1. Na ini sortu muilek situwâsi David ben de?

 DAVID ben e lowe fu di Saul, a makti kownu fu Israel, ben de nomonomo fu kiri en. Di David ben abi nyanyan fanowdu, dan a stop na a foto Nob fu aksi feifi brede nomo (1 Sam. 21:1, 3). Bakaten en nanga den man fu en go kibri na ini wan bergi-olo (1 Sam. 22:1). Fu san ede David ben de na ini a situwâsi disi?

2. Fa Saul ben e suku problema gi ensrefi? (1 Samuel 23:16, 17)

² Saul ben dyarusu srefisrefi tapu David fu di furu sma ben lobi David èn a ben wini furu feti. Saul ben sabi tu taki na fu di a ben trangayesi Yehovah, meki Yehovah no ben feni en bun moro leki kownu fu Israel. A ben sabi tu taki Yehovah ben teki David leki kownu. (Leisi 1 Samuel 23:16, 17.) Ma leki kownu fu Israel, Saul ben abi wan bigi legre èn furu sma ben e horibaka gi en. Dati meki David ben musu lowe. Yu denki taki Saul ben prakseri taki a ben kan tapu Gado fu poti David leki kownu? (Yes. 55:11) Bijbel no e taki dati, ma wi kan de seiker fu a sani disi: Saul ben e suku problema gi ensrefi. Den sma di e feti teige Gado noiti no o wini!

3. Fa David ben firi aladi a ben de na ini wan muilek situwâsi?

³ David ben de wan man di ben abi sakafasi. A no ben e suku fu tron kownu fu Israel. Na Yehovah ben gi en a wroko dati (1 Sam. 16:1, 12, 13). Bakaten Saul ben e si David leki wan bigi feanti fu en. Ma toku David no ben feni taki na Yehovah ben meki den sani disi pasa nanga  en. David no ben e krutu tu di a ben e pina nyanyan èn di a ben musu kibri na ini wan bergi-olo. A kan taki na di a ben kibri na ini a bergi-olo dati a skrifi a moi prèisesingi pe a thema tekst fu wi skrifi: „Den sma di e suku yepi na Yehovah, no o mankeri noti.”​—Ps. 34:10.

4. Sortu aksi wi o luku èn fu san ede a prenspari fu poti prakseri na den aksi disi?

⁴ Na ini a ten disi furu futuboi fu Yehovah no abi nofo nyanyan nanga tra prenspari sani di de fanowdu na ini a libi. * Disi de so, spesrutu na ini a Covid-situwâsi pe wi de na ini now. Èn fu di a „bigi banawtu” de krosibei, meki wi kan fruwakti taki moro muilek ten o kon (Mat. 24:21). Fu dati ede wi o poti prakseri na fo aksi: Fu san ede David taki dati a ’no ben mankeri noti’? Fu san ede wi musu leri fu de tevrede nanga san wi abi? Fu san ede wi kan de seiker taki Yehovah o sorgu gi wi? Èn fa wi kan sreka now gi sani di o pasa na ini a ten di e kon?

5-6. Fa Psalm 23:1-6 e yepi wi fu frustan san David ben wani sori di a taki dati den futuboi fu Gado „no sa mankeri noti”?

⁵ San David ben wani sori di a taki dati den futuboi fu Yehovah „no o mankeri noti”? Wi kan frustan den wortu disi te wi e luku Psalm 23 pe den srefi sortu wortu skrifi. (Leisi Psalm 23:1-6.) David e bigin a psalm dati nanga den wortu disi: „Yehovah na mi Skapuman. Mi no sa mankeri noti.” Moro fara na ini a psalm, David e taki fu sani di prenspari trutru. Fu eksempre, a e taki fu den bun sani di Yehovah gi en fu di a ben si Yehovah leki en Skapuman. David e taki dati Yehovah yepi en fu „libi na wan reti fasi” èn Yehovah horibaka gi en na ini bun ten nanga muilek ten. David ben e si ensrefi leki wan skapu di Yehovah e tyari go na „wei pe furu grasi e gro”. Ma a ben sabi tu  taki a ben o kisi problema. A ben sabi taki son leisi a ben o lasi-ati èn a ben o firi neleki a ben e waka „na ini a lagipresi di dungru pikapika”. Boiti dati, a ben o abi feanti tu. Ma fu di Yehovah ben de en Skapuman, meki David no ben frede „nowan ogri”.

⁶ Sobun, kow luku a piki tapu a fosi aksi: Fu san ede David ben taki dati a ’no ben e mankeri noti’? David ben abi ala sani di a ben abi fanowdu fu tan krosibei fu Yehovah. A no ben abi furu sani fanowdu fu man de koloku. David ben de tevrede nanga den sani di Yehovah ben gi en. San ben moro prenspari gi en ben de den blesi di a ben kisi fu en Gado èn a fasi fa en Gado ben e kibri en.

7. Soleki fa Lukas 21:20-24 e sori, dan sortu muilek situwâsi ben miti den Kresten na ini Yudea?

⁷ Den wortu fu David e leri wi fa wi musu si gudu. A no de fu taki dati wi kan prisiri nanga den gudu di wi abi, ma den no musu kon na a fosi presi na ini wi libi. Na a prenspari sani disi den Kresten di ben e libi na ini Yudea ben musu kon frustan. (Leisi Lukas 21:20-24.) Yesus ben warskow den taki wan ten ben o kon pe ’legre ben o seti kampu lontu Yerusalem’. Te dati ben o pasa, dan den ben musu „bigin lowe go na den bergi”. Na so den ben o tan na libi, ma den ben o abi fu libi furu sani na baka. Wan tu yari pasa A Waktitoren ben taki fu a tori disi: „Den ben libi den djari nanga den oso, èn den no ben tjari den goedoe foe den oso kon na wan srefi. Foe di den ben abi froetrow taki Jehovah ben o kibri den èn ben o jepi den, meki den ben poti na anbegi foe en na tapoe a fosi presi, bifo ala tra sani di kande ben sa kan de prenspari.”

8. Sortu prenspari sani wi kan leri te wi e luku san miti den Kresten na ini Yudea?

⁸ Sortu prenspari sani wi kan leri te wi e luku san miti den Kresten na ini Yudea? A Waktitoren di wi ben kari kaba taki: „A fasi fa wi e si materia goedoe kan de wan tesi gi wi na ini a ten di e kon; den de a moro prenspari sani gi wi, noso a de so, taki a froeloesoe di sa de gi ala sma di de na a sei foe Gado, de moro prenspari? Ija, a lowe di wi moesoe lowe kan abi foe doe nanga wan toe problema èn sani di wi sa lasi. Wi sa abi foe de klariklari foe doe ala sani di de fanowdoe, soleki fa wi fosi jarihondro kompe ben doe di den ben lowe gowe foe Judea.” *

9. Sortu deki-ati yu e kisi fu a rai di na apostel Paulus ben gi den Hebrewsma?

⁹ A ben musu fu muilek gi den Kresten dati fu gowe libi ala san den ben abi fu bigin wan nyun libi na wan tra presi. Den ben musu abi a bribi taki Yehovah ben o sorgu gi den. Ma san ben kan yepi den? Feifi yari fosi den Romesma ben lontu Yerusalem, na apostel Paulus ben gi den Hebrewsma a prenspari rai disi: „No meki a fasi fa unu e libi sori taki unu lobi moni. Ma un musu breiti nanga den sani di unu abi now, bika Gado taki: ’Mi no o libi yu kwetikweti èn noiti mi o gowe fu yu.’ Na so fasi wi kan abi deki-ati èn wi kan taki: ’Yehovah na mi yepiman. Mi no o frede. San libisma kan du mi?’” (Hebr. 13:5, 6) A no de fu taki dati den sma di ben du san Paulus ben taigi den fosi den Romesma teki a foto abra, no ben feni en muilek fu kon gwenti a libi na a nyun presi pe den ben go tan. Den ben kan de seiker taki Yehovah ben o gi den ala  san den ben abi fanowdu. Den wortu fu Paulus e sori taki wi kan abi a frutrow dati tu.

10. Sortu moi rai Paulus gi wi?

¹⁰ Paulus ben gi Timoteyus wan srefi sortu rai èn wi srefi kan teki a rai dati. A ben skrifi: „Sobun, efu wi abi nyanyan, krosi nanga wan presi fu tan, dan wi musu breiti nanga den sani disi” (1 Tim. 6:8). Ma yu denki taki disi wani taki dati wi no mag nyan switi nyanyan, wi no mag abi wan moi oso, noso wi no mag bai nyun krosi son leisi? A no dati Paulus ben wani taki. Paulus ben wani sori wi taki wi musu de tevrede nanga san wi abi (Fil. 4:12). Na a sani dati ben e yepi Paulus. A moro prenspari sani di wi abi a no den gudu fu wi, ma na a matifasi di wi abi nanga wi Gado.​—Hab. 3:17, 18.

11. Fa den sani di Moses taigi den Israelsma e leri wi fu de tevrede?

¹¹ Kande wi e denki taki wi abi son sani fanowdu, ma a kan taki Yehovah e denki tra fasi fu a tori disi. Luku san Moses taigi den Israelsma, baka di den ben tan 40 yari na ini a gran sabana: „Yehovah un Gado blesi ala sani di unu du. A sabi heri bun fa unu waka na ini a bigi sabana disi. Ala den fotenti yari di pasa, Yehovah un Gado ben de nanga unu. Unu no ben mankeri noti” (Deut. 2:7). Na ini den 40 yari dati, Yehovah ben gi den Israelsma mana fu nyan. Den krosi fu den ben de den  srefi krosi di den ben weri di den gowe libi Egepte. Den tan bun ala den yari dati (Deut. 8:3, 4). A kan taki son Israelsma ben feni taki den sani disi no ben sari. Toku Moses ben memre den taki den ben abi ala sani di den ben abi fanowdu. Yehovah o breiti te wi e leri fu de tevrede èn fu warderi srefi den pikinpikin sani di a e gi wi. A o breiti tu te wi e si den sani dati leki blesi èn te wi e sori taki wi de nanga tangi.

12. San e sori taki David no ben e frutrow tapu ensrefi, ma tapu Yehovah?

¹² David ben sabi taki Yehovah noiti e gowe libi den wan di lobi en èn taki a e broko en ede nanga den. Na a ten di David ben skrifi Psalm 34, a ben kan lasi en libi. Ma fu di a ben abi bribi, meki a ben si taki „na engel fu Yehovah” ben „de lontu” en (Ps. 34:7). Kande David ben agersi na engel fu Yehovah nanga wan srudati di ben de na ai fu luku efu feanti ben e kon. David srefi ben de wan deki-ati fetiman èn Yehovah ben pramisi en taki a ben o tron kownu. Toku David no ben e frutrow tapu a koni di a ben abi fu fringi ston nanga wan slenger noso fu gebroiki wan feti-owru fu wini den feanti fu en (1 Sam. 16:13; 24:12). David ben e frutrow tapu Gado èn a ben de seiker taki na engel fu Yehovah ’e frulusu den wan di e lespeki Gado’. A no de fu taki dati wi no e fruwakti taki Yehovah o kibri wi na wan wondru fasi na ini a ten disi. Ma wi sabi taki ala sma di e frutrow tapu Yehovah o kisi têgo libi, awinsi den lasi libi now.

13. Fu san ede Gok fu Magok o denki taki den o man wini wi te den o kon feti nanga wi? Fu san ede wi no abi fu frede? (Luku a prenki na tapu a kafti.)

¹³ Na ini a ten di e kon wi o abi fu sori taki wi e bribi taki Yehovah man frulusu wi. Te a grupu fu kondre di Bijbel e kari Gok fu Magok o kon feti nanga Gado en pipel, dan kande wi o denki taki den o man kiri wi. Wi o abi fu de seiker taki Yehovah abi a makti fu frulusu wi èn taki a o du dati tu. Den kondre o si wi leki skapu di no man feti gi densrefi èn di no abi nowan sma fu kibri den (Esek. 38:10-12). Wi no o abi fetisani èn wi no o sabi fa fu feti. Den kondre o denki taki den o man kiri wi makriki. Fu di wi abi bribi, meki wi sabi taki wan bigi legre fu engel de lontu a pipel fu Gado èn den de srekasreka fu feti gi wi. Den kondre no man si dati. Den no e bribi na ini Gado. Den o skreki te den e si fa den legre fu hemel e kon fu frulusu wi!​—Openb. 19:11, 14, 15.

14. San wi kan du fu sreka wisrefi gi a ten di e kon?

¹⁴ Fa wi kan sreka nownow kaba gi a ten di e kon? Wi no musu denki taki den gudu fu wi na den moro prenspari sani, fu di a kan taki wi o abi fu libi den sani disi na baka wan dei. Wi musu de tevrede tu èn wi musu breiti taki wi na mati fu Yehovah. O moro wi e kon sabi Gado, o moro wi o de seiker taki a man kibri wi te Gok fu Magok o kon feti nanga wi.

15. Sortu tra sani ben leri David taki Yehovah ben o yepi en ala ten?

¹⁵ Luku sortu tra sani di yepi David, kan yepi wi tu fu sreka gi tesi. David taki: „Tesi èn si taki Yehovah bun. Koloku fu a man di e go suku kibri na en” (Ps. 34:8).  Den wortu disi e sori fu san ede David ben sabi taki a ben kan abi a frutrow taki Yehovah ben o yepi en. David ben gwenti fu frutrow tapu Yehovah èn ala ten Gado yepi en. Di David ben yongu, a ben musu feti nanga a bigiskin Filistea man Goliat. A taigi en: „Tide Yehovah o meki mi wini yu” (1 Sam. 17:46). Bakaten David ben e wroko gi Kownu Saul di pruberi fu kiri en omeni leisi. Ma ’Yehovah ben de nanga David’ (1 Sam. 18:12). Fu di David ben si kaba fa Yehovah yepi en, meki a ben sabi taki a ben kan frutrow tapu Yehovah te tesi ben o miti en.

16. Na sortu fasi wi kan „tesi èn si taki Yehovah bun”?

¹⁶ O moro wi e frutrow tapu Yehovah now, o moro wi o de seiker taki a o man frulusu wi na ini a ten di e kon. Wi musu abi bribi èn wi musu frutrow tapu Yehovah te wi o aksi wi wrokobasi fu teki vrij, so taki wi kan go na wan kring konmakandra noso wan kongres. Wi musu abi bribi nanga frutrow tu te wi o aksi wi wrokobasi fu kenki den wrokoyuru fu wi, so taki wi man go na ala den konmakandra èn du moro na ini a preikiwroko. Ma kow taki dati a wrokobasi fu wi no wani du san wi aksi èn wi lasi wi wroko. Wi abi a bribi taki Yehovah noiti no o gowe libi wi èn taki a o tan sorgu gi wi ala ten? (Hebr. 13:5) Furu sma di e du furuten diniwroko kan fruteri fa Yehovah yepi den omeni leisi di den ben abi en fanowdu trutru. Ala ten Yehovah e horibaka gi den futuboi fu en.

17. San na a yaritekst fu 2022, èn fu san ede a fiti?

¹⁷ Nanga Yehovah na wi sei, wi no abi fu frede san o pasa na ini a ten di e kon. A Gado fu wi noiti no o gowe libi wi solanga wi poti a Kownukondre na a fosi presi na ini wi libi. A Tiri Skin wani memre wi taki wi musu sreka now gi a muilek ten di de na wi fesi èn den wani taki wi abi a frutrow taki Yehovah noiti no o gowe libi wi. Dati meki den teki Psalm 34:10 leki a yaritekst fu 2022: Den sma di e suku yepi na Yehovah, no o mankeri noti.