1-2. (a) Fu san ede wi no musu skreki efu lanti tapu a wroko na ini a kondre pe wi e tan? (b) San wi o luku na ini na artikel disi?

NA INI a dienstyari fu 2018, moro leki 223.000 preikiman fu a bun nyunsu ben e libi na ini kondre pe lanti tapu a wroko fu wi noso pe wi no mag du son sani soleki preiki noso hori konmakandra. A sani disi no e fruwondru wi. Soleki fa wi leri na ini na artikel na fesi tru Kresten sabi taki den o kisi frufolgu (2 Tim. 3:12). Awinsi pe wi e libi lanti kan tapu a wroko fu wi sondro taki wi fruwakti dati, èn disi kan pasa esi-esi.

² Efu lanti bosroiti fu tapu a wroko na ini a kondre pe yu e tan, dan yu ben kan aksi yusrefi: ’Disi wani taki dati Gado no e blesi wi? Disi wani taki dati wi no o man dini Yehovah moro? Mi musu froisi go na wan tra kondre pe mi kan dini Gado fri?’ Na ini na artikel disi wi o piki den aksi disi. Wi o si tu fa wi kan tan dini Yehovah te lanti tapu a wroko fu wi èn san wi no musu du.

3. Soleki fa 2 Korentesma 11:23-27 e sori, dan sortu frufolgu na apostel Paulus kisi èn san wi e leri fu na eksempre fu en?

³ Te lanti tapu a wroko fu wi, dan kande wi o denki taki Gado no e blesi wi. Ma disi no de so. Te wi e kisi frufolgu dan disi no wani taki dati Yehovah no breiti nanga wi. Luku na eksempre fu na apostel Paulus. Gado ben breiti nanga en. A ben kisi a grani fu skrifi 14 fu den Kresten  Griki Buku fu Bijbel èn a ben de wan apostel gi den trakondre sma. Toku a ben kisi hebi frufolgu. (Leisi 2 Korentesma 11:23-27.) Na eksempre fu na apostel Paulus e leri wi taki son leisi Yehovah e gi pasi taki sma e frufolgu den anbegiman fu en di e tan gi yesi na en.

4. Fu san ede grontapu e teige wi?

⁴ Yesus ben sori fu san ede wi kan fruwakti taki wi o kisi frufolgu. A ben taki dati sma ben o teige wi fu di wi no de wan pisi fu grontapu (Yoh. 15:18, 19). Te sma e frufolgu wi, dan dati no wani taki dati Yehovah no e blesi wi. Na presi fu dati a e sori taki wi e du san bun!

5. Libisma man tapu wi fu dini Yehovah? Gi wan eksempre.

⁵ Nowan libisma man tapu wi fu dini na Almakti Gado Yehovah. Furu gensman pruberi a sani disi, ma den no ben man. Luku san pasa na a ten fu a Di Fu Tu Grontapufeti. Na ini furu kondre a pipel fu Gado ben e kisi hebi frufolgu. Boiti taki den Nazisma ben tapu a wroko fu Yehovah Kotoigi na ini Doisrikondre, a wroko fu wi ben tapu tu na ini Australia, Kanada nanga tra kondre. Ma luku san pasa. Di a feti bigin na ini 1939 yu ben abi 72.475 preikiman na heri grontapu. Ma na a kaba fu a feti na ini 1945 yu ben abi 156.299 preikiman. Fu di Yehovah ben blesi en pipel meki yu ben abi tu tron so furu preikiman!

6. Sortu bun sani kan pasa te wi e kisi frufolgu? Gi wan eksempre.

⁶ Te wi e kisi frufolgu, dan na presi taki wi e kon frede, a kan meki wi dini Yehovah nanga moro faya. Luku na eksempre fu wan trowpaar di ben abi wan pikin boi èn di ben libi na ini wan kondre pe lanti bosroiti fu tapu a wroko fu wi. Na presi taki den frede, a trowpaar disi bigin pionier. A frow libi en wroko srefi aladi a wroko ben pai bun. A masra taki dati di lanti tapu a wroko, moro sma ben wani kon sabi sani fu Yehovah Kotoigi. A bakapisi ben de taki a ben moro makelek fu bigin Bijbelstudie. Wan tra bun sani ben pasa tu fu di lanti ben tapu a wroko. Wan owruman na ini a srefi kondre taki dati furu sma di ben tapu fu dini Yehovah ben  bigin kon na den konmakandra baka èn den ben bigin preiki tu.

7. (a) San wi e leri fu Lefitikus 26:36, 37? (b) San yu o du te lanti tapu a wroko fu wi?

⁷ Den feanti fu wi e tapu a wroko fu wi fu di den wani taki wi kon frede fu dini Yehovah. Boiti taki den tapu a wroko, den kan panya lei fu na organisâsi, skowtu kan broko kon na ini wi oso, den kan tyari wi go na krutubangi noso den kan seni wi go na strafu-oso. Den e denki taki te wi yere taki wan tu brada nanga sisa de na strafu-oso, dan dati o tapu skreki gi wi. Efu wi bigin frede, dan dati kan meki taki wisrefi e tapu fu dini Yehovah. Ma wi no wani de leki den sma di kari na ini Lefitikus 26:36, 37. (Leisi en.) Noiti wi o kon frede so te taki wi no e du wi diniwroko moro, noso taki wi e stop fu dini Yehovah. Wi e frutrow tapu Yehovah èn wi no e meki sma bruya wi (Yes. 28:16). Wi e tan aksi Yehovah fu sori wi san wi musu du. Wi sabi taki efu a e horibaka gi wi, nowan libisma regering o man tapu wi fu dini wi Gado.​—Hebr. 13:6.

8-9. (a) Sortu bosroiti ibri Kresten o abi fu teki gi ensrefi noso gi en osofamiri? (b) San o yepi wan sma fu teki wan bun bosroiti?

⁸ Efu lanti tapu a wroko na ini a kondre pe yu e tan, dan kande yu e aksi yusrefi efu yu musu froisi go na wan tra kondre pe yu kan dini Yehovah fri. Disi na wan bosroiti di yu srefi musu teki. Nowan sma kan teki a bosroiti disi gi yu. Fosi yu teki so wan bosroiti a ben o bun fu luku san den Kresten na ini a ten fu den apostel ben du di sma ben frufolgu den. Baka di feanti ston Stefanus kiri, den disipel na ini Yerusalem froisi go na Yudea nanga Samaria. Trawan froisi go na Fenisia, Siprus nanga Antiokia di ben moro fara srefi (Mat. 10:23; Tori 8:1; 11:19). Ma yu kan luku tu san na apostel Paulus ben du di den Kresten bigin kisi frufolgu wan tra leisi. Paulus bosroiti fu tan na ini den kontren pe sma ben gens a preikiwroko, awinsi ogri ben kan miti en. A du dati fu di a ben wani preiki a bun nyunsu èn a ben wani gi den brada nanga sisa di ben libi na ini den foto dati deki-ati.​—Tori 14:19-23.

⁹ San den eksempre disi e leri wi? Na ini ibri osofamiri na edeman musu luku sortu bosroiti a o teki. Fosi a teki wan bosroiti a musu begi èn a musu hori a situwâsi fu en osofamiri na prakseri. A musu luku efu a ben o bun gi den fu froisi noso efu a ben o tyari takru bakapisi kon gi den. Na ini den sortu tori disi, ibri Kresten musu „tyari en eigi lai” (Gal. 6:5). Wi no mag krutu den bosroiti di trawan e teki.

10. Fa a bijkantoro nanga den owruman o yepi wi?

¹⁰ Fa wi kan tan dini Yehovah te lanti tapu a wroko fu wi? A bijkantoro o taigi den owruman na ini yu gemeente san na a moro bun fasi fu feni den buku fu wi, fu hori konmakandra èn fu preiki a bun nyunsu. Efu a bijkantoro no man miti nanga den owruman, dan den owruman o yepi yu nanga ala tra sma na ini a gemeente fu go doro nanga na anbegi fu wi. Den o gebroiki den rai na ini Bijbel èn na ini den buku fu wi fu sori wi san wi musu du.​—Mat. 28:19, 20; Tori 5:29; Hebr. 10:24, 25.

11. (a) Fu san ede yu kan de seiker taki yu o abi ala sani di de fanowdu fu tranga yu bribi? (b) San yu kan du fu kibri yu Bijbel nanga den tra buku fu wi?

 ¹¹ Yehovah pramisi taki a o gi den futuboi fu en ala san den abi fanowdu fu tranga den bribi (Yes. 65:13, 14; Luk. 12:42-44). Dati meki yu kan de seiker taki na organisâsi o gi yu ala sani di yu abi fanowdu fu horidoro. San yusrefi kan du? Te lanti tapu a wroko na ini yu kondre, dan suku wan bun presi fu kibri yu Bijbel nanga den tra buku fu wi. Noiti yu musu libi den warti sani disi na wan presi pe sma kan feni den makriki. Srefi na ini yu telefon noso tablet yu musu kibri den sani disi bun. Ibriwan fu wi musu du ala san wi man fu tranga wi bribi.

12. Fa den owruman kan seti den konmakandra na so wan fasi taki den no e hari sma prakseri?

¹² Wi o man hori konmakandra? Den owruman o seti sani so taki wi kan hori konmakandra na wan fasi di no e hari sma prakseri. Kande den o aksi yu fu kon makandra na ini moro pikin grupu èn a kan tu taki ten na ten den o kenki a yuru nanga a presi pe den konmakandra e hori. Yu kan yepi fu kibri den brada nanga sisa te yu e taki safri te yu e go na den konmakandra dati èn te yu e gowe baka. Kande den o aksi wi fu no weri zaal krosi.

13. San wi kan leri fu den brada nanga sisa di ben tan na ini Sovyet-Unie?

¹³ Na ini ibri kontren wi o abi fu luku san na a moro bun fasi fu preiki. Ma fu di wi lobi Yehovah èn wi lobi fruteri trawan fu a Kownukondre, meki wi o feni wan fasi fu preiki (Luk. 8:1; Tori 4:29). Emily B. Baran na wan historia skrifiman. Luku san a taki fu a fasi fa den Yehovah Kotoigi ben preiki na ini Sovyet-Unie: „Te lanti ben taigi den taki den no ben mag fruteri trawan fu a bribi fu den, dan den Kotoigi ben preiki gi den sma na ini den birti, den sma na wrokope èn gi den mati fu den. Te den ben seni den go na wrokoman-kampu fu di den ben preiki, dan den ben preiki gi den tra sma na ini a kampu.” Aladi lanti ben tapu a wroko, toku den brada nanga sisa na ini Sovyet-Unie no stop nanga a preikiwroko. Yu kan teki na eksempre fu den te lanti tapu a wroko na ini a kondre pe yu e tan.

14. Sortu warskow wi e kisi na ini Psalm 39:1?

¹⁴ Luku bun nanga den sani di yu e fruteri trawan. Te lanti tapu a wroko fu wi, dan wi musu frustan taki son leisi wi o abi fu „tan tiri” (Preik. 3:7). Sobun, wi musu luku bun taki wi no e meki sma kon sabi sani soleki den nen fu wi brada nanga sisa, den presi pe wi e hori konmakandra, a fasi fa wi e preiki èn pe wi e feni den  buku fu wi. Wi no o fruteri lanti den sani disi. Ma wi no o fruteri den mati noso den famiriman fu wi tu, awinsi den libi na ini a kondre fu wi noso na ini wan tra kondre. Efu wi ben o du a sani disi, dan wi kan meki taki ogri miti den brada nanga sisa fu wi.​—Leisi Psalm 39:1.

15. San Satan o pruberi fu du nanga wi èn fa wi kan sorgu taki a no kisi wi?

¹⁵ Wi no musu meki pikinpikin sani prati wi. Satan sabi taki sani no o go bun nanga wan osofamiri di prati (Mark. 3:24, 25). Dati meki ala ten a e pruberi fu tyari pratifasi kon na wi mindri. A e du dati fu di a e howpu taki wi o bigin feti nanga makandra na presi taki wi e feti teige en.

16. San wi e leri fu na eksempre fu Sisa Gertrud Poetzinger?

¹⁶ Srefi lepi Kresten musu luku bun taki a sani disi no miti den. Luku na eksempre fu Gertrud Poetzinger nanga Elfriede Löhr, tu sisa di ben de salfu Kresten. Den ben de na ini wan strafuman-kampu fu den Nazisma, makandra nanga tra sisa. Gertrud ben dyarusu tapu Elfriede fu di Elfriede ben hori moi lezing di ben gi den tra sisa na ini a kampu deki-ati. Bakaten Gertrud ben firi syen èn a aksi Yehovah fu yepi en. A sisa disi ben skrifi: „Wi musu leri taki trawan o man du sani moro bun leki wi èn taki den o kisi moro frantwortu.” San yepi en fu no dyarusu moro? Gertrud bigin poti prakseri na den bun fasi fu Elfriede èn na a fasi fa a ben sori switifasi. Disi yepi en fu tan bun mati nanga Elfriede. Den ala tu komoto libilibi na ini a strafuman-kampu èn den tan dini Yehovah te na a dede fu den. Efu wi e wroko tranga fu no meki problema prati wi, dan wánfasi o de na wi mindri.​—Kol. 3:13, 14.

17. Fu san ede wi musu hori wisrefi na den rai di wi e kisi fu Yehovah organisâsi?

¹⁷ Ala ten wi musu du san den brada e taigi wi. Efu wi e du san den brada di e teki fesi e taigi wi, dan wi no o kisi problema (1 Petr. 5:5). Fu eksempre, na ini wan kondre pe a wroko fu wi ben tapu, den brada di ben teki fesi ben seti sani so taki den preikiman ben kan du okasi preiki. Ma den ben taigi den taki den no ben musu libi den tijdschrift fu wi gi sma. Toku wan brada di ben pionier no arki a rai disi èn a libi tijdschrift gi den sma. San ben de a bakapisi? Syatu baka di en nanga wan tu trawan kaba preiki, skowtu kon na den. A sori leki lanti ben seni wan sma fu waka na den baka, èn a sma dati ben feni den tijdschrift di a ben libi gi den sma. San na ondrofenitori disi e leri wi? Wi musu du san den brada e taigi wi, srefi  efu wi feni taki a rai fu den no bun. Yehovah o breiti te a e si taki wi e horibaka gi den brada di a poti fu teki fesi.​—Hebr. 13:7, 17.

18. Fu san ede wi no musu meki wan lo wet gi den brada nanga sisa, te dati no de fanowdu?

¹⁸ No meki wet di no de fanowdu. Efu owruman e meki wet di no de fanowdu, dan den o meki sani moro muilek gi den brada nanga sisa. Brada Juraj Kaminský e memre ete san ben pasa baka di lanti tapu a wroko na ini a kondre di ben nen Tyeko-Slowâkia fosi. A taki: „Baka di den sroto furu fu den owruman, den brada di ben tan abra fu teki fesi bigin meki den eigi wet gi den preikiman. Den bigin meki wan lo wet fu sani di den ben musu du èn fu sani di den no ben musu du.” Yehovah no gi wi a frantwortu fu meki wet gi den brada nanga sisa. Wan sma di e du a sani disi, no e kibri den brada nanga sisa. Na presi fu dati a e pruberi fu tron a basi fu a bribi fu den.​—2 Kor. 1:24.

19. Awinsi san Satan e du, sortu deki-ati wi e kisi na ini 2 Kroniki 32:7, 8?

¹⁹ Satan Didibri, a moro bigi feanti fu wi, o tan frufolgu den anbegiman fu Yehovah (1 Petr. 5:8; Openb. 2:10). Satan nanga den bakaman fu en o pruberi fu tapu wi fu dini Yehovah. Ma awinsi wi e frede wi o tan dini Yehovah! (Deut. 7:21) Yehovah de nanga wi èn a o tan horibaka gi wi te lanti tapu a wroko fu wi.​—Leisi 2 Kroniki 32:7, 8.

20. Sortu bosroiti yu teki?

²⁰ Meki wi teki na eksempre fu den Kresten na ini a ten fu den apostel di ben taki: „Na unu srefi musu sabi efu Gado feni en bun taki wi e arki unu na presi fu en. Ma wi no man tapu fu taki fu den sani di wi si èn di wi yere.”​—Tori 4:19, 20.