1. Fa yu e firi te yu e prakseri a lobi fu Gado?

„GADO na lobi”, Yohanes ben skrifi (1 Yoh. 4:8). Den wortu disi e meki wi prakseri a prenspari tori disi: Wi sabi taki libi komoto fu Gado, ma lobi komoto fu Gado tu. Yehovah lobi wi. A lobi fu en e meki wi firi koloku fu di wi abi a dyaranti taki sani o waka bun nanga wi.

2. (a) San na den tu moro bigi komando, soleki fa Mateyus 22:37-40 e sori? (b) Fu san ede a muilek son leisi fu hori wisrefi na a di fu tu komando?

² Leki Kresten, wi sabi taki wi musu sori lobi. Disi na wan komando di Gado gi wi. (Leisi Mateyus 22:37-40.) Te wi kon sabi Yehovah bun, dan kande a no o muilek gi wi fu hori wisrefi na a fosi komando fu di Yehovah no abi sondu. A e hori den firi fu wi na prakseri èn a abi switifasi. Ma kande a muilek gi wi fu hori wisrefi na a di fu tu komando. Fu san ede? Fu di den brada nanga sisa fu wi di wi sabi bun, na sondusma. Son leisi den kan du noso taki sani di e hati wi. Yehovah ben sabi taki disi ben o pasa. Fu dati ede a meki son Bijbel skrifiman skrifi rai di e sori wi fu san ede wi musu sori lobi gi makandra èn fa wi musu dati. Wan fu den Bijbel skrifiman disi na Yohanes.​—1 Yoh. 3:11, 12.

3. San Yohanes ben taki fu lobi?

³ Na ini den buku di Yohanes skrifi, a sori ibri tron baka taki Kresten musu sori lobi. Te yu e luku san Yohanes skrifi fu a libi fu Yesus, dan yu e si taki a taki moro fu lobi leki ala den tra Evangelie skrifiman. Di Yohanes skrifi na  Evangelietori nanga den dri brifi fu en, dan a ben abi pikinmoro 100 yari. Den Bijbel buku disi e sori wi taki wan Kresten musu du ala sani nanga lobi (1 Yoh. 4:10, 11). Ma a teki ten fosi Yohanes kon frustan a sani dati.

4. Yohanes ben sori lobi gi trawan ala ten?

⁴ Di Yohanes ben de wan yonguman, a no ben e sori lobi ala ten. Wan leisi, Yesus nanga den disipel fu en ben e waka pasa na ini Samaria fu go preiki na Yerusalem. Ma den sma fu wan fu den dorpu na ini Samaria no ben wani sori switifasi gi den. Dati meki en nanga en brada Yakobus aksi Yesus efu den ben musu meki faya saka komoto fu hemel fu kiri den sma fu a dorpu (Luk. 9:52-56). Wan tra leisi, Yohanes no ben sori lobi gi den tra apostel. Soleki fa a sori, dan en nanga en brada Yakobus, meki den mama aksi Yesus fu gi den prenspari posisi na ini a Kownukondre. Di den tra apostel yere san Yakobus nanga Yohanes du, den ati bron srefisrefi (Mat. 20:20, 21, 24). Ma aladi Yohanes meki den fowtu disi, toku Yesus ben lobi en.​—Yoh. 21:7.

5. San wi o luku na ini na artikel disi?

⁵ Na ini na artikel disi, wi o luku san wi kan leri fu Yohanes èn wi o luku wan tu fu den sani di a skrifi fu lobi. Disi o sori fa wi kan sori lobi gi den brada nanga sisa fu wi. Wi o leri tu san na wan prenspari sani di osofamiri-edeman musu du fu sori den osofamiri taki den lobi den.

6. Fa Yehovah sori taki a lobi wi?

⁶ Nofo tron, wi e prakseri taki te wi e denki bun fu trawan noso te wi e taki switi nanga den, dan dati wani taki dati wi lobi den. Ma te wi lobi sma trutru, dan wi musu du bun sani gi den tu. (Luku Yakobus 2:17, 26.) Fu eksempre, Yehovah lobi wi (1 Yoh. 4:19). Wi sabi taki a lobi wi fu di Bijbel e fruteri wi dati (Ps. 25:10; Rom. 8:38, 39). Ma wi no e bribi nomo taki a lobi wi fu di a taki dati, ma fu di a du sani tu fu sori a lobi dati. Yohanes skrifi: „Disi na a fasi fa Gado sori taki a lobi wi: Gado ben seni en wan-enkri Manpikin kon na grontapu, so taki a kan yepi wi fu kisi libi” (1 Yoh. 4:9). Yehovah gi pasi taki en lobi Manpikin pina èn dede gi wi (Yoh. 3:16). Dati meki wi de seiker taki Yehovah lobi wi.

7. San Yesus du fu sori taki a lobi wi?

⁷ Yesus ben taigi den bakaman fu en taki a lobi den (Yoh. 13:1; 15:15). Den  sani di a taki nanga den sani di a du, ben sori o furu a lobi den èn o furu a lobi wi. Yesus ben taki: „A moro bigi lobi di wan sma kan sori, na fu gi en libi gi den mati fu en” (Yoh. 15:13). San wi musu du te wi e prakseri ala den sani di Yehovah nanga Yesus du gi wi?

8. San 1 Yohanes 3:18 e taki dati wi musu du?

⁸ Te wi e gi yesi na Yehovah nanga Yesus, dan wi e sori taki wi lobi den (Yoh. 14:15; 1 Yoh. 5:3). Yesus ben taigi wi krin taki wi musu lobi makandra (Yoh. 13:34, 35). Wi no musu taigi wi brada nanga sisa nomo taki wi lobi den, ma wi musu du sani tu fu sori den taki wi lobi den. (Leisi 1 Yohanes 3:18.) San na wan tu sani di wi kan du fu sori a lobi dati?

9. San lobi ben meki Yohanes du?

⁹ Efu Yohanes ben wani, a ben kan tan wroko nanga en papa fu meki moni na ini a fisi bisnis fu den. Ma na presi fu dati, a gebroiki en heri libi fu leri sma fu Yehovah nanga Yesus. A libi dati no ben makriki gi en. Sma ben e frufolgu en èn na a kaba fu a fosi yarihondro, sma seni en go na strafu di a ben kon owru kaba (Tori 3:1; 4:1-3; 5:18; Openb. 1:9). Yohanes tan sori lobi gi trawan, srefi di a ben de na strafu fu di a ben preiki fu Yesus. Fu eksempre, di a ben de na a èilanti Patmos, a ben kisi wan openbaring. A skrifi a boskopu dati, dan a seni en gi den gemeente, so taki den ben kan sabi san na „den sani di musu pasa dyonsro” (Openb. 1:1). Soleki fa a sori, dan di Yohanes komoto na strafu na Patmos, a skrifi na Evangelietori di e taki fu a libi fu Yesus nanga a diniwroko fu en. A ben skrifi dri brifi tu fu gi den brada nanga sisa fu en deki-ati èn fu tranga den. Fa yu kan teki na eksempre fu Yohanes?

10. Fa yu kan sori taki yu lobi tra sma?

¹⁰ A fasi fa yu o gebroiki yu libi, kan sori taki yu lobi trawan. A grontapu fu Satan wani taki yu gebroiki ala yu ten nanga krakti gi yusrefi, taki yu e pruberi fu meki moni, èn taki yu suku biginen. Ma na heri grontapu, Kownukondre preikiman e gebroiki so furu ten leki den man fu preiki a bun nyunsu èn fu yepi sma fu kon moro krosibei na Yehovah. Sonwan fu den tron furuten preikiman srefi.

11. Fa furu preikiman e sori taki den lobi Yehovah nanga den brada nanga sisa fu den?

¹¹ Furu fu wi brada nanga sisa musu wroko tranga fu sorgu densrefi nanga den osofamiri. Toku den preikiman disi e horibaka gi na organisâsi fu Yehovah so furu leki den man. Fu eksempre, sonwan fu den e yepi te rampu pasa. Trawan e yepi fu du bow-wroko, èn ala sma kan gi bijdrage fu horibaka gi a wroko di e du na heri grontapu. Den e du den sani disi fu di den lobi Gado nanga tra sma. Ibri wiki te wi de na den konmakandra èn te wi e teki prati na den, wi e sori wi brada nanga sisa taki wi lobi den. Awinsi wi weri, toku wi de na den konmakandra. Awinsi wi e senwe pikinso, toku wi e gi piki. Èn awinsi wi abi wi eigi problema, toku wi e gi wi brada nanga sisa deki-ati fosi a konmakandra èn baka a konmakandra (Hebr. 10:24, 25). Wi de nanga tangi trutru gi a wroko di wi brada nanga sisa e du.

12. San na wan tra fasi fa Yohanes ben sori taki a lobi den brada nanga sisa fu en?

¹² Yohanes sori den brada nanga sisa fu en taki a lobi den. Dati meki a no ben e prèise den wawan, ma a ben e gi den rai  tu. Na ini den brifi fu en, Yohanes e prèise den brada nanga sisa fu en gi a bribi fu den èn gi den bun sani di den du. Ma a gi den seryusu rai tu di abi fu du nanga sondu (1 Yoh. 1:8–2:1, 13, 14). Na ini a ten disi wi musu prèise wi brada nanga sisa tu gi den bun sani di den du. Ma efu wan sma e tyari ensrefi na wan fasi di no fiti, noso efu a du wan sani di kan pori a matifasi fu en nanga Yehovah, dan wi kan gi en rai na wan switi fasi. Na a fasi dati wi e sori taki wi lobi en. Yu musu abi deki-ati fu gi wan mati fu yu rai. Ma Bijbel e taki dati trutru mati e yepi makandra noso den e srapu makandra fu du san bun.​—Odo 27:17.

13. San wi no musu du?

¹³ Son leisi, na den sani di wi no e du e sori taki wi lobi wi brada nanga sisa. Wan eksempre fu dati, na taki yu no e mandi esi te den taigi yu wan sani di yu no lobi. Prakseri san ben pasa na a kaba fu Yesus libi dyaso na grontapu. A ben taigi den disipel fu en taki efu den ben wani kisi libi, den ben musu nyan en skin èn dringi en brudu (Yoh. 6:53-57). A sani dati ben gi furu fu den disipel fu en groskin, èn fu dati ede den ben gwe libi en. Ma den trutru mati fu en tan nanga en. Yohanes ben de wan fu den. Den tan horibaka gi en. Den no ben frustan krin san Yesus ben wani taigi den, èn kande den ben e fruwondru tu fu a sani di a taki. Ma den mati fu Yesus no ben denki taki a sani di a ben taki no ben bun, èn dati meki den no firi wan fasi di a taki so. Na presi fu dati den ben frutrow en fu di den ben sabi taki a ben e fruteri san tru (Yoh. 6:60, 66-69). A prenspari srefisrefi taki wi no mandi esi te wan mati fu wi taki wan sani di wi no lobi. Na presi fu dati wi o taki nanga en fu a tori fu man frustan makandra moro bun.​—Odo 18:13; Preik. 7:9.

14. Fu san ede wi no musu abi bita-ati gi wi brada nanga sisa?

¹⁴ Yohanes e taigi wi tu fu no abi bita-ati gi wi brada nanga sisa. Efu wi no e gi yesi na a rai dati, dan wi kan gi Didibri okasi fu kori wi (1 Yoh. 2:11; 3:15). Na dati pasa tu nanga wan tu Kresten na a kaba fu a fosi yarihondro. Na a ten dati, Satan ben e du ala san a man fu meki den Kresten abi bita-ati gi makandra èn fu  tyari pratifasi kon na den mindri. Na a ten di Yohanes skrifi den brifi fu en, man ben boro kon na ini a gemeente di ben e pruberi fu du san Satan ben e du. Wan fu den ben de Diotrefes di ben e suku fu tyari prati kon na ini wan fu den gemeente (3 Yoh. 9, 10). Diotrefes no ben abi lespeki gi den brada di a tiri skin ben seni kon luku a gemeente. A ben pruberi srefi fu puru sma fu a gemeente di ben e sori switifasi gi sma di a no ben lobi. A man disi ben abi bigifasi trutru. Na ini a ten disi, Satan e tan pruberi fu tyari pratifasi kon na mindri a pipel fu Gado. Dati meki wi wani du ala muiti fu no gi pasi taki bita-ati tyari prati kon na wi mindri.

15. San wan osofamiri-edeman musu hori na prakseri?

¹⁵ Wan prenspari fasi fa wan osofamiri-edeman kan sori taki a lobi en osofamiri, na te a e sorgu gi den (1 Tim. 5:8). Ma a musu hori na prakseri taki a moro prenspari fu yepi en osofamiri fu abi wan bun matifasi nanga Gado (Mat. 5:3). Luku sortu moi eksempre Yesus e gi osofamiri-edeman. Soleki fa na Evangelietori fu Yohanes e sori, Yesus ben e prakseri en famiri srefi di a ben de fu dede na a pina-postu. Yohanes ben e tanapu drape tu makandra nanga Yesus en mama. Yesus ben abi furu skin-ati, ma toku a aksi Yohanes fu sorgu gi Maria (Yoh. 19:26, 27). A no de fu taki dati Yesus ben abi brada nanga sisa di ben o man sorgu Maria. Ma soleki fa a sori, nowan fu den ben tron bakaman fu en ete. Dati meki Yesus ben wani de seiker taki wan sma ben o sorgu Maria èn gi en deki-ati fu tan dini Yehovah.

16. Sortu frantwortu Yohanes ben abi?

¹⁶ Yohanes ben abi furu frantwortu. Fu di a ben de wan fu den apostel, meki a ben musu teki fesi na ini a preikiwroko. Ma kande a ben trow tu. Sobun, a ben musu sorgu gi en osofamiri èn a ben musu yepi den fu abi wan bun matifasi nanga Yehovah (1 Kor. 9:5). San osofamiri-edeman na ini a ten disi e leri fu Yohanes?

17. Sortu prenspari frantwortu wan osofamiri-edeman abi?

¹⁷ Wan brada di de wan osofamiri-edeman, kan abi difrenti hebi frantwortu.  A no de fu taki dati a musu wroko tranga na en grontapuwroko fu gi Yehovah grani (Ef. 6:5, 6; Tit. 2:9, 10). Kande a e dini leki owruman noso dinari na ini a gemeente. Disi wani taki dati a musu yepi en brada nanga sisa, taki a musu gi den deki-ati, èn taki a musu wroko makandra nanga den na ini a preikiwroko. Ma na a srefi ten a musu studeri Bijbel nanga en wefi èn nanga den pikin fu en. Na osofamiri fu en o breiti srefisrefi taki a e meki muiti fu sorgu taki den de gosontu, taki den de koloku, èn taki a e yepi den fu tan bun mati fu Yehovah.​—Ef. 5:28, 29; 6:4.

18. San Yohanes ben sabi seiker?

¹⁸ Yohanes ben libi wan langa libi èn a ben ondrofeni furu sani. Ala sortu tesi ben miti en di ben kan swaki a bribi fu en. Fu di a ben abi a gwenti fu du san Yesus ben leri en, meki a ben sori lobi gi en brada nanga sisa. Dati meki Yohanes ben de seiker taki Yehovah nanga Yesus ben lobi en èn taki den ben o gi en a krakti fu pasa iniwan tesi di ben kan miti en (Yoh. 14:15-17; 15:10; 1 Yoh. 4:16). Satan nanga a grontapu fu en no ben man tapu Yohanes fu du èn fu taki sani di ben e sori taki a lobi den brada nanga sisa fu en.

19. San 1 Yohanes 4:7 e gi wi deki-ati fu du, èn fu san ede?

¹⁹ Neleki fa a ben de nanga Yohanes, wi e libi na ini wan grontapu di Satan e tiri èn wi sabi taki Satan no lobi nowan sma (1 Yoh. 3:1, 10). A no de fu taki dati a no wani taki wi lobi den brada nanga sisa fu wi. Ma solanga wi no gi en na okasi, a no o man tapu wi fu sori a lobi dati. Dati meki wi wani tan sori wi brada nanga sisa taki wi lobi den. Disi musu de fu si na den sani di wi e taki èn na den sani di wi e du. Efu wi tan sori lobi, dan wi o breiti fu de na ini a bigi famiri fu Yehovah.​—Leisi 1 Yohanes 4:7.