1. San na a moro prenspari sani gi furu sma na ini a ten disi?

 YU NO si taki furu sma na ini a ten disi e denki densrefi nomo? Son sma e gebroiki social media fu dyaf èn fu meki bigi gi den sani di den e du. Ma na ini a ten disi, furu sma no de di wani gi Yehovah grani. Na ini na artikel disi, wi o luku san a wani taki fu gi Yehovah grani noso fu prèise en, èn wi o luku tu fu san ede wi musu du dati. Wi o leri tu fa wi kan gi Gado a grani di a musu kisi èn fa a o gi en nen glori na ini a ten di e kon.

SAN A WANI TAKI FU GI YEHOVAH GRANI?

 2. Fa Yehovah sori na Sinai-bergi taki a makti srefsrefi? (Luku a na tapu a kafti.)

² Bijbel e sori taki Yehovah na wan Gado di abi bigi makti. Wan tu dei baka di Yehovah ben puru a pipel fu Israel na ini katibo na Egepte, a sori den a bigi makti di a abi. Pruberi fu si na yu fesi san ben psa: Milyunmilyun Israelsma ben kon makandra na a futu fu Sinai-bergi fu yere san a Gado fu den ben o taigi den. Ne wan dungru wolku tapu a heri bergi. Wantronso, soso smoko ben de fu si na loktu. A gron bigin seki hebi, faya koti na hemel, dondru bari, dan a tranga b’bari fu wan tutu ben de fu yere (Eks. 19:16-18; 24:17; Ps. 68:8). A no de fu taki dati den Israelsma no ben man bribi di den si a bigi makti fu Yehovah.

 3. San a wani taki fu gi Yehovah grani?

³ Wi leki libisma man yepi trawan tu fu kon si taki Yehovah na wan makti Gado. Wán fasi fa wi kan du dati, na te wi e ferteri trawan fu a bigi makti fu en èn fu den moi  fasi di a abi. Wi e gi Yehovah grani tu te wi e prèise en gi den sani di wi ben man du (Yes. 26:12). Kownu David ben de wan man di ben e gi Yehovah furu grani. Di a ben begi na fesi a gemeente fu Israel, dan a taigi Gado: „Yehovah, yu bigi, yu abi makti, ala moi sani na fu yu, yu abi furu glori èn na yu musu kisi ala grani. Ala sani na hemel èn na grontapu na fu yu.” Di David kba begi, dan „ala den sma di ben de drape blesi Yehovah”.​—1 Kron. 29:11, 20.

 4. Fa Yesus gi Yehovah grani?

⁴ Di Yesus ben de na grontapu, dan a gi en P’pa grani. A fasi fa a du dati, na taki a ferteri sma taki na Yehovah ben gi en a krakti fu du wondru (Mark. 5:18-20). Yesus ben gi en P’pa grani tu nanga yepi fu a fasi fa a ben e taki fu en èn a fasi fa a ben e libi nanga trawan. Wan leisi di Yesus ben e gi leri na ini wan snoga, dan wan uma ben de drape e arki en. Na uma disi ben abi wan ogri yeye na en tapu 18 yari langa. Na ogri yeye ben meki taki na uma disi en skin ben kron so te, taki a no ben man tnapu let’opo. Disi ben de wan sari sani fu si. Fu di Yesus ben e firi gi na uma disi, meki a waka go na en èn a taigi en na wan switi fasi: „Uma, yu musu kon betre fu a siki fu yu.” Ne a poti en anu na tapu na uma èn wantewante na uma tnapu let’opo èn a „gi Gado glori”. A ben de nanga tangi taki Yehovah ben meki a kon betre baka (Luk. 3:10-13). Na uma dati ben abi bun reide fu gi Yehovah grani, èn wi abi bun reide tu fu du dati.

FU SAN EDE WI E GI YEHOVAH GRANI?

 5. Sortu reide wi abi fu lespeki Yehovah?

⁵ Wi e gi Yehovah grani fu di wi abi bigi lespeki gi en. Wi abi furu reide fu lespeki Yehovah. A abi a makti fu du iniwan sani di a wani èn a no e kon weri noiti (Ps. 96:4-7). Den sani di a meki e sori taki a koni psa marki. Na en gi wi libi èn na en e hori ala sani na libi (Openb. 4:11). A e tan horbaka gi den anbegiman fu en (Openb. 15:4). Ala sani di a e du abi bun bakapisi èn ala ten a e du san a pramisi (Yos. 23:14). Dati meki a profeiti Yeremia ben taki disi fu Yehovah: „Nowan koniman noso kownu fu den pipel de leki yu” (Yer. 10:6, 7). A no de fu taki dati wi abi bun reide fu lespeki wi P’pa na hemel. Ma boiti taki wi e lespeki Yehovah, wi lobi en tu nanga wi heri ati.

 6. Fu san ede wi lobi Yehovah?

⁶ Wi e gi Yehovah grani fu di wi lobi en trutru. Luku wan tu fu den fasi fu Yehovah di e meki taki wi lobi en. A abi sar’ati èn a e firi gi sma (Ps. 103:13; Yes. 49:15). A e ferstan fa sma e firi. Te wi e sari, dan a e sari tu (Sak. 2:8). A e yepi wi fu kon sabi en èn fu tron en mati (Ps. 25:14; Tori 17:27). Èn a abi sakafasi. A „e saka ensrefi fu luku hemel nanga grontapu. A e opo a mofinawan puru na doti” (Ps. 113:6, 7). Na den sani disi e meki taki wi wani gi wi bigi Gado grani.​—Ps. 86:12.

 7. Sortu moi okasi wi abi?

⁷ Wi e gi Yehovah grani so taki tra sma kan kon sabi en. Furu sma no sabi den tru tori fu Yehovah. Fu san ede? Fu di Satan ferteri ogr’ati lei fu En èn sma e bribi den lei dati (2 Kor. 4:4). Satan meki sma bribi taki Yehovah na wan ogr’ati Gado di no e broko en ede nanga libisma èn taki na en e meki taki so furu pina de na grontapu. Ma wi sabi san tru. Wi abi  na okasi fu ferteri sma suma na Gado trutru èn wi kan yepi den fu gi en grani tu (Yes. 43:10). Psalm 96 e sori taki wi musu gi Yehovah grani. A psalm disi o leri wi fa wi kan gi Yehovah a grani di en w’wan musu kisi.

FA WI KAN GI YEHOVAH A GRANI DI A MUSU KISI?

 8. San na wán fasi fa wi kan gi Yehovah grani? (Psalm 96:1-3)

⁸ Leisi Psalm 96:1-3. Wi kan gi Yehovah grani nanga den sani di wi e taki fu en. Den vers disi e taigi wi fu „singi gi Yehovah”, fu „prèise en nen”, fu „ferteri [trawan] a bun nyunsu taki a e ferlusu sma”, èn fu „fruteri den pipel fu grontapu fu a glori fu en”. Ala den sani disi na fasi fa wi kan gi grani na wi P’pa na hemel. Na ini owruten, den futuboi fu Yehovah ben de fayafaya fu ferteri trawan fu den moi fasi fu en èn fu den bun sani di a ben du gi den (Dan. 3:16-18; Tori 4:29). Fa wi kan du a srefi leki den?

9-10. San yu e leri fu na ondrofenitori fu Angelena? (Luku a prenki.)

⁹ Luku na ondrofenitori fu Angelena, a wan sisa di e libi na Amerkankondre. A no ben frede fu opo taki gi Yehovah na en wrokope. Fu di Angelena ben de wan nyun wrokoman, meki en nanga tra nyun wrokoman ben musu kon makandra wan leisi fu leri sabi makandra. Den alamala ben mag ferteri wan sani fu densrefi. Angelena ben sreka sani fu sori den wrokoman wan tu fowtow so taki den ben kan si taki a ben abi wan koloku libi leki Yehovah Kotoigi. Ma leti fosi a ben musu taki, wan tra wrokoman bigin ferteri taki a ben kweki leki Yehovah Kotoigi. A bigin taki takru fu Yehovah Kotoigi èn fu a bribi fu den. Angelena e taki: „Mi bigin frede. Ma mi denki na misrefi: ’Mi o gi pasi taki wan sma e lei gi Yehovah? Noso mi o opo taki gi En?’”

¹⁰ Di a man kba taki, dan Angelena begi es’esi na ini en ati. Ne a taigi a man na wan switi fasi: „Mi srefi kweki leki Yehovah Kotoigi, èn mi na wan Yehovah Kotoigi ete.” Aladi Angelena ben kan firi taki ala sma ben e luku san a ben o du, tòg a no bruya. A sori den sma na en wrokope den fowtow di ben e sori fa en nanga den mati fu en ben e prisiri fu dini  Yehovah èn a opo taki gi a bribi fu en na wan lespeki fasi (1 Petr. 3:15). San ben de a bakapisi? Di Angelena kba taki, dan a man en ati kon kowru. A taki srefi fu wan tu moi sani di a ben ondrofeni na ini en yongu yari di a ben e bemui nanga Yehovah Kotoigi. Angelena e taki: „Wi musu opo taki gi Yehovah. A de wan grani fu opo taki gi a nen fu en.” Wi srefi abi a grani fu prèise Yehovah èn fu hei en nen, srefi te trawan no e sori lespeki gi en.

11. Fa tru anbegiman tan hori densrefi na a gronprakseri di de fu feni na ini Psalm 96:8?

¹¹ Leisi Psalm 96:8. Wi kan gi Yehovah grani nanga den sani di wi abi. Ala ten tru anbegiman gi Yehovah grani na a fasi dati (Odo 3:9). Den Israelsma ben e gi moni nanga gudu fu yepi bow a tempel èn fu sorgu gi en (2 Kow. 12:4, 5; 1 Kron. 29:3-9). Sonwan fu den disipel fu Yesus ben e „gebroiki den sani fu den” fu horbaka gi Yesus nanga den apostel (Luk. 8:1-3). Èn Bijbel e taki dati te son Kresten ben e pina fu di wan angriten ben de, dan den brada nanga sisa di ben e libi na tra presi ben e seni moni gi den (Tori 11:27-29). Wi srefi na ini a ten disi kan gi Yehovah grani nanga yepi fu den bijdrage fu wi.

12. Fa wi kan gi Yehovah grani nanga yepi fu den bijdrage fu wi? (Luku a prenki.)

¹² Poti prakseri na a ondrofenitori disi di e sori fa wi e gi grani na Yehovah nanga yepi fu den bijdrage fu wi. Na ini 2020, alen no ben fadon wan heri pisi ten na ini Zimbabwe. Moro leki wán milyun sma no ben abi sani fu nyan èn den ben kan lasi den libi. Prisca, wan sisa fu wi, ben de na ini a situwâsi dati tu. Aladi a situwâsi no ben makelek, tòg a ben e tan go na ini a preikiwroko tapu dridewroko nanga freida. A ben e go preiki sosrefi na a ten te sma ben e wroko na ini den gron fu den. Den birtisma fu en ben e spotu en fu di a ben e go na ini a preikiwroko na presi taki a ben e prani sani fu feni nyan. Den ben e taigi en: „Yu o dede fu angri.” Fu di Prisca ben de seiker taki Yehovah ben o sorgu gi en, meki ala ten a ben e piki den: „Noiti Yehovah drai baka gi den futuboi fu en.” A no langa baka dati, Prisca kisi yepi fu na organisâsi fu wi. Fu di ibriwan fu wi e gi bijdrage, meki  Prisca ben man kisi n’nyan nanga tra sani di a ben abi fanowdu. Den birtisma fu en no ben man bribi san den si èn den taigi en: „Wi si taki Gado no drai baka gi yu, èn dati meki wi wani leri sabi en.” Seibi fu den birtisma fu en bigin kon na den konmakandra.

13. Fa a fasi fa wi e tyari wisrefi kan gi Yehovah grani? (Psalm 96:9)

¹³ Leisi Psalm 96:9. Wi kan gi Yehovah grani nanga a fasi fa wi e tyari wisrefi. Den priester di ben e dini na ini a tempel fu Yehovah ben musu wasi densrefi èn den ben musu de krin (Eks. 40:30-32). Wi srefi musu de krin, ma dati w’wan no sari. San moro prenspari, na taki wi musu wai pasi gi iniwan sani di Yehovah no lobi kwetkweti (Ps. 24:3, 4; 1 Petr. 1:15, 16). Bijbel e taki dati wi musu ’kenki a fasi fa wi ben de fosi’ èn taki wi musu kon tron nyun sma „di kisi nyun fasi.” Dati wani taki dati wi musu du ala san wi man fu no denki noso du sani di Yehovah no feni bun. Na presi fu dati, wi musu meki muiti fu denki èn fu du sani di e sori taki wi abi den moi fasi fu en (Kol. 3:9, 10). Yehovah kan yepi srefi sma di ben du den moro ogri sani fu kenki èn fu kisi nyun fasi.

14. San yu e leri fu na ondrofenitori fu Jack? (Luku a prenki.)

¹⁴ Luku na ondrofenitori fu Jack. A ben de wan ogr’ati man èn den ben e kari en Didibri. Fu di Jack ben du so furu ogri, meki a kisi dedestrafu. Ma na a pisi ten di a ben e wakti fu kisi en strafu, dan wan brada di ben gwenti go na a straf’oso, aksi en efu a wani studeer Bijbel. Jack ben feni dati bun èn a bigin studeer Bijbel. Aladi Jack ben du so furu ogri, tòg a ben man kenki a fasi fa a ben de èn baka wan pisi ten a ben man teki dopu leki Yehovah Kotoigi. Jack kenki so furu, taki na a dei di a ben o kisi en strafu, wan tu fu den straf’oso waktiman krei di den ben e taki en odi fu a lasti leisi. Wan komandanti di ben e wroko na a straf’oso, ben taki: „Fosi, Jack ben de a moro ogri strafman na ini a presi disi. Now a de wan fu den moro bunwan.” A wiki baka di den kiri Jack, a brada go na a straf’oso soleki fa a ben gwenti, fu  hori komakandra nanga den strafman. A brada miti wan strafman di ben kon na a konmakandra fu a fosi leisi. Fu san ede a ben besroiti fu kon? A fasi fa Jack ben kenki ben naki en ati èn a ben wani sabi san a ben musu du fu anbegi Yehovah. A de krin taki a fasi fa wi e tyari wisrefi kan gi wi P’pa na hemel grani!​—1 Petr. 2:12.

FA YEHOVAH O GI EN NEN GRANI NA INI A TEN DI E KON?

15. Fa Yehovah o gi en nen grani na ini a ten di e kon? (Psalm 96:10-13)

¹⁵ Leisi Psalm 96:10-13. Den lasti vers disi fu Psalm 96 e sori taki Yehovah na wan Krutuman èn wan Kownu di lobi retidu. Fa Yehovah o gi en nen grani na ini a ten di e kon? A o poti sani kon reti baka. Heri esi a o tyari wan kba kon na Babilon a Bigiwan, fu di a pori a santa nen fu en (Openb. 17:5, 16; 19:1, 2) Te Babilon a Bigiwan o kisi pori, dan a kan taki son sma o bigin anbegi Yehovah makandra nanga wi. Te fu kba, Yehovah o pori a heri grontapu fu Satan na ini a feti fu Armagedon èn a o tyari wan kba kon na ala sma di e gens en èn di e pori en nen. Ma a o kibri ala den sma di lobi en, di e gi yesi na en, èn di wani gi en grani (Mark. 8:38; 2 Tes. 1:6-10). Baka te sma kisi tesi fu a lasti leisi baka a Dusun Yari Tiri fu Krestes, dan a o de krin fu si taki Yehovah na a wan-enkri Gado di ala libisma musu anbegi (Openb. 20:7-10). Na a ten dati, a o de so taki „neleki fa a se lai nanga watra, na so a sabi fu a glori fu Yehovah o lai na grontapu”.​—Hab. 2:14.

16. San yu o du? (Luku a prenki.)

¹⁶ A o de wan span ten te ala sma o prèise Yehovah fu di a warti fu kisi grani. Ma teleki a dei dati doro, wi kan tan gebroiki ibri okasi fu gi a Gado fu wi grani. Fu di a sani disi prenspari srefsrefi, meki a Tiri Skin teki Psalm 96:8 leki a yaritekst fu 2025: „Prèise Yehovah fu di en nen bigi.”