1. San na wán reide fu san ede Yehovah seti a trowlibi?

 YEHOVAH na „a koloku Gado” èn a wani taki wi de koloku tu (1 Tim. 1:11). A gi wi furu kado fu yepi wi fu nyan bun fu a libi (Yak. 1:17). Wan fu den kado dati na a trowlibi. Te wan man nanga wan uma trow, dan den e pramisi fu lobi èn fu lespeki makandra. Te den e tan sori tranga lobi gi makandra, dan den ala tu o de koloku.​—Odo 5:18.

 2. Fa furu masra na ini a ten disi e libi nanga a wefi fu den?

² A sari fu si taki furu trowpaar na ini a ten disi e fergiti san den ben pramisi makandra na a trowdei fu den. Dati meki den no de koloku. No so langa psa, na organisâsi fu gosontu afersi na heri grontapu kon si taki furu masra e fon den wefi, den e kosi den, noso den e du tra ogri nanga den. Son masra e du neleki den e lespeki a wefi fu den te den de na fesi trawan, ma den no e libi bun nanga en te den de na oso. Wan tra sani, na taki furu masra e luku porno èn a sani disi e meki tu taki a wefi fu den no de koloku.

 3. Fu san ede son masra no e libi bun nanga a wefi fu den?

³ Fu san ede son masra no e libi bun nanga a wefi fu den? Kande den no e si a sani disi leki wan problema fu di a p’pa fu den no ben e libi bun nanga den m’ma. Tra man no e libi bun nanga a wefi fu den fu di dati na a gwenti na ini a kulturu fu den. Kande den man disi feni taki den musu prei basi gi a wefi fu den so taki a kan sabi en presi. Dan yu abi den man tu di no leri fu basi den firi fu den èn den no man hori densrefi te den e atibron. Son man gwenti luku porno èn a sani dati kan meki den denki taki umasma bun soso fu abi seks nanga den. Boiti dati, furu sabiman kon si taki na a ten fu a COVID-19 siki di ben panya na heri grontapu, den problema disi kon moro bigi. Ma den sani disi no e gi  masra reide fu no libi bun nanga a wefi fu den.

 4. Nanga san Kresten masra musu luku bun èn fu san ede?

⁴ Kresten masra musu luku bun taki den no e teki a denki abra fu den sma fu a grontapu disi di no e lespeki umasma. a Fu san ede? Wán reide, na taki a fasi fa wan sma e denki, nofo tron abi krakti tapu den sani di a e du. Na apostel Paulus ben warskow salfu Kresten na ini Rome fu „no libi moro leki den sma fu a grontapu disi” (Rom. 12:1, 2). Di Paulus ben skrifi a brifi gi den Romesma, dan den sma na ini a gemeente dati ben de Kresten wan pisi ten kba. Ma tòg den sani di Paulus taki e sori taki den gwenti nanga a denki fu a grontapu disi ben abi krakti ete tapu son sma na ini a gemeente dati. Dati meki a gi den dek’ati fu kenki a denki fu den èn so srefi a fasi fa den ben e tyari densrefi. Na ini a ten disi a rai dati e fiti tu gi Kresten masra. A sari fu si taki a denki fu a grontapu disi abi krakti tapu son Kresten masra èn sonwan fu den du ogri srefi nanga a wefi fu den. b Fa Yehovah wani taki wan masra e libi nanga a wefi fu en? A thema tekst fu na artikel disi e piki na aksi disi.

 5. Fa wan masra musu libi nanga a wefi fu en, soleki fa 1 Petrus 3:7 e sori?

⁵ Leisi 1 Petrus 3:7. Yehovah wani taki masra musu gi den wefi grani. Te wi e gi wan sma grani, dan dati wani taki dati wi e lespeki a sma èn a o de fu si na ini a fasi fa wi e libi nanga en. Wan masra di e gi en wefi grani, o sori swit’fasi nanga lobi gi en. Na ini na artikel disi, wi o luku fa wan masra kan gi en wefi grani. Ma wi o taki fosi fu den sani di wan masra noiti no musu du nanga en wefi.

NO DU SANI DI E MEKI YU WEFI SARI

 6. Fa Yehovah feni en te wan man e fon en wefi? (Kolosesma 3:19)

⁶ Wan masra no musu fon en wefi. Yehovah e teige sma di lobi ogri (Ps. 11:5). Yehovah no lobi en kwetkweti te wan masra e fon en wefi (Mal. 2:16; leisi Kolosesma 3:19). A thema tekst fu wi, 1 Petrus 3:7, e sori taki te wan masra no e libi bun nanga en wefi, dan dati o pori a matifasi di a abi nanga Gado. Kande Yehovah no o arki den begi fu en srefi.

 7. Fa masra no musu taki nanga a wefi fu den, soleki fa Efeisesma 4:31, 32, e sori? (Luku sosrefi „San a wortu disi wani taki”.)

⁷ Wan masra no musu bari noso kosi a wefi fu en. Son masra e kosi a wefi fu den èn den e taigi en hati sani. Ma Yehovah e teige „atibron nanga babari nanga kosikosi”. c (Leisi Efeisesma 4:31, 32.) Yehovah e yere ala sani. A e poti prakseri na a fasi fa wan masra e taki nanga a wefi fu en, srefi te den de den w’wan. Wan masra di e taigi en wefi hati sani, e pori a trowlibi fu en èn sosrefi a matifasi di a abi nanga Gado.​—Yak. 1:26.

 8. Fa Yehovah e si porno, èn fu san ede?

⁸ Wan masra no musu luku porno. Fa Yehovah e si porno? A e teige a sani dati. Dati meki wan masra di e luku doti prenki nanga felem e pori a matifasi di a abi nanga Yehovah èn a no e sori lespeki gi a wefi fu en. d  Yehovah e lespeki wan man di e tai hori na a wefi fu en. Wan man di e tai hori na a wefi fu en no o du hurudu nanga wan tra uma. A no musu prakseri den sani dati srefi. Yesus ben taki dati wan man di e luku wan tra uma nanga tranga lostu, du sutadu kba nanga en „na ini en ati”. e​—Mat. 5:28, 29.

 9. Fu san ede Yehovah e teige en te wan masra e dwengi en wefi fu du wani sani di a no wani du te den abi seks?

⁹ Wan masra no musu dwengi en wefi fu du wan sani di a no wani du te den abi seks. Son masra e dwengi a wefi fu den fu du sani di e meki a firi fisti. Kande den sani dati e trobi a konsensi fu a wefi noso kande den e meki a firi leki en masra no lobi en. Yehovah no lobi en kwetkweti te masra en denki densrefi nomo èn te den no e broko den ede nanga a wefi fu den. A wani taki wan masra musu lobi en wefi, taki a e sori swit’fasi gi en, èn taki a e lespeki a konsensi fu en (Ef. 5:28, 29). Ma fa a de te wan Kresten masra no e lespeki a wefi fu en, te a e fon en, noso te a e luku porno? Fa a kan kenki a denki fu en èn a fasi fa a e tyari ensrefi?

FA WAN MASRA KAN TAPU FU DU SANI DI YEHOVAH NO LOBI KWETKWETI

10. San masra kan leri fu na eksempre fu Yesus?

¹⁰ San kan yepi wan masra fu no fon en wefi moro èn fu no du sani moro di e sori taki a no e lespeki en? A kan du muiti fu teki na eksempre fu Yesus. Aladi Yesus noiti no ben trow, tòg a fasi fa a ben e libi nanga den disipel fu en kan yepi wan masra fu kon si fa a musu libi nanga a wefi fu en (Ef. 5:25). Luku san masra kan leri fu a fasi fa Yesus ben e libi nanga den apostel fu en èn fa a ben e taki nanga den.

11. Fa Yesus ben e libi nanga den apostel fu en?

¹¹ Yesus ben e sori swit’fasi gi den apostel fu en èn a ben e lespeki den. Noiti a ben e taigi den hati sani èn a no ben prei basi gi den. Aladi Yesus ben makti moro den, tòg a no gebroiki a makti fu en fu meki den firi leki den swaki, noso fu tapu skreki gi den. Na presi fu dati, a ben de klarklari fu dini den (Yoh. 13:12-17). A ben taigi den disipel fu en: „Leri fu mi, bika mi abi safri-ati nanga sakafasi èn unu o kisi krakti baka” (Mat. 11:28-30). Luku taki Yesus ben abi safrifasi. Wan sma di abi safrifasi no swaki. Na presi fu dati a man dwengi ensrefi. Te a e atibron a no e lasi ensrefi, ma a man basi den firi fu en.

12. Fa Yesus ben e taki nanga trawan?

¹² Yesus ben e taki sani fu trowstu trawan èn fu gi den dek’ati. A no ben e taigi den bakaman fu en hati sani (Luk. 8:47, 48). Srefi di den feanti fu en ben e kosi en èn ben e pruberi fu meki a kisi atibron, dan „a no ben e kosi den baka” (1 Petr. 2:21-23). Son leisi, Yesus besroiti srefi fu tan pî, na presi fu taigi sma hati sani baka (Mat. 27:12-14). Dati na wan moi eksempre gi Kresten masra.

13. Fa wan masra kan „tai hori na en wefi”, soleki fa Mateyus 19:4-6 e sori? (Luku a prenki.)

¹³ Yesus ben taigi masra fu tan getrow na a wefi fu den. A ben gebroiki den wortu fu en P’pa di ben taki dati wan masra musu „tai hori na en wefi”. (Leisi Mateyus 19:4-6.) A Griki wortu di wani taki „tai hori na” wan taki trutru „fu plak nanga lijm”. Dati meki a lobi fu wan masra nanga wan wefi musu tranga neleki den plak na makandra nanga lijm. Efu wán fu den trowpatna ben o du wan hati sani nanga a trawan, dan den ala tu ben o firi en. Wan masra di lobi en wefi trutru, no o luku nowan enkri sortu porno. A o drai en  fesi wantewante gi „sani di no abi nowan waarde” (Ps. 119:37). Fu taki en leti, a e meki wan kontrakti nanga en ai fu no luku nowan enkri tra uma nanga tranga lostu.​—Yob 31:1.

14. San wan masra di e fon en wefi èn di e kosi en musu du fu man meki sani bun baka nanga Yehovah èn nanga a wefi fu en?

¹⁴ Wan masra di e fon en wefi noso di e kosi en, musu du wan tu sani fu meki sani bun baka nanga Yehovah èn nanga a wefi fu en. San na den sani dati? A fosi sani, na taki a musu ferstan taki a abi wan seryusu problema. Nowan enkri sani kibri gi Yehovah (Ps. 44:21; Preik. 12:14; Hebr. 4:13). A di fu tu sani, na taki a musu tapu fu fon en wefi èn fu kosi en, èn a musu kenki a fasi fa a e tyari ensrefi (Odo 28:13). A di fu dri sani, na taki a musu taigi en wefi nanga Yehovah taki a e ferstan fa a hati den firi fu den, èn a musu begi den fu gi en pardon (Tori 3:19). A musu begi Yehovah tu fu yepi en fu kon abi na angri fu kenki, èn fu yepi en fu denki, fu taki, èn fu tyari ensrefi na wan fasi di Yehovah feni bun (Ps. 51:10-12; 2 Kor. 10:5; Fil. 2:13). A di fu fo sani, na taki a musu leri fu no lobi nowan ogri noso dot’taki, èn a musu begi Yehovah tu fu yepi en nanga dati (Ps. 97:10). A di fu feifi sani, na taki a musu go suku yepi wantewante na den owruman fu a gemeente fu en (Yak. 5:14-16). A di fu siksi sani, na taki a musu suku wan fasi di o yepi en fu no du den sortu sani disi moro. Wan masra di e luku porno musu du den srefi siksi sani disi. Yehovah o blesi a muiti di a e meki fu kenki a fasi fa a e tyari ensrefi (Ps. 37:5). Ma a no nofo te wan masra e tapu fu du hati sani nanga en wefi. A musu leri tu fu gi en wefi grani. Fa a kan du dati?

FA WAN MASRA KAN GI A WEFI FU EN GRANI

15. Fa wan masra kan sori lobi gi a wefi fu en?

¹⁵ Sori taki yu lobi yu wefi. Son brada di abi wan koloku trowlibi e sorgu taki den e  du wan sani ibri dei fu sori a wefi fu den taki den lobi en (1 Yoh. 3:18). Kande wan masra e du pkinpkin sani fu sori a lobi dati. Kande a e hori en wefi anu te a e taki nanga en, noso kande a e gi en wan waran brasa. A kan tu taki a e seni wan sms gi en fu taigi en taki a e misi en, noso fu aksi en fa a e go. Ten na ten, a kan skrifi wan tu moi wortu gi en wefi tapu wan karta fu sori en taki a lobi en. Te wan masra e du den sani disi, dan a e gi en wefi grani èn na so a trowlibi fu den o waka moro bun.

16. Fu san ede wan masra musu prèise en wefi?

¹⁶ Taigi yu wefi taki a prenspari gi yu. Wan masra di e gi en wefi grani e taigi en fu san ede a breiti nanga en èn a e gi en dek’ati. Wán fasi fa a e du dati, na taki a no e fergiti fu sori en taki a e warderi ala sani di a e du fu horbaka gi en (Kol. 3:15). Te wan masra e prèise en wefi nanga en heri ati, dan dati e meki a wefi firi koloku. A o abi a dyaranti taki sani o waka bun nanga en, taki en masra lobi en, èn taki a e lespeki en.​—Odo 31:28

17. Fa wan masra kan sori lespeki gi en wefi?

¹⁷ Sori swit’fasi nanga lespeki gi yu wefi. Te wan masra lobi en wefi, dan a o breiti nanga en èn a o sori en taki a e warderi en. A e si en wefi leki wan warti kado di a kisi fu Yehovah (Odo 18:22; 31:10). Dati meki a e sori swit’fasi nanga lespeki gi en, srefi te den abi seks. A no o dwengi en wefi fu du sani di e meki a firi fisti, di e meki a firi taki en masra no lobi en, noso di e trobi a konsensi fu en. f Te den abi seks, dan a masra no o wani du nowan sani tu di ben o trobi en eigi konsensi.​—Tori 24:16.

18. San masra musu pruberi fu du ala ten? (Luku a faki „ Fo fasi fa wan masra kan sori lespeki gi en wefi”.)

¹⁸ Un masra, un kan de seiker taki Yehovah e si a muiti di unu e du fu gi un wefi grani na ini ala san unu e taki èn e du. Sori taki yu wani gi yu wefi grani ala ten.Sobun, no du sani di e hati en, sori swit’fasi gi en, sori en taki yu e lespeki en, èn sori en taki yu lobi en. Na so a o man si taki yu lobi en èn taki a prenspari gi yu. Gi yu wefi grani, dan yu no o pori a matifasi di yu abi nanga Yehovah, a moro prenspari mati fu yu.​—Ps. 25:14.