1. Fa wi kan meki ten gi Yehovah?

 WI LOBI fu meki ten gi den sma di wi lobi. Trowpaar di abi wan koloku trowlibi, lobi fu de nanga makandra. Yonguwan lobi fu de nanga den bun mati fu den. Wi alamala e prisiri fu de makandra nanga den Kresten brada nanga sisa fu wi. Ma san moro prenspari, na taki wi lobi fu meki ten gi wi Gado. Wi kan du disi te wi e begi en, te wi e leisi a Wortu fu en, èn te wi e denki dipi fu den sani di a o du èn fu den moi fasi fu en. A ten di wi e meki gi Yehovah prenspari srefisrefi.​—Ps. 139:17.

2. San kan meki en muilek gi wi fu meki ten gi Yehovah?

² Aladi wi lobi meki ten gi Yehovah, toku a no makelek ala ten fu du dati. Wi abi furu fu du èn a sani dati kan meki en muilek gi wi fu meki ten gi Yehovah. A wroko fu wi, wi osofamiri, nanga tra sani di wi musu du kan teki so furu fu wi ten taki wi no abi ten fu begi, fu studeri, noso fu denki dipi fu sani.

3. San na wan tra sani di kan teki furu fu wi ten?

³ Wan tra sani de di kan teki furu fu wi ten. Kande den sani di wi e du no fowtu, ma efu wi no e luku bun, den kan teki so furu fu wi ten taki wi no abi ten moro gi Yehovah. Wan fu den sani disi na a ten di wi e gebroiki fu abi prisiri. Ten na ten wi alamala lobi fu du sani fu blo wi ede. Ma awinsi den sani dati na bun sani, toku den kan teki so furu fu wi ten taki wi no abi ten moro fu du sani  di abi fu du nanga na anbegi fu wi. Wi musu hori na prakseri taki den sani di wi e du fu abi prisiri a no den moro prenspari sani.​—Odo 25:27; 1 Tim. 4:8.

4. San wi o luku now?

⁴ Na ini na artikel disi wi o luku fu san ede wi musu hori na prakseri san na den moro prenspari sani. Wi o luku tu fa wi kan gebroiki a ten di wi meki gi Yehovah moro bun, èn fa wi kan kisi wini fu dati.

5. Fa Efeisesma 5:15-17 kan yepi wan yongu sma fu teki a moro bun fasi fu libi?

⁵ Teki a moro bun fasi fu libi. Nofo tron yonguwan e aksi densrefi san na a moro bun fasi fu libi. Ma leriman nanga famiriman kan gi den deki-ati fu teki heiskoro-leri, so taki den kan feni wan bun wroko èn meki furu moni. A no de fu taki dati a heiskoro-leri dati ben o teki furu fu den ten. Ma na tra sei, papa nanga mama èn mati na ini a gemeente kan gi den yonguwan deki-ati fu gebroiki den libi fu dini Yehovah. San kan yepi wan yonguwan di lobi Yehovah, fu teki a moro bun bosroiti? A ben o bun te a e leisi Efeisesma 5:15-17 èn te a e denki dipi fu den vers dati. (Leisi en.) Baka te wan yonguwan leisi den vers disi, dan a ben kan aksi ensrefi: „San na a wani fu Yehovah? Sortu bosroiti a feni bun? Sortu bosroiti o yepi mi fu gebroiki mi ten na a moro bun fasi?” Hori na prakseri taki „wi e libi na ini ogri ten” èn a grontapu disi di Satan e tiri o kon na wan kaba heri esi. A ben o de wan koni sani te wi e gebroiki wi libi na wan fasi di Yehovah feni bun.

6. Sortu bosroiti Maria ben teki èn fu san ede dati ben de wan koni bosroiti?

⁶ Sabi san na den moro prenspari sani. Son leisi den sani di wi wani du no fowtu srefisrefi. Ma efu wi wani gebroiki wi ten na wan koni fasi, wi o abi fu bosroiti san wi o du. Wi e si dati te wi e luku san pasa di Yesus ben go luku Maria nanga Marta. A no de fu taki dati Marta ben breiti taki Yesus ben kon na den èn a bigin sreka furu nyanyan gi en. Ma na presi taki en sisa Maria go yepi en, a go sidon krosibei fu Yesus fu arki san a ben abi fu taki. Aladi a no fowtu taki Marta ben e bori nyanyan, toku Maria ben „teki a bun pisi” (Luk. 10:38-42). Kande Maria ben frigiti srefi sortu nyanyan en sisa ben bori, ma wi kan de seiker taki a no frigiti noiti san a leri fu Yesus. Neleki fa Maria ben warderi a ten di a ben de nanga Yesus, na so wi e warderi a ten di wi e meki gi Yehovah. Fa wi kan gebroiki a ten fu wi na wan koni fasi?

7. Fu san ede a prenspari taki wi e begi, studeri, èn denki dipi fu sani?

⁷ Yu musu frustan taki a prenspari fu begi, fu studeri, èn fu denki dipi fu sani te yu e anbegi Gado. Te wi e begi, wi e taki nanga wi hemel Tata di lobi wi trutru (Ps. 5:7). Te wi e studeri Bijbel, wi e „kon leri sabi Gado” di koni moro ala sma (Odo 2:1-5). Te wi e denki dipi fu den sani di wi leri fu Yehovah, dan wi e prakseri den moi fasi fu en èn den moi sani di a o du gi wi èn gi ala tra libisma. Disi na a moro bun fasi fa wi kan gebroiki wi ten. Ma fa wi kan gebroiki a ten di wi abi na wan koni fasi?

8. San wi kan leri fu a fasi fa Yesus gebroiki en ten di a ben de na ini a gran sabana?

 ⁸ Suku wan presi pe yu kan de yu wawan. Luku na eksempre fu Yesus. Fosi a bigin nanga a diniwroko fu en na grontapu, a ben de 40 dei langa na ini a gran sabana (Luk. 4:1, 2). Fu di drape ben rustig, meki Yesus ben kan begi Yehovah èn a ben kan denki dipi fu den sani di en Papa ben wani taki a du. A no de fu taki dati a sani disi sreka Yesus gi den tesi di ben o miti en heri esi. San yu kan leri fu na eksempre fu Yesus? Efu yu abi wan bigi famiri, dan kande a no o makelek gi yu fu feni wan presi na ini na oso pe yu kan de yu wawan. Efu dati de so, dan kande yu kan suku wan bun presi na dorosei. Na dati Julie e du te a wani teki ten fu begi Yehovah. En nanga en masra e libi na ini wan pikin apartement na ini Fransikondre èn a muilek gi en fu feni okasi fu de en wawan. Julie e taki: „Dati meki mi e go koiri na ini a park ibri dei. Drape mi kan de mi wawan, noti no e puru mi prakseri, èn mi kan taki bun nanga Yehovah.”

9. Yesus ben abi furu fu du, ma fa a sori taki a ben prenspari gi en fu begi en Papa Yehovah?

⁹ Yesus ben abi furu fu du. Di a ben e du a diniwroko fu en na grontapu, dan ipi-ipi sma ben e tan waka na en baka èn den alamala ben wani de nanga en. Wan leisi, „ala sma na ini a foto kon tanapu leti na a doro” fu di den ben wani si en. Toku Yesus ben e meki ten ibri dei fu begi Yehovah. Fosi son opo, a feni „wan presi pe a ben kan de en wawan” fu begi en Papa.​—Mark. 1:32-35.

10-11. Sortu prenspari rai Yesus gi den disipel fu en na ini a dyari fu Getseimanei, soleki fa Mateyus 26:40, 41 e sori? Ma san pasa?

¹⁰ Di a diniwroko fu Yesus na grontapu ben e doro en kaba, dan na a lasti neti fu en libi na grontapu, a suku wan presi baka fu denki dipi fu sani èn fu begi. A go na ini a dyari fu Getseimanei (Mat. 26:36). Di Yesus ben de drape, dan a taigi den disipel fu en wan tu prenspari sani di ben abi fu du nanga begi.

¹¹ Luku san pasa. Di den doro na ini a dyari fu Getseimanei, a ben lati kaba. Kande mindrineti ben pasa kaba srefi. Yesus aksi den apostel fu „tan na ai”, dan a gwe fu go begi (Mat. 26:37-39). Ma di a ben e begi, dan den fadon na sribi. Di a go na den disipel èn a si taki den ben e sribi, a gi den deki-ati baka fu „tan na ai èn begi doronomo”. (Leisi Mateyus 26:40, 41.) A ben frustan taki den ben abi furu na den ede èn taki den ben weri. Fu di Yesus ben e firi gi den, meki  a taki dati „na ati wani, ma a skin swaki”. Ma aladi Yesus gwe ete tu leisi fu begi, toku di a drai kon baka, den disipel no ben e begi, ma den ben e sribi.​—Mat. 26:42-45.

12. San wi kan du efu son leisi wi no man begi fu di wi e stress noso fu di wi weri tumusi?

¹² Suku a yoisti ten fu begi. Son leisi wi kan abi so furu na wi ede noso kande wi weri so te, taki wi no man begi. A sani disi pasa nanga trawan tu. San yu kan du? Son sma di ben gwenti fu begi Yehovah na a kaba fu a dei, kon si taki a moro bun gi den fu begi pikinso moro fruku na neti te den no weri so. Trawan kon si taki den man begi moro bun te den e sidon noso te den e kindi. Ma fa a de te yu no man begi fu di yu e stress tumusi noso fu di yu e sari? We, taigi Yehovah fa yu e firi. Yu kan de seiker taki yu lobi-ati Tata o frustan fa yu e firi.​—Ps. 139:4.

13. Sortu sani kan puru wi prakseri te wi e begi, te wi e studeri, noso te wi de na den konmakandra?

¹³ No meki sani puru yu prakseri te yu e studeri. Begi a no a wan-enkri fasi fa wi kan tron moro bun mati fu Yehovah. Te wi e studeri Gado Wortu èn te wi e go na den gemeente konmakandra, dan dati kan yepi wi tu fu kon moro krosibei na Gado. Te yu e studeri èn te yu de na den gemeente konmakandra, dan fa yu kan kisi moro wini fu den okasi dati? Aksi yusrefi: „Sortu sani kan puru mi prakseri te mi de na den gemeente konmakandra noso te mi e pruberi fu studeri?” A de so taki sma e bel yu èn taki yu e kisi e-mail noso app tapu yu telefon noso tablet? Na ini a ten disi, milyardmilyard sma e gebroiki den sortu aparaat disi. Sabiman e taki dati te wi e pruberi fu poti wi prakseri na wan sani, dan wan cellulair kan puru wi prakseri makriki te a de krosibei fu wi. „Yu no e poti ala yu prakseri na a sani di yu e du”, na so wan professor taki. „Yu e prakseri tra sani.” Fosi a programa fu bigi konmakandra nanga kongres e bigin, wi gwenti kisi a rai fu seti wi telefon nanga tablet na so wan fasi taki den no e puru a prakseri fu trawan. Kande wi kan du dati tu te wi de wi wawan, so taki sani no e puru wi prakseri te wi e meki ten gi Yehovah.

14. Soleki fa Filipisma 4:6, 7 e sori, dan fa Yehovah o yepi wi so taki sani no e puru wi prakseri?

 ¹⁴ Aksi Yehovah fu yepi yu so taki sani no e puru yu prakseri. Te yu e si taki yu e bigin prakseri tra sani te yu e studeri noso te yu de na den konmakandra, dan aksi Yehovah fu yepi yu. Efu yu e broko yu ede nanga wan sani, dan kande a no o makelek fu poti prakseri na Gado Wortu. Ma toku a prenspari taki yu e du dati. Begi Gado fu gi yu a freide di e kibri yu ati nanga yu „frustan”.​—Leisi Filipisma 4:6, 7.

15. Sortu wini wi kan kisi te wi e meki ten gi Yehovah?

¹⁵ Efu yu e meki ten fu taki nanga Yehovah, fu arki en, èn fu prakseri en, dan yu o kisi furu wini. Sortu wini yu o kisi? A fosi wini di yu o kisi, na taki yu o man teki moro bun bosroiti. Bijbel e taki dati „te wan sma e waka nanga koniwan, dan ensrefi o kon koni” (Odo 13:20). Sobun, te yu e meki ten gi Yehovah, a sma di abi ala koni, dan yu o kon moro koni. Yu o frustan moro bun fa yu kan plisi en èn gi sortu sani yu musu wai pasi, so taki yu no meki a sari.

16. Te wi e meki ten gi Yehovah, dan fa dati e yepi wi fu tron moro bun leriman?

¹⁶ A di fu tu, yu o tron wan moro bun leriman. Te wi e studeri Bijbel nanga wan sma, dan wan fu den moro prenspari sani di wi wani du, na fu yepi a studenti fu kon moro krosibei na Yehovah. O moro wi e taki nanga wi hemel Tata, o moro a lobi di wi abi gi en o kon tranga èn wi o man yepi a studenti moro bun fu kon lobi Yehovah. Na dati Yesus ben du. Te a ben e taki fu en Papa, dan a ben de krin taki a ben lobi en Papa èn dati yepi den bakaman fu en fu kon lobi Yehovah tu.​—Yoh. 17:25, 26.

17. Fu san ede wi musu begi èn studeri fu kan tranga a bribi fu wi?

¹⁷ A di fu dri, a bribi fu yu o kon moro tranga. Luku san e pasa te yu e aksi Gado fu sori yu san fu du, fu trowstu yu, noso fu yepi yu. Ibri leisi te Yehovah e piki den begi dati, a bribi fu yu e kon moro tranga (1 Yoh. 5:15). Sortu tra sani kan tranga a bribi fu yu? Yu musu studeri. Te yu luku en bun, „bribi e kon baka te wan sma yere a boskopu” (Rom. 10:17). Ma efu wi wani abi wan tranga bribi, dan wi no musu kisi sabi nomo. San moro de fanowdu?

18. Fruteri fu san ede wi musu denki dipi fu san wi e leri.

¹⁸ Wi musu denki dipi fu den sani di wi  e leri. Luku na ondrofenitori fu a skrifiman fu Psalm 77. A ben e broko en ede fu di a ben feni taki Yehovah no ben feni den Israelsma bun moro. Den broko-ede dati ben e meki taki a no ben man sribi te neti (Vers 2-8). San a du? A taigi Yehovah: „Mi o denki dipi fu ala den sani di yu du” (Vers 12). A no de fu taki dati a psalm skrifiman ben sabi heri bun sortu sani Yehovah ben du gi a pipel fu en na ini a ten di pasa. Ma toku a ben aksi ensrefi: „Na frigiti Gado frigiti fu du bun gi wi? Na fu di en ati e bron nanga wi, meki a no wani sori sari-ati moro?” (Vers 9). A psalm skrifiman denki dipi fu den sani di Yehovah ben du èn fu a sari-ati nanga a lobi di Gado ben sori gi a pipel fu en na ini a ten di pasa (Vers 11). San ben de a bakapisi? A psalm skrifiman ben de seiker now taki Yehovah no ben o gwe libi a pipel fu en (Vers 15). Na so a bribi fu yu o kon tranga tu te yu e denki dipi fu den sani di Yehovah du kaba gi a pipel fu en èn san a du gi yu.

19. Sortu tra wini wi o kisi te wi e meki ten gi Yehovah?

¹⁹ A di fu fo wini di yu o kisi, na a moro prenspariwan. Yu o kisi moro lobi gi Yehovah. Lobi na a moro prenspari sani di o meki taki yu o gi yesi na Yehovah, taki yu o du muiti fu plisi en, èn taki yu o horidoro awinsi sortu tesi miti yu (Mat. 22:37-39; 1 Kor. 13:4, 7; 1 Yoh. 5:3). Nowan sani prenspari moro leki a matifasi di yu abi nanga Yehovah!​—Ps. 63:1-8.

20. San yu o du fu sorgu taki yu abi ten gi Yehovah?

²⁰ No frigiti taki te wi e anbegi Gado, dan wi musu begi, studeri Bijbel, èn denki dipi fu san wi e leri. Neleki Yesus, wi musu suku wan presi pe wi kan de wi wawan fu kan taki nanga Yehovah. No meki sani puru yu prakseri. Aksi Yehovah fu yepi yu fu poti prakseri na den sani di yu musu du fu anbegi en. Efu yu gebroiki yu ten na a moro bun fasi now, dan Yehovah o gi yu têgo libi na ini a nyun grontapu fu en.​—Mark. 4:24.