1. Fu san ede a Memrefesa na a moro prenspari dei fu a yari? (Lukas 22:19, 20)

 GI A pipel fu Yehovah, a Memrefesa fu a dede fu Krestes na a moro prenspari dei fu a yari. Disi na a wan-enkri sani di Yesus ben taigi den bakaman fu en fu memre. (Leisi Lukas 22:19, 20.) Wi abi difrenti reide fu san ede wi wani go na a Memrefesa. Kow luku wan tu fu den.

2. San na wan tu reide fu san ede wi wani go na a Memrefesa?

² A Memrefesa e yepi wi fu denki dipi fu a lusu-paiman èn fu den blesi di a e tyari kon. A e memre wi na sortu fasi wi kan sori warderi gi na ofrandi fu Yesus (2 Kor. 5:14, 15). A e gi wi na okasi tu fu „gi makandra deki-ati” (Rom. 1:12). Ibri yari, furu brada nanga sisa di no e preiki moro e kon na a Memrefesa. Fu di a gemeente ben sori so furu lobi gi den, meki sonwan fu den e drai kon baka na Yehovah. Èn furu sma di ben lobi san den yere èn san den si na a Memrefesa bigin studeri Bijbel. Ala den sani disi e meki taki a Memrefesa prenspari so gi wi.

3. San den brada nanga sisa fu wi na heri grontapu e du na a dei fu a Memrefesa? (Luku a prenki.)

³ Prakseri tu fa den brada nanga sisa fu wi na heri grontapu e du a srefi sani na a dei fu a Memrefesa. Na difrenti presi na heri grontapu Yehovah Kotoigi e kon makandra te a son saka. Wi alamala e arki wan lezing di e sori krin fu san ede a lusu-paiman prenspari so. Wi e singi tu singi fu prèise Yehovah, a brede nanga a win e psa lontu, èn wi alamala e taki „amen” baka den fo begi. Na ini wan pisi ten fu 24 yuru, ala gemeente du den srefi sani disi. Yu kan ferstan fa Yehovah nanga Yesus breiti te den e si  fa wi alamala na heri grontapu e gi den grani na a fasi disi.

4. San wi o luku na ini na artikel disi?

⁴ Na ini na artikel disi wi o poti prakseri na den aksi disi: Fa wi kan sreka wi ati gi a Memrefesa? Fa wi kan yepi trawan fu kisi wini fu en? Èn fa wi kan yepi den wan di no e preiki moro? A piki tapu den aksi disi o yepi wi fu sreka gi a santa okasi disi.

FA WI KAN SREKA WI ATI GI A MEMREFESA?

5. (a) Fu san ede wi musu denki dipi fu a lusu-paiman? (Psalm 49:7, 8) (b) San yu leri fu a felem Fu san ede Yesus dede?

⁵ Wan fu den moro prenspari fasi fa wi kan sreka wi ati gi a Memrefesa, na te wi e denki dipi fu a lusu-paiman fu Yesus Krestes. Noiti wi ben o man frulusu wisrefi fu sondu nanga dede. (Leisi Psalm 49:7, 8; luku a felem Fu san ede Yesus dede?) a Dati meki Yehovah seti sani so taki Yesus gi en libi fu frulusu wi. Yehovah nanga Yesus pai wan bigi paiman gi wi (Rom. 6:23). O moro wi e denki dipi fu san Yehovah nanga Yesus du gi wi, o moro wi o warderi a lusu-paiman. Wi o luku wan tu fu den bigi sani di Yehovah nanga Yesus du gi wi. Ma wi o luku fosi san na a lusu-paiman.

6. San na a lusu-paiman?

⁶ Wan lusu-paiman na wan prijs di sma e pai fu kisi wan sani baka. A fosi man, Adam, no ben abi sondu di Gado meki en. Di a sondu, dan a lasi a howpu fu libi fu têgo. A no lasi a howpu dati soso gi ensrefi, ma gi ala den bakapkin fu en. Fu man bai baka san Adam ben lasi, Yesus gi en eigi libi leki wan ofrandi. A heri pisi ten di Yesus ben e libi na grontapu, a „no du nowan sondu èn a no taki nowan sani fu bedrigi sma” (1 Petr. 2:22). Di Yesus dede, a ben de sondro sondu, neleki fa Adam ben de fosi a du sondu. Sobun, di a gi en libi leki ofrandi, dan na so a ben man pai gi a libi di Adam ben lasi.​—1 Kor. 15:45; 1 Tim. 2:6.

7. San na wan tu tesi di Yesus kisi di a ben de na grontapu?

⁷ Di Yesus ben de na grontapu, a gi yesi na Yehovah na ini ala sani aladi a ben kisi furu tesi. Di Yesus ben pkin a no ben abi sondu ma toku a tan gi yesi na en papa nanga mama di ben abi sondu (Luk. 2:51). Di a ben de wan yonguwan, dan kande a ben musu kakafutu gi trawan di ben wani dwengi en fu trangayesi en papa nanga mama, noso Yehovah. Èn di Yesus ben de wan bigisma, a ben musu kakafutu gi Satan Didibri di ben wani meki a du sondu. Satan ben taigi en srefi fu trangayesi Gado (Mat. 4:1-11). Satan ben de nomonomo fu meki Yesus sondu so taki a no ben o man pai a lusu-paiman.

8. Sortu tra tesi miti Yesus?

⁸ Di Yesus ben e du a diniwroko fu en na grontapu, dan moro tesi miti en. Den feanti fu en ferfolgu en èn den pruberi fu kiri en (Luk. 4:28, 29; 13:31). A ben musu ferdrage den fowtu fu den bakaman fu en (Mark. 9:33, 34). Di a ben de na fesi krutu, dan sma pina en èn den spotu en. Dan den kiri en na wan tumsi ogri-ati fasi fu meki a kisi syen (Hebr. 12:1-3). Di a ben e anga na a pina-postu, a ben e pina hebi fu di Yehovah no ben e kibri en moro. b​—Mat. 27:46.

9. Fa wi e si a lusu-paiman fu Yesus? (1 Petrus 1:8)

 ⁹ A de krin taki Yesus pina hebi fu man pai a lusu-paiman. Te wi e prakseri ala den sani di Yesus ben de klarklari fu du gi wi, dan wi lobi en trutru.​—Leisi 1 Petrus 1:8.

10. San Yehovah du fu man pai a lusu-paiman?

¹⁰ Fa a de nanga Yehovah? San a ben de klarklari fu du so taki Yesus ben kan pai a lusu-paiman? Nowan papa lobi en manpkin moro leki fa Yehovah lobi Yesus (Odo 8:30). Prakseri fa Yehovah ben musu fu sari di a si fa Yesus kisi so furu tesi na grontapu. A no de fu taki dati a ben hati Yehovah fu si fa sma du ogri nanga en Manpkin, fa den wiswasi en, èn fa den pina en.

11. Gebroiki wan eksempre fu sori fa Yehovah ben musu fu firi di den kiri Yesus.

¹¹ Iniwan papa noso mama di lasi wan pkin na ini dede sabi heri bun fa a sani dati e hati. A tru taki wi e bribi tranga na ini a opobaka, ma dati no e puru a pen di wi e firi na ini wi ati te wan lobiwan fu wi dede. Na eksempre disi e yepi wi fu ferstan fa Yehovah ben musu fu firi di a si fa en Manpkin pina èn dede tapu 14 Nisan, na ini a yari 33. c​—Mat. 3:17.

12. San wi kan du na ini den wiki fosi a Memrefesa?

¹² Na ini den wiki fosi a Memrefesa, pruberi fu kon sabi moro fu a lusu-paiman. Yu kan studeri a tori disi gi yusrefi noso makandra nanga yu osofamiri. Gebroiki a buku Ondrosuku Bijbel moro fini​—Gi Yehovah Kotoigi noso tra buku di o yepi yu fu ondrosuku moro fini san na a lusu-paiman. d Boiti dati, leisi a Bijbel leisipisi gi a Memrefesa di de fu feni na ini a Wi Kresten libi nanga a preikiwroko​—Studie-buku. Èn na a dei fu a Memrefesa, no frigiti fu luku a deitekst takimakandra di o hori spesrutu gi a dei dati. Te wi e sreka wi eigi ati gi a Memrefesa, dan wi o man yepi trawan fu kisi wini tu fu a programa.​—Esra 7:10.

YEPI TRAWAN FU KISI WINI FU A MEMREFESA

13. San na a fosi sani di wi kan du fu yepi trawan fu kisi wini fu a Memrefesa?

¹³ Fa wi kan yepi trawan fu kisi wini fu a Memrefesa? A fosi sani di wi kan du, na fu gi den wan kari. Boiti taki wi e kari  den sma di wi e miti na ini a preikiwroko, wi kan meki wan lijst tu fu tra sma di wi kan kari. Dati na wi famiri, sma na wroko, pkin na skoro, èn tra sma di wi sabi. Efu wi no abi moro fu den kari gi a Memrefesa, dan wi kan seni a link gi den. Kande wi o ferwondru fu si omeni kon.​—Preik. 11:6.

14. Ferteri fu san ede a bun te yu srefi gi sma wan kari.

¹⁴ Te yu srefi e gi wan sma wan kari fu kon na a Memrefesa, dan kande a o firi fu kon. Wan sisa no ben man bribi di a masra fu en di no de wan Kotoigi, taigi en taki a ben o go nanga en na a Memrefesa. Fu san ede a no ben man bribi dati? Fu di ala yari a ben e aksi en masra fu kon nanga en, ma noiti a ben wani. San psa disi leisi? A masra taki: „Mi kisi wan kari.” A ferteri taki a ben kisi wan kari fu wan owruman di a ben sabi fu a kontren drape. A masra go na a Memrefesa a yari dati èn a tan du dati furu yari langa.

15. San wi wani hori na prakseri te wi e gi sma wan kari fu kon na a Memrefesa?

¹⁵ Hori na prakseri taki den sma di wi e gi wan kari kande o abi wan tu aksi, spesrutu efu den no ben kon na wan konmakandra fu wi noiti ete. Dati meki a bun fu prakseri na fesi sortu sani den ben kan aksi wi so taki wi kan sabi san fu piki den (Kol. 4:6). Kande son sma e aksi densrefi: ’San o psa na a konmakandra disi?’ ’O langa a o teki?’ ’Sortu krosi mi musu weri?’ ’Mi musu pai fu go na inisei?’ ’Den o teki kollekte?’ Te wi e kari wan sma gi a Memrefesa, dan wi kan aksi en: „Yu abi wan sani fu aksi ete?” èn baka dati wi kan piki na aksi noso wi kan ferteri en iniwan sani di a wani sabi ete. Boiti dati, wi kan gebroiki den felem Memre a dede fu Yesus, nanga San wi e du na ini wan Kownukondre zaal? fu yepi a sma fu ferstan fa den konmakandra fu wi e hori. Èn les 28 fu a Yu kan de koloku fu têgo! buku e taki fu furu moi sani di wi kan ferteri den sma.

16. Sortu tra aksi wan sma di e kon na a Memrefesa ben kan abi?

 ¹⁶ Kande den sma di kon na a Memrefesa fu a fosi leisi, o abi moro aksi. Kande den o aksi densrefi fu san ede nowan sma nyan a brede èn dringi a win, noso fu san ede wan tu sma nomo du dati. Kande den o aksi densrefi tu omeni leisi wi e hori a Memrefesa. Èn kande den o wani sabi efu ala den konmakandra fu Yehovah Kotoigi e hori na a srefi fasi. Aladi a lezing di e hori na a Memrefesa e piki furu fu den aksi disi, toku a kan taki den sma di kon fu a fosi leisi o wani sabi sani moro fini. Na artikel tapu jw.org di nen „Fu san ede Yehovah Kotoigi e hori na Avondmaal fu Masra tra fasi leki den tra kerki?” kan yepi wi fu piki wan tu fu den aksi fu den sma. Wi wani du ala san wi man fosi a Memrefesa, na a ten fu a Memrefesa, èn baka a Memrefesa fu yepi ’den wan di abi a yoisti denki’ fu kisi wini fu a konmakandra disi.​—Tori 13:48.

YEPI DEN WAN DI NO E PREIKI MORO

17. Fa owruman kan yepi den wan di no e preiki moro? (Esekièl 34:12, 16)

¹⁷ Fa den owruman kan yepi den wan di no e preiki moro, na a ten fu a Memrefesa? Sori den taki yu e broko yu ede nanga den. (Leisi Esekièl 34:12, 16.) Sorgu taki yu kari ala den brada nanga sisa disi fosi a Memrefesa hori. Taigi den taki yu e broko yu ede nanga den èn taki yu wani du ala san yu man fu yepi den. Gi den wan kari fu kon na a Memrefesa. Efu den kon, dan gi den wan switikon. Baka a Memrefesa, tan poti prakseri na den lobi brada nanga sisa disi, èn gi den iniwan yepi di den abi fanowdu fu drai baka kon na Yehovah.​—1 Petr. 2:25.

18. Fa wi alamala kan yepi den wan di no e preiki moro? (Romesma 12:10)

¹⁸ Te sma di no e preiki moro e kon na a Memrefesa, dan ala sma na ini a gemeente kan yepi den. Fa so? Den kan sori lobi, switifasi, nanga lespeki gi  den. (Leisi Romesma 12:10.) No fergiti taki kande a no ben makelek gi den lobi skapu disi fu kon baka na wan konmakandra. Kande den ben frede san sma na ini a gemeente ben o taki fu den. e Sobun, no aksi den sani di o meki den firi syen èn no taigi den sani di kan hati den (1 Tes. 5:11). Den brada nanga sisa disi e anbegi Gado makandra nanga wi. Wi breiti taki wi man anbegi Gado makandra nanga den baka.​—Ps. 119:176; Tori 20:35.

19. Sortu wini wi e kisi fu di wi e memre a dede fu Yesus?

¹⁹ Wi de nanga tangi taki Yesus taigi wi fu memre a dede fu en ibri yari, èn wi e ferstan fu san ede a sani disi prenspari so. Te wi de na a Memrefesa, dan wi nanga trawan e kisi wini na difrenti fasi (Yes. 48:17, 18). A lobi di wi abi gi Yehovah nanga Yesus e kon moro tranga. Wi e sori fa wi de nanga tangi gi san den du gi wi. Wi e tron moro bun mati fu wi brada nanga sisa. Èn wi kan yepi trawan fu kon sabi fa den srefi kan kisi den blesi di a lusu-paiman e tyari kon. Sobun, meki wi du ala san wi man fu sreka gi a Memrefesa fu a yari disi fu di dati na a moro prenspari dei fu a yari.