—2 Tim. 3:1.

3. (a) Sortu dri sani Yehovah pramisi wi na ini Yesaya 41:10, a yaritekst fu 2019? (b) Fu san ede wi abi den pramisi disi fanowdu?

³ Na ini na artikel disi wi o luku dri sani di Yehovah pramisi  na ini Yesaya 41:10: (1) Yehovah o de nanga wi, (2) en na wi Gado èn (3) a o yepi wi. Den pramisi * disi o tranga a bribi fu wi. Wi abi den fanowdu fu di wi alamala e kisi tesi neleki Yoshiko. Boiti dati, wi e kisi problema fu di ogri e pasa na grontapu. Sonwan fu wi e kisi gens fu tiriman di abi furu makti. Meki wi go luku den dri sani di Yehovah pramisi wi.

4. (a) San na a fosi sani di Yehovah pramisi wi? (Luku sosrefi a futuwortu.) (b) San Yehovah taki fu sori taki a e firi gi wi? (c) Fa yu feni den sani di Yehovah taki?

⁴ A fosi sani di Yehovah pramisi na: „No frede, bika mi de nanga yu.” * Yehovah e sori taki a de nanga wi. Ala ten a e luku wi bun èn a e sori taki a e firi gi wi. Luku san a e taki na ini Yesaya 43:4: „Fu di mi e si unu leki wan gudu, meki mi e lespeki unu èn mi lobi unu.” Nowan sani na hemel noso grontapu kan tapu Yehovah fu lobi den wan di e dini en nanga den heri ati. Ala ten a o tai hori na den (Yes. 54:10). A sani disi e gi wi deki-ati. Fu di wi na en mati, meki a o kibri wi neleki fa a ben kibri en mati Abram (Abraham). Yehovah ben taigi en: „No frede, Abram. Na mi e kibri yu.”​—Gen. 15:1.

5-6. (a) Fa wi du sabi taki Yehovah wani yepi wi te wi e kisi tesi? (b) San wi kan leri fu na eksempre fu Yoshiko?

⁵ Wi sabi taki Yehovah wani yepi wi nanga den problema di wi abi fu di a pramisi wi: „Efu unu musu pasa na ini watra, mi o de nanga unu. Efu unu musu pasa na ini liba, mi o sorgu taki unu no sungu. Efu unu musu pasa na ini faya, unu no o bron. Iya, nowan faya o bron unu” (Yes. 43:2). San den wortu disi wani taki?

⁶ Yehovah no e pramisi taki a o puru den problema fu a libi gi wi. Ma a pramisi taki awinsi den problema fu wi furu  leki watra na ini wan liba, a o sorgu taki wi no sungu. Èn awinsi den tesi fu wi bigi leki wan faya, a o sorgu taki wi no bron. A pramisi wi taki a o de nanga wi èn taki a o yepi wi fu pasa den tesi di wi e kisi. Fa Yehovah o du dati? A o yepi wi fu abi wan korostu firi èn fu tan gi yesi na en awinsi wi musu dede srefi (Yes. 41:13). Yoshiko, di wi ben taki fu en, si taki disi tru. En umapikin e taki: „A ben naki wi ati fu si taki Mama no ben bruya. Wi ben si taki Yehovah ben meki a abi wan korostu firi. Te na a dei fu en dede, a ben e fruteri den ati-oso zuster nanga tra sikisma fu Yehovah èn fu den sani di a pramisi.” San wi e leri fu na eksempre fu Yoshiko? Te wi abi a frutrow taki Yehovah ’de nanga wi’, dan wi o kisi a krakti fu horidoro te wi e kisi tesi.

7-8. (a) San na a di fu tu sani di Yehovah pramisi èn san a wani taki? (b) Fu san ede Yehovah taigi den Dyu di ben de na ini katibo fu ’no luku leki den e frede’? (c) Sortu sani di skrifi na ini Yesaya 46:3, 4 yepi Gado pipel fu no frede?

⁷ Luku a di fu tu sani di Yehovah pramisi na ini Yesaya 41:10: „No luku leki yu e frede, bika mi na yu Gado.” San Yehovah wani sori wi nanga den wortu disi? A Hebrew wortu di vertaal nanga „no luku leki yu e frede” abi fu du nanga wan sma di e tan luku na en baka fu di a e frede wan sani, noso a abi fu du nanga wan sma di bruya fu di a de na ini wan muilek situwâsi.

⁸ Fu san ede Yehovah taigi den Dyu di ben o go na ini katibo fu ’no luku leki den e frede’? Fu di a ben sabi taki den sma na ini Babilon ben o kon frede. Fu san ede? Yehovah ben sori taki den Dyu ben o de na ini katibo 70 yari. Syatu fosi den ben o komoto na ini katibo, a tranga legre fu den Mediasma nanga den Persiasma ben o kon teki Babilon abra. Yehovah ben o gebroiki a legre disi fu fri en pipel (Yes. 41:2-4). Di den Babilonsma nanga den sma fu tra kondre di ben e libi na a ten dati yere taki den feanti fu den de krosibei, den ben wani yepi makandra fu no frede èn dati meki den ben e taki: „Abi deki-ati.” Boiti dati, den meki moro falsi gado fu di den ben howpu taki den ben o kibri den (Yes. 41:5-7). Ma Yehovah kowru na ati fu den Dyu di a taigi den: „Yu, Israel, yu na mi futuboi [den trakondre sma a no mi futuboi] . . . No luku leki yu e frede, bika mi na yu Gado” (Yes. 41:8-10). Luku taki Yehovah taigi den: „Mi na yu Gado.” Nanga den wortu disi Yehovah ben gi en pipel a dyaranti taki a no frigiti den. A ben de den Gado ete èn den ben de en pipel ete. A taigi den: ’Mi o tyari yu, so taki yu kan kisi frulusu.’ Den wortu disi ben musu fu gi den Dyu di ben de na ini katibo deki-ati.​—Leisi Yesaya 46:3, 4.

9-10. Fu san ede wi no abi fu frede? Gi wan agersitori.

⁹ Na ini a ten disi furu sma e frede fu di a situwâsi na grontapu e kon moro ogri. A no de fu taki dati wi srefi e kisi fu du nanga den problema disi. Ma wi no abi fu frede. Yehovah e taigi wi: „Mi na yu Gado.” Fa den wortu disi e yepi wi fu no frede?

¹⁰ Luku na agersitori disi: Tu man, Jim nanga Ben, de na ini wan opolani èn bigi winti e seki na opolani. Now den e yere wan sten e taki: „No lusu yu seat belt.  Bigi winti e seki na opolani èn wi o abi fu frei so wan pisi ten.” Jim e bigin frede. Ma dan a piloot e taki moro fara: „No frede, na a piloot e taki nanga unu.” Te Jim e yere disi, dan a e taki: „Luku fa na opolani e seki, dan a man disi e taigi wi fu no frede.” Ma Jim si taki Ben no e frede srefisrefi. Dati meki a e aksi en: „Fu san ede yu no e span?” Ben e lafu, dan a e taigi en: „Mi sabi a piloot bun. En na mi papa!” A e taigi en moro fara: „Meki mi fruteri yu suma na mi papa. Mi de seiker taki te yu sabi o bun a man frei opolani, yu no o frede moro.”

11. San wi e leri fu na agersitori fu den tu man na ini na opolani?

¹¹ San wi kan leri fu na agersitori disi? Neleki Ben, wi no e bruya fu di wi sabi Yehovah wi hemel Tata, heri bun. Wi sabi taki a o kibri wi te wi e kisi bigi problema na ini den lasti dei disi (Yes. 35:4). Fu di wi e frutrow tapu Yehovah, meki wi no e frede aladi den tra sma na grontapu e frede èn e beifi (Yes. 30:15). Boiti dati, neleki Ben wi e fruteri tra sma fu san ede den kan frutrow tapu Gado. Te den e frutrow tapu Gado, dan den srefi kan abi a dyaranti taki a o horibaka gi den, awinsi sortu tesi den e kisi.

12. (a) San na a di fu dri sani di Yehovah pramisi? (b) San den wortu ’Yehovah anu o tiri a kondre’ wani taki?

¹² A di fu dri sani di Yehovah pramisi na: „Mi o meki yu kon tranga. Mi o yepi yu trutru.” Yesaya ben taki kaba fa Yehovah ben o meki en pipel kon tranga. A ben taki: „Yehovah srefi o kon leki wan tranga fetiman èn en anu o tiri  a kondre” (Yes. 40:10). Nofo tron Bijbel e gebroiki a wortu „anu” fu sori taki wan sma abi makti. Sobun, te Yesaya e taki dati Yehovah „anu o tiri a kondre”, dan dati e memre wi taki Yehovah na wan makti Kownu. A gebroiki a bigi krakti fu en fu yepi en pipel na ini owruten èn fu kibri den. Te nanga now a e tan tranga den wan di e frutrow na en tapu èn a e kibri den tu.​—Deut. 1:30, 31; Yes. 43:10.

13. (a) Spesrutu na ini sortu situwâsi Yehovah e du san a pramisi wi? (b) Sortu pramisi fu Yehovah e gi wi deki-ati?

¹³ Spesrutu te feanti e gens wi, Yehovah e hori ensrefi na a pramisi disi: „Mi o meki yu kon tranga.” Na ini son kondre, feanti e pruberi fu tapu a preikiwroko fu wi noso den wani gens na organisâsi. Toku wi no e broko wi ede tumusi. Yehovah e gi wi a dyaranti disi: „Awinsi sortu fetisani sma meki fu feti nanga yu, a no o abi bun bakapisi” (Yes. 54:17). A pramisi disi e gi wi deki-ati èn a e meki taki wi no e frede awinsi san feanti wani du. Boiti dati, a e memre wi na dri prenspari sani.

14. Fu san ede a no e skreki wi taki feanti fu Gado e kon feti nanga wi?

¹⁴ A fosi sani na taki wi leki bakaman fu Krestes sabi taki sma o teige wi (Mat. 10:22). Yesus ben taki dati sma ben o frufolgu den disipel fu en na ini den lasti dei (Mat. 24:9; Yoh. 15:20). A di fu tu sani di wi e leri fu a profeititori fu Yesaya, na taki boiti taki den feanti fu wi ben o teige wi, den ben o teki fetisani fu kon feti nanga wi. Wan fu den fetisani na den ogri-ati lei di den ben o fruteri fu wi. Boiti dati, den ben o frufolgu wi hebi (Mat. 5:11). Yehovah no o tapu den feanti disi fu kon feti nanga wi (Ef. 6:12; Openb. 12:17). Ma wi no abi fu frede den. Fu san ede?

15-16. (a) San na a di fu dri sani di wi musu hori na prakseri èn fa Yesaya 25:4, 5 e sori disi? (b) Soleki fa Yesaya 41:11, 12 e sori, dan san o pasa nanga den wan di e kon feti nanga wi?

 ¹⁵ Luku san na a di fu dri sani di Yesaya 54:17 e memre wi. Yehovah taki dati nowan „fetisani” di sma meki fu kon feti nanga wi o „abi bun bakapisi”. Neleki fa wan skotu kan kibri wi gi a tranga winti fu wan sibibusi, na so Yehovah e kibri wi gi den „ogri-ati sma” di e kon na wi tapu. (Leisi Yesaya 25:4, 5.) Awinsi san den feanti fu wi du, den no o man tapu wi fu kisi têgo libi.​—Yes. 65:17.

¹⁶ Yehovah e fruteri wi finifini tu san o pasa nanga den ’sma di ati e bron nanga’ wi. A sani disi e gi wi furu deki-ati. (Leisi Yesaya 41:11, 12.) Awinsi sortu ogri den feanti wani du nanga wi, noso awinsi o hebi a feti o de, wi kan de seiker fu a sani disi: Ala den feanti fu Gado pipel „o tron noti èn den o dede”.

17-18. (a) Te wi e leisi Bijbel, dan fa dati o yepi wi fu frutrow moro tapu Yehovah? Gi wan eksempre. (b) Fu san ede wi musu denki dipi fu a yaritekst fu 2019?

¹⁷ Te wi e leri sabi Yehovah bun, dan wi o frutrow moro na en tapu. A wan-enkri fasi fa wi kan kon sabi Gado bun, na te wi e leisi Bijbel èn te wi e denki dipi fu san wi leisi. Na ini Bijbel wi kan leisi fa Yehovah kibri en pipel na ini owruten. Den tori dati e gi wi a dyaranti taki a o yepi wi na ini a ten disi tu.

¹⁸ Luku na sortu moi fasi Yesaya e sori fa Yehovah e kibri wi. A e kari Yehovah wan skapuman èn den futuboi fu en na pikin skapu. Yesaya e taki fu Yehovah: „Nanga en anu a o tyari den pikin skapu kon na wán èn a o hori den na en borsusei te a e tyari den” (Yes. 40:11). Te wi e leisi taki Yehovah e tyari wi na ini en anu, dan dati e meki wi firi korostu èn wi no e frede moro. A koni srafu di de fu frutrow wani yepi wi fu no frede awinsi sortu problema wi o kisi. Dati meki den teki Yesaya 41:10 leki a yaritekst fu 2019: No frede, bika mi na yu Gado. Denki dipi fu den wortu disi. Den o gi yu a krakti di yu abi fanowdu fu pasa den tesi di yu o kisi.