1. San kan meki wi frede son leisi?

 ALA sma e frede son leisi. A no de fu taki dati di wi studeri Bijbel, wi kon sabi taki wi no abi fu frede den dedewan moro, wi no abi fu frede den ogri yeye moro, èn wi no abi fu frede moro san o psa na ini a ten di e kon. Ma tòg wi e libi na ini wan ten pe wi e „si kefalek ogri sani” soleki feti, ogridu nanga siki (Luk. 21:11). Kande wi e frede libisma tu, soleki den tiriman di e kwinsi wi, noso srefi den famiriman fu wi di de teige a tru anbegi. Son sma e broko den ede efu den o man hordoro te den e kisi tesi now noso te den o kisi tesi na ini a ten di e kon.

2. Ferteri san ben de a situwâsi fu David di a ben de na ini Gat.

² Son leisi David ben e frede. Fu eksempre, di Kownu Saul ben e suku fu kiri en, dan David bosroiti fu lowe go na a foto Gat fu den Filisteasma. Akes, a kownu fu Gat, ben kon sabi taki David ben de a fetiman di ben kiri „someni tenti dusun” Filisteasma. Disi meki taki David kon frede srefsrefi (1 Sam. 21:10-12). A ben e broko en ede san Akes ben o du nanga en. San yepi David fu abi dek’ati?

3. Soleki fa Psalm 56:1-3, 11 e taki, dan san yepi David fu no frede moro?

³ Na ini Psalm 56, David e taki fa a ben e firi di a ben de na Gat. Na ini a psalm dati David e taki krin fu san ede a ben e frede, ma a e taki tu san yepi en fu no frede moro. Di David ben e frede, a fertrow tapu Yehovah. (Leisi Psalm 56:1-3, 11.) David ben abi bun reide fu fertrow tapu Yehovah. Yehovah yepi David fu du wan fruwondru sani. David ben e du leki a ben e law èn a sani dati wroko. Akes no ben wani kiri David moro, ma a ben e fuga fu en  èn a ben wani taki a gwe. Na so David ben man kmoto drape.​—1 Sam. 21:13–22:1.

4. Fa wi kan fertrow moro tapu Yehovah? Gi wan eksempre.

⁴ Te wi e fertrow tapu Yehovah, dan wi kan tan rustig tu te wi e frede èn wi kan du sani na wan koni fasi. Ma fa wi kan fertrow moro tapu Yehovah, spesrutu te wi e frede? Luku wan eksempre. Efu yu kon sabi taki yu abi wan siki, dan kande na a bigin yu e frede. Ma yu no o frede so furu moro efu yu e fertrow a datra fu yu. Kande a datra disi yepi furu sma nanga a srefi siki disi. A e arki te yu e ferteri san e meki yu frede èn yu e firi taki a e broko en ede nanga yu. Kande a wani gi yu wan dresi di yepi tra sma. Na so a de tu taki wi o fertrow moro tapu Yehovah te wi e luku den sani di a du kba, den sani di a e du now èn den sani di a o du gi wi na ini a ten di e kon. Na dati David du. Te wi o luku wan tu fu den vers na ini Psalm 56, dan prakseri fa yu kan fertrow moro tapu Yehovah èn fa dati kan yepi yu fu no frede moro.

SAN YEHOVAH DU KBA?

5. Te David ben e frede, dan fu san a ben e denki dipi? (Psalm 56:12, 13)

⁵ Aladi ogri ben kan miti David ete, tòg a ben e tan prakseri den bun sani di Yehovah ben du gi en kba. (Leisi Psalm 56:12, 13.) Na a sani dati David ben e du en heri libi langa. Fu eksempre, son leisi a ben e denki dipi fu den sani di Yehovah meki. Den sani dati ben e memre en taki Yehovah abi furu makti èn taki a lobi libisma trutru (Ps. 65:6-9). David ben e denki dipi tu san Yehovah du gi trawan (Ps. 31:19; 37:25, 26). Èn a ben e denki dipi spesrutu fu den sani di Yehovah ben du gi en. Sensi di David ben de wan beibi, Yehovah ben e yepi en èn a ben e kibri en (Ps. 22:9, 10). A musu de so taki a fasi fa David ben e denki dipi fu den sani disi ben meki a fertrow moro tapu Yehovah.

6. Te wi e frede, dan san o yepi wi fu fertrow tapu Yehovah?

⁶ Te yu e frede, dan aksi yusrefi: ’San Yehovah du kba?’ Prakseri den sani di a meki. Fu eksempre luku den fowru nanga  den bromki. Yehovah e sorgu gi den aladi a no meki den leki fa ensrefi de èn den no man anbegi en. Disi e sori taki Yehovah o sorgu gi wi tu. Te wi e denki dipi fu a sani disi, dan dati kan meki wi fertrow en moro (Mat. 6:25-32). Luku sosrefi san Yehovah du gi den anbegiman fu en. Kande yu kan ondrosuku a tori fu wan sma na ini Bijbel di sori taki a ben abi wan tranga bribi, noso yu kan leisi na ondrofenitori fu wan futuboi fu Yehovah na ini a ten disi. a Boiti dati, prakseri fa Yehovah sorgu gi yu kba. Fa a hari yu kon na ini waarheid? (Yoh. 6:44) Fa a piki den begi fu yu? (1 Yoh. 5:14) Fa yu e kisi wini ibri dei fu na ofrandi di en lobi Manpikin tyari gi wi?​—Ef. 1:7; Hebr. 4:14-16.

7. Fa na ondrofenitori fu a profeiti Danièl yepi Vanessa fu no frede moro?

⁷ Vanessa, b wan sisa na ini Haiti, ben kon de na ini wan situwâsi di ben meki a frede. Wan man na ini a birti fu en ben e bel en èn seni sms gi en ala dei. A man ben de nomonomo fu abi seks nanga en. Vanessa taigi a man krin taki a no wani. Ma a man ati kon bron srefsrefi èn a taigi en srefi taki a o du ogri nanga en. Vanessa e taki: „Mi ben e frede.” San Vanessa du? A du san a ben man fu kibri ensrefi. Wan owruman gi en dek’ati fu bel skowtu. Ma Vanessa poti prakseri tu na a fasi fa Yehovah ben kibri den futuboi fu en na ini a ten di psa. Vanessa e ferteri: „A fosi sma di mi ben e prakseri, na a profeiti Danièl. Sma ben trowe en go na ini wan peti nanga lew aladi a no ben du noti. Tòg Yehovah yepi en èn a tapu a mofo fu den lew. Dati meki mi aksi Yehovah fu meki a man stop nanga den sani di a ben du. Baka dati mi no ben e frede moro.”​—Dan. 6:12-22.

SAN YEHOVAH E DU NOW?

8. Fu san David ben de seiker? (Psalm 56:8)

⁸ Aladi ogri ben kan miti David di a ben de na ini Gat, tòg a no bruya. A no poti prakseri na den sani di ben e meki a frede. Na presi fu dati, a besroiti fu poti prakseri na den sani di Yehovah ben e du gi en na a ten dati. David ben kan firi taki Yehovah ben e tiri en, taki a ben e kibri en èn taki a ben e ferstan fa a ben e firi. (Leisi Psalm 56:8.) David ben abi bun mati tu, soleki Yonatan nanga Granpriester Akimeilek di ben e gi en dek’ati èn di ben e yepi en (1 Sam. 20:41, 42; 21:6, 8, 9). Èn aladi Kownu Saul ben wani kiri en, tòg David ben man lon gwe fu a no kiri en. David ben de seiker taki Yehovah ben sabi san ben e psa nanga en èn fa a ben e firi.

9. San Yehovah e si te a e luku ibriwan fu wi?

⁹ Te wan tesi di e miti yu e meki yu frede, dan hori na prakseri taki Yehovah e si sortu tesi e miti yu èn fa dati e meki yu firi. Fu eksempre, Yehovah no ben si nomo taki den Israelsma ben e pina na ini Egepte ma a ben ’sabi heri bun tu fa den ben e pina’ (Eks. 3:7). David ben singi taki Yehovah ben si a banawtu fu en èn taki a ben sabi heri bun fa a ben e pina (Ps. 31:7). Aladi Gado en pipel ben e pina fu di den ben teki don besroiti son leisi, tòg Yehovah ben e firi leki na „ensrefi ben de na ini banawtu tu” (Yes. 63:9). Te yu e frede, dan Yehovah e ferstan fa yu e firi èn a wani yepi yu fu no frede moro.

10. San e meki yu de seiker taki Yehovah lobi yu èn taki a o yepi yu awinsi sortu tesi e miti yu?

 ¹⁰ Te yu de na ini wan situwâsi di e meki yu frede, dan kande yu no e si fa Yehovah e yepi yu. San yu kan du dan? Aksi en fu yepi yu so taki yu kan si fa a e yepi yu (2 Kow. 6:15-17). Baka dati, aksi yusrefi: Wan lezing noso wan piki na wan konmakandra ben gi yu dek’ati? Wan buku, tijdschrift, felem noso wan Broadcasting poku ben tranga yu? Wan sma ferteri yu wan sani noso leisi wan tekst gi yu di gi yu dek’ati? Wi kan fergiti makelek taki wi e kisi furu yepi fu den brada nanga sisa di lobi wi èn taki wi e kisi furu dek’ati fu Gado Wortu. Ma tòg den sani disi na spesrutu kado di Yehovah gi wi (Yes. 65:13; Mark. 10:29, 30). Den sani disi e sori taki a lobi yu (Yes. 49:14-16). Den e sori tu taki yu kan fertrow tapu en.

11. San yepi Aida fu no frede moro?

¹¹ Aida, wan sisa di e libi na ini Senegal, ben poti prakseri na a fasi fa Yehovah yepi en di wan tesi ben e miti en. Fu di en na a moro owruwan fu na osofamiri, meki en papa nanga mama ben ferwakti taki a ben o wroko nofo moni fu sorgu gi den tu. Ma Aida di ben de wan pionier ben e libi wan simpel libi èn dati meki a no ben abi furu moni. En famiri ben e atibron nanga en èn den ben e krutu en. Aida e taki: „Mi ben frede taki mi no ben o man yepi mi papa nanga mama èn taki ala sma ben o drai baka gi mi. Mi ben feni srefi taki na Yehovah ben meki sani waka so gi mi.” Bakaten a yere wan lezing na wan konmakandra. A e taki: „A takiman ben memre wi taki Yehovah sabi san e meki ibriwan fu wi frede. A rai di mi kisi fu den owruman nanga trawan, meki taki safsafri mi ben de seiker baka taki Yehovah lobi mi. Te mi ben e begi Yehovah, dan mi ben abi moro fertrow taki a ben o yepi mi. Mi ben e firi bun trutru te mi ben si fa a ben e piki den begi fu mi.” Baka wan pisi ten, Aida feni wan wroko di yepi en fu sorgu ensrefi leki pionier èn fu yepi en papa nanga mama èn trawan. Aida e taki: „Mi leri fu fertrow tapu Yehovah nanga mi heri ati. Now, te mi kba begi, dan mi no e frede moro.”

 SAN YEHOVAH O DU NA INI A TEN DI E KON?

12. Soleki fa Psalm 56:9 e taki, dan fu san David ben de seiker?

¹² Leisi Psalm 56:9. A vers disi e taki fu wan tra sani di yepi David di a ben e frede. Aladi a ben kan lasi en libi ete, tòg a denki dipi fu den sani di Yehovah ben o du gi en na ini a ten di e kon. David ben sabi taki Yehovah ben o ferlusu en na a yoisti ten. Fu taki en leti, Yehovah ben taki kba dati David ben o tron kownu fu Israel baka Saul (1 Sam. 16:1, 13). Gi David, awinsi san Yehovah ben pramisi, a ben de seiker taki a sani dati ben o psa.

13. San wi kan de seiker taki Yehovah o du?

¹³ San Yehovah pramisi fu du gi yu? Wi no e ferwakti taki a o kibri wi gi ala problema. c Ma no fergiti taki awinsi sortu tesi yu e kisi na ini a grontapu disi, Yehovah o puru ala den problema dati na ini a nyun grontapu di e kon (Yes. 25:7-9). A Mekiman fu wi tranga nofo fu wiki den dedewan, fu dresi iniwan siki èn fu puru iniwan sma di e gens wi.​—1 Yoh. 4:4.

14. Fu san wi kan denki dipi?

¹⁴ Te yu e frede, dan denki dipi fu den sani di Yehovah o du na ini a ten di e kon. Prakseri fa a o de te Satan no de moro, te ogrisma kisi pori èn te soso ret’ati sma o de na grontapu. Prakseri fa yu o firi te ibri dei sondu e gwe safsafri. Wan fu den demo na a kongres fu 2014 ben sori fa wi kan denki dipi fu a howpu fu wi. Na ini a demo dati, wan papa ben e taki nanga en osofamiri fa a ben o de efu den vers disi fu 2 Timoteyus 3:1-5 ben o taki fa a libi na ini a Paradijs o de. A ben taki: „Na ini a nyun grontapu a moro prisiri ten o de. Bika sma o lobi trawan, den o lobi leri sani fu Gado, den no o denki tmusi furu fu densrefi, den o abi sakafasi, den o prèise Gado, den o gi yesi na papa nanga mama, den o de nanga tangi, den o tai hori na trawan, den o lobi den famiri so te, den o de klarklari fu meki kruderi, den o fruteri bun sani fu trawan, den o dwengi densrefi, den o abi switifasi, den o lobi san bun, den o de fu fertrow, den no o du san densrefi wani, den no o abi heimemre, den o lobi Gado na presi taki den lobi prisiri, èn den o dini Gado fayafaya. Tai hori na den sma dati.” Yu e taki nanga yu osofamiri noso nanga brada nanga sisa fa a libi o de na ini a nyun grontapu?

15. Aladi Tanja ben e frede, tòg san yepi en fu no frede moro?

¹⁵ Wan sisa di nen Tanja èn di e libi na Noord Masedonia, ben e denki dipi fu den sani di Yehovah o du na ini a ten di e kon. Disi yepi en fu no frede moro. A papa nanga mama fu a sisa disi ben e gens en di a bigin studeri Bijbel. A e ferteri: „Sonwan fu den sani gi san mi ben e frede, psa trutru. Mi m’ma ben e fon mi baka ibri konmakandra. Mi p’pa nanga m’ma taigi mi taki den ben o kiri mi efu mi tron wan Kotoigi fu Yehovah.” Te fu kba, Tanja en p’pa nanga m’ma yagi en gwe fu oso. San Tanja du? A e taki: „Mi ben prakseri taki mi o de koloku fu têgo efu mi e tai hori na Yehovah. Mi ben prakseri tu fa Yehovah ben o pai mi baka na ini a nyun grontapu gi ala den sani di mi lasi na ini a grontapu disi èn fa mi ben o fergiti ala ogri sani.” Tanja tai hori na Yehovah. Èn Yehovah yepi en fu feni wan presi fu tan. Now, Tanja trow nanga wan getrow brada èn den e prisiri fu dini makandra na ini a furuten diniwroko.

 LERI NOWNOW KBA FU FERTROW MORO TAPU YEHOVAH

16. San o yepi wi fu tan abi dek’ati te den sani e psa di kari na Lukas 21:26-28?

¹⁶ Na a ten fu a bigi banawtu, sma „o frede te fu dede”. Ma a pipel fu Gado o tan tnapu kánkan èn den o abi dek’ati. (Leisi Lukas 21:26-28.) Fu san ede wi no o frede? Fu di wi leri kba fa fu fertrow tapu Yehovah. Tanja, di wi ben taki fu en kba, e taki dati den sani di a ondrofeni na ini a ten di psa e yepi en fu hordoro te muilek situwâsi e miti en. A e taki: „Mi leri taki Yehovah kan yepi wi fu hordoro na ini ala situwâsi èn a kan blesi wi. Son leisi a kan gersi leki trawan kan du san den wani nanga wi, ma Yehovah tranga moro den. Èn aladi wan tesi kan hebi, tòg a o kba wan dei.”

17. Fa a yaritekst fu 2024 o yepi wi? (Luku a prenki na tapu a kafti.)

¹⁷ Na ini a ten disi furu sani de di kan meki wi frede. Ma neleki David, wi kan sorgu taki a firi dati no basi wi. A yaritekst fu 2024 na a begi fu David pe a e taigi Yehovah: „Te mi e frede, mi e fertrow na yu tapu” (Ps. 56:3). Luku san wan Bijbel sabiman taki fu a vers disi: „David no e tan prakseri den sani di e frede en èn a no e meki den problema fu en basi en. Na presi fu dati a e fertrow tapu a Sma di o ferlusu en.” Prakseri a yaritekst fu wi na ini den mun di e kon, spesrutu te yu kon de na ini situwâsi di o meki yu frede. Teki ten fu prakseri den sani di Yehovah du na ini a ten di psa, san a e du na ini a ten disi, èn san a o du na ini a ten di e kon. Dan, neleki David, yu kan taki: „Na tapu Gado mi frutrow. Mi no sa frede noti.”​—Ps. 56:4.