1. Fu san ede wi musu sreka wisrefi gi frufolgu?

YESUS ben sabi taki sma ben o teige ala sma di ben o tron wan disipel fu en. Dati meki a neti fosi den kiri en, a warskow den disipel gi a sani disi (Yoh. 17:14). Te nanga now, sma di no e dini Yehovah e frufolgu den Kotoigi fu en (2 Tim. 3:12). Fu di a kaba fu a grontapu disi e kon krosibei, meki wi kan fruwakti taki den feanti fu wi o gens wi moro.​—Mat. 24:9.

2-3. (a) Fu san ede a no bun fu frede? (b) San wi o luku na ini na artikel disi?

² Fa wi kan sreka wisrefi gi frufolgu? A no de fanowdu fu sidon prakseri sortu sani ben kan miti wi. Efu wi e du dati, dan wi kan kon frede èn wi kan bruya. Wi kan kon frede so te, taki wi e stop dini Yehovah, fosi wi kisi tesi srefi (Odo 12:25; 17:22). ’Didibri, a feanti fu wi’ wani taki wi kon frede fu di dati kan meki taki wi gowe libi Yehovah (1 Petr. 5:8, 9). San wi kan du now fu tranga wi bribi?

³ Na ini na artikel disi wi o luku fa wi kan kon abi wan moro bun matifasi nanga Yehovah èn fu san ede a prenspari fu du dati now. Wi o luku tu san wi kan du fu kon abi moro deki-ati. Èn leki lasti, wi o luku san wi kan du te sma e gens wi.

4. Soleki fa Hebrewsma 13:5, 6 e sori, dan fu sortu sani wi musu de seiker èn fu san ede disi prenspari?

⁴ Yu musu abi a frutrow taki Yehovah lobi yu èn taki a no o gowe libi yu noiti. (Leisi Hebrewsma 13:5, 6.) Furu yari  pasa, A Waktitoren ben taki: „Wan sma di sabi Gado bun o frutrow na en tapu spesrutu te a e kisi tesi.” A sani disi tru! Efu wi wani horidoro te wi e kisi tesi, dan wi musu lobi Yehovah, wi musu frutrow na en tapu èn noiti wi musu tweifri taki Yehovah lobi wi.​—Mat. 22:36-38; Yak. 5:11.

5. San o yepi yu fu firi taki Yehovah lobi yu?

⁵ Leisi Bijbel ala dei fu kan tron wan moro bun mati fu Yehovah (Yak. 4:8). Te yu e leisi Bijbel, dan poti prakseri na den moi fasi fu Yehovah. Pruberi fu si o furu Yehovah lobi yu te yu e leisi san a taki èn san a du (Eks. 34:6). A muilek gi son sma fu bribi taki Gado lobi den fu di noiti wan sma sori lobi gi den. Efu yu e firi so, dan skrifi ala dei fa Yehovah sori sari-ati nanga switifasi gi yu (Ps. 78:38, 39; Rom. 8:32). Te yu e prakseri fa Yehovah yepi yu èn te yu e denki dipi fu san yu leisi na ini Gado Wortu, dan yu o si taki Yehovah du furu sani gi yu. Te yu e kisi moro warderi gi den sani di Yehovah e du, dan yu o kon abi wan moro bun matifasi nanga en.​—Ps. 116:1, 2.

6. Soleki fa Psalm 94:17-19 e sori, dan san o de a bakapisi te wi e begi Yehovah fayafaya?

⁶ Begi doronomo. Prakseri fa wan boi e firi te en papa e brasa en hori. A no e frede fu taigi en papa san miti en a dei dati. A e fruteri en den bun sani di pasa nanga en, ma a e fruteri en tu sortu sani no go bun. Yu kan abi a srefi sortu matifasi nanga Yehovah te yu e begi ibri dei. (Leisi Psalm 94:17-19.) Te yu e begi Yehovah, taigi en „ala san de na tapu yu ati” èn fruteri yu lobi Papa san e meki yu frede èn sortu broko-ede yu abi (Sari 2:19). San o de a bakapisi? ’A freide fu Gado di bigi moro iniwan sani di libisma man frustan, o kibri yu ati nanga yu frustan’ (Fil. 4:6, 7). Te yu e begi na a fasi disi, dan yu o kon moro krosibei na Yehovah.​—Rom. 8:38, 39.

7. Fu san ede yu musu abi na overtoigi taki Gado Kownukondre o tyari blesi kon gi wi?

⁷ Abi na overtoigi taki Gado Kownukondre o tyari blesi kon (Num. 23:19). Efu yu bribi na ini den pramisi fu Yehovah swaki, dan a o moro makriki gi Satan nanga den bakaman fu en fu tapu skreki gi yu (Odo 24:10; Hebr. 2:15). San yu kan du now fu tranga yu bribi na ini Gado Kownukondre? Meki ten fu studeri san Gado Kownukondre o du èn fu tranga yu bribi na ini den pramisi fu Gado. Fa dati o yepi yu? Luku na eksempre fu Stanley Jones, di ben de na strafu-oso seibi yari langa fu di a ben e dini Yehovah. San yepi en fu no drai baka gi Yehovah? A taki: „Den sani di mi ben e bribi fu Gado Kownukondre ben e gi mi krakti, èn dati meki mi no ben tweifri nowan momenti. Iya, nowan sma ben man meki mi gowe libi Yehovah!” Efu yu abi wan tranga bribi na ini den pramisi  fu Yehovah, dan yu o kon moro krosibei na en. Yu no o frede nowan sani èn yu no o stop dini en.​—Odo 3:25, 26.

8. Fu san ede a prenspari fu abi a gwenti now fu go na den konmakandra? Tyari disi kon na krin.

⁸ Go doronomo na den gemeente konmakandra. Den konmakandra e yepi wi fu kon moro krosibei na Yehovah. A muiti di wi e meki fu go na den konmakandra e sori efu wi o man horidoro te wi o kisi frufolgu na ini a ten di e kon (Hebr. 10:24, 25). Fu san ede wi kan taki dati? Efu wi e meki pikinpikin sani tapu wi fu go na den konmakandra now, dan san wi o du efu lanti no wani taki wi kon makandra nanga wi brada nanga sisa na ini a ten di e kon? Efu wi e meki muiti fu go na ala den konmakandra now, dan wi no o meki gensman tapu wi fu kon makandra. Now na a ten fu kon abi lobi gi den konmakandra. Te wi lobi go na den konmakandra, dan awinsi sma e gens wi èn awinsi lanti tapu a wroko fu wi srefi, wi o tan gi yesi na Gado na presi fu libisma.​—Tori 5:29.

9. Fu san ede a bun fu leri Bijbeltekst na ede?

⁹ Pruberi fu leri den Bijbeltekst di yu lobi na ede (Mat. 13:52). Kande yu no man memre ala sani bun, ma Yehovah kan gebroiki en santa yeye fu yepi yu fu memre den Bijbeltekst dati (Yoh. 14:26). Di wan brada ben de na strafu-oso na ini Owstu Doisrikondre, den ben poti en wawan na ini wan kamra. A brada disi taki: „Mi ben breiti trutru taki mi ben leri moro leki tu hondro Bijbeltekst na ede! A heri pisi ten di mi ben de drape, mi ben kan prakseri dipi fu difrenti Bijbel tori.” Den tekst dati yepi wi brada fu tan krosibei na Yehovah èn fu horidoro.

10. Fu san ede wi musu leri den singi fu wi na ede?

¹⁰ Singi gi Yehovah èn leri den singi disi na ede. Di Paulus nanga Silas ben de na strafu-oso na ini Filipi, den ben prèise Yehovah nanga singi di den ben sabi na ede (Tori 16:25). Wan srefi sortu sani ben miti den brada nanga sisa fu Sovyet-Unie. San ben yepi den fu horidoro di lanti seni den leki strafuman go na Siberia? Sisa Mariya Fedun e taki: „Wi ben e singi ala den singi di wi ben sabi, dati na den singi fu a singibuku.” A sisa taki dati den singi disi gi den alamala deki-ati èn den yepi den fu kon moro krosibei na Yehovah. A e gi yu deki-ati te yu e singi den singi fu wi singibuku  èn fu wi website? Efu dati de so, dan meki muiti now fu leri den singi disi na ede!​—Luku a faki „ Gi mi deki-ati”.

11-12. (a) Soleki fa 1 Samuel 17:37, 45-47 e sori, dan fu san ede David ben abi deki-ati? (b) Sortu prenspari sani wi e leri fu na eksempre fu David?

¹¹ Yu musu abi deki-ati fu man horidoro te yu e kisi frufolgu. Efu yu feni taki yu no abi nofo deki-ati, san yu kan du? Hori na prakseri taki a no te yu bigi, te yu tranga noso te yu man du sani bun, dan yu abi trutru deki-ati. Prakseri a tori fu yongu David di ben go feti nanga Goliat. David ben pikin moro Goliat, a ben moro swaki èn a no ben abi so furu fetisani. David no ben abi wan feti-owru srefi. Toku a ben abi furu deki-ati. Sondro fu frede, David lon go miti a bigiskin man dati di ben abi heimemre.

¹² Fa a du kon taki David ben abi so furu deki-ati? A ben abi wan tranga bribi na ini Yehovah. (Leisi 1 Samuel 17:37, 45-47.) David no ben luku taki Goliat ben bigi moro en. Na presi fu dati, a ben sabi taki Yehovah ben bigi moro Goliat. San wi e leri fu a tori disi? Wi o abi deki-ati te wi abi a frutrow taki Yehovah de nanga wi èn te wi sabi taki wi Almakti Gado bigi moro den feanti fu wi (2 Kron. 20:15; Ps. 16:8). San wi musu du now fu kon abi moro deki-ati?

13. Fa wi kan kon abi moro deki-ati? Fruklari dati.

¹³ Wi kan kon abi moro deki-ati now te wi e preiki a bun nyunsu fu Gado Kownukondre. Fu san ede wi kan taki dati? Fu di te wi e preiki, dan wi e leri fu frutrow na Yehovah tapu èn fu no frede gi libisma (Odo 29:25). Neleki fa den titei fu wi skin e kon moro tranga te wi e oefen den, na so wi o kon abi moro deki-ati te wi e preiki oso fu oso, te wi e preiki na presi pe furu sma de, na ini bisnis kontren èn na tra okasi. Efu wi e meki muiti now fu preiki nanga deki-ati, dan wi o tan preiki srefi te lanti tapu a wroko fu wi.​—1 Tes. 2:1, 2.

14-15. San wi kan leri fu Nancy Yuen nanga Valentina Garnovskaya?

¹⁴ Wi kan leri furu fu na eksempre fu tu sisa di ben abi furu deki-ati. Nancy Yuen ben de wan syatu sisa, ma sma no ben  man tapu skreki gi en. * A no meki nowan sma tapu en fu preiki a bun nyunsu fu Gado Kownukondre. Dati meki den poti en na strafu-oso sowan 20 yari langa na ini China. Den skowtu di ben e poti wan lo aksi gi a sisa disi taki dati a ben de „wan fu den moro tranga-ede sma” na ini a heri kondre.

¹⁵ Sisa Valentina Garnovskaya ben de na strafu-oso tu na ini a Sovyet-Unie. Dri leisi den sroto en èn ala nanga ala a ben de na strafu-oso 21 yari langa. * Fu san ede den ben sroto en? Fu di a ben de nomonomo fu preiki a bun nyunsu. Dati meki den skowtu taki dati en na wan „bigi ogriman”. Fa a du kon taki den tu sisa disi ben abi so furu deki-ati? Den ben abi na overtoigi taki Yehovah ben de nanga den.

16. San o gi wi trutru deki-ati?

¹⁶ Soleki fa wi si kaba, dan efu wi wani abi deki-ati, dan wi no musu frutrow tapu wi eigi krakti nanga koni. Na presi fu dati wi musu bribi taki Yehovah de nanga wi èn taki na en e feti gi wi (Deut. 1:29, 30; Sak. 4:6). Na dati o gi wi trutru deki-ati.

17-18. Sortu warskow Yesus gi wi na Yohanes 15:18-21? Tyari disi kon na krin.

¹⁷ Wi lobi te sma e lespeki wi, ma wi no musu denki taki wi no warti noti efu sma no lobi wi. Yesus ben taki: „Koloku fu unu te sma no lobi unu kwetikweti, te den e yagi unu, te den e gi unu porinen, èn te den e taki wan lo ogri fu unu fu di unu na bakaman fu a Manpikin fu libisma” (Luk. 6:22). San Yesus ben wani taki nanga disi?

¹⁸ Yesus no ben wani taki dati Kresten musu lobi en te sma e teige den. Na presi fu dati, a ben e warskow wi gi san ben o pasa nanga wi. Wi no de wan pisi fu grontapu. Wi e gi yesi na den leri fu Yesus èn wi e preiki a srefi boskopu di en ben e preiki. Dati meki grontapu e teige wi. (Leisi Yohanes 15:18-21.) Wi wani plisi  Yehovah. Efu libisma e teige wi fu di wi lobi wi Papa, dan wi no e lasi-ati.

19. Fa wi kan teki na eksempre fu den apostel?

¹⁹ Awinsi san sma e taigi yu noso awinsi san den e du nanga yu, noiti yu musu syen taki yu na wan Yehovah Kotoigi (Mika 4:5). Te wi e luku san den apostel na ini Yerusalem du syatu baka di sma kiri Yesus, dan dati kan yepi wi fu no frede gi libisma. Den apostel ben sabi o furu den Dyu kerki fesiman ben e teige den (Tori 5:17, 18, 27, 28). Toku den ben meki ala sma sabi taki den na disipel fu Yesus fu di den ben go preiki ala dei na a tempel (Tori 5:42). Den no ben meki sma tapu skreki gi den. Wi srefi no o frede sma moro te wi e meki den kon sabi taki wi na Yehovah Kotoigi, awinsi wi de na wroko, na skoro noso na ini a birti pe wi e tan.​—Tori 4:29; Rom. 1:16.

20. Fu san ede den apostel ben e prisiri, aladi sma ben e teige den?

²⁰ Fu san ede den apostel ben e prisiri? Den ben sabi fu san ede sma ben e teige den èn den ben si en leki wan grani taki sma ben e fon den fu di den ben e du a wani fu Yehovah (Luk. 6:23; Tori 5:41). Na apostel Petrus ben skrifi bakaten: „Srefi efu unu ben sa musu pina fu di unu e du san bun, toku unu o de koloku” (1 Petr. 2:19-21; 3:14). Te wi e frustan taki sma e teige wi fu di wi e du san bun, dan noiti wi o meki dati tapu wi fu dini Yehovah.

21-22. (a) Fa yu o sreka yusrefi gi frufolgu? (b) San wi o luku na ini a tra artikel?

²¹ Wi no sabi o ten sma o bigin frufolgu wi noso o ten lanti o tapu a wroko fu wi. Ma wi sabi taki wi kan sreka wisrefi now. Wi kan du sani fu kon abi wan moro bun matifasi nanga Yehovah èn fu kon abi wan moro tranga bribi. Wi kan leri tu fu no frede libisma. Te wi e sreka wisrefi now, dan dati o yepi wi fu horidoro na ini a ten di e kon.

²² Ma san wi musu du efu lanti tapu a wroko fu wi? Na ini a tra artikel wi o taki fu wan tu Bijbeltekst di kan yepi wi fu tan du a wani fu Yehovah te dati pasa.