1-2. (a) Te wan lobiwan fu wi dede, dan o ten wi e denki en moro furu? (b) San Yesus du a neti fosi a dede?

 AWINSI o langa den lobiwan fu wi dede, te now ete wi e memre den. Nofo tron wi e prakseri den furu te a dei di den dede e kon krosibei.

² Ibri yari, wi nanga milyunmilyun tra sma na heri grontapu e kon makandra fu memre wan sma di wi lobi srefisrefi, Yesus Krestes (1 Petr. 1:8). Wi e kon makandra fu memre a sma di gi en libi leki lusu-paiman fu frulusu wi fu sondu nanga dede (Mat. 20:28). Yesus ben wani den bakaman fu en fu memre a dede fu en tu. A neti fosi a dede, a nyan wan spesrutu nyanyan nanga den èn a taigi den: „Tan du disi fu memre mi.”​—Luk. 22:19.

3. San wi o luku na ini na artikel disi?

³ Soso wan pikin grupu sma di e go na a Memrefesa abi a howpu fu libi na hemel. Ma milyunmilyun trawan di abi a howpu fu libi na grontapu e go na a Memrefesa tu. Na ini na artikel disi, wi o luku fu san ede ala tu grupu breiti fu go na a Memrefesa ibri yari. Wi o luku tu fu san ede a bun taki wi alamala go na a Memrefesa. Meki wi luku fosi fu san ede den salfuwan e go na a Memrefesa.

4. Fu san ede den salfuwan e nyan fu a brede èn dringi fu a win na a Memrefesa?

⁴ Ibri yari den salfuwan e angri fu go na a Memrefesa pe den o nyan fu a brede èn dringi fu a win. Fu san ede a  fiti taki den e du dati? Fu kisi piki tapu na aksi dati, dan luku san pasa a lasti neti di Yesus ben de na grontapu. Baka a Paskafesa, Yesus ben nyan wan spesrutu nyanyan nanga den apostel fu en, èn sma kon sabi a neti disi leki na Avondmaal fu Masra. Yesus ben prati a brede nanga a win gi den erfu apostel fu en di ben de nanga en ete èn a taigi den fu nyan èn fu dringi fu den sani disi. Yesus ben fruteri den fu tu frubontu noso kontrakti, a nyun frubontu èn a Kownukondre frubontu * (Luk. 22:19, 20, 28-30). Den frubontu disi ben opo a pasi gi den apostel nanga wan pikin grupu fu sma fu tron kownu nanga priester na hemel (Openb. 5:10; 14:1). Soso den salfuwan di de na grontapu ete * èn di de na ini den tu frubontu disi mag nyan fu a brede èn dringi fu a win na a Memrefesa.

5. San den salfuwan sabi fu a howpu di den kisi?

⁵ Wan tra reide fu san ede den salfuwan de fayafaya fu go na a Memrefesa, na taki den kisi na okasi fu prakseri a howpu di den abi. Yehovah gi den wan heri moi howpu. Den o libi na hemel èn den o abi wan skin di no man pori èn di no man dede. Boiti dati, den o tiri makandra nanga Yesus Krestes èn nanga den trawan di de na ini a grupu fu 144.000 salfuwan. A moro moi sani fu a howpu disi, na taki den o kisi na okasi fu si Yehovah Gado nanga den eigi ai! (1 Kor. 15:51-53; 1 Yoh. 3:2) Den salfuwan sabi taki den kisi a kari fu kisi den grani disi na hemel. Ma fu man go na hemel, den musu tan dini Gado te na dede (2 Tim. 4:7, 8). Den salfuwan e breiti srefisrefi te den e prakseri a howpu di den abi fu libi na hemel (Tit. 2:13). Ma fa a de nanga den „tra skapu”? (Yoh. 10:16) Sortu reide den abi fu go na a Memrefesa?

6. Fu san ede den tra skapu e go na a Memrefesa ibri yari?

⁶ Den tra skapu no e nyan fu a brede èn dringi fu a win, ma toku den breiti fu de na a Memrefesa. Na ini 1938, den sma di abi a howpu fu libi na grontapu ben kisi a kari fu a fosi leisi fu go na a Memrefesa. A Waktitoren fu 1 maart 1938 taki: ’A de wan yoisti sani èn a bun gi den tra skapu fu go na a konmakandra dati fu si san e pasa. Gi den sosrefi a de wan okasi fu prisiri.’ Te sma e kisi kari fu go na wan trow, dan den breiti. Èn na so den tra skapu breiti tu fu go na a Memrefesa, aladi den no e nyan fu a brede èn dringi fu a win.

7. Fu san ede den tra skapu lobi fu arki a lezing di e hori na a Memrefesa?

⁷ Den tra skapu e prakseri tu fu a howpu di den abi. Den lobi fu arki a lezing di e hori na a Memrefesa, fu di a lezing dati e sori san Krestes nanga den 144.000 tiriman o du gi libisma na ini den dusun yari di den o tiri. Ondro a tiri fu Kownu Yesus Krestes, den tiriman disi na hemel o yepi fu kenki grontapu kon tron wan paradijs èn den o yepi fu puru  sondu gi libisma. A de wan span sani gi den milyunmilyun sma di e kon na a Memrefesa, fu prakseri fa den Bijbel profeititori o kon tru na ini a ten di e kon. Profeititori soleki Yesaya 35:5, 6; 65:21-23 nanga Openbaring 21:3, 4. Te den e prakseri fa den nanga den lobiwan fu den o de na ini a nyun grontapu, dan a howpu fu den e kon moro tranga èn den e kisi moro deki-ati fu tan dini Yehovah fayafaya.​—Mat. 24:13; Gal. 6:9.

8. San na wan tra reide fu san ede den tra skapu e go na a Memrefesa?

⁸ Luku ete wan reide fu san ede den tra skapu e go na a Memrefesa. Den wani sori taki den lobi den salfuwan èn taki den e horibaka gi den. Gado Wortu ben taki na fesi taki den salfuwan nanga den sma di ben o libi na grontapu ben o wroko skinskin makandra. Fa dati e pasa? Kow luku wan tu eksempre.

9. San a profeititori na Sakaria 8:23 e taki fu a fasi fa den tra skapu e denki fu den salfuwan?

⁹ Leisi Sakaria 8:23. Na wan moi fasi a profeititori disi e sori fa den tra skapu e denki fu den brada nanga sisa fu den. Den wortu „wan Dyu” èn „unu”, abi fu du nanga a srefi grupu. Dati na den salfuwan di de na grontapu ete (Rom. 2:28, 29). Den ’tin man di o komoto na mindri ala den pipel di e taki difrenti tongo’, na den tra skapu. Den e „grabu wan Dyu hori na en krosi”, wani taki dati den tra skapu e horibaka gi den salfuwan èn den e dini a tru Gado makandra nanga den. Den tra skapu e sori taki den de bun mati fu den salfuwan te den de na a Memrefesa makandra nanga den.

10. San Yehovah du fu meki a profeititori na Esekièl 37:15-19, 24, 25 kon tru?

¹⁰ Leisi Esekièl 37:15-19, 24, 25. Yehovah meki a profeititori disi kon tru di a meki den salfuwan wroko skinskin makandra nanga den tra skapu. A profeititori e taki fu tu tiki. Den sma di abi a howpu fu libi na hemel, na a tiki „gi Yuda”. Dati na a lo pe den kownu fu Israel ben e komoto. Den sma di abi a howpu fu libi na grontapu, na a tiki „fu Efrayim”. * Yehovah ben o tyari den tu grupu disi kon na wán, so taki den ben o tron „wán tiki”. Disi wani taki dati den ben o dini a wán-enkri Kownu fu den, Yesus Krestes, leki wán man. Ibri yari te den salfuwan nanga den tra skapu e go na a Memrefesa, den no e go leki tu grupu, ma leki „wán ipi” ondro a tiri fu „wán skapuman”.​—Yoh. 10:16.

11. Fa „den skapu” na ini Mateyus 25:31-36, 40 e sori taki den e horibaka gi den brada fu Krestes?

¹¹ Leisi Mateyus 25:31-36, 40. „Den skapu” na ini na agersitori disi, na den tra skapu noso den reti-atisma na ini a ten fu a kaba di abi a howpu fu libi na grontapu. Nanga den heri-ati den e horibaka gi den salfuwan noso den brada fu Krestes di de na grontapu ete. Den e yepi den salfuwan nanga wan bigi wroko. Dati na a preikiwroko èn a wroko fu meki sma tron disipel.​—Mat. 24:14; 28:19, 20.

12-13. Na sortu tra fasi den tra skapu e horibaka gi den brada fu Krestes?

¹² Ibri yari na ini den wiki fosi a Memrefesa, den tra skapu e sori taki den e  horibaka gi den brada fu Krestes, fu di den e du ala muiti fu gi sma na heri grontapu wan kari gi a Memrefesa. (Luku a faki „ Yu e sreka sani kaba gi a Memrefesa?”) Den e yepi fu seti ala sani tu so taki a Memrefesa kan hori na ini ibri gemeente na grontapu, srefi na ini den gemeente pe salfuwan no de. Den tra skapu breiti fu horibaka gi den brada fu Krestes na den fasi disi. Den sabi taki Yesus e si a wroko di den e du gi den salfu brada fu en leki wroko di den e du gi en.​—Mat. 25:37-40.

¹³ Sortu tra reide wi alamala abi fu go na a Memrefesa, awinsi sortu howpu wi abi?

14. Fa Yehovah nanga Yesus sori taki den lobi wi trutru?

¹⁴ Wi e warderi a lobi di Yehovah nanga Yesus sori gi wi. Yehovah sori na furu fasi taki a lobi wi. Ma a moro prenspari fasi fa a sori taki a lobi wi, na di a seni en lobi Manpikin fu pina èn dede gi wi (Yoh. 3:16). Wi man si tu taki Yesus srefi lobi wi trutru, fu di a ben de klariklari fu dede gi wi (Yoh. 15:13). Noiti wi o man pai Yehovah nanga Yesus fu a lobi di den sori gi wi. Ma nanga a fasi fa wi e libi ibri dei, wi kan sori taki wi de nanga tangi (Kol. 3:15). Èn wi e go na a Memrefesa fu di wi wani prakseri a lobi di den sori gi wi èn fu di wi wani sori taki wi lobi den.

15. Fu san ede den salfuwan nanga den tra skapu abi furu warderi gi a lusu-paiman?

¹⁵ Wi abi furu warderi gi a lusu-paiman di wi kisi leki kado (Mat. 20:28). Den salfuwan e warderi a lusu-paiman fu di a lusu-paiman meki taki den sani di den e howpu o pasa trutru. Fu di den e bribi na ini na ofrandi fu Yesus, meki Yehovah taki dati den na reti-ati sma èn a teki den leki pikin fu en (Rom. 5:1; 8:15-17, 23). Den tra skapu abi warderi gi a lusu-paiman tu. Fu di den e bribi na ini na ofrandi fu Yesus, meki den man kon na fesi Gado nanga wan krin konsensi, den kan du santa diniwroko gi en, èn den abi a howpu fu „komoto na ini a bigi banawtu” (Openb. 7:13-15). Wán fasi fa den salfuwan nanga den tra skapu e sori taki den e warderi a lusu-paiman, na te den e go na a Memrefesa ibri yari.

16. San na wan tra reide fu san ede wi e go na a Memrefesa?

¹⁶ Wan tra reide fu san ede wi e go na a Memrefesa, na fu di wi wani gi yesi na Yesus. Awinsi sortu howpu wi abi, ibriwan fu wi wani du san Yesus taki na a neti di a seti a Memrefesa: „Tan du disi fu memre mi.”​—1 Kor. 11:23, 24.

17. Fa a Memrefesa e yepi wi fu kon moro krosibei na Yehovah?

¹⁷ Wi e kon moro krosibei na Yehovah (Yak. 4:8). Soleki fa wi si, dan a Memrefesa e gi wi na okasi fu prakseri fu a howpu di Yehovah gi wi èn fu a bigi lobi di a sori gi wi (Yer. 29:11; 1 Yoh. 4:8-10). Te wi e prakseri taki den sani di wi e howpu o pasa trutru na ini a ten di e kon èn te wi e prakseri a bigi lobi di Gado sori gi wi, dan wi srefi o kon abi moro lobi gi Yehovah èn wi o tron moro bun mati fu en.​—Rom. 8:38, 39.

18. San wi wani du te wi e prakseri na eksempre fu Yesus?

 ¹⁸ Wi e kisi deki-ati fu teki na eksempre fu Yesus (1 Petr. 2:21). Na ini den dei fosi a Memrefesa, wi e poti prakseri na den Bijbeltori di e taki fu a lasti dei di Yesus ben de na grontapu, a dede fu en, èn na opobaka fu en. Èn na a neti fu a Memrefesa, a lezing e memre wi taki Yesus lobi wi trutru (Ef. 5:2; 1 Yoh. 3:16). Te wi e leisi fu den sani di Yesus du sondro fu denki ensrefi nomo èn te wi e teki ten fu prakseri fu den sani disi, dan wi e kisi deki-ati fu „tan waka neleki fa Krestes ben e waka”.​—1 Yoh. 2:6.

19. San wi o du efu wi wani taki Gado tan lobi wi?

¹⁹ Wi e kisi moro deki-ati fu du sani di o meki taki Gado tan lobi wi (Yud. 20, 21). Efu wi wani taki Gado tan lobi wi, dan wi o du ala san wi man fu gi yesi na en, fu santa en nen, èn fu meki en ati prisiri (Odo 27:11; Mat. 6:9; 1 Yoh. 5:3). Te wi e go na a Memrefesa, dan wi o kisi moro deki-ati fu libi na wan fasi di e sori taki wi wani taki Yehovah lobi wi fu têgo.

20. Sortu bun reide wi abi fu go na a Memrefesa?

²⁰ Awinsi wi abi a howpu fu libi fu têgo na hemel noso na grontapu, wi alamala abi bun reide fu go na a Memrefesa. Ibri yari te wi e kon makandra na a dei dati, wi e memre a dede fu wan sma di wi lobi srefisrefi, Yesus Krestes. Ma san moro prenspari, na taki wi e memre a moro moi fasi fa Yehovah sori lobi gi wi di a gi en Manpikin leki lusu-paiman. A yari disi, a Memrefesa o hori na a mofoneti fu freida 15 april 2022. Wi lobi Yehovah nanga en Manpikin. Sobun, nowan tra sani kan de moro prenspari gi wi leki fu de na a Memrefesa fu a dede fu Yesus.