1-2. (a) Fa wi kan firi te wi e prakseri a libi nanga a diniwroko fu Yesus? (b) San wi o luku na ini na artikel disi?

 TE WI lasi wan lobiwan na ini dede, dan wi e misi a sma dati srefisrefi! Na a bigin, na soso sari wi e sari te wi e prakseri den dei fosi a sma dede, spesrutu efu a sma ben abi furu pen fosi a dede. Ma baka wan pisi ten, wi kan bigin firi prisiri baka te wi e prakseri wan sani di a sma leri wi, noso wan sani di a ben e taki noso du fu gi wi deki-ati noso fu meki wi lafu.

² Na so a de tu taki wi e sari te wi e leisi fa Yesus pina èn dede. Na a ten fu a Memrefesa wi gwenti teki ten fu prakseri o prenspari a frulusu-ofrandi fu Yesus de (1 Kor. 11:24, 25). Ma a e gi wi furu prisiri tu te wi e prakseri ala den sani di Yesus taki èn du di a ben de na grontapu. Wi e kisi deki-ati tu te wi e prakseri san Yesus e du nownow èn san a o du gi wi na ini a ten di e kon. Te wi e denki dipi fu den sani disi èn fu a lobi di Yesus sori gi wi, dan dati kan meki wi sori na difrenti fasi taki wi de nanga tangi. Na ini na artikel disi wi o luku fa wi kan sori taki wi de nanga tangi.

3. Sortu reide wi abi fu de nanga tangi gi a lusu-paiman?

³ Wi de nanga tangi na ati te wi e prakseri a libi nanga a dede fu Yesus. Di Yesus ben de na grontapu, a ben e fruteri sma den bun sani di Gado Kownukondre o du. Wi lobi den Bijbel leri disi trutru. Wi de nanga tangi gi a lusu-paiman fu di a e meki taki wi kan tron bun mati fu Yehovah nanga Yesus. Den sma di poti bribi na ini Yesus abi a howpu tu fu libi fu têgo èn fu si den lobiwan fu den baka te den o kisi wan opobaka (Yoh. 5:28, 29; Rom.  6:23). Fu taki en leti, wi no e frudini den moi blesi disi èn noiti wi o man pai Gado nanga Krestes baka gi den sani di den du gi wi (Rom. 5:8, 20, 21). Ma wi kan sori den taki wi de nanga tangi trutru. Fa wi kan du dati?

4. Fa Maria Makdalena sori taki a ben de nanga tangi gi san Yesus ben du gi en? (Luku a prenki.)

⁴ Luku na eksempre fu a Dyu uma di nen Maria Makdalena. A ben e pina srefisrefi fu di seibi ogri yeye ben de na en tapu. A ben musu fu denki taki nowan sma ben o man yepi en. Prakseri fa a ben de nanga bigi tangi di Yesus puru den ogri yeye dati na en tapu. Fu di a ben de nanga tangi, meki a tron wan bakaman fu en èn a gebroiki en ten, en krakti nanga den sani di a ben abi fu horibaka gi Yesus na ini a diniwroko (Luk. 8:1-3). Aladi Maria ben abi furu warderi gi san Yesus ben du gi en, toku a kan taki a no ben sabi taki Yesus ben o du moro gi en na ini a ten di e kon. Yesus ben o dede gi libisma „so taki ala sma di e bribi na ini en no sa dede, ma sa kisi têgo libi” (Yoh. 3:16). Ma Maria sori taki a ben de nanga tangi fu di a tan waka baka Yesus. Di Yesus ben e pina srefisrefi na a pinapostu, dan Maria ben e tanapu krosibei fu di a ben e broko en ede nanga Yesus èn a ben wani trowstu den tra sma di ben de drape (Yoh. 19:25). Baka di Yesus dede, Maria nanga tu tra uma tyari switismeri sani fu lobi gi Yesus en skin fosi den beri en (Mark. 16:1, 2). Yehovah gi Maria wan bigi blesi fu di a tan getrow na Yesus. Di Yesus opobaka, dan a miti Maria èn a taki nanga en. Disi na wan grani di furu fu den disipel fu Yesus no ben kisi.​—Yoh. 20:11-18.

5. Fa wi kan sori taki wi de nanga tangi gi ala den sani di Yehovah nanga Yesus du gi wi?

⁵ Wi kan sori tu taki wi de nanga tangi gi ala den sani di Yehovah nanga Yesus  du gi wi te wi e gebroiki wi ten, wi krakti, nanga wi moni fu meki Kownukondre afersi go na fesi. Fu eksempre, wi kan yepi fu bow presi di wi e gebroiki fu anbegi Yehovah èn wi kan yepi fu hori den presi disi bun.

6. Fu san ede wi kan taki dati a lusu-paiman na wan kado di Gado gi ibriwan fu wi?

⁶ Te wi e prakseri o furu lobi Yehovah nanga Yesus abi gi wi, dan wi o wani sori lobi tu gi den (1 Yoh. 4:10, 19). A lobi di wi abi gi den e kon moro tranga te wi e frustan taki Yesus dede gi ibriwan fu wi. Na apostel Paulus ben frustan a sani disi èn a sori fa a ben de nanga tangi di a skrifi den Galasiasma. A taki: ’A Manpikin fu Gado lobi mi èn a gi en libi fu mi ede’ (Gal. 2:20). Fu di Yesus dede gi wi, meki Yehovah kan hari yu kon na en so taki yu kan tron en mati (Yoh. 6:44). A no e naki yu ati fu sabi taki Yehovah si wan bun sani na ini yu èn taki a pai a moro hei prijs so taki yu kan de wan fu den mati fu en? A sani disi no e meki yu kisi moro lobi gi Yehovah nanga Yesus? Dati meki wi musu aksi wisrefi: ’San mi o du fu di mi lobi Yehovah nanga Yesus?’

7. Soleki fa a fowtow e sori, dan fa wi alamala kan sori taki wi lobi Yehovah nanga Yesus? (2 Korentesma 5:14, 15; 6:1, 2)

⁷ A lobi di wi abi gi Gado nanga Krestes e meki wi sori lobi gi trawan. (Leisi 2 Korentesma 5:14, 15; 6:1, 2.) Wan fasi fa wi kan sori lobi gi trawan na te wi e teki prati fayafaya na a preikiwroko. Wi no e desko sma fu di den de fu wan tra ras noso fu wan tra lo. Boiti dati, wi e taki nanga ala sma awinsi den gudu èn den kisi hei skoroleri, noso awinsi den pôti èn den no go na skoro. Te wi e taki  nanga ala sma di wi e miti, wi e du a wani fu Yehovah fu di „a wani taki ala sortu sma musu kisi frulusu èn taki den musu kon sabi a tru leri finifini”.​—1 Tim. 2:4.

8. Fa wi kan sori taki wi lobi wi brada nanga sisa?

⁸ Wi e sori tu taki wi lobi Gado nanga Krestes te wi lobi wi brada nanga sisa (1 Yoh. 4:21). Wi e broko wi ede trutru nanga den èn wi e yepi den te den de na nowtu. Wi e trowstu den te den lasi wan lobiwan na ini dede, wi e go luku den te den siki, èn wi e du ala san wi man fu gi den deki-ati te den brokosaka (2 Kor. 1:3-7; 1 Tes. 5:11, 14). Wi e tan begi gi den fu di wi sabi taki „a fayafaya begi fu wan reti-ati sma abi furu krakti èn a abi bun bakapisi”.​—Yak. 5:16.

9. San na wan tra fasi fa wi kan sori taki wi lobi wi brada nanga sisa?

⁹ Wi e sori tu taki wi lobi wi brada nanga sisa te wi e du tranga muiti fu libi na ini freide nanga den. Wi e pruberi fu gi trawan pardon neleki fa Yehovah e gi sma pardon. Yehovah ben de klariklari fu meki en Manpikin dede gi den sondu fu wi. Dati meki wi musu de klariklari fu gi wi brada nanga sisa pardon te den sondu teige wi. Wi no wani de leki na ogri srafu na ini wan fu den agersitori fu Yesus. Di a masra taigi a srafu disi taki a no ben abi fu pai en a bigi paiman moro, dan a srefi srafu disi no sori sari-ati gi wan tra srafu di no ben abi so wan bigi paiman na en (Mat. 18:23-35). Efu yu nanga wan tra sma na ini a gemeente abi wan pikin kesekese, dan yu ben o meki muiti fu meki en bun baka nanga en fosi yu go na a Memrefesa? (Mat. 5:23, 24) Efu yu du dati, dan yu e sori taki yu lobi Yehovah nanga Yesus trutru.

10-11. Fa owruman kan sori taki den lobi Yehovah nanga Yesus? (1 Petrus 5:1, 2)

¹⁰ Fa owruman kan sori taki den lobi Yehovah nanga Yesus? Wan prenspari fasi fa den kan du dati, na fu sorgu gi den skapu fu Yesus. (Leisi 1 Petrus 5:1, 2.) Yesus sori na apostel Petrus a sani disi krin. Baka di Petrus taki dri leisi dati a no sabi Yesus, dan a ben de klariklari fu du ala san a man fu sori taki a lobi Yesus. Baka di Yesus opo baka, a aksi Petrus: „Simon, manpikin fu Yohanes, yu lobi mi?” Wi de seiker taki Petrus ben o du ala san a ben man fu sori taki a lobi en Masra Yesus. Yesus ben taigi Petrus: „Gi den pikin skapu fu mi nyanyan” (Yoh. 21:15-17). Baka dati, Petrus sori taki a lobi Yesus trutru fu di a sorgu bun gi den skapu fu Yesus te na dede.

¹¹ Owruman, fa yu kan sori na ini den wiki fosi èn baka a Memrefesa taki a sani di Yesus taigi Petrus prenspari gi yu? Yu kan sori o furu yu lobi Yehovah nanga Yesus te yu gwenti tyari herder fisiti èn te yu e du muiti fu yepi den wan di no e preiki moro fu drai kon baka na Yehovah (Esek. 34:11, 12). Yu kan gi Bijbelstudenti nanga trawan di ben kon na a Memrefesa deki-ati tu. Wi wani taki den firi bun te den e kon na den konmakandra fu di wi e howpu taki wan dei den o tron disipel fu Yesus tu.

12. Te wi e prakseri san Yesus ben taki a neti fosi a dede, dan fu san ede dati e gi wi deki-ati? (Yohanes 16:32, 33)

¹² A neti fosi Yesus dede, a taigi den disipel fu en: „Na grontapu unu e kisi banawtu, ma hori deki-ati! Mi wini  grontapu.” (Leisi Yohanes 16:32, 33.) San yepi Yesus fu abi deki-ati di den feanti ben kon grabu en? San yepi en fu tan getrow te na dede? A ben poti en frutrow tapu Yehovah. Fu di Yesus ben sabi taki den bakaman fu en ben o kisi den srefi sortu tesi disi tu, meki a aksi Yehovah fu kibri den (Yoh. 17:11). Fu san ede a sani disi e gi wi deki-ati? Fu di Yehovah tranga moro iniwan fu den feanti fu wi (1 Yoh. 4:4). Yehovah e si ala sani. Wi de seiker taki efu wi e frutrow tapu Yehovah, dan a o yepi wi fu no frede moro èn fu tan sori deki-ati.

13. Fa Yosef fu Arimateya sori deki-ati?

¹³ Luku na eksempre fu Yosef fu Arimateya. Den Dyu ben abi furu lespeki gi en. A ben de wan memre fu a Sanhedrin, a moro hei krutubangi fu den Dyu. Ma na a ten fu Yesus en diniwroko na grontapu, Yosef no ben abi deki-ati kwetikweti. Yohanes ben taki dati Yosef „ben de wan disipel fu Yesus, ma a no ben meki sma sabi taki a ben de wan disipel, fu di a ben frede den Dyu” (Yoh. 19:38). Aladi Yosef ben wani sabi moro fu a Kownukondre boskopu, toku a no meki trawan kon sabi taki a ben poti bribi na ini Yesus. Soleki fa a sori, dan a ben frede taki sma no ben o lespeki en moro efu den ben kon sabi taki a ben de wan disipel fu Yesus. Ma Bijbel e taigi wi taki baka di Yesus dede, Yosef no ben frede moro fu di a ben „teki deki-ati fu go aksi Pilatus a dedeskin fu Yesus” (Mark. 15:42, 43). Now ala sma ben sabi taki Yosef ben de wan disipel.

14. San yu musu du efu yu e frede libisma?

¹⁴ Oiti yu ben e frede libisma tu neleki Yosef? Yu e syen son leisi fu taigi sma na skoro noso na yu wrokope taki yu na wan Kotoigi fu Yehovah? Yu e draidrai fu tron wan preikiman noso fu dopu fu di yu e frede san trawan o taki fu yu? No meki den sortu sani disi tapu yu fu du san bun. Begi Yehovah fayafaya. Aksi en fu gi yu a deki-ati fu du a wani fu en. Te yu e si fa Yehovah e piki den begi fu yu, dan yu o kisi krakti èn yu o kon abi moro deki-ati.​—Yes. 41:10, 13.

15. Baka di Yesus sori ensrefi na den disipel fu en, dan san den du fu di den ben de nanga prisiri? (Lukas 24:52, 53)

¹⁵ Den disipel ben e sari srefisrefi di Yesus dede. Prakseri fa yu ben o firi efu  yu ben de na ini a situwâsi fu den. Boiti taki den ben lasi a mati fu den di den ben lobi srefisrefi, den ben lasi howpu tu (Luk. 24:17-21). Ma di Yesus sori ensrefi na den, a teki ten fu yepi den frustan fa a Bijbel profeititori kon tru na ini en. A gi den wan prenspari wroko fu du tu (Luk. 24:26, 27, 45-48). Baka 40 dei, di Yesus opo go na hemel, den disipel no ben e sari moro, ma den ben de nanga bigi prisiri. Den ben breiti srefisrefi fu di den ben sabi taki Yesus de na libi èn taki a ben o yepi den fu du a wroko di a gi den fu du. Fu di den ben de nanga prisiri, meki den prèise Yehovah doronomo.​—Leisi Lukas 24:52, 53; Tori 5:42.

16. Fa wi kan teki na eksempre fu den disipel fu Yesus?

¹⁶ Fa wi kan teki na eksempre fu den disipel fu Yesus? A heri yari langa wi kan de nanga prisiri na ini na anbegi fu Yehovah, a no soso na a ten fu a Memrefesa. Dati meki wi musu poti a Kownukondre fu Gado na a fosi presi na ini wi libi. Fu eksempre, furu sma kenki den wrokoyuru fu den so taki den man go na ini a preikiwroko, na den konmakandra èn hori na Osofamiri Anbegi ibri wiki. Trawan bosroiti fu no feti baka den sani di trawan e si leki sani di den musu fu abi. Den du dati soso fu man du moro na ini a gemeente noso fu man dini na wan presi pe moro Kownukondre preikiman de fanowdu. A tru taki wi musu horidoro fu man tan dini Yehovah, ma a e pramisi fu blesi wi bogobogo te wi e poti Kownukondre afersi na a fosi presi na ini wi libi.​—Odo 10:22; Mat. 6:32, 33.

17. San yu o du na a ten fu a Memrefesa? (Luku a fowtow.)

¹⁷ Wi e luku go na tudewroko 4 april fu man hori a Memrefesa. Ma no wakti fosi a ten dati doro fu denki dipi fu a libi nanga a dede fu Yesus èn fu a lobi di en nanga Yehovah sori gi wi. Prakseri den sani disi so furu leki yu man na ini den wiki fosi èn baka a Memrefesa. Fu eksempre, yu kan poti ten na wan sei fu leisi èn fu denki dipi fu den sani di skrifi na ini a schema „A lasti wiki fu Yesus en libi na grontapu”, pisi 16 fu a buku Studeri Gado Wortu moro fini. Te yu e leisi fu Yesus en libi, dan suku Bijbeltekst di kan yepi yu fu abi moro warderi, moro lobi, moro deki-ati nanga prisiri. Baka dati prakseri na sortu fasi yu kan sori warderi. Yu kan de seiker taki Yesus o warderi ala den sani di yu e du fu memre en na a ten fu a Memrefesa.​—Openb. 2:19.