1-3. Sortu sani kan meki wi krei son leisi?

 YU MAN memre a lasti leisi di yu krei? Son leisi wi e krei fu di wi e prisiri. Ma nofo tron wi e krei fu di wi e sari. Kande wi e krei fu di wan lobiwan fu wi lasi libi. Lorilei, wan sisa na Amerkankondre, skrifi: „Son leisi te mi ben e prakseri a dede fu mi umapikin, dan mi ben e sari so te, taki noti no ben e gi mi trowstu. Na den momenti dati mi ben e aksi misrefi fa mi ben o man go doro.” *

² Kande wi e krei fu tra sani ede. Hiromi, wan pionier na ini Yapan, ben taki: „Ten na ten mi e lasi-ati fu di den sma na ini a preikiwroko no wani arki a boskopu fu wi. Son leisi mi e begi Yehovah nanga watra-ai fu yepi mi fu feni wan sma di e suku a waarheid.”

³ Yu e firi so tu? Kande furu fu wi e firi so (1 Petr. 5:9). Wi wani „dini Yehovah nanga prisiri”, ma kande wi e dini en nanga watra-ai fu di wi e sari, fu di wi lasi-ati, noso fu di problema e meki en muilek gi wi fu tan du san Gado e aksi fu wi (Ps. 6:6; 100:2). San wi kan du te wi e firi so?

4. San wi o luku na ini na artikel disi?

⁴ Wi kan leri furu fu na eksempre fu Yesus. Son leisi en srefi ben e sari so te, taki a „bigin krei” (Yoh. 11:35; Luk. 19:41; 22:44; Hebr. 5:7). Meki wi go luku wan tu fu den  okasi dati fu si san wi kan leri. Wi o luku tu san wi kan du te sani e miti wi di e meki wi krei.

5. San wi e leri fu Yesus te wi e luku san skrifi na Yohanes 11:32-36?

⁵ Na ini a kowru pisi ten fu a yari 32, Yesus en bun mati Lasarus kon siki èn a dede (Yoh. 11:3, 14). A man disi ben abi tu sisa, Maria nanga Marta. Yesus ben lobi a famiri disi srefisrefi. Den uma ben de nanga bigi sari di a lobi brada fu den kon dede. Baka di Lasarus dede, Yesus go na a foto Betania pe Maria nanga Marta ben e libi. Di Marta yere taki Yesus ben de na pasi e kon, dan a lon go miti en. Prakseri fa a ben e firi di a taki: „Masra, efu yu ben de dya, mi brada no ben o dede” (Yoh. 11:21). Syatu baka dati, di Yesus si fa Maria nanga den trawan ben e krei, dan en srefi „bigin krei”.​—Leisi Yohanes 11:32-36.

6. Fu san ede Yesus krei di Lasarus dede?

⁶ Fu san ede Yesus krei? A buku Inzicht in de Schrift e taki dati di Yesus en mati Lasarus dede èn di Yesus si fa den sisa fu Lasarus ben e sari, dan ’a soktu dipi èn a bigin krei’. * A kan taki Yesus ben e prakseri a pen di en lobi mati Lasarus ben e firi di a ben siki. Kande a ben prakseri tu fa Lasarus ben e firi di a ben sabi taki a o dede. A no de fu taki dati Yesus bigin krei tu di a si fa Maria nanga Marta ben e sari taki a brada fu den dede. Efu wan bun mati noso wan famiri fu yu lasi libi, dan a no de fu taki dati yu ben e firi so tu. Kow luku dri sani di yu kan leri fu a tori disi.

7. San a krei di Yesus krei e leri wi fu Yehovah?

⁷ Yehovah e frustan fa yu e firi. Yesus „de soifri leki fa [en Papa] de” (Hebr. 1:3). Di Yesus krei, a sori fa en Papa ben e firi (Yoh. 14:9). Efu wan lobiwan fu yu  dede, yu kan de seiker taki Yehovah e si fa yu e sari èn a e firi gi yu. A wani trowstu yu so taki yu no sari moro.​—Ps. 34:18; 147:3.

8. Fu san ede wi kan de seiker taki Yesus o gi den lobiwan fu wi wan opobaka?

⁸ Yesus wani gi den lobiwan fu yu wan opobaka. Syatu fosi Yesus bigin krei, a taigi Marta: „Yu brada o kon na libi baka.” Marta ben e bribi Yesus (Yoh. 11:23-27). Fu di Marta ben e anbegi Yehovah fayafaya, meki a ben sabi taki den profeiti Elia nanga Elisa ben gi sma wan opobaka hondrohondro yari na fesi (1 Kow. 17:17-24; 2 Kow. 4:32-37). Seiker a ben yere tu taki Yesus ben gi sma wan opobaka (Luk. 7:11-15; 8:41, 42, 49-56). Yu srefi kan bribi taki yu o si den lobiwan fu yu baka. Te wi e luku taki Yesus krei di a trowstu den mati fu en di ben e sari, dan san disi e leri wi? Wi e leri taki a e angri fu gi den dedewan wan opobaka.

9. Fa wi kan trowstu den wan di e sari neleki fa Yesus ben e trowstu sma? Gi wan eksempre.

⁹ Yu kan trowstu den wan di e sari. Yesus no ben e krei nomo nanga Marta nanga Maria, ma a arki den tu èn a gi den deki-ati. Wi srefi kan du dati gi den wan di e sari. Wan owruman di nen Dan èn di e libi na ini Australia, taki: „Baka di mi frow dede, mi ben abi trowstu fanowdu. Wan tu trowpaar ben de klariklari fu arki mi, awinsi na dei noso neti. Den ben e arki mi te mi ben e fruteri den fa mi ben e sari èn den no ben e firi wan fasi te mi ben e krei. Den du sani tu fu yepi mi. Den wasi mi oto, den go bai sani gi mi na wenkri, èn den ben e bori nyanyan gi mi te mi ben e firi taki mi no ben man du den sani dati. Den ben begi furu nanga mi. Den ben sori taki den na trutru mati èn ’brada di gebore fu te nowtu de’.”​—Odo 17:17.

10. Fruteri a tori di skrifi na Lukas 19:36-40.

¹⁰ Yesus doro na Yerusalem tapu 9 Nisan fu a yari 33. Di Yesus doro a foto, wan bigi grupu sma waka kon miti en èn den bradi den krosi fu den na tapu a pasi fu di den ben e si en leki den Kownu. A no de fu taki dati den sma ben e prisiri. (Leisi Lukas 19:36-40.) Sobun, a kan taki den disipel no ben e fruwakti san ben o pasa baka dati. „Di [Yesus] kon moro krosibei, a luku a foto èn a krei fu a foto ede.” Nanga watra-ai Yesus taigi den sortu ogri ben o miti den sma fu Yerusalem.​—Luk. 19:41-44.

11. Fu san ede Yesus krei gi den sma di ben e libi na ini Yerusalem?

¹¹ Yesus ben e sari fu di a ben sabi taki furu fu den Dyu no ben o arki a Kownukondre boskopu. Dati meki Yerusalem ben o kisi pori èn iniwan Dyu di ben de na libi baka dati ben o abi fu go na ini katibo (Luk. 21:20-24). Ma soleki fa Yesus ben taki, dan furu sma no ben wani si en leki a Mesias. Fa sma na ini a kondre pe yu e tan e si a Kownukondre boskopu? Efu furu sma no wani arki te yu e du muiti fu leri den a waarheid, dan san yu kan leri fu a krei di Yesus krei? Kow luku ete dri sani di wi kan leri.

12. Te wi e luku fa Yesus krei di trawan ben e sari, dan san disi e leri wi fu Yehovah?

¹² Yehovah e broko en ede nanga sma. A krei di Yesus krei e sori wi taki Yehovah lobi en pipel trutru. „A no wani taki wan sma lasi libi. A wani taki ala  sma musu kisi na okasi fu sori berow” (2 Petr. 3:9). Na ini a ten disi wi e sori taki wi lobi tra sma te wi e tan meki muiti fu doro na ati fu den nanga a bun nyunsu.​—Mat. 22:39.

13-14. Fa Yesus sori taki a ben e firi gi sma, èn fa wi kan kon abi a fasi dati tu?

¹³ Yesus ben e preiki fayafaya. Fu di a ben lobi a pipel, meki a ben gebroiki ibri okasi fu gi den leri (Luk. 19:47, 48). Fu san ede a ben du dati? Yesus ben e firi gi den. Son leisi someni sma ben wani arki Yesus, taki en nanga den disipel fu en „no ben man nyan wan sani srefi” (Mark. 3:20). Di wan man ben wani taki nanga Yesus na neti, a ben de klariklari fu taki nanga a man dati (Yoh. 3:1, 2). Furu fu den sma di ben e arki Yesus na a bigin, no tron disipel fu en. Ma ala sma di ben e arki en yere a Kownukondre boskopu finifini. Na ini a ten disi wi wani gi ala sma na okasi fu yere a bun nyunsu (Tori 10:42). Fu man du disi, dan kande wi o abi fu kenki a fasi fa wi e preiki.

¹⁴ De klariklari fu tyari kenki kon. Efu ala ten wi e preiki na a srefi ten, dan kande wi no o man miti den sma di wani arki a bun nyunsu. Wan pionier sisa di nen Matilda taki: „Mi nanga mi masra e pruberi fu preiki na difrenti ten. Fruku mamanten wi e preiki na ini bisnis kontren. Na bakadina te furu sma de na strati wi e gebroiki bukuwagi. Moro lati na ini a dei wi e si taki wi e miti moro sma na den oso.” Na presi taki wi e tan preiki na ten di moro bun gi wi, wi musu de klariklari fu preiki na tra ten tu, so taki wi o man miti moro sma. Te wi e du dati, dan wi kan de seiker taki Yehovah o breiti nanga wi.

15. San pasa a lasti neti fosi Yesus dede, soleki fa skrifi na Lukas 22:39-44?

¹⁵ Latilati na neti tapu 14 Nisan fu a yari 33, Yesus go na ini a dyari fu Getseimanei. Drape a begi Yehovah. (Leisi Lukas 22:39-44.) Na ini a muilek pisi ten dati Yesus „begi fayafaya . . . èn a  ben e krei watra-ai” (Hebr. 5:7). San Yesus begi Yehovah a lasti neti fosi a dede? A begi fu kisi krakti fu kan tai hori na Yehovah èn fu du a wani fu en. Yehovah yere a fayafaya begi fu en Manpikin èn a seni wan engel fu tranga en.

16. Fu san ede Yesus krei di a ben e begi na ini a dyari fu Getseimanei?

¹⁶ A no de fu taki dati di Yesus ben e begi na ini a dyari fu Getseimanei a ben e krei fu di a ben e hati en taki sma ben o si en leki wan sma di no ben e lespeki Gado nen. A ben sabi tu taki a ben abi wan bigi frantwortu: A ben musu tai hori na Yehovah èn a ben musu santa a nen fu en Papa. Efu yu de na ini wan muilek situwâsi pe yu musu tai hori na Yehovah, dan san yu kan leri fu a krei di Yesus krei? Kow luku ete dri sani di wi kan leri.

17. San wi kan leri fu a fasi fa Yehovah piki den fayafaya begi fu Yesus?

¹⁷ Yehovah e arki den fayafaya begi fu wi. Yehovah ben arki den fayafaya begi fu Yesus. Fu san ede? Fu di a moro prenspari sani gi Yesus, ben de fu tai hori na en Papa èn fu santa a nen fu En. Efu wi srefi e si en leki wan prenspari sani fu tai hori na Yehovah èn fu santa a nen fu en, dan a o piki wi te wi e begi en fu yepi wi.​—Ps. 145:18, 19.

18. Fu san ede wi kan taki dati Yesus na wan mati di e frustan fa wi e firi?

¹⁸ Yesus e frustan fa wi e firi. Te wi e sari, dan wi breiti te wi abi wan mati di e frustan fa wi e firi, spesrutu efu na wan sma di ondrofeni den srefi sani di wi e ondrofeni. Yesus na so wan mati. A sabi san a wani taki fu firi swaki èn fu abi yepi fanowdu. A e frustan taki wi abi swakifasi èn a o sorgu taki wi kisi yepi „na a yoisti ten” (Hebr. 4:15, 16). Neleki fa Yesus ben teki a yepi fu wan engel na ini a dyari fu Getseimanei, na so wi musu de klariklari fu teki a yepi di Yehovah e gi wi. Kande a e gebroiki wan buku, wan tijdschrift, wan felem, noso wan lezing fu yepi wi. A kan meki wan owruman noso wan mati kon na wi tu fu gi wi deki-ati.

19. Fa Yehovah kan gi wi krakti? Gi wan eksempre.

 ¹⁹ Yehovah o gi yu „a freide fu Gado”. Fa Yehovah e gi wi krakti? Te wi e begi, dan wi e kisi „a freide fu Gado di bigi moro iniwan sani di libisma man frustan” (Fil. 4:6, 7). A freide di Yehovah e gi wi e meki wi firi korostu èn wi man denki krin. Luku fa a sani disi yepi wan sisa di nen Luz. A taki: „Furu tron mi e firi leki mi de mi wawan. Son leisi te mi e firi so, dan mi e denki taki Yehovah no lobi mi. Ma te dati pasa, dan wantewante mi e fruteri Yehovah fa mi e firi. Begi e yepi mi fu firi moro bun.” Na ondrofenitori disi e sori taki begi kan yepi wi fu firi korostu.

20. San wi leri fu a krei di Yesus krei?

²⁰ Wi kan leri furu fu a krei di Yesus krei èn a sani dati de wan trowstu gi wi tu! Den tori disi e memre wi taki wi musu tan horibaka gi den mati fu wi di e sari, èn wi musu abi a frutrow taki Yehovah nanga Yesus o yepi wi te wan lobiwan fu wi lasi libi. Den tori disi e gi wi deki-ati tu fu sori switifasi te wi e preiki èn te wi e gi sma leri, fu di Yehovah Gado nanga Yesus Krestes abi a moi fasi disi tu. Boiti dati, wi e kisi trowstu fu di wi sabi taki Yehovah nanga en lobi Manpikin e frustan fa wi e firi, den e frustan taki wi abi swakifasi, èn den wani yepi wi fu horidoro. Meki a de so taki wi tan du san wi leri teleki a dei doro te Yehovah ’o figi ala watra puru na wi ai’, soleki fa a pramisi!​—Openb. 21:4.