1. Fu san ede wi kan taki dati ala sani na fu Yehovah? (Luku a prenki na a bigin fu na artikel.)

ALA sani na fu Yehovah! Na en abi „hemel nanga ala sani di de na hemel, èn grontapu nanga ala sani di de na grontapu” (Deut. 10:14; Openb. 4:11). Fu di Yehovah meki libisma, meki wi alamala na fu en tu (Ps. 100:3). Toku sensi a bigin, Yehovah teki son sma leki en spesrutu pipel.

2. Soleki fa Bijbel e sori, dan suma Yehovah teki leki en spesrutu pipel?

² Fu eksempre, Psalm 135 e taki dati den Israelsma di ben dini Yehovah nanga den heri ati ben de „a spesrutu gudu fu en” (Ps. 135:4). Boiti dati, Hosea ben taki na fesi taki sma di no ben de Israelsma ben o tron a pipel fu Yehovah (Hos. 2:23). A profeititori fu Hosea kon tru di Yehovah bigin teki sma di no ben de Dyu fu tiri makandra nanga Krestes na hemel (Tori 10:45; Rom. 9:23-26). Bijbel e kari den sma di salfu nanga santa yeye wan „santa pipel”. Den na a „spesrutu gudu” fu Yehovah (1 Petr. 2:9, 10). Ma fa a de nanga ala den reti-ati Kresten na ini a ten disi di abi a howpu fu libi fu têgo na grontapu? Yehovah e taki dati den na ’en pipel’ tu èn taki den na ’den wan di a teki’.​—Yes. 65:22.

3. (a) Suma na ini a ten disi Yehovah teki leki mati? (b) San wi o luku na ini na artikel disi?

 ³ Na ini a ten disi, a „pikin ipi” di abi a howpu fu libi na hemel nanga den „tra skapu” di abi a howpu fu libi na grontapu, e dini Yehovah makandra leki „wán ipi” (Luk. 12:32; Yoh. 10:16). Wi wani sori Yehovah taki wi de nanga tangi taki a gi wi a grani fu tron en mati. Na ini na artikel disi wi o si fa wi kan sori taki wi de nanga tangi gi a spesrutu grani disi.

4. San na wan fasi fa wi kan sori Yehovah taki wi de nanga tangi taki wi kan de en mati èn fa Yesus ben sori taki a ben de nanga tangi?

⁴ Wi e sori Yehovah taki wi de nanga tangi te wi e gi wisrefi abra na en èn e teki dopu. Te wi e teki dopu na ini watra, wi e meki ala sma sabi taki wi na fu Yehovah èn taki wi wani gi yesi na en (Hebr. 12:9). Yesus du a srefi sani di a ben teki dopu. Fu taki en leti, a taigi Yehovah: „Gado, mi prisiri fu du yu wani” (Ps. 40:7, 8). Yesus du disi, aladi a ben de fu wan pipel di ben gi densrefi abra na Yehovah kaba.

5, 6. (a) Fa Yehovah ben firi di Yesus teki dopu? (b) Fruteri wan agersitori di e yepi wi fu frustan fa Yehovah e firi te wi gi wisrefi abra na en.

⁵ Fa Yehovah ben firi di Yesus dopu? Bijbel e taki: „Di Yesus dopu, dan wantewante a opo komoto na a watra. Ne hemel opo èn Yohanes si Gado en yeye saka kon na Yesus tapu leki wan doifi. Boiti dati wan sten komoto na hemel. A taki: ’Disi na mi Manpikin, a lobiwan di mi feni bun’” (Mat. 3:16, 17). Aladi Yesus ben de fu Gado kaba, toku Yehovah ben breiti di Yesus sori taki a ben de klariklari fu dini En wawan. Yehovah breiti tu te wi e gi wisrefi abra na en èn dati meki a o blesi wi.​—Ps. 149:4.

⁶ Meki wi luku wan agersitori di kan yepi wi fu frustan a tori disi. Kon meki wi taki dati wan man prani furu moi bromki na ini en dyari. Wan dei a pikin meisje fu en e piki wan fu den bromki, dan a e tyari en gi en papa. A bromki ben de kaba fu a papa, a no so? Fa a meisje ben kan gi en papa wan sani di de fu a papa kaba? Wan papa di lobi en pikin noiti no ben o denki so. Na presi fu dati a ben o breiti nanga a kado di a meisje gi en. A kado disi e sori en taki a meisje fu en lobi en. A bromki di a papa kisi fu a meisje fu en abi moro waarde gi en leki den tra bromki na ini a dyari. Na so a de tu taki Yehovah breiti te wi e gi wisrefi abra na en.​—Eks. 34:14.

7. Fa Maleaki e yepi wi fu frustan fa Yehovah e si den sma di e dini en nanga den heri ati?

⁷ Leisi Maleaki 3:16. Efu yu no gi yusrefi abra na Yehovah ete èn efu yu no dopu, dan prakseri o prenspari a de fu du den sani disi. A tru taki sensi di yu gebore yu na fu Yehovah fu di na en meki yu. Ma prakseri fa Yehovah o breiti te yu e sori taki yu wani en leki yu Tiriman èn te yu gi yusrefi abra na en (Odo 23:15). Yehovah sabi den sma di e dini en nanga den heri ati èn a e skrifi den nen na ini „wan buku fu memre den”.

8, 9. San Yehovah e fruwakti fu den sma di nen de na ini a ’buku di a skrifi fu memre den’?

⁸ Efu wi wani taki Yehovah skrifi wi nen na ini a buku fu en, dan wi musu du wan sani. Maleaki taki dati wi musu ’abi lespeki gi Yehovah èn wi musu hori en nen na prakseri’. Efu wi ben o anbegi wan tra sma noso wan tra sani, dan  Yehovah o puru wi nen na ini a buku fu libi!​—Eks. 32:33; Ps. 69:28.

⁹ Sobun, te wi pramisi Yehovah taki wi o du a wani fu en èn wi teki dopu, dan dati a no ala. Den sani disi wi e du wán leisi nomo, ma wi heri libi langa wi musu anbegi Yehovah. Ibri dei fu wi libi wi musu sori taki wi e gi yesi na Yehovah.​—1 Petr. 4:1, 2.

10. Sortu difrenti musu de fu si na mindri den sma di e dini Yehovah èn den wan di no e dini en?

¹⁰ Na ini na artikel fosi a wan disi, wi poti prakseri na den eksempre fu Kain, Salomo nanga den Israelsma. Den alamala ben e taki dati den ben e dini Yehovah, ma toku den no tai hori na en. Den eksempre disi leri wi taki wi no musu taki nomo dati wi e anbegi Yehovah. Wi musu tegu gi ogri èn wi musu lobi san bun (Rom. 12:9). Yehovah taki dati sma ben o man ’si krin suma na wan reti-ati sma èn suma na wan ogri sma, suma e dini Gado èn suma no e dini en’.​—Mal. 3:18.

11. Fu san ede tra sma musu sabi taki wi e dini Yehovah wawan?

¹¹ Sobun, fu di wi de nanga tangi taki Yehovah teki wi leki en pipel, meki ’ala sma musu si’ taki wi teki a sei fu en (1 Tim. 4:15; Mat. 5:16). Aksi yusrefi: ’Ala sma man si taki mi e gi yesi na Yehovah nanga mi heri ati? Mi breiti fu meki tra sma sabi taki mi na wan Yehovah Kotoigi?’ Prakseri fa Yehovah ben o sari efu wi ben o syen fu taigi tra sma taki wi e dini en.​—Ps. 119:46; leisi Markus 8:38.

12, 13. Fa son sma meki en muilek gi trawan fu si efu den na Yehovah Kotoigi?

¹² Ma a de wan sari sani taki son Kotoigi e meki „a yeye fu grontapu” tiri den. Dati meki a no de krin fu si moro efu den e dini Gado noso efu den no e dini Gado (1 Kor. 2:12). A yeye fu grontapu e meki taki den e „du san a skin wani” (Ef. 2:3). Fu eksempre, aladi wi kisi so furu rai fu den krosi di wi e weri,  toku son sma e tan weri krosi di no fiti gi wan Kresten. Den e weri krosi di span èn di e sori furu fu den skin. Den e weri den krosi disi srefi te den e go na den Kresten konmakandra fu wi. Son sma e koti den wiwiri noso den e seti en na so wan fasi taki sma e poti tumusi furu prakseri na den noso den e gersi sma fu grontapu (1 Tim. 2:9, 10). Disi kan meki en muilek gi trawan fu si efu den na Yehovah Kotoigi noso grontapu sma.​—Yak. 4:4.

¹³ Son Kotoigi e du tra sani di e sori taki den no e difrenti fu grontapu. Fu eksempre, te den de na fesa, den e dansi na wan fasi di no fiti èn den e du tra sani di no fiti gi Kresten. Den e go tapu Internet fu poti fowtow fu densrefi nanga boskopu di e sori taki den abi a denki fu grontapu. Kande noiti den kisi piri-ai na ini a gemeente fu di den du wan seryusu sondu, ma toku den kan de takru kompe gi den brada nanga sisa di e meki tranga muiti fu no de leki grontapu.​—Leisi 1 Petrus 2:11, 12.

14. San wi musu du efu wi wani tan mati fu Yehovah?

¹⁴ Ala sani na ini grontapu e gi sma deki-ati fu poti prakseri na „a lostu fu a skin, a lostu fu den ai èn a prodo di wan sma e prodo nanga den gudu di a abi” (1 Yoh. 2:16). Ma wi musu de tra fasi fu di wi na fu Yehovah. Dati meki wi e kisi a rai fu ’kakafutu gi ogridu èn gi den lostu fu grontapu, fu libi nanga krin frustan, fu de reti-ati sma èn fu dini Gado fayafaya na ini a ten disi’ (Tit. 2:12). Ala san wi e du musu sori tra sma krin taki wi na fu Yehovah. A fasi fa wi e taki, den krosi fu wi, a fasi fa wi e moi wisrefi, a fasi fa wi e wroko èn srefi efu wi e nyan noso wi e dringi, sma musu man si krin taki wi na futuboi fu Yehovah.​—Leisi 1 Korentesma 10:31, 32.

15. Fu san ede wi musu sori lobi nanga switifasi gi wi Kresten brada nanga sisa?

¹⁵ Wi e sori taki wi de nanga tangi taki wi na mati fu Yehovah te wi e libi  bun nanga wi brada nanga sisa. Den na fu Yehovah tu. Efu wi no e frigiti a sani disi, dan ala ten wi o sori switifasi gi den èn wi o sori den taki wi lobi den (1 Tes. 5:15). Yesus ben taigi den bakaman fu en: „Na a fasi disi ala sma o sabi taki unu na mi disipel, te unu lobi makandra.”​—Yoh. 13:35.

16. San wan fu den wet di Gado ben gi den Israelsma e leri wi fu a lobi di Yehovah abi gi a pipel fu en?

¹⁶ Wan fu den wet di Gado ben gi den Israelsma kan yepi wi fu frustan o prenspari a de fu libi bun nanga brada nanga sisa fu a gemeente. Na ini a tempel fu Yehovah yu ben abi wrokosani di den Leifisma ben musu gebroiki soso gi na anbegi. A Wet ben sori krin fa den ben musu gebroiki den sani disi èn efu wan sma no ben hori ensrefi na den wet disi, a ben o kisi dedestrafu (Num. 1:50, 51). Efu Yehovah ben e broko en ede nanga a fasi fa sma ben e gebroiki den wrokosani na ini a tempel, dan a no de fu taki dati a e broko en ede moro nanga a fasi fa sma e libi nanga den futuboi fu en di e dini en nanga den heri ati! Fu sori o warti wi de gi en, a ben taki: „A sma di e fasi unu e fasi a popki fu mi ai.”​—Sak. 2:8.

17. San Yehovah sabi fu wi?

¹⁷ Maleaki taki dati Yehovah e ’poti prakseri èn a e arki’ a pipel fu en te den e taki nanga makandra (Mal. 3:16). Iya, Yehovah „sabi den sma di de fu en” (2 Tim. 2:19). A e si ala sani di wi e du èn a e yere ala sani di wi e taki (Hebr. 4:13). Te wi no e sori switifasi gi wi brada nanga sisa, dan Yehovah e si dati. Ma wi kan de seiker tu taki Yehovah e si te wi gi wi brada nanga sisa wan switikon, te wi e prati sani nanga den, te wi e gi den pardon èn te wi e sori switifasi gi den.​—Hebr. 13:16; 1 Petr. 4:8, 9.

18. Fa wi kan sori taki wi de nanga tangi taki Yehovah teki wi leki en pipel?

¹⁸ A no de fu taki dati wi wani sori Yehovah taki wi de nanga tangi taki wi na fu en. Wi sabi taki te wi gi wisrefi abra na en, dan dati na a moro koni bosroiti di wi kan teki. Awinsi wi e libi „na mindri den ogri sma fu a ten disi di e du kruktudu”, toku wi wani sorgu taki sma ’no feni fowtu na wi tapu’. Wi wani taki den si taki wi na ’sma di no e du nowan ogri èn di e skèin leti na ini a grontapu disi’ (Fil. 2:15). Wi no e du nowan sani di Yehovah no lobi (Yak. 4:7). Èn wi abi lobi nanga lespeki gi wi brada nanga sisa fu di den na fu Yehovah tu.​—Rom. 12:10.

19. Fa Yehovah e blesi den wan di de fu en?

¹⁹ Bijbel e taki: „Yehovah no o gowe libi a pipel fu en” (Ps. 94:14). Wi kan de seiker taki awinsi san e pasa, Yehovah o de nanga wi ala ten. Awinsi wi dede, a no sa frigiti wi (Rom. 8:38, 39). „Efu wi e libi, wi e libi gi Yehovah, èn efu wi e dede, wi e dede gi Yehovah. Fu dati ede, awansi wi e libi noso wi e dede, wi na fu Yehovah” (Rom. 14:8). Wi no man wakti a ten te Yehovah o gi den mati fu en di dede libi baka (Mat. 22:32). Nownow kaba wi e kisi furu blesi. Dati meki Bijbel e taki: „Koloku fu den sma di abi Yehovah leki Gado. Iya, koloku fu a pipel di a teki leki a gudu fu en.”​—Ps. 33:12.