1-2. Sortu problema kan miti getrow futuboi fu Yehovah?

 A LIBI fu wi kan kenki wantronso te wan sari sani psa nanga wi. Fu eksempre, wan getrow brada di nen Luis, a kon yere taki a abi kanker. Datra taigi en taki a abi wan tu mun ete fu libi. Monika nanga en masra ben e dini Yehovah fayafaya. Ma wan dei Monika kon sabi taki en masra, di ben de wan owruman, ben e waka gi en omeni yari kba. Olivia, wan sisa di no trow, ben musu gwe libi en oso fu di wan bigi draiwinti ben de na pasi e kon. Di a drai go baka na oso, a si taki a draiwinti ben broko en heri oso. Wantronso a heri libi fu den sma disi kon kenki. Oiti yu ondrofeni wan sari sani di kenki yu libi wantronso?

² Aladi wi na getrow futuboi fu Yehovah, toku wi e kisi problema èn wi e siki neleki ala tra sma. Boiti dati, a kan taki sma di de teige wi e gens wi noso den e ferfolgu wi. Yehovah no e kibri wi gi ala den problema disi, ma a pramisi taki a o yepi wi (Yes. 41:10). A o yepi wi fu tan de koloku, fu teki bun besroiti, èn fu tai hori na en, srefi te wi de na ini muilek situwâsi. Na ini na artikel disi, wi o ondrosuku fo fasi fa Yehovah e yepi wi te sari sani e psa na ini wi libi. Wi o luku tu san wi musu du fu kisi wini fu a yepi di a e gi wi.

YEHOVAH O KIBRI YU

3. San kan muilek gi wi te wan sari sani miti wi?

³ San kan muilek gi wi. Te wan sari sani psa nanga wi, dan a kan muilek fu denki krin èn fu teki bun besroiti.  Fu san ede? A kan taki wi e sari srefsrefi, noso kande wi e broko wi ede trutru. Kande wi e firi leki wi waka na busi sondro fu sabi sortu sei wi musu go. Luku fa den tu sisa na a bigin fu na artikel ben e firi di problema miti den. Olivia e taki: „Baka di a bigi draiwinti broko mi oso, mi no ben sabi san fu du, a ben hebi gi mi.” Luku san Monika taki baka di a kon sabi taki en masra ben e waka gi en: „Mi no ben e firi sari nomo, ma mi ben e firi neleki wan sma dyuku mi na ini mi ati. Mi no ben e firi fu du noti te dei opo. Noiti mi ben denki taki so wan sani ben o miti mi.” Fa Yehovah e pramisi fu yepi wi te sani e kon hebi gi wi?

4. San Yehovah e pramisi wi soleki fa Filipisma 4:6, 7 e taki?

⁴ A fasi fa Yehovah e yepi wi. A e pramisi fu gi wi wan sani di Bijbel e kari „a freide fu Gado”. (Leisi Filipisma 4:6, 7.) A freide disi na a korostu firi di wi abi fu di wi na bun mati fu en. A freide disi „bigi moro iniwan sani di libisma man frustan”. A e meki wi firi so bun taki wi no man bribi dati. Oiti a psa nanga yu taki yu ben firi korostu wantronso baka di yu begi Yehovah fayafaya? A korostu firi dati na „a freide fu Gado”.

5. Fa a freide fu Gado e kibri wi frustan nanga wi ati?

⁵ Filipisma 4:7 e taki tu dati a freide fu Gado „o kibri un ati nanga un frustan”. Na ini owruten, a wortu di vertaal nanga „kibri” ben de wan wortu di sma ben gwenti gebroiki na ini a legre. A ben abi fu du nanga srudati di ben e hori wakti na wan foto so taki feanti no teki en abra. Den sma di ben e tan na ini a foto ben kan sribi sondro fu frede, fu di den ben sabi taki den srudati ben e kibri den. Na so a de tu taki te a freide fu Gado e kibri wi ati nanga wi frustan, dan wi e firi korostu èn wi no e frede fu di wi sabi taki Gado e kibri wi (Ps. 4:8). Awinsi a situwâsi fu wi no e kenki wantewante, neleki fa a ben de nanga Hana, toku wi kan firi korostu (1 Sam. 1:16-18). Èn te wi e firi korostu, dan nofo tron a moro makelek gi wi fu denki krin èn fu teki bun besroiti.

6. San wi kan du fu kisi a freide fu Gado? (Luku a prenki.)

⁶ San wi musu du? Te yu e broko ede nanga wan sani, dan neleki fa den sma fu a foto ben kari a waktiman fu kibri den, na so wi musu aksi Yehovah tu fu kibri wi. Fa yu kan du dati? Begi teleki yu firi taki yu kisi a freide fu Gado (Luk.  11:9; 1 Tes. 5:17). Luis, di wi kari na a bigin fu na artikel, ferteri san ben yepi en nanga en frow Ana fu no bruya di den yere taki a ben abi wan tu mun ete fu libi. A ben taki: „Na a momenti disi a muilek srefsrefi fu teki besroiti di abi fu du nanga a gosontu fu mi, noso nanga tra afersi. Ma na begi yepi wi fu no bruya na ini a tumsi muilek ten disi.” Luis nanga en frow taki dati den ben e begi fayafaya èn furu tron. Den ben aksi Yehovah fu gi den wan korostu firi, fu no frede, èn fu gi den a koni fu teki bun besroiti. Èn den si taki Yehovah yepi den. Efu wan sari sani miti yu, dan hordoro na ini begi. Dati o yepi yu fu kisi a freide fu Yehovah di o kibri yu ati nanga yu frustan.​—Rom. 12:12.

YEHOVAH O HORI YU TNAPU

7. Fa wi kan firi te wi e kisi hebi tesi?

⁷ San kan muilek gi wi. Te hebi tesi e miti wi, dan kande wi no man basi den firi fu wi, kande wi no man denki krin, èn kande wi no e tyari wisrefi soleki fa wi gwenti. Kande wi e firi leki wan boto di bigi skwala e naki go-kon. Wan dei wi e firi so èn wan tra dei wi e firi wan tra fasi baka. Ana, di wi kari na a bigin, e taki dati a ben e firi ala sortu fasi baka di Luis dede. A ben taki: „Son leisi mi ben e firi so brokosaka, taki mi bigin aksi misrefi fu san ede a sani disi psa nanga mi. Ma mi ben mandi tu taki Luis no ben de moro.” Na tra momenti Ana ben e firi leki a ben de en wawan èn a ben bruya te a ben musu teki besroiti di Luis ben gwenti teki. Son leisi a ben e firi leki a ben de na ini wan bigi draiwinti na se. Fa Yehovah e yepi wi te sani e kon hebi tumsi gi wi?

8. Sortu dyaranti Yehovah e gi wi soleki fa Psalm 94:18 e taki?

⁸ A fasi fa Yehovah e yepi wi. A e gi wi a dyaranti taki a o hori wi tnapu. (Leisi Psalm 94:18.) Te tranga winti nanga bigi skwala e naki wan sipi, dan a sipi kan seki kefalek. Ma na ondrosei fu furu sipi yu abi sani di gersi pari èn den de na ala tu sei fu a sipi. Den sani disi kan sorgu taki a sipi no e seki tumsi. Disi e meki taki den sma na ini a sipi no abi fu frede tumsi taki a boto o kanti. Ma nofo tron den sortu pari disi e wroko moro bun te a sipi e go na fesi. Na so Yehovah o hori wi tnapu tu efu wi e tan go doro fu dini en awinsi tesi e miti wi.

9. Fa den sani di wi abi fu ondrosuku Bijbel kan yepi fu hori wi tnapu? (Luku a prenki.)

⁹ San wi musu du? Te yu e si taki yu no  man basi den firi fu yu, dan du muiti fu tan begi, fu go na konmakandra èn fu preiki. A tru taki yu no man du so furu leki fosi kande, ma hori na prakseri taki Yehovah no e aksi moro fu yu leki san yu man du. (Luku Lukas 21:1-4.) Meki ten tu fu studeri èn fu denki dipi fu san yu leisi. Fu san ede? Nanga yepi fu en organisâsi, Yehovah gi wi moi artikel nanga video di kan yepi fu hori wi tnapu na ini muilek ten. Efu yu wani feni san yu abi fanowdu, dan yu kan gebroiki den sani di wi abi fu ondrosuku Bijbel, soleki a JW Library^® app, nanga Ondrosuku Bijbel moro fini​—Gi Yehovah Kotoigi. Monika, di wi kari na a bigin, e taki dati a gebroiki den sani dati fu suku rai te a ben muilek fu basi den firi fu en. Son leisi a ben e suku a wortu „atibron”. Tra leisi baka a ben e suku tori di ben abi fu du nanga „te wan sma waka gi en trowpatna” noso san a wani taki fu de „getrow”. Dan a ben e leisi den artikel teleki a firi bun baka. A ben taki: „Di mi bigin suku den artikel, mi ben e sari. Ma o moro mi ben e leisi, o moro mi ben firi taki Yehovah brasa mi hori. Mi kon si taki Yehovah e ferstan krin fa mi e firi èn taki a ben e yepi mi.” Na so Yehovah kan yepi yu tu nanga den firi fu yu teleki yu e firi korostu.​—Ps. 119:143, 144.

YEHOVAH O HORBAKA GI YU

10. Fa wi kan firi te wan tumsi sari sani psa nanga wi?

¹⁰ San kan muilek gi wi. Te wan tumsi sari sani psa nanga wi, dan son leisi wi kan firi swaki èn kande wi e firi brokosaka. Kande wi e firi leki wan sportman di ben gwenti lon tranga fosi, ma a e tingatinga now. Kande a muilek fu du sani di ben makelek gi wi fu du fosi. Noso kande wi no e firi fu du den sani moro di wi ben lobi du fosi. Neleki Elia wi kan feni en muilek fu opo te m’manten. Soso sribi wi wani sribi (1 Kow. 19:5-7). San Yehovah e pramisi fu du te wi e firi swaki?

11. San na wan tra fasi fa Yehovah e yepi wi? (Psalm 18:18)

¹¹ A fasi fa Yehovah e yepi wi. A pramisi fu horbaka gi wi. (Leisi Psalm 18:18.) Neleki fa wan sportman di kisi mankeri abi wan sma fanowdu fu tyari en, na so wi kan abi yepi fanowdu fu tan go doro na ini a diniwroko fu Yehovah. Na den momenti dati Yehovah e pramisi wi:  „Mi, Yehovah, na yu Gado di e grabu yu reti-anu hori. Mi na a sma di e taigi yu: ’No frede. Misrefi o yepi yu’” (Yes. 41:13). Kownu David ben kisi a yepi disi. Di a ben kisi tesi èn feanti ben suku en, a ben taigi Yehovah: „Yu reti-anu o horibaka gi mi” (Ps. 18:35). Ma fa Yehovah e horbaka gi wi?

12. Suma Yehovah kan gebroiki fu yepi wi te wi e firi brokosaka?

¹² Nofo tron Yehovah e gebroiki tra sma fu yepi wi. Fu eksempre, wan leisi di David ben e firi brokosaka, dan en mati Yonatan kon na en fu gi en dek’ati èn a taigi en taki a ben o horbaka gi en (1 Sam. 23:16, 17). Na a srefi fasi, Yehovah ben gebroiki Elisa fu yepi Elia (1 Kow. 19:16, 21; 2 Kow. 2:2). Na ini a ten disi, Yehovah kan gebroiki famiri, mati, noso den owruman fu yepi wi. Ma te wi e firi sari, dan kande wi no wani de nanga tra sma. Wi wani de wi w’wan. Wi alamala kan firi so. San wi kan du fu kisi yepi fu Yehovah?

13. San wi musu du so taki Yehovah kan horbaka gi wi? (Luku a prenki.)

¹³ San wi musu du? Dwengi yusrefi fu no hori yusrefi aparti fu trawan. Te wi no wani moksi nanga trawan, dan wi kan bigin prakseri wisrefi nomo èn wi o si soso den problema fu wi. Te wi e denki so, dan wi no o man teki bun besroiti (Odo 18:1). A no de fu taki dati wi alamala abi ten fanowdu gi wisrefi te wan sari sani psa nanga wi. Ma te wi e tan hori wisrefi aparti fu trawan wan heri pisi ten, dan wi kan pusu den sma gwe di Yehovah e gebroiki fu yepi wi. Sobun, awinsi fa a situwâsi fu yu muilek, meki famiri, mati nanga owruman yepi yu. Si den leki sma di Yehovah e gebroiki fu yepi yu.​—Odo 17:17; Yes. 32:1, 2.

YEHOVAH O TROWSTU YU

14. Sortu sani kan meki wi frede?

¹⁴ San kan muilek gi wi. Wi kan bigin prakseri ala sortu sani te wi e frede. Na ini Bijbel, getrow futuboi fu Gado ben ferteri fa den ben de na ini bigi banawtu èn fa den ben frede gi den feanti fu den noso gi tra sani (Ps. 18:4; 55:1, 5). Na so a de tu taki wi kan kisi gens na skoro, na wroko, fu wi famiri, noso fu a regering. Kande wi frede taki wi o dede fu di wi siki. Te den sani disi e psa nanga wi, dan wi kan firi leki wan yongu pkin di no  man yepi ensrefi. Fa Yehovah e yepi wi na den momenti disi?

15. San Yehovah o du seiker gi wi soleki fa Psalm 94:19 e taki?

¹⁵ A fasi fa Yehovah e yepi wi. A e trowstu wi èn a e meki wi firi bun. (Leisi Psalm 94:19.) A psalm disi e meki wi prakseri wan pkin meisje di no man sribi fu di a frede dondru nanga bliksem. Wi kan si fa en papa e waka kon, dan a brasa en hori teleki a fadon na sribi. Aladi dondru e bari tranga ete, a meisje no e frede moro fu di en papa brasa en hori fu trowstu en. Te wi e kisi tesi di e meki wi frede, dan a kan taki wi abi wan brasa fanowdu tu fu wi hemel Papa teleki wi no e frede moro. Fa wi kan kisi a trowstu disi fu Yehovah?

16. San wi kan du fu kisi trowstu fu Yehovah? (Luku a prenki.)

¹⁶ San wi musu du? Abi a gwenti fu taki nanga Yehovah na ini begi èn fu leisi en Wortu (Ps. 77:1, 12-14). Te yu abi a gwenti disi, dan a fosi sani di yu o du te problema miti yu, na fu suku yepi na yu hemel Papa. Ferteri Yehovah san e meki yu frede èn san e trobi yu. Meki a taki nanga yu èn meki a trowstu yu nanga yepi fu Bijbel (Ps. 119:28). Son pisi na ini Bijbel kan de wan bigi trowstu gi yu te yu e frede. Fu eksempre, wan tu fu den buku di kan gi yu dek’ati na Yob, Psalm nanga Odo. Yu kan kisi dek’ati tu fu den wortu fu Yesus na ini Mateyus kapitel 6. Te yu e begi Yehovah èn yu e leisi en Wortu, dan yu o firi fa a e trowstu yu.

17. Fu san wi kan de seiker?

¹⁷ Wi kan de seiker taki Yehovah o sorgu gi wi te sari sani e psa na ini wi libi. Noiti wi o de wi w’wan (Ps. 23:4; 94:14). Yehovah e pramisi fu kibri wi, fu hori wi tnapu, fu horbaka gi wi, èn fu trowstu wi. Yesaya 26:3 e taki disi fu Yehovah: „Yu o meki sani waka bun gi den wan di abi wan bun denki, bika na yu den e frutrow.” Sobun, fertrow tapu Yehovah èn du ala san yu man fu kisi a yepi fu en. Efu yu du dati, dan yu o kisi krakti baka srefi na ini muilek ten.