1. Fruteri fa a famiri fu Yakobus ben de.

 YAKOBUS, a brada fu Yesus, ben gro kon bigi na ini wan osofamiri di ben e dini Gado fayafaya. * En papa Yosef nanga en mama Maria ben lobi Yehovah srefisrefi èn den ben e du ala san den man fu dini en. Yakobus ben abi ete wan grani. En bigi brada ben o gro kon tron a Mesias di Gado ben pramisi libisma. A ben de wan bigi grani gi Yakobus fu de na ini a famiri dati.

2. Sortu reide Yakobus ben abi fu lespeki en bigi brada?

² Yakobus ben abi furu reide fu lespeki en bigi brada (Mat. 13:55). Fu eksempre, den leriman na ini Yerusalem ben e fruwondru taki Yesus ben sabi Gado Wortu so bun di a ben abi 12 yari (Luk. 2:46, 47). A kan taki Yakobus ben e du temrewroko makandra nanga Yesus. Efu dati de so, dan a ben leri sabi en brada heri bun. Nathan H. Knorr ben gwenti taki: „Yu kan kon sabi furu fu wan sma te yu e wroko nanga en.” * Yakobus ben si tu fa ’Yesus kon moro koni, fa a gro kon bigi, èn fa Gado nanga libisma ben kon lobi en moro nanga moro’ (Luk. 2:52). Te wi e luku den sani disi, dan kande wi e denki taki Yakobus ben de wan fu den fosi disipel fu Yesus, ma dati no ben de so.

3. San Yakobus du di Yesus bigin nanga a diniwroko fu en?

³ Di Yesus ben e du a diniwroko fu en dyaso na grontapu,  dan Yakobus no tron wan disipel fu en (Yoh. 7:3-5). A kan taki Yakobus ben de wan fu den famiriman di ben e denki taki Yesus ben „lasi en frustan” (Mark. 3:21). Èn Bijbel no e taki dati Yakobus ben de nanga en mama Maria di Yesus dede na a pinapostu.​—Yoh. 19:25-27.

4. San wi o leri na ini na artikel disi?

⁴ Bakaten Yakobus poti bribi na ini Yesus èn a tron wan lespeki owruman na ini a Kresten gemeente. Na ini na artikel disi wi o luku tu sani di wi kan leri fu Yakobus: (1) Fu san ede wi musu abi sakafasi, èn (2) fa wi kan tron bun leriman.

5. San Yakobus du di Yesus kon na en baka di a kisi wan opobaka?

⁵ O ten Yakobus tron wan fayafaya bakaman fu Yesus? Baka di Yesus kisi wan opobaka, dan „a sori ensrefi na Yakobus èn baka dati na ala den apostel” (1 Kor. 15:7). Baka a konmakandra dati, Yakobus tron wan fu den disipel fu Yesus. A ben de drape tu na ini a sodrokamra na Yerusalem di den apostel ben e wakti fu kisi a santa yeye di Yesus ben pramisi den (Tori 1:13, 14). Bakaten Yakobus ben abi a grani fu dini leki wan fu den owruman fu a tiri skin fu a ten dati (Tori 15:6, 13-22; Gal. 2:9). Èn wan pisi ten fosi a yari 62, Gado meki a skrifi wan brifi gi den salfu Kresten. Na ini a ten disi wi kan leri furu fu a brifi dati tu, awinsi wi abi a howpu fu go na hemel noso fu libi na grontapu (Yak. 1:1). Soleki fa a historia skrifiman Josephus ben taki, dan a Dyu granpriester Ananias, di ben de a manpikin fu Anas, meki den kiri Yakobus. Yakobus tan gi yesi na Yehovah teleki a klari en diniwroko dyaso na grontapu.

6. Fu san ede wi kan taki dati Yakobus ben de tra fasi leki den kerki fesiman fu a ten fu en?

⁶ Yakobus ben abi sakafasi. Fu san ede wi kan taki dati? Wi man si dati te wi e luku fa Yakobus ben si Yesus bakaten èn fa furu fu den kerki fesiman ben e si Yesus. Di Yakobus si krin buweisi taki Yesus na a Manpikin fu Gado, dan a ben e bribi dati fu di a ben abi sakafasi. Ma den moro prenspari priester na ini Israel no ben e du dati. Fu eksempre, a ben de krin taki Yesus ben gi Lasarus wan opobaka. Ma na presi fu taki krin taki Yesus ben e teki presi gi Yehovah, den pruberi fu  kiri Yesus nanga Lasarus (Yoh. 11:53; 12:9-11). Bakaten di Yesus srefi kisi wan opobaka, den pruberi fu kibri a tori disi gi a pipel (Mat. 28:11-15). Fu di den kerki fesiman dati ben abi heimemre, meki den no ben wani si Yesus leki a Mesias.

7. Fu san ede wi no musu abi heimemre?

⁷ San disi e leri wi: No abi heimemre èn meki Yehovah gi yu leri. Neleki fa siki kan meki taki wan sma en ati no e wroko bun, na so heimemre kan meki taki wi no e gi yesi na Yehovah. Den Fariseiman ben abi so furu heimemre taki den ben e weigri fu bribi den krinkrin buweisi di ben e sori taki Yesus ben abi a yeye fu Gado èn taki a ben de Gado Manpikin (Yoh. 12:37-40). A denki disi no ben bun srefisrefi fu di a ben e tapu pasi gi den fu kisi têgo libi (Mat. 23:13, 33). Dati meki a prenspari fu meki Gado Wortu nanga a santa yeye abi krakti tapu den fasi fu wi, den sani di wi e denki nanga den bosroiti di wi e teki (Yak. 3:17). Fu di Yakobus ben abi sakafasi, meki a gi pasi taki Yehovah gi en leri. Èn soleki fa wi o si, dan na fu di a ben abi sakafasi, meki a tron wan bun leriman.

8. San kan yepi wi fu tron bun leriman?

⁸ Yakobus no ben kisi heiskoro-leri. A no de fu taki dati den kerki fesiman fu a ten fu en ben e si Yakobus na a srefi fasi leki fa den ben e si den apostel Petrus nanga Yohanes. Den kon frustan taki den man disi „no ben kisi furu skoro ma taki den ben de neleki ala tra sma” (Tori 4:13). Ma Yakobus ben leri fu de wan bun leriman soleki fa wi kan si na ini a buku di a skrifi. Kande wi no kisi heiskoro-leri tu, ma toku a yeye fu Yehovah èn a leri di wi e kisi fu na organisâsi fu en, kan yepi wi fu tron bun leriman. Meki wi go luku fa Yakobus ben e gi leri èn san wi kan leri fu dati.

9. Fa Yakobus ben e gi leri?

⁹ Yakobus no gebroiki muilek wortu èn a no taki sani di sma no ben o man frustan. Dati meki den sma di ben e arki en  ben sabi san den ben musu du èn fa den ben musu du dati. Luku a makelek fasi fa Yakobus e leri wi taki Kresten no musu hori sma na ati te ogri miti den. A skrifi: „Wi e taki dati den sma di horidoro, na koloku sma. Unu yere fa Yob ben horidoro èn unu si fa Yehovah meki sani waka gi en. Unu si taki Yehovah lobi sma trutru èn taki a abi sari-ati” (Yak. 5:11). Luku taki Yakobus ben gebroiki Bijbel fu leri den Kresten brada nanga sisa fu en den sani disi. A gebroiki Gado Wortu fu yepi den sma fu kon si taki ala ten Yehovah e blesi den wan di e tan gi yesi na en neleki Yob. Yakobus ben taki fu sani di den sma ben o man frustan makriki. Na so a no poti prakseri na ensrefi, ma a poti prakseri na Yehovah.

10. San na wán fasi fa wi kan gi leri neleki Yakobus?

¹⁰ San disi e leri wi: Taki sani di makelek fu frustan èn gebroiki Gado Wortu fu gi sma leri. Te wi e gi sma leri, dan wi no musu pruberi fu sori den o furu wi sabi, ma wi musu sori den o furu Yehovah sabi èn fa a e broko en ede nanga den (Rom. 11:33). Wi o man du dati te wi e gebroiki Bijbel ala ten te wi e gi leri. Fu eksempre, na presi taki wi e taigi den Bijbel studenti fu wi san wi ben o du, wi musu yepi den fu prakseri den eksempre na ini Bijbel èn fu frustan fa Yehovah e denki èn e firi. Na so den no o luku nomo san wi e du, ma den o du san den leri fu di den wani taki Yehovah breiti nanga den.

11. Sortu problema son Kresten ben abi na ini a ten fu Yakobus èn sortu rai a gi den? (Yakobus 5:13-15)

¹¹ Yakobus no ben e fruwakti tumusi furu fu trawan. A brifi fu Yakobus e sori krin taki a ben sabi san na den problema di den brada nanga sisa fu en ben abi èn a ben taigi den krin san fu du. Son Kresten no ben de gaw fu gi yesi na den rai di den ben kisi (Yak. 1:22). Trawan ben abi moro lobi gi gudusma (Yak. 2:1-3). Dan yu ben abi Kresten tu di no ben man basi den tongo (Yak. 3:8-10). Den Kresten dati ben abi seryusu problema, ma Yakobus ben abi a frutrow taki den ben o man kenki. A gi den krin rai na wan switi fasi èn a taigi den wan di ben abi yepi fanowdu, fu go suku yepi na den owruman.​—Leisi Yakobus 5:13-15.

12. Fa wi kan tan si a bun na ini den Bijbelstudenti fu wi?

¹² San disi e leri wi: No fruwakti tumusi furu fu trawan, ma pruberi fu si den bun fasi fu den. Furu fu den sma di wi e studeri Bijbel nanga den, feni en muilek fu fiti den rai fu Bijbel (Yak. 4:1-4). Kande a e teki ten fosi den tapu nanga takru gwenti èn fosi den kon abi den fasi fu Krestes. Neleki Yakobus wi no musu frede fu taigi den Bijbelstudenti fu wi sortu kenki den musu tyari kon. Wi musu tan si a bun na ini den èn wi musu abi a frutrow taki Yehovah o hari sma di abi sakafasi kon na en èn taki a o gi den a krakti di den abi fanowdu fu tyari kenki kon na ini den libi.​—Yak. 4:10.

13. San Yakobus ben e frustan, soleki fa Yakobus 3:2 e sori?

¹³ Yakobus no ben e denki taki a ben bun moro trawan. Yakobus no ben denki taki a ben prenspari moro den tra Kresten, soso fu di a ben de wan brada fu Yesus, noso fu di a ben abi bigi frantwortu. A ben kari den tra Kresten „mi lobi brada” (Yak. 1:16, 19; 2:5). A no ben e du neleki a no ben abi fowtu. Na presi fu  dati a taki: „Wi alamala e sondu furu tron.”​—Leisi Yakobus 3:2.

14. Fu san ede wi no musu du neleki wi no e meki fowtu?

¹⁴ San disi e leri wi: Hori na prakseri taki wi alamala e sondu. Wi no musu denki taki wi bun moro den sma di wi e gi leri. Fu san ede? Efu wi e gi a Bijbelstudenti fu wi a denki taki wi no abi fowtu, dan a kan denki taki noiti a o man du san Gado e aksi fu en. Ma te wi e taigi a studenti eerlijk taki a no ala ten a ben makelek gi wi fu du san Bijbel e taki èn te wi e fruteri en fa Yehovah yepi wi fu tyari kenki kon na ini wi eigi libi, dan dati o yepi en fu si taki en srefi kan dini Yehovah tu.

15. San yu kan taki fu den agersitori di Yakobus gebroiki? (Yakobus 3:2-6, 10-12)

¹⁵ Yakobus gebroiki agersitori di ben e naki na ati fu sma. A no de fu taki dati a santa yeye ben yepi en. Ma a kan taki a ben man gi bun leri fu di a ben leri furu fu den agersitori di en bigi brada Yesus ben fruteri. Den agersitori di Yakobus gebroiki na ini a brifi fu en abi fu du nanga aladei sani èn den makelek fu frustan.​—Leisi Yakobus 3:2-6, 10-12.

16. Fu san ede wi musu gebroiki bun agersitori.

¹⁶ San disi e leri wi: Gebroiki bun agersitori. Te yu e gebroiki agersitori di fiti, dan sma o man si na den fesi san yu wani leri den. Disi o yepi den fu memre prenspari tru tori fu Bijbel. Yesus ben sabi heri bun fa fu gebroiki bun agersitori èn en brada Yakobus leri fu dati tu. Meki wi go luku wan fu den agersitori di Yakobus gebroiki. Wi o si tu fu san ede a ben naki na ati fu sma.

17. Fu san ede na agersitori na Yakobus 1:22-25, na wan bun agersitori?

¹⁷ Leisi Yakobus 1:22-25. Na agersitori fu a spikri na wan bun agersitori. Difrenti reide de fu san ede dati de so. Yakobus ben wani leri wi wan prenspari sani. A ben wani leri wi taki efu wi wani kisi wini fu Gado Wortu, dan wi no musu leisi en nomo, ma wi musu du tu san wi e leri fu en. Yakobus gebroiki wan agersitori di sma ben o man frustan makriki. A ben taki fu wan man di e luku na ini wan spikri. San a ben wani leri wi? A de  wan don sani te wan man di e luku na ini wan spikri e si wan sani na ensrefi di no bun, ma a e libi en leti so. Na so a de wan don sani tu te wi e leisi Gado Wortu èn wi e si taki wi musu kenki den fasi fu wi, ma wi e tan leti so.

18. San na dri sani di wi musu du te wi e gebroiki wan agersitori?

¹⁸ Te yu e gebroiki wan agersitori, dan neleki Yakobus yu musu du dri sani: (1) Sorgu taki na agersitori o yepi a sma fu frustan san yu wani leri en. (2) Gebroiki wan agersitori di sma o man frustan makelek. (3) Fruklari san na agersitori wani taki. Efu a muilek gi yu fu feni bun agersitori, dan luku a buku Ondrosuku Bijbel moro fini, gi Yehovah Kotoigi. Suku a pisi di nen „Agersitori”, dan yu o feni bun furu eksempre di yu kan gebroiki. Ma hori na prakseri taki agersitori de leki wan mikrofon. Den e yepi sma fu frustan sani moro bun. Sobun, na agersitori fu yu musu poti prakseri soso na den prenspari sani di yu wani leri a sma. A no de fu taki dati wi no wani tron moro bun leriman soso fu sori sma o furu wi sabi, ma san moro prenspari gi wi, na taki wi wani yepi so furu sma leki wi man fu kon na ini a koloku famiri fu Yehovah.

19. Fa wi e sori taki wi lobi wi Kresten brada nanga sisa?

¹⁹ A no de fu taki dati wi no ben abi a grani fu gro kon bigi nanga wan brada di no ben abi fowtu. Ma wi abi a grani fu dini Yehovah makandra nanga wan bigi famiri fu Kresten brada nanga sisa di lobi Yehovah. Wi e sori taki wi lobi den te wi e meki ten gi den, te wi e leri fu den, èn te wi e wroko skinskin nanga den na ini a preikiwroko èn na ini a wroko di wi e du fu gi sma leri. Te wi e du muiti fu kon abi den fasi fu Yakobus, fu du den sani di a ben e du, èn fu gi leri neleki en, dan wi e gi grani na Yehovah èn wi e yepi reti-ati sma fu kon krosibei na wi lobi-ati hemel Tata.