1-2. Fu san ede wi e go na a Memrefesa ibri yari?

 SOWAN 2000 yari pasa, Yesus dede gi wi èn disi meki taki wi man kisi têgo libi. A neti fosi Yesus dede, a taigi den bakaman fu en fu memre a dede fu en. Te den ben o du dati, dan den no ben o abi fu du wan lo sani ma den ben musu gebroiki soso brede nanga win.​—1 Kor. 11:23-26.

² Wi e du san Yesus taigi wi fu di wi lobi en trutru (Yoh. 14:15). Ibri yari, na a ten fu a Memrefesa, wi e sori taki wi de nanga tangi gi san Yesus du gi wi. Dati meki wi e meki ten fu denki san a dede fu en wani taki gi wi èn wi e begi tu fu a tori dati. Boiti dati, wi e prisiri fu du moro na ini a preikiwroko èn wi e gi so furu sma leki wi man deki-ati fu de na a spesrutu okasi disi makandra nanga wi. Èn a no de fu taki dati wi no o meki noti tapu wi fu go na a Memrefesa.

3. San wi o luku na ini na artikel disi?

³ Na ini na artikel disi wi o luku dri fasi fa a pipel fu Yehovah du ala san den man fu hori a Memrefesa fu a dede fu Yesus. Wi o luku (1) fa wi e hori a Memrefesa na a fasi fa Yesus ben leri wi, (2) fa wi e gi trawan wan kari fu kon hori a Memrefesa makandra nanga wi, èn (3) fa wi e hori a Memrefesa awinsi wi e kisi fu du nanga muilek situwâsi.

4. San wi e leri na a Memrefesa èn fu san ede wi musu de nanga tangi taki wi sabi den sani disi? (Lukas 22:19, 20)

⁴ Ibri yari na a Memrefesa wi e arki wan Bijbel-lezing di e gi krin piki tapu wan tu aksi. Wi e leri fu san ede libisma  abi wan lusu-paiman fanowdu èn fa a dede fu wán man kan pai gi den sondu fu so furu sma. A lezing e memre wi tu san a brede nanga a win wani taki èn suma musu gebroiki den sani disi. (Leisi Lukas 22:19, 20.) Boiti dati, wi e denki dipi fu den blesi di e wakti den wan di abi a howpu fu libi fu têgo na grontapu (Yes. 35:5, 6; 65:17, 21-23). Wi musu de nanga tangi trutru taki wi sabi den sani disi. Milyardmilyard sma no sabi den sani disi èn den no sabi tu o prenspari a lusu-paiman fu Yesus de. Boiti dati, den no e hori a Memrefesa fu a dede fu en na a fasi fa a ben leri wi. Fu san ede dati de so?

5. Baka di furu fu den apostel fu Yesus dede, dan fa sma bigin memre a dede fu Yesus?

⁵ Baka di furu fu den apostel fu Yesus dede, dan fosi yu denki falsi Kresten bigin kon na ini a gemeente (Mat. 13:24-27, 37-39). Den ben e taki „sani di no tru, fu hari den disipel kon na den baka” (Tori 20:29, 30). Wan fu den sani di den falsi Kresten bigin leri sma te fu kaba, na taki Yesus no ben gi ensrefi „leki wan ofrandi wán leisi nomo, fu tyari den sondu fu wan heri ipi sma”, soleki fa Bijbel e taki. Na presi fu dati, den ben e leri sma taki na ofrandi fu Yesus ben musu tyari ibri leisi baka (Hebr. 9:27, 28). Na ini a ten disi, furu reti-ati sma e bribi a falsi leri disi. Den e go na kerki ibri wiki èn son leisi ibri dei fu teki prati na a Komuni. b Aladi sma fu tra kerki no e memre a dede fu Yesus so furu leisi na ini wan yari, toku furu fu den no sabi krin san a frulusu-ofrandi fu Yesus wani taki gi libisma. Sonwan fu den kan aksi densrefi: ’A tru taki a dede fu Yesus wani taki dati mi kan kisi pardon fu den sondu fu mi?’ Fu san ede den e aksi densrefi a sani dati? Na fu di den e bribi den sma di e taki dati a dede fu Yesus no kan meki taki sma kisi pardon fu den sondu fu den. Fa den tru bakaman fu Yesus yepi sma fu kon frustan san a frulusu-ofrandi fu Yesus wani taki èn san na a yoisti fasi fu memre a dede fu Yesus?

6. San wan grupu Bijbel ondrosukuman kon frustan na a ten fu 1872?

⁶ Na ini 1870, wan grupu Bijbel ondrosukuman bigin ondrosuku Bijbel finifini èn Charles Taze Russel ben e teki fesi na ini a grupu dati. Den ben wani sabi san a frulusu-ofrandi fu Yesus ben wani taki trutru èn fa den ben musu memre a dede fu en. Na a ten fu 1872, den kon frustan nanga yepi fu Bijbel taki Yesus ben gi en libi trutru leki ofrandi gi ala libisma. Den Bijbel ondrosukuman no hori den sani disi gi densrefi. Na presi fu dati den tyari buku, koranti, nanga tijdschrift kon na doro fu meki trawan kon sabi den sani disi tu. Èn syatu baka dati, den bigin kon makandra wán leisi wan yari fu hori a Memrefesa, neleki fa den fosi Kresten ben e du dati.

7. Fa wi e kisi wini fu den sani di den Bijbel ondrosukuman ben studeri?

⁷ Na ini a ten disi wi e kisi wini fu den sani di den Kresten dati ben e studeri furu yari pasa. Fa so? Yehovah yepi wi fu frustan san a frulusu-ofrandi fu Yesus wani taki èn san na ofrandi disi o du gi wi èn gi ala sma (1 Yoh. 2:1, 2). Bijbel e leri wi sosrefi taki tu howpu de gi libisma di  e gi yesi na Gado. Son sma o libi fu têgo na hemel leki yeye di no man dede noiti moro èn milyunmilyun trawan o libi fu têgo na grontapu. Te wi e luku fa Yehovah lobi wi èn fa wi e kisi wini fu na frulusu-ofrandi fu Yesus, dan wi e kon moro krosibei na Yehovah (1 Petr. 3:18; 1 Yoh. 4:9). Sobun, neleki den reti-ati brada nanga sisa fu wi na ini owruten, wi e gi trawan a kari fu kon hori a Memrefesa makandra nanga wi na a fasi fa Yesus ben leri wi.

8. San a pipel fu Yehovah du fu gi trawan wan kari fu kon na a Memrefesa? (Luku a fowtow.)

⁸ A pipel fu Yehovah e kari sma kon na a Memrefesa furu yari kaba. Sensi 1881, brada nanga sisa na ini Amerkankondre ben e kisi a kari fu kon makandra na wan sma oso na ini Allegheny, Pennsylvania, fu hori a Memrefesa. Bakaten, ibri gemeente ben e hori a Memrefesa. Na ini maart 1940, preikiman kisi a rai fu gi iniwan sma na ini a kontren fu den wan kari. Na ini 1960, Betel druk den papira fu gi sma wan kari fu a fosi leisi. Sensi a ten dati, milyardmilyard fu den kari disi prati. Fu san ede wi e gebroiki so furu fu wi ten nanga wi krakti fu gi trawan wan kari?

9-10. Suma e kisi wini fu a muiti di wi e meki fu kari sma kon na a Memrefesa? (Yohanes 3:16)

⁹ Fu san ede wi e gi trawan wan kari fu kon hori a Memrefesa makandra nanga wi? Wan reide na taki wi wani den sma di e kon fu a fosi leisi sabi san Yehovah nanga Yesus du gi wi alamala. (Leisi Yohanes  3:16.) Wi e howpu taki den sani di den e si èn e yere na a Memrefesa o gi den deki-ati fu kon sabi moro èn fu tron futuboi fu Yehovah. Ma tra sma e kisi wini tu.

¹⁰ Wi e kari den sma tu di no e preiki moro. Wi e du dati fu memre den taki Gado lobi den ete. Furu fu den sma disi e teki a kari fu wi èn wi breiti srefisrefi fu si den na a Memrefesa. Te den de na a Memrefesa, dan dati e memre den fa den ben e prisiri fu dini Yehovah fosi. Luku na eksempre fu Monica. c A tron wan preikiman baka, na a ten di a COVID-19 siki ben panya na ala sei. Baka di a go na a Memrefesa na ini 2021, a taki: „A Memrefesa disi ben prenspari srefisrefi gi mi. Disi na a fosi leisi na ini 20 yari taki mi ben man preiki gi sma èn gi den wan kari fu kon na a Memrefesa. Mi du ala san mi man fu gi sma wan kari fu di mi de nanga tangi gi san Yehovah nanga Yesus du gi mi” (Ps. 103:1-4). Awansi sma no e teki a kari fu wi, toku wi e tan du ala san wi man fu kari tra sma kon na a Memrefesa fu di wi sabi taki Yehovah e warderi a muiti di wi e meki.

11. Fa Yehovah blesi a muiti di wi e meki fu kari sma kon na a Memrefesa? (Hagai 2:7)

¹¹ A no de fu taki dati Yehovah blesi a muiti di wi meki fu kari sma kon na a Memrefesa. Aladi a COVID-19 siki ben panya na ala sei na ini 2021, toku 21.367.603 sma ben de na a Memrefesa. Noiti ete dati ben de so. Dati na bijna tu nanga afu tron so furu sma leki ala den Yehovah Kotoigi na heri grontapu! A no de fu taki dati Yehovah no e poti prakseri nomo na a nomru fu sma di kon na a Memrefesa, ma e poti prakseri na ibriwan fu den sma di e kon (Luk. 15:7; 1 Tim. 2:3, 4). Wi kan de seiker taki te wi e gi sma wan kari fu kon na a Memrefesa, dan Yehovah e yepi wi fu feni reti-ati sma.​—Leisi Hagai 2:7.

12. Sortu situwâsi kan meki en muilek gi wi fu hori a Memrefesa? (Luku a fowtow.)

¹² Yesus ben taki dati na ini den lasti dei, wi ben o kisi fu du nanga muilek situwâsi soleki gens fu famiriman, frufolgu, orloku, siki, nanga furu tra sani (Mat. 10:36; Mark. 13:9; Luk. 21:10, 11). Son leisi, den situwâsi disi e meki en muilek gi wi fu hori a Memrefesa. San den brada nanga sisa fu wi du na ini den sortu situwâsi dati èn fa Yehovah yepi den?

13. Fa Yehovah blesi Artem fu di a ben du ala san a man fu hori a Memrefesa?

¹³ Sma poti den na strafu-oso. Den brada nanga sisa fu wi di de na strafu-oso fu a bribi fu den ede, e du san den man fu memre a dede fu Yesus. Luku na eksempre fu Artem. Na a ten fu a Memrefesa fu 2020, a ben musu koti strafu na ini wan pikin strafu-oso kamra èn son leisi fo noso feifi strafuman ben de na ini a kamra dati. Aladi a ben de na strafu-oso, toku a ben man feni wan tu sani fu gebroiki leki a brede nanga a win èn a seti sani fu hori a Memrefesa gi ensrefi. Ma den strafuman di ben de nanga en na ini a kamra ben e smoko èn ben e taki wan lo dotitaki. San a du? A aksi den fu no taki dotitaki èn fu no smoko gi wán yuru nomo. Artem no ben man bribi di ala  den strafuman na ini a kamra pramisi en taki den no ben o taki dotitaki noso smoko te a ben o hori a Memrefesa. A e taki: „Mi aksi den efu den ben wani sabi san na a Memrefesa.” Den strafuman taigi en taki den no ben wani sabi, ma baka di den si fa a hori a Memrefesa èn den yere den sani di a taki, dan den poti furu aksi gi en.

14. Fa a pipel fu Yehovah hori a Memrefesa di a COVID-19 siki ben panya na ala sei?

¹⁴ A COVID-19 siki di ben panya na ala sei. Di a siki disi panya na ala sei, dan a pipel fu Yehovah no ben man kon makandra fu hori a Memrefesa. Ma dati no tapu den fu memre a dede fu Krestes. d Gemeente di ben abi Internet hori a Memrefesa nanga yepi fu videoconferentie. Ma fa a ben de nanga den milyunmilyun sma di no ben abi Internet? Na ini son kondre den bijkantoro seti sani so taki a lezing ben o plèi na TV noso radio. Boiti dati, den bijkantoro meki opname fu a lezing na ini moro leki  500 tongo so taki srefi sma na farawe presi ben kan hori a Memrefesa. Èn den brada sorgu taki den sma di ben abi den opname disi fanowdu kisi den.

15. San yu leri fu na eksempre fu wan Bijbelstudenti di nen Sue?

¹⁵ Den kisi gens fu famiriman. A sani di ben meki en moro muilek gi son sma fu hori a Memrefesa, na taki den ben kisi gens fu famiriman. Luku na eksempre fu wan Bijbelstudenti di nen Sue. Na ini 2021, a dei fosi a Memrefesa, Sue taigi a sisa di ben e studeri Bijbel nanga en taki a no ben o man de na a Memrefesa fu di en famiri ben gens en. A sisa dati leisi Lukas 22:44. Baka dati a taigi en taki te problema e miti wi, dan neleki Yesus wi musu begi Yehovah fu yepi wi èn wi musu frutrow na en tapu nanga wi heri ati. A dei baka dati, Sue sreka a brede nanga a win èn a arki a deitekst takimakandra di hori spesrutu gi a dei dati tapu jw.org. A neti dati di a ben de en wawan na ini en kamra, a arki a Memrefesa lezing tapu en telefon. Bakaten, Sue skrifi a sisa di ben e studeri Bijbel nanga en: „Yu gi mi so furu deki-ati esde. Mi du ala san mi man fu de na a Memrefesa èn Yehovah yepi mi trutru. Mi no man taigi yu fa mi breiti èn fa mi de nanga tangi!” Yu denki taki Yehovah kan yepi yu efu yu de na ini wan srefi sortu situwâsi?

16. Fu san ede wi kan de seiker taki Yehovah o blesi a muiti di wi e meki fu de na a Memrefesa? (Romesma 8:31, 32)

¹⁶ Yehovah breiti srefisrefi nanga a muiti di wi e meki fu memre a dede fu Yesus. Wi kan de seiker taki a o blesi wi te wi e sori warderi gi san a du gi wi. (Leisi Romesma 8:31, 32.) Sobun, meki wi du ala san wi man fu de na a Memrefesa a yari disi èn fu du moro na ini a preikiwroko na a ten fu a Memrefesa.