1. Fa wi e kisi wini te wi e go na a Memrefesa fu a dede fu Yesus Krestes di e hori ibri yari?

 A NO de fu taki dati a lusu-paiman na wan kado di warti srefsrefi! (2 Kor. 9:15) Fu di Yesus gi en libi gi wi, meki yu kan de wan mati fu Yehovah Gado. Boiti dati, yu abi a howpu tu fu libi fu têgo na ini a ten di e kon. Wi abi furu reide fu de nanga tangi taki Yehovah sorgu gi a lusu-paiman. A du disi fu di a lobi wi trutru (Rom. 5:8). Fu yepi wi fu tan de nanga tangi èn fu no fergiti noiti san Yehovah nanga Yesus du gi wi, meki Yesus gi wi a komando fu de na a Memrefesa di e hori ibri yari.​—Luk. 22:19, 20.

 2. San wi o luku na ini a artikel disi?

² A yari disi, a Memrefesa o hori tapu satra 12 april 2025. A no de fu taki dati wi alamala o de drape. Wi o kisi furu wini te wi e meki ten na ini den wiki fosi èn baka a Memrefesa, fu denki dipi fu san Yehovah nanga Yesus du gi wi. Na ini a artikel disi, wi o luku san a lusu-paiman e leri wi fu Yehovah nanga Yesus. Na artikel baka a wan disi o yepi wi fu kon ferstan fa wi kan kisi wini fu a lusu-paiman dati èn fa wi kan sori taki wi de nanga tangi gi en.

SAN A LUSU-PAIMAN E LERI WI FU YEHOVAH

 3. Fa a dede fu wán man kan meki taki milyunmilyun sma kisi ferlusu? (Luku a prenki.)

³ A lusu-paiman e leri wi taki Yehovah na wan Gado di  lobi retidu (Deut. 32:4). Fu san ede wi kan taki dati? Luku a tori disi: Di Adam trangayesi Gado, a tron wan sondu sma èn a dede te fu kba. Èn fu di wi na bakapkin fu en meki wi srefi tron sondusma èn wi e dede tu (Rom. 5:12). Fu meki wi kon fri fu sondu nanga dede, dan Yehovah seti sani so, taki Yesus ben kan kon na grontapu fu gi en libi gi wi leki lusu-paiman. Ma fa a dede fu wán sma di no ben abi sondu ben kan ferlusu someni libisma fu sondu nanga dede? Na apostel Paulus ben taki: „Neleki fa furu sma tron sondari fu di a wán man dati [Adam] trangayesi Gado, na so furu sma o tron reti-ati sma fu di wán sma gi yesi na Gado” (Rom. 5:19; 1 Tim. 2:6). Paulus e sori dyaso taki na fu di wán man trangayesi Gado, meki ala libisma tron sondusma èn e dede te fu kba. Sobun, wán man di ben e gi yesi na Gado èn di ben de sondro fowtu ben de fanowdu fu meki wi kon fri fu sondu nanga dede.

 4. Fu san ede Yehovah no meki den ret’ati bakapkin fu Adam libi fu têgo, sondro taki wan lusu-paiman ben musu pai?

⁴ A ben de fanowdu taki Yesus dede so taki wi ben kan kisi ferlusu? Fu san ede Yehovah no meki den ret’ati bakapkin fu Adam libi fu têgo, sondro taki wan lusu-paiman ben musu pai? Kande wi ben o denki taki dati ben o de a moro bun sani fu du. Ma gi Yehovah, dati no ben o de a yoisti sani fu du. Fu di Yehovah na wan Gado di lobi retidu, meki noiti a ben o tapu ai gi a bigi sondu di Adam du.

 5. Fu san ede wi kan de seiker taki ala ten Yehovah o du san reti?

⁵ Ma fa a ben o de efu Yehovah ben gi pasi taki den bakapkin fu Adam libi fu têgo, sondro taki a ben sorgu gi wan lusu-paiman? Kande sma ben o aksi densrefi efu Gado ben o psa den wet fu en tu na ini tra situwâsi. Kande wi ben o aksi wisrefi efu a ben o hori ensrefi na sonwan fu den pramisi fu en. Wi no abi fu frede taki a sani dati o psa. Fu san ede? Fu di Yehovah du san reti aladi a ben musu gi pasi taki en Manpkin gi en libi leki srakti-ofrandi. Disi e gi wi a dyaranti taki ala ten a o du san reti.

 6. San na wán fasi fa a lusu-paiman e sori taki Yehovah lobi wi? (1 Yohanes 4:9, 10)

⁶ A tru taki a lusu-paiman e yepi wi fu ferstan taki Yehovah na wan Gado di lobi retidu, ma san moro prenspari, na taki a e yepi wi fu kon ferstan o furu Yehovah lobi wi (Yoh. 3:16; leisi 1 Yohanes  4:9, 10). Yehovah seni en Manpkin kon fu dede gi wi fu di a wani taki wi libi fu têgo èn fu di a wani taki wi tron en pkin. Luku san psa: Di Adam sondu, dan a no ben kan de wan pkin fu Yehovah moro. Ma nanga yepi fu a lusu-paiman, Yehovah man gi wi pardon fu den sondu fu wi èn te fu kba ala libisma di e sori bribi èn di e gi yesi na en o man kon na ini a famiri fu en. Nownow kba srefi, wi kan tron bun mati fu Yehovah èn fu wi Kresten brada nanga sisa. A de krin taki Yehovah lobi wi trutru.​—Rom. 5:10, 11.

 7. Fa a pina di Yesus pina e yepi wi fu ferstan taki Yehovah lobi wi?

⁷ Wi kan ferstan moro bun fa Yehovah lobi wi te wi e prakseri fa a ben musu fu hati en fu si fa en Manpkin ben e pina. Satan taki dati nowan enkri futuboi fu Gado o tan gi yesi na en te tesi e miti en. Fu sori taki Satan na wan leiman, meki Yehovah gi pasi taki Yesus pina fosi a dede (Yob 2:1-5; 1 Petr. 2:21). Yehovah ben e luku fa den kerki fesiman ben e spotu Yesus, fa den srudati wipi en teleki en skin ben e brudu, èn fa den spikri en na wan postu. Dan Yehovah luku fa den libi en lobi Manpkin fu pina teleki a dede (Mat. 27:28-31, 39). Yehovah ben abi a makti fu tyari wan kba kon na den sani disi. Fu eksempre, di den gensman taki: „Meki Gado frulusu en efu A lobi en”, dan Yehovah ben kan du dati (Mat. 27:42, 43). Ma efu Gado ben du wan sani, dan wan lusu-paiman no ben o pai èn wi no ben o abi wan howpu. Dati meki Yehovah gi pasi taki en Manpkin pina teleki a hari en lasti bro.

 8. Fu san ede wi kan de seiker taki a hati Yehovah fu si fa en Manpkin ben e pina? (Luku a prenki.)

⁸ A no fu di Yehovah abi ala makti, meki wi musu denki taki a no abi firi. Libisma abi firi, fu di na so Gado meki den. Èn fu di Bijbel e taki dati a meki wi fu gersi en, dan dati wani taki dati a abi firi tu. Bijbel e taki dati sma „ben e hati en firi” èn taki a ben e „sari” (Ps. 78:40, 41). Prakseri a tori fu Abraham nanga Isak. Yehovah ben taigi Abraham fu gi en wan-enkri manpkin leki ofrandi (Gen. 22:9-12; Hebr. 11:17-19). Prakseri fa Abraham ben e sari èn fa a ben e broko en ede di a ben e sreka sani fu kiri en eigi manpkin. Wi kan ferstan taki a ben moro hebi gi Yehovah fu si fa sma pina en Manpkin na so wan ogr’ati fasi teleki a dede. Luku a felem Teki na eksempre fu sma di ben abi bribi​—Abraham, Pisi 2, tapu jw.org.

 9. San Romesma 8:32, 38, 39 e leri yu fu a lobi fu Yehovah?

 ⁹ A lusu-paiman e leri wi taki nowan sma lobi wi moro leki fa Yehovah lobi wi. Srefi wi famiriman, noso wi bun mati no lobi wi so. (Leisi Romesma 8:32, 38, 39.) A no de fu taki dati Yehovah lobi wi moro leki fa wi lobi wisrefi. Yu wani libi fu têgo? Yehovah wani dati moro gi yu leki fa yu wani dati gi yusrefi. Yu wani kisi pardon gi den sondu fu yu? Yehovah wani dati moro gi yu leki fa yu wani dati gi yusrefi. A wan-enkri sani di a e ferwakti fu wi, na taki wi musu sori warderi gi san a du gi wi. A lusu-paiman trutru na wan warti kado di e sori taki Yehovah lobi wi trutru. Èn na ini a nyun grontapu, wi o leri moro srefi fu a lobi fu Yehovah.​—Preik. 3:11.

SAN A LUSU-PAIMAN E LERI WI FU YESUS

10. (a) Nanga san Yesus ben e broko en ede di sma ben de fu kiri en? (b) Na sortu fasi Yesus sori taki Yehovah abi leti? (Luku a faki „ A srakti-ofrandi fu Yesus sori taki Yehovah abi leti”.)

¹⁰ Yesus e broko en ede trutru nanga san sma e denki fu en P’pa (Yoh. 14:31). Yesus ben e broko en ede taki sma ben o denki takru fu en P’pa. Fu taki en leti sma ben wani kiri Yesus fu di den ben feni taki a no ben lespeki Gado èn taki a ben du ogri. Dati meki Yesus begi: „Mi Tata, efu a man, dan puru a kan disi na mi fesi” (Mat. 26:39). Ma fu di Yesus tan gi yesi na Yehovah teleki a dede, meki a sori krin taki den sani di Satan ben ferteri fu en P’pa no ben tru.

11. Fa Yesus sori dipi lobi gi sma? (Yohanes 13:1)

¹¹ A lusu-paiman e leri wi tu taki Yesus abi dipi lobi gi sma, spesrutu gi den disipel fu en (Odo 8:31; leisi Yohanes  13:1). Fu eksempre, Yesus ben sabi taki wan tu fu den sani di a ben o abi fu du na grontapu ben o muilek srefsrefi, spesrutu na ogr’ati fasi fa a ben o abi fu dede. Ma Yesus no du ala den muilek sani disi soso fu di Yehovah ben taigi en fu du dati, ma a du den fu di a ben lobi libisma. Dati meki a preiki gi den, a gi den leri, èn a yepi den. Srefi a dei di a ben o dede, Yesus teki a ten fu wasi den futu fu den apostel fu en, fu gi den leri, fu gi den dek’ati, èn fu trowstu den (Yoh. 13:12-15). Baka dati, a gi wan ogriman di ben e anga na en sei howpu, èn a du dati aladi a ben e pina na a postu. A taigi a man disi taki a ben o de na ini Paradijs èn fu di a ben e broko en ede nanga en m’ma, meki a aksi Yohanes fu sorgu gi en (Luk. 23:42, 43; Yoh. 19:26, 27). Dus, a no soso a dede fu Yesus e sori taki a lobi libisma, ma a sori dati sosrefi nanga den bun sani di a du gi den èn nanga a swit’fasi di a sori gi den a di a ben de na grontapu.

12. San Yesus e du gi wi now?

¹² Aladi Yesus dede „wán leisi nomo”, tòg a e du furu sani ete gi wi (Rom. 6:10). San a e du gi wi? A e tan wroko fu sorgu taki wi e kisi den someni bun sani di wi man kisi now fu di a lusu-paiman pai. Nownowde a de wi Kownu, wi Granpriester, èn na ede fu a gemeente (1 Kor. 15:25; Ef. 5:23; Hebr. 2:17). A e teki fesi na ini a wroko di e du fu tyari den salfuwan nanga a bigi-ipi kon na wán. A wroko disi o klari fosi a bigi banawtu kon na wan kba (Mat. 25:32; Mark. 13:27). Yesus e sorgu tu taki den getrow futuboi fu en e kisi san den abi fanowdu fu man tan dini Yehovah na ini den lasti dei disi (Mat. 24:45). Èn na a ten fu a Dusun Yari Tiri, a o tan du sani gi wi. A de krin taki Yehovah no gi en Manpkin soso fu dede gi wi, ma gi en fu du so furu tra sani tu gi wi.

TAN LERI NYUN SANI

13. Te wi e denki dipi fu sani, dan fa dati kan yepi wi fu leri moro fu a lobi di Yehovah nanga Krestes abi gi wi?

¹³ O moro yu e tan denki dipi fu den sani di Yehovah Gado nanga Krestes Yesus du gi yu, o moro yu o si fa den lobi yu. Kande yu kan leisi wan fu den Evangelietori finfini a yari disi, na ini den wiki fosi èn baka a Memrefesa. No pruberi fu leisi tumsi furu kapitel wán leisi. Na presi fu dati, teki yu ten èn luku sortu tra reide de fu san ede wi musu lobi Yehovah nanga Yesus. Èn ferteri trawan san yu leri di yu leisi den kapitel dati.

14. Soleki fa Psalm 119:97 e sori, dan fa wi kan tan leri moro fu a lusu-paiman èn fu tra sani di Bijbel e leri te wi e ondrosuku sani finfini? (Luku a prenki.)

 ¹⁴ Efu yu de na ini waarheid furu yari kba, dan kande yu e aksi yusrefi efu nyun sani de ete fu leri fu a retidu fu Gado, fu a lobi fu en, èn fu a lusu-paiman. Fu taki en leti, nyun sani o de fu leri ala ten fu den tori disi. Sobun, san yu kan du? Leisi èn studeri den moi tori di de fu feni na ini den buku fu wi. Te yu e leisi wan sani na ini Bijbel di yu no e ferstan, dan ondrosuku a tori dati moro fini. Baka dati, meki ten fu denki fu den sani di yu studeri èn fu den sani di yu leri fu Yehovah, fu en Manpkin, èn fu a lobi di den abi gi yu.​—Leisi Psalm 119:97.

15. Fu san ede wi musu tan leri nyun sani fu Bijbel?

¹⁵ No las’ati efu yu no feni wan nyun sani ibri leisi te yu e leisi Bijbel noso te yu e ondrosuku sani moro fini. Fu taki en leti, yu musu si yusrefi leki wan sma di e suku gowtu. Nofo tron, wan sma di e suku gowtu e wroko omeni yuru noso omeni dei langa fosi a feni pkinso gowtu. Ma tòg a e tan suku nanga pasensi fu di ibri pisi gowtu di a e feni, awinsi fa a pkin, prenspari gi en. A no de fu taki dati ibri nyun sani di wi e leri fu Bijbel warti moro gowtu (Ps. 119:127; Odo 8:10). Sobun, tan leisi Bijbel èn tan ondrosuku en moro fini fu leri nyun sani.​—Ps. 1:2.

16. Fa wi kan de leki Yehovah nanga Yesus?

¹⁶ Te yu e studeri, dan prakseri fa yu kan fiti den sani di yu e leri na ini yu libi. Fu eksempre, te yu e libi bun nanga trawan, dan dati e sori taki yu lobi retidu neleki Yehovah. Te yu de klarklari fu du san Yehovah wani èn te yu e yepi trawan awinsi dati no makelek son leisi, dan yu e teki na eksempre fu Yesus. Wan tra fasi fa yu kan de leki Yesus, na te yu e preiki gi trawan so taki den kan kon sabi den kfalek sani di Yehovah du gi sma. Na so den kan poti bribi na ini a lusu-paiman.

17. San wi o luku na ini a tra artikel?

¹⁷ O moro wi e leri fu a lusu-paiman, o moro wi o kon lobi Yehovah nanga en Manpkin, èn den o kon abi moro lobi tu gi wi (Yoh. 14:21; Yak. 4:8). Sobun, meki wi tan gebroiki ala den sani di Yehovah seti so taki wi kan kon sabi moro fu lusu-paiman. Na ini a tra artikel, wi poti prakseri na wan tu fasi fa wi kan kisi wini fu a lusu-paiman èn fa wi kan sori warderi gi a lobi di Yehovah abi gi wi.