DI YESUS ben leri den disipel fu en fa fu preiki a bun nyunsu, a ben taigi den taki a no ala sma ben o arki a Kownukondre boskopu (Luk. 10:3, 5, 6). Te wi e preiki, wi srefi kan miti nanga sma di e taki grofu nanga wi noso di wani du wi ogri srefi. A sani disi kan meki en muilek gi wi fu sori sari-ati gi den.

Wan sma di abi sari-ati e si san wan tra sma abi fanowdu noso sortu problema a abi, a e firi gi a sma èn a wani yepi en. Ma san kan pasa efu wi no e sari den sma di wi e miti na ini a preikiwroko? Wi no o de fayafaya fu preiki gi den èn wi no o sabi fa fu yepi den. Neleki fa wi musu poti udu gi wan faya fu meki a tan bron, na so a de tu taki wi musu abi sari-ati efu wi wani du a preikiwroko fayafaya.​—1 Tes. 5:19.

Fa wi kan tan sori sari-ati, srefi te a no makelek? Meki wi go luku dri eksempre. A di fu Yehovah, Yesus nanga na apostel Paulus.

Omeni dusun yari kaba, sma e taki lei fu Yehovah. Toku a e tan „du bun gi den sma di no de nanga tangi èn gi den ogri sma” (Luk. 6:35). Fa a e du dati? A e hori pasensi nanga den. Yehovah wani taki „ala sortu sma” kisi frulusu (1 Tim. 2:3, 4). Aladi Gado no lobi ogridu, toku libisma warti gi en èn a no wani taki nowan fu den lasi den libi.​—2 Petr. 3:9.

Yehovah sabi taki Satan breni a frustan fu furu sma (2 Kor. 4:3, 4). A muilek gi den sma disi fu bribi den tru leri fu Bijbel fu di sensi den yongu, sma leri den lei fu Gado. Yehovah wani yepi den sma disi. Fa wi du sabi dati?

Luku fa Yehovah ben e denki fu den sma fu Ninefei. Aladi den sma disi ben e du furu ogri, toku Yehovah taigi Yona: „Mi no musu sari den sma fu a bigi foto Ninefei? Moro leki wán hondro tutenti dusun sma e tan drape nanga den furu osometi fu den. Den no sabi srefi san na den reti-anu èn san na den kruktu-anu” (Yona 4:11). Yehovah ben sari den Ninefeisma fu di den no ben sabi en. Dati meki a seni Yona fu warskow den.

Wi musu si sma neleki fa Yehovah e si den. Wi kan teki na eksempre fu Yehovah te wi e pruberi fu yepi ala sma, srefi efu a gersi leki den no o teki a tru anbegi.

Te sma no wani arki a boskopu fu wi, dan wi musu pruberi fu kon sabi fu san ede den no wani arki. Kande sonwan fu den e denki  takru fu Bijbel noso fu a Kresten bribi fu di den e si sortu ogri son sma e du aladi den e taki dati den na Kresten. Kande trawan yere lei fu wi. Noso a kan taki sonwan e frede taki famiri noso birtisma o spotu den efu den arki wi.

Son sma di wi e miti na ini a preikiwroko no wani arki wi fu di den miti sani di e hati den te nanga now. Wan zendeling sisa di nen Kim e taki: „Na ini wan pisi fu a kontren pe mi e preiki, furu sma lasi ala san den abi na ini wan feti. Den no abi howpu taki sani o go moro bun. Den e bruya èn den no e frutrow trawan. Na ini a kontren disi furu tron sma e pruberi fu tapu wi fu preiki. Wan leisi, den fon mi srefi.”

San e yepi Kim fu tan sori sari-ati gi sma di du ogri nanga en? A e taki: „Te sma e kosi mi, mi e hori Odo 19:11 na prakseri, pe skrifi: ’Koni fu man si sani krin e meki taki wan man en ati no e bron esi.’ Te mi e hori na prakseri san miti den sma na ini a kontren fu mi, dan dati e yepi mi fu abi sari-ati nanga den. Èn a no ala sma di wi e miti e rigeri nanga wi. Na ini a srefi kontren dati wi ben man go baka na sma di ben wani sabi moro.”

Wi musu aksi wisrefi: ’Mi ben o arki a Kownukondre boskopu efu mi ben de na ini a srefi situwâsi leki den sma di mi e preiki gi?’ Fu eksempre, san yu ben o du efu yu ben yere furu lei fu Yehovah Kotoigi? Kande yu no ben o wani arki den. Sobun, den ben o abi fu sori sari-ati gi yu tu. Yesus ben taki dati ala san wi wani taki sma du gi wi, wi musu du gi den tu. Sobun, srefi te a no makelek, wi musu pruberi fu frustan fa trawan e firi èn wi musu hori pasensi nanga den.​—Mat. 7:12.

Na apostel Paulus ben sori sari-ati gi sma, srefi te den ben wani du ogri nanga en. Fu san ede? Fu di a no ben frigiti fa ensrefi ben de. A e taki: „Fosifosi mi ben de wan sma di ben e taki ogri fu Gado, di ben e frufolgu sma èn di no ben abi syen. Ma toku a ben abi sari-ati nanga mi, fu di mi no ben sabi san mi ben e du èn mi ben e du den sani disi fu di mi no ben e bribi” (1 Tim. 1:13). A ben frustan taki Yehovah nanga Yesus ben sori sari-ati gi en. A kan taki te a ben luku son sma di a ben e preiki gi, dan a ben e denki fa a ben de fosi.

Son leisi Paulus ben e miti nanga sma di ben e bribi tranga na ini afkodrei. San a ben  e du? Na ini Tori fu den apostel 17:16 wi e leisi taki di Paulus ben de na ini Ateine „a no ben lobi en di a si taki a foto lai popki di sma ben anbegi leki gado”. Toku Paulus taki fu den srefi sani disi di a ben e preiki gi den sma (Tori 17:22, 23). A ben e kenki a fasi fa a ben e preiki, soso fu di a ben wani „du ala san de fanowdu fu frulusu sma, awinsi na wan tu nomo”.​—1 Kor. 9:20-23.

Te wi e preiki gi sma di no wani arki wi noso di e bribi falsi leri, wi kan du neleki Paulus. Wi kan gebroiki den sani di wi sabi fu den fu fruteri den „bun nyunsu fu wan moro bun sani” (Yes. 52:7). Wan sisa di nen Dorothy e taki: „Na ini a kontren fu wi, furu sma leri taki Gado e meki ogri-ati sani pasa èn taki a e krutu wi. Mi e taigi den sma taki mi breiti taki den e bribi na ini Gado. Baka dati mi e sori den taki Bijbel e leri taki Yehovah lobi wi èn taki a pramisi wi wan bun ten.”

Wi musu prakseri tu fa wi kan gi den brada nanga sisa deki-ati te wi e preiki makandra nanga den. Jessica e taki: „Efu wan fu wi ondrofeni wan sani di no switi, mi e pruberi fu no taki fu en langa. Na presi fu dati mi e taki fu den bun sani di wi e ondrofeni aladi a no ala sma wani arki wi.”

Yehovah sabi sortu muilek sani wi e ondrofeni te wi e preiki. A musu fu de so taki a e breiti te wi e sori sari-ati gi sma (Luk. 6:36). Ma wi sabi taki Yehovah no o tan sori sari-ati fu ala ten. Wi kan de seiker taki a o tyari a kaba kon na a yoisti ten. Ma wi musu hori na prakseri taki furu ten no de moro fu du a preikiwroko (2 Tim. 4:2). Sobun, meki wi tan du a wroko disi fayafaya èn meki wi tan sori sari-ati gi „ala sortu sma”.