STUDIE-ARTIKEL 3
SINGI 35 „Kon sabi san na den moro prenspari sani”
Teki besroiti di Yehovah feni bun
„Bigi lespeki gi Yehovah na a bigin fu koni. Na a sma di sabi a Moro Santawan abi ferstan.”—ODO 9:10.
SAN WI O LERI
Wi o leri fa fu gebroiki koni èn fa fu si sani krin so taki wi kan teki bun besroiti.
1. Sortu muilek sani wi alamala musu du?
IBRI dei wi musu teki besroiti. Son besroiti makelek fu teki, soleki san wi o nyan te m’manten noso te neti. Tra besroiti moro muilek fu teki. Kande den besroiti dati o abi krakti tapu a gosontu fu wi, tapu a fasi fa wi libi o waka, tapu wi famiri, noso tapu na anbegi fu wi. Wi wani teki besroiti di e tyari wini kon gi wi nanga wi osofamiri. Ma san moro prenspari, na taki wi e howpu taki Yehovah o feni den besroiti fu wi bun.—Rom. 12:1, 2.
2. San yu kan du fu man teki koni besroiti?
2 A o moro makelek gi yu fu teki wan koni besroiti te yu (1) e kon sabi sani finfini, (2) e kon sabi fa Yehovah e denki fu a tori, èn (3) te yu e denki bun san na a moro bun sani fu du. Na artikel disi o taki fu den sani disi èn wi o leri tu fa wi kan gebroiki wi ferstan fu man si sani krin.—Odo 2:11.
KON SABI SANI FINFINI
3. Ferklari fu san ede yu musu kon sabi sani finfini fosi yu e teki wan besroiti.
3 A fosi sani di o yepi wi fu teki wan bun besroiti, na taki wi musu kon sabi sani finfini. Fu san ede a sani disi prenspari? Kow taki dati wan sikisma e go suku yepi na wan datra fu di a e siki seryusu. Yu denki taki a datra ben o besroiti kba sortu datrayepi a o gi a sma, sondro taki a e ondrosuku en fosi èn sondro taki a poti aksi gi en? A no de fu taki dati a no ben o du dati. Yu o man teki moro bun besroiti tu te yu e kon sabi finfini san fiti na ini a situwâsi fu yu. Fa yu kan du dati?
4. Fa yu kan sorgu taki yu e kon sabi sani finfini, soleki fa Odo 18:13 e sori? (Luku a prenki.)
4 Nofo tron yu kan kon sabi sani finfini te yu e poti aksi. Kow taki dati yu kisi wan kari fu de na wan prisiri demakandra. Yu musu go? Efu yu no sabi suma e hori a prisiri demakandra noso san a sma seti gi na okasi dati, dan yu o abi fu aksi en sani soleki: „Pe a demakandra o hori èn o ten a o hori? Omeni sma o de drape? Suma abi a frantwortu fu sorgu taki ala sani e waka bun? Suma o de drape? Sortu sani sma o du na a demakandra? Sopi o de?” Den piki tapu den aksi disi o yepi yu fu teki wan koni besroiti.—Leisi Odo 18:13.
Poti aksi fu kon sabi sani finfini (Luku paragraaf 4) a
5. San yu musu du te yu kon sabi sani finfini?
5 Baka te yu kon sabi san yu wani sabi, dan poti prakseri na a heri situwâsi. San yu o du efu yu e kon sabi taki sma di no e lespeki Bijbel gronprakseri o de na a demakandra? San yu o du te yu e kon sabi taki sopi o de, ma taki sani no seti fu sorgu taki sma no e dringi tumsi furu? Yu denki taki a demakandra disi kan tron wan bradyari fesa? (1 Petr. 4:3) Ma san yu o du efu a demakandra disi e hori na a ten te yu musu go na wan gemeente konmakandra noso na a ten te yu gwenti go na ini a preikiwroko? Te yu e prakseri ala den sani disi, dan a o moro makelek gi yu fu teki wan bun besroiti. Ma ete wan sani de di yu musu du. Yu sabi fa yu e denki fu a situwâsi, ma aksi yusrefi: ’Fa Yehovah e denki fu en?’—Odo 2:6.
KON SABI FA YEHOVAH E DENKI FU WAN TORI
6. Fu san ede wi musu begi Yehovah fu yepi wi, soleki fa Yakobus 1:5 e sori?
6 Aksi Yehovah fu yepi yu fu kon ferstan fa a e denki fu wan tori. Yehovah pramisi taki a o gi wi a koni fu man si efu a besroiti di wi teki e kruderi nanga a wani fu en. A e gi ala sma a koni dati „nanga en heri ati èn sondro fu suku fowtu na den”.—Leisi Yakobus 1:5.
7. Fa yu kan kon sabi fa Yehovah e denki fu wan tori? Gi wan agersitori.
7 Te yu begi Yehovah fu sori yu san na a moro bun sani fu du, dan luku bun fa a o piki a begi fu yu. Kow taki dati yu go na wan presi ma yu lasi pasi. Kande yu aksi wan sma fu drape fu sori yu sortu pasi yu musu teki. Ma yu ben o waka gwe fosi a piki yu? Nôno, yu no ben o du dati. Yu ben o arki bun san a ben o taigi yu. Na so a de tu taki te yu aksi Yehovah fu gi yu koni, dan pruberi fu kon sabi san na a piki fu en. Yu kan kon sabi dati te yu e luku sortu Bijbel wet nanga gronprakseri abi fu du nanga a situwâsi fu yu. Kow taki dati yu musu besroiti efu yu o go na a prisiri demakandra di wi ben taki fu en. A ben o bun fu luku san Bijbel e taki fu bradyari fesa èn fu takru kompe. A bun fu kon sabi tu fu san ede a prenspari fu poti Kownukondre afersi na a fosi presi na wi libi.—Mat. 6:33; Rom. 13:13; 1 Kor. 15:33.
8. Ma san yu kan du fu man feni den sani di yu wan sabi? (Luku a prenki.)
8 Ma son leisi a kan taki yu abi yepi fanowdu fu man feni den sani di yu wani sabi. Kande wan lepi brada noso sisa kan gi yu rai. Ma yu o kisi wini tu te yu srefi e ondrosuku sani. Bun furu koni rai de fu feni na ini den buku fu wi, soleki na Ondrosuku Bijbel moro fini—Gi Yehovah Kotoigi nanga Bijbelteksten voor ons leven als christen. Hori na prakseri san na a marki fu yu: Yu wani teki wan besroiti di Yehovah feni bun.
Kon sabi fa Yehovah e denki fu a tori (Luku paragraaf 8) b
9. Fa wi kan de seiker taki Yehovah o feni a besroiti fu wi bun? (Efeisesma 5:17)
9 Fa wi kan de seiker taki Yehovah o feni a besroiti fu wi bun? Na a fosi presi, yu musu kon sabi Yehovah bun. Bijbel e taki: „Na a sma di sabi a Moro Santawan abi ferstan” (Odo 9:10). Iya, te wi sabi san na den fasi fu Yehovah, san na a wani fu en, èn san a lobi noso san a no lobi, dan ala ten wi o sabi san na a yoisti sani fu du. Aksi yusrefi: ’Now di mi sabi den sani disi fu Yehovah, dan sortu besroiti mi musu teki so taki a kan feni dati bun?’—Leisi Efeisesma 5:17.
10. Fu san ede Bijbel gronprakseri prenspari moro leki famiri gwenti noso a kulturu fu wi?
10 Fu man du san Yehovah feni bun, dan son leisi wi musu du sani di den famiriman nanga mati fu wi no lobi. Kande wan p’pa nanga wan m’ma di abi a bun fu na umapkin fu den na prakseri, wani taki a trow nanga wan man di abi furu moni, noso di o man sorgu bun gi den. A p’pa nanga mama wani a sani disi aladi den sabi taki a man no e meki muiti fu go na fesi na ini a waarheid. A tru taki den wani taki na umapkin fu den abi wan bun libi, ma suma o yepi en fu tron wan lepi anbegiman fu Yehovah? Fa Yehovah e si a tori? Wi e feni a piki na Mateyus 6:33. A tekst disi e gi Kresten dek’ati fu tan „suku fosi a Kownukondre” (Mat. 6:33). Aladi wi e lespeki wi p’pa nanga m’ma èn sosrefi den famiriman nanga mati fu wi, tòg a moro prenspari sani gi wi, na taki wi wani prisiri Yehovah ati.
LUKU SAN NA A MORO BUN SANI FU DU
11. San o yepi yu fu kon sabi san na a moro bun sani fu du, soleki fa Filipisma 1:9, 10 e sori?
11 Te yu kon sabi sortu gronprakseri fiti na ini a situwâsi fu yu, dan yu musu luku san na a moro bun sani fu du. (Leisi Filipisma 1:9, 10.) Te yu sabi krin san na a wani fu Gado, dan yu o man si na fesi san o psa te yu teki wan besroiti. Son besroiti makelek fu teki. Ma dati no de so nanga ala besroiti. Te yu abi a koni fu man si sani krin, dan dati o yepi fu teki bun besroiti, awinsi a situwâsi muilek.
12-13. Fa a koni fu man si sani krin, o yepi yu fu teki wan bun besroiti te abi fu du nanga grontapu wroko?
12 Prakseri a situwâsi disi. Yu e suku wan wroko fu man sorgu yu osofamiri. Tu wroko de di yu kan feni. Yu e kon sabi ala sani finfini, yu e poti prakseri na a sortu wroko di yu o abi fu du, den wrokoyuru, a ten di a o teki fu go na wroko, èn so moro fara. Na ini ala tu situwâsi, a wroko srefi na wan bun wroko gi Kresten. Kande yu feni wan fu den wroko moro bun fu di na a sortu wroko dati yu lobi, noso kande na fu di a e pai moro bun. Ma tra sani de di yu musu hori na prakseri fosi yu teki wan besroiti.
13 Ma fa a de te ala tu wroko ben o tapu yu fu go na den gemeente konmakandra? Den wroko disi ben o go na ini a ten di yu musu gebroiki fu yepi yu osofamiri fu de koloku èn fu abi wan tranga bribi? Te yu e aksi yusrefi den sani disi, dan dati o yepi yu fu tan poti prakseri na „den moro prenspari sani”, na presi fu luku a moni nomo di yu kan meki. Na so yu o man teki wan besroiti di Yehovah o blesi.
14. Te wi e ferstan krin san na a wani fu Gado èn te wi abi lobi, dan fa dati o yepi wi fu no meki trawan fadon?
14 Te wi sabi krin san na a wani fu Gado, dan wi o prakseri tu sortu krakti a besroiti fu wi o abi tapu trawan, fu di wi no wani „meki trawan fadon” (Fil. 1:10). A sani disi prenspari te a abi fu du nanga den krosi di wi e weri èn nanga a fasi fa wi e moi wisrefi. Kande wi lobi son krosi, noso kande wi lobi moi wisrefi na wan spesrutu fasi. Ma fa a de efu sma ini a gemeente noso dorosei fu a gemeente abi muiti nanga den sani disi? Te wi sabi krin san na a wani fu Gado, dan dati o yepi wi fu lespeki den firi fu trawan. Lobi o meki wi suku a bun fu „trawan” èn fu no denki tumsi furu fu wisrefi (1 Kor. 10:23, 24, 32; 1 Tim. 2:9, 10). Na so wi o man teki wan besroiti di e sori taki wi lobi trawan èn taki wi e lespeki den.
15. San yu musu du fosi yu teki wan prenspari besroiti?
15 Efu yu musu teki wan prenspari besroiti, dan prakseri san a besroiti dati o aksi fu yu. Yesus ben leri wi fu „teri den kostu” (Luk. 14:28). Dus prakseri a ten, a moni, èn a muiti di o de fanowdu fu meki sani waka bun. Na ini son situwâsi yu kan taki nanga yu osofamiri fu kon sabi san a o aksi fu den fu meki sani waka bun. Fu san ede a prenspari fu seti sani na a fasi disi? Na so a o kon na krin efu yu musu kenki wan tu sani na a besroiti fu yu, noso efu a moro bun fu du wan tra sani. Èn te yu e meki ibri sma na ini yu osofamiri kon sabi san den o abi fu du fu meki sani waka bun, dan den o wani du moro muiti fu horbaka gi yu.—Odo 15:22.
TEKI WAN BESROITI DI O ABI BUN BAKAPISI
16. Sortu sani yu o abi fu du efu yu wani taki a besroiti di yu teki abi bun bakapisi? (Luku a faki „ Fa yu kan teki bun besroiti”.)
16 Efu yu du ala den sani di kari na a bigin fu na artikel disi, dan yu o man teki wan bun besroiti. Yu kon sabi sani finfini èn yu o ondrosuku sortu gronprakseri o yepi yu fu teki wan besroiti di Yehovah feni bun. Now yu kan aksi Yehovah fu yepi yu so taki a besroiti di yu teki kan abi bun bakapisi.
17. San na a moro prenspari sani di o yepi yu fu teki bun besroiti?
17 Awinsi yu teki furu bun besroiti na ini a ten di psa, hori na prakseri taki a moro prenspari sani di o yepi yu fu teki bun besroiti, na a koni fu Yehovah. No fertrow tapu yu eigi koni èn no denki tu taki ala ten sani o waka soleki fa yu e ferwakti. Na Yehovah w’wan kan gi yu trutru koni, na en man yepi yu fu ferstan sani krin, èn fu sabi krin san na a wani fu en. Ala den sani disi prenspari fu man abi trutru koni (Odo 2:1-5). Yehovah kan yepi yu fu teki besroiti di a feni bun.—Ps. 23:2, 3.
SINGI 28 Suma Yehovah e teki leki mati?
