1. Sortu kenki kon na ini son kondre na ini den yari di pasa?

DUSUNDUSUN yari langa, furu sma na grontapu ben e go na kerki. Ma na ini a ten di pasa wan bigi kenki kon ini a sani disi. Moro nanga moro sma no e go na kerki. Fu taki en leti, na ini son kondre furu sma no de fu wan kerki. *​—Mat. 24:12.

2. Fa a du kon taki son sma no e go na kerki moro?

² Fu san ede moro nanga moro sma e taki dati den no de fu wan kerki? * A kan taki sonwan fu den e suku fu abi soso prisiri noso den abi furu broko-ede (Luk. 8:14). Son sma di ben e go na kerki fosi e taki now taki den no e bribi moro na ini Gado. Tra sma e bribi na ini Gado, ma den feni taki na ini a ten disi a no de fanowdu fu go na kerki èn taki kerkileri no e kruderi nanga sani di sabiman kon sabi. Kande den e yere fa mati, leriman na skoro noso sma tapu telefisi e taki dati a libi kon fu ensrefi. Ma den no e yere furu sma e taki fu buweisi di e sori taki wan Gado de trutru. Tra sma no lobi den kerki fesiman srefisrefi fu di den gridi gi moni èn gi makti. Na ini son kondre, lanti meki wet di e tapu kerki fu du son sani.

3. Fa na artikel disi o yepi wi?

³ Yesus taki dati wi musu „go na sma fu ala kondre èn meki den tron disipel” (Mat. 28:19). Fa wi kan yepi sma di  no e bribi na ini Gado fu kon lobi Gado èn fu tron disipel fu Krestes? Wi musu hori na prakseri taki a fasi fa wan sma kweki kan meki taki a arki wi boskopu, noso taki a no arki. Fu eksempre, sma fu Europa e denki heri tra fasi fu a boskopu fu wi leki den sma fu Asia. Fu san ede? Fu di na ini Europa sma sabi Bijbel èn furu fu den leri taki na Gado meki ala sani. Ma na ini Asia, furu sma no sabi noti fu Bijbel èn den no e bribi na ini wan Mekiman. Na ini na artikel disi wi o si fa wi kan doro na ati fu ala sma di wi e miti na ini a preikiwroko, awinsi fu pe den komoto noso awinsi san den e bribi.

4. Fu san ede wi no musu denki taki sma no man kenki?

⁴ No denki taki sma no man kenki. Ibri yari sma di no ben e bribi na ini Gado e tron Yehovah Kotoigi. Furu fu den ben e tyari densrefi kaba na wan fasi di fiti èn den no ben wani abi noti fu du nanga den kerki fesiman di e hoigri. Trawan no ben e libi bun èn furu fu den ben musu tapu nanga takru gwenti. Ma Yehovah kan yepi wi fu feni den sma di „abi a yoisti denki fu man kisi têgo libi”.​—Tori 13:48; 1 Tim. 2:3, 4.

5. San e meki taki sma arki a boskopu fu wi nofo tron?

⁵ Abi switifasi èn taki na wan lespeki fasi. Nofo tron a no den sani di wi e taki e meki sma arki wi, ma na a fasi fa wi e taki nanga den. Den lobi en te wi e sori switifasi nanga lespeki gi den èn te wi e sori taki wi e broko wi ede nanga den. Wi no e dwengi den fu arki wi. Na presi fu dati, wi e pruberi fu frustan fa den e denki fu Gado èn fu san ede den e denki so. Fu eksempre, son sma no lobi taki fu Gado nanga sma di den no sabi. Tra sma feni taki yu no e sori lespeki gi den te yu e aksi den fa den e denki fu Gado. Son sma e syen te sma o si taki den e leisi Bijbel, spesrutu nanga Yehovah Kotoigi. Awinsi fa wan sma de, wi musu pruberi fu frustan fa a e firi.​—2 Tim. 2:24.

6. Fa na apostel Paulus ben e fiti ensrefi na sma èn fa wi kan teki na eksempre fu en?

⁶ San wi kan du efu a gersi leki wan sma no lobi en taki wi e gebroiki den wortu „Bijbel”, „Gado”, noso „kerki”? Neleki na apostel Paulus, wi e pruberi fu kenki a fasi fa wi e taki nanga den. Te Paulus ben e taki nanga Dyu, a ben e gebroiki Gado Wortu. Ma di a ben e taki nanga den Griki filosofiaman na a Areopagus, a no taigi den taki den sani di a ben e taki ben komoto fu Bijbel (Tori 17:2, 3, 22-31). Fa wi kan teki na eksempre fu Paulus? Efu yu e miti wan sma di no e bribi na ini Bijbel, dan a ben o bun fu no taigi en taki den sani di yu e taki komoto fu Bijbel. Efu yu e si taki wan sma no wani taki trawan si taki a e leisi Bijbel nanga yu, dan kande yu kan leisi komoto fu yu tablet noso cellulair. Na so wan fasi sma no o si taki na Bijbel unu e leisi.

7. Efu wi wani de leki Paulus soleki fa skrifi na 1 Korentesma 9:20-23, dan san wi musu du kande?

⁷ Arki bun èn pruberi fu frustan a sma. Wi musu pruberi fu frustan fu san ede sma abi son denki (Odo 20:5). Luku na eksempre fu Paulus baka. A ben de wan Dyu. Sobun, a ben musu leri preiki gi sma di no ben abi a Dyu bribi èn di no ben sabi noti fu Yehovah nanga a Wortu fu en. Efu wi wani frustan fa den sma na ini wi kontren e denki, dan kande wi musu ondrosuku sani na ini den buku fu wi èn taki nanga brada nanga sisa di e  preiki langa kaba.​—Leisi 1 Korentesma 9:20-23.

8. San na wan fasi fa wi kan taki nanga sma fu Bijbel?

⁸ Wi kisi a wroko fu suku sma di „warti” (Mat. 10:11). Efu wi wani doro sma ati, dan wi musu aksi den fa den e denki èn wi musu arki bun. Wan brada na ini Ingrisikondre e aksi sma fa den e denki taki sma kan abi wan koloku trowlibi, fa den kan kweki pikin noso san sma kan du te trawan no e libi bun nanga den. Baka te a arki den, a e taki: „Fa yu feni a rai disi di skrifi pikinmoro 2000 yari pasa?” Dan sondro fu gebroiki a wortu „Bijbel”, a e sori en wan tekst na tapu en telefon di fiti a tori dati.

9. San na wan fasi fa wi kan yepi sma di no lobi taki fu Gado?

⁹ Efu wan sma no lobi taki fu Gado, dan toku wi kan doro en ati te wi e taki fu tra sani di a lobi. Son sma lobi luku den meti. Sobun, wi ben kan taki: „Kande yu sabi taki te sabiman e meki nyun sani, dan den e luku fa den meti meki. Fu eksempre den sma di e meki mikrofon, e ondrosuku den yesi fu meti èn den sma di e meki camera, e ondrosuku den ai fu den meti. San yu e denki? Suma meki a yesi nanga na ai?” Baka te yu arki san a sma taki, dan yu kan taki: „Te sabiman e ondrosuku a fasi fa na ai nanga yesi meki, dan fu suma den e leri? Mi lobi a sani disi di wan puwema-skrifiman ben skrifi: ’Unu denki taki a sma di meki a yesi, no man yere? Noso unu denki taki a sma di meki na ai, no man si? Na en e gi sma leri.’ Son sabiman e agri nanga den wortu disi èn den e bribi na ini wan Mekiman” (Ps. 94:9, 10). Baka dati wi kan sori en wan felem fu JW Broadcasting^®. (Go na FELEM DI YU WANI LUKU > INTERVIEW NANGA ONDROFENITORI > FA A LIBI DU KON.) Noso wi kan gi en a brochure Is het leven geschapen? noso a brochure Vijf belangrijke vragen over het ontstaan van het leven.

10. San na wan tra fasi fa wi kan bigin wan takimakandra nanga sma di no lobi taki fu Gado?

¹⁰ Furu sma wani taki sani go moro bun na ini a ten di e kon. Ma den e frede taki grontapu o kisi pori noso taki wi no o man tan na en tapu moro. Wan kring-opziener fu Noorwegen e taki dati sma di no lobi taki fu Gado, de klariklari fu taki fu den  sani di e pasa na grontapu. Baka te a gi den sma odi, a e aksi den: „Yu denki taki sani o go moro bun na ini a ten di e kon? Wi musu frutrow tapu politiekman, sabiman, noso wan tra sma?” Baka te a kring-opziener arki bun san den sma taki, a e leisi wan Bijbeltekst di e sori sortu moi sani o pasa na ini a ten di e kon, noso a e taki san skrifi na ini Bijbel. Son sma lobi den pramisi fu Bijbel di e taki dati grontapu o tan fu ala ten èn taki bun sma o libi na en tapu fu têgo.​—Ps. 37:29; Preik. 1:4.

11. Fu san ede wi musu suku difrenti fasi fu bigin takimakandra nanga sma di wi e miti èn fa wi kan teki na eksempre fu Paulus soleki fa skrifi na Romesma 1:14-16?

¹¹ Wi musu suku difrenti fasi fu bigin takimakandra nanga sma di wi e miti. Fu san ede? Fu di ala sma de tra fasi. Wan sma kan lobi taki fu wan tori, ma kande wan tra sma no lobi fu taki fu a tori dati srefisrefi. Son sma no abi problema fu taki fu Gado noso Bijbel, ma trawan wani taki fu tra sani. Ma awinsi suma wi miti, wi musu pruberi fu taki nanga en. (Leisi Romesma 1:14-16.) Wi musu hori na prakseri taki na Yehovah e yepi reti-ati sma fu frustan den tru tori fu Bijbel.​—1 Kor. 3:6, 7.

12. San wi kan du fu yepi den sma fu Asia di no prakseri srefi efu wan Mekiman de?

¹² Na heri grontapu preikiman e miti nanga sma di no e bribi taki wan tru Gado de noso di komoto na ini kondre pe lanti no e gi pasi taki sma anbegi Gado fri. Na ini son kondre fu Asia, furu sma noiti no prakseri srefi efu wan Mekiman de trutru. Fu di sonwan fu den wani sabi moro, meki den de klariklari fu studeri Bijbel te wi aksi den. Ma trawan e tweifri fu studeri nanga wi fu di den no gwenti nanga den leri fu Bijbel. Fa wi kan yepi den sma disi? Son preikiman di abi furu ondrofeni kon si taki a bun fu bigin taki nanga den fu tra tori èn fu sori taki yu e broko yu ede nanga den. Èn efu a fiti, den preikiman e fruteri den fa den eigi libi kon moro bun fu di den du san Bijbel e taki.

13. San kan yepi sma fu wani sabi moro fu Bijbel? (Luku a fowtow tapu a kafti.)

¹³ Furu sma lobi den koni rai fu Bijbel di e sori fa wi musu libi (Preik. 7:12). Wan sisa na ini New York e preiki gi sma di e taki Sneisitongo. A sisa e taki: „Mi e pruberi fu kon sabi moro fu den èn mi e arki den. Efu mi kon sabi taki den komoto fu wan tra kondre no so langa pasa, dan mi e aksi den: ’Yu kon gwenti a kondre kaba? Yu feni wan wroko? Den sma dya e libi bun nanga yu?’” Son leisi disi e gi en na okasi fu sori den sma san Bijbel e leri. Efu a fiti, a sisa e taki tu: „San yu denki na a moro prenspari sani di wi musu du fu feni en nanga sma? Mi kan sori yu wan moi odo fu Bijbel? Na odo e taki: ’A bigin fu trobi de leki te wan sma e libi watra meki a lon. Sobun, fosi wan trobi bigin, gowe fu drape.’ Yu denki taki a rai disi kan yepi wi fu feni en nanga sma?” (Odo 17:14) Den sortu takimakandra disi kan yepi wi fu feni sma di wani sabi moro.

14. Fa wan brada na ini Asia e yepi sma di e taki dati den no e bribi na ini Gado?

¹⁴ San wi kan du te sma e taigi wi taki den no e bribi na ini Gado? Wan brada na ini Asia di gwenti preiki gi den sortu sma disi, e taki: „Te wan sma e taki dati a no e bribi na ini Gado, dan nofo tron dati wani taki dati a no e bribi na ini den gado di sma na ini a kontren e anbegi. Dati meki furu tron mi e taigi den taki mi srefi e  agri taki furu fu den gado na gado di libisma meki èn den a no trutru gado. Mi lobi leisi Yeremia 16:20 gi den. Drape skrifi: ’Libisma e meki gado, ma den gado dati na noti.’ Baka dati mi e aksi den: ’Fa yu kan sabi sortuwan fu den gado na wan trutru gado?’ Mi e arki bun san den e piki, èn baka dati mi e leisi Yesaya 41:23, pe skrifi: ’Fruteri wi den sani di o pasa bakaten, so taki wi kan sabi taki unu na gado.’ Dan mi e sori den wan sani di Yehovah taki na fesi èn fa dati kon tru.”

15. San wi kan leri fu na eksempre fu a brada di e tan na a owstusei fu Asia?

¹⁵ Luku san wan brada di e tan na a owstusei fu Asia e du te a e tyari gobaka. A e taki: „Mi e sori den sma sortu koni rai Bijbel abi, mi e sori den profeititori di kon tru èn mi e taki fu sani soleki den stari nanga planeiti. Dan mi e sori den fa ala den sani disi e sori taki wan koni Mekiman de. Te wan sma e bigin prakseri taki a kan taki wan Gado de trutru, dan mi e sori en san Bijbel e taki fu Yehovah.”

16. Soleki fa Hebrewsma 11:6 e sori, dan fu san ede den Bijbelstudie musu abi bribi na ini Bijbel èn na ini Gado, èn fa wi kan yepi den?

¹⁶ Te wi e studeri Bijbel nanga sma di no e bribi na ini Gado, dan wi musu tan yepi den fu kon abi wan moro tranga bribi na ini Gado. (Leisi Hebrewsma 11:6.) Wi musu yepi den tu fu bribi na ini Bijbel. Fu man du disi, dan kande wi o abi fu taki fu son leri omeni leisi. Kande ibri leisi te wi e studeri nanga den, wi o abi fu taki fu difrenti sani di e sori taki Bijbel na Gado Wortu. Wi kan taki fu Bijbel profeititori di kon tru, fu tori na ini Bijbel di e kruderi nanga sani di sabiman kon sabi, wi kan sori en taki den tori na ini Bijbel pasa trutru, noso wi kan sori en fa Bijbel kan yepi wi na ini wi libi.

17. San o de a bakapisi te wi e sori lobi gi sma?

¹⁷ Efu wi wani yepi sma fu tron disipel fu Krestes, dan wi musu sori taki wi lobi den, awinsi den no e bribi na ini Gado (1 Kor. 13:1). Te wi e gi den leri, dan wi musu sori den taki Gado lobi wi èn taki a wani taki wi lobi en tu. Ibri yari dusundusun sma di no ben e bribi na ini Gado e dopu, fu di den leri fu lobi Gado. Sobun, no denki taki sma no man kenki. Sori lobi gi ala sortu sma èn meki den si taki yu e broko yu ede nanga den. Arki den èn pruberi fu frustan fa den e firi. Te yu de wan bun eksempre gi den, dan yu o yepi den fu tron disipel fu Krestes.