1. San Paulus no ben syen fu taki?

NA APOSTEL Paulus no ben syen fu taki dati a ben firi swaki * son leisi. A ben taki dati a skin fu en ben „e kon swaki moro nanga moro”, taki a ben abi fu feti fu du san bun èn taki a no ala ten Yehovah ben piki den begi fu en soleki fa a ben wani (2 Kor. 4:16; 12:7-9; Rom. 7:21-23). Paulus ben sabi taki den gensman fu en ben wisiwasi en. Ma awinsi sma ben denki so fu Paulus èn awinsi a ben abi swakifasi toku a no ben feni taki a no warti noti.​—2 Kor. 10:10-12, 17, 18.

2. Soleki fa 2 Korentesma 12:9, 10 e sori, dan sortu prenspari sani Paulus ben leri?

² Paulus ben leri wan prenspari sani. A ben leri taki wan sma kan tranga aladi a e firi swaki. (Leisi 2 Korentesma 12:9, 10.) Yehovah ben taigi en: „Te yu swaki, a o de krin taki mi e gi yu a krakti di yu abi fanowdu.” Ma now wi o luku fu san ede wi no musu lasi-ati tumusi te den feanti fu wi e kosi wi.

3. Fu san ede wi kan prisiri te sma e kosi wi?

³ Nowan sma lobi en te trawan e kosi en. Ma efu den feanti fu wi e kosi wi èn wi e broko wi ede tumusi nanga den sani di den e taki, dan wi kan lasi-ati (Odo 24:10). Fa wi  musu si en te den feanti fu wi e kosi wi? Neleki Paulus wi kan ’prisiri te sma e kosi wi’ (2 Kor. 12:10). Fu san ede? Fu di te sma e kosi wi èn den e gens wi, dan dati e sori taki wi na disipel fu Yesus (1 Petr. 4:14). Yesus ben taki dati sma ben o frufolgu den bakaman fu en (Yoh. 15:18-20). Na dati pasa nanga den fosi Kresten. Den sma di ben teki a Griki kulturu abra ben wisiwasi den Kresten èn den ben si den leki donsma. Èn den Dyu ben feni taki den Kresten soleki na apostel Petrus nanga Yohanes ’no ben kisi furu skoro èn taki den ben de neleki ala tra sma’ (Tori 4:13). Furu sma ben e si den Kresten leki sma di no ben abi makti fu di den no ben bumui nanga politiek èn den no ben go na ini a legre. Dati meki sma no ben lespeki den.

4. San den fosi Kresten ben du te sma ben kosi den?

⁴ Den fosi Kresten no ben tapu fu preiki fu di sma ben wisiwasi den. Na apostel Petrus nanga Yohanes ben si en leki wan grani taki sma ben frufolgu den fu di den ben de bakaman fu Yesus èn fu di den ben gi tra sma leri fu en (Tori 4:18-21; 5:27-29, 40-42). Den disipel ben sabi taki den no ben abi reide fu syen. Aladi sma no ben lespeki den fosi Kresten, toku den du moro fu yepi sma leki den gensman fu den. Fu eksempre, te nanga now den Bijbel buku di sonwan fu den skrifi e yepi milyunmilyun sma. A Kownukondre fu san den ben preiki e tiri na ini hemel now èn heri esi a o tiri heri grontapu (Mat. 24:14). Ma a makti regering fu owruten Rome di ben frufolgu den Kresten no de moro. Boiti dati, den disipel fu Yesus e tiri leki kownu na ini hemel. Ma ala den gensman fu den dede èn efu den kisi wan opobaka den o abi fu saka densrefi na ondro a Kownukondre di den Kresten ben preiki fu en èn di den no ben lobi.​—Openb. 5:10.

5. Soleki fa Yohanes 15:19 e sori, dan fu san ede sma no e lespeki Yehovah Kotoigi?

⁵ Na ini a ten disi son sma no e lespeki wi, den e spotu wi èn den e si wi leki donsma. Fu san ede? Fu di wi no e tyari wisrefi leki den. Wi e pruberi fu abi sakafasi èn wi e gi yesi na den wet fu lanti. Ma furu sma fu grontapu lobi sma di abi heimemre èn di e opo densrefi teige lanti. Boiti dati, wi no e bumui nanga politiek èn wi no e go na ini a legre fu nowan kondre. Wi no de leki den sma fu grontapu èn dati meki den e wisiwasi wi.​—Leisi Yohanes 15:19; Rom. 12:2.

6. Sortu bigi wroko Yehovah e yepi en pipel fu du?

⁶ Aladi den sma fu grontapu no e lespeki wi, toku Yehovah e gebroiki wi fu du bigi sani. A e yepi wi fu preiki na ala sei fu grontapu. A pipel fu en e meki tijdschrift di vertaal na ini moro tongo leki iniwan tra tijdschrift èn di e prati na heri grontapu. Boiti dati, den e gebroiki Bijbel fu yepi milyunmilyun sma fu kon abi wan moro bun libi. Na Yehovah e meki taki wi man du ala den sani disi. A gebroiki wan grupu sma di grontapu e wisiwasi fu du den bigi wroko disi. Ma fa a de nanga yu? Yehovah kan yepi yu fu kon tranga? San yu musu du fu kisi a yepi dati? Meki wi go luku dri sani di wi kan leri fu na apostel Paulus.

7. San na wan sani di wi kan leri fu Paulus?

⁷ Wan sani di wi e leri fu Paulus na disi: No frutrow tapu yu eigi krakti nanga  koni te yu e dini Yehovah. Te yu e luku a situwâsi fu Paulus èn den sani di a ben man du, dan a ben kan kisi heimemre èn a ben kan frutrow tapu ensrefi. A kweki na ini Tarsus, a mamafoto fu Silisia, wan distrikt fu Rome. Tarsus ben de wan gudu foto èn a ben abi wan universiteit pe furu sma ben wani go. Paulus ben kisi furu skoroleri èn a ben kisi leri fu Gamaliyel, wan fu den Dyu fesiman di furu sma ben lespeki (Tori 5:34; 22:3). Paulus ben tron wan prenspari sma na mindri den Dyu. A ben taki: „Mi ben go na fesi na ini a Dyu bribi, moro leki furu fu mi speri” (Gal. 1:13, 14; Tori 26:4). Ma Paulus no ben frutrow tapu ensrefi.

8. Soleki fa Filipisma 3:8 e sori, dan fa Paulus ben si den sani di a ben libi na baka èn fu san ede a ben e ’prisiri te a ben swaki’?

⁸ Paulus ben de klariklari fu libi den sani na baka di ben meki taki grontapusma ben lespeki en. Fu taki en leti, a kon si den sani di a ben abi fosi leki „wan ipi doti”. (Leisi Filipisma 3:8.) Paulus kisi furu problema di a tron wan bakaman fu Krestes. En eigi pipel no ben lobi en (Tori 23:12-14). Èn aladi a ben de wan borgu fu Rome, toku den Romesma ben fon en èn den ben poti en na strafu-oso (Tori 16:19-24, 37). Boiti dati, Paulus ben abi fu du tranga muiti fu du san bun fu di a ben abi sondu (Rom. 7:21-25). Ma aladi sma ben gens en èn aladi a ben abi fu feti nanga en eigi swakifasi, toku a no tapu fu de wan bakaman fu Yesus. Bijbel e taki dati a ben ’prisiri te a ben swaki’. Fu san ede? Fu di te a ben swaki a ben si fa Gado ben yepi en.​—2 Kor. 4:7; 12:10.

9. Fa wi musu si den sani di e meki wi firi leki wi swaki?

⁹ Efu wi wani kisi krakti fu Yehovah, dan wi no musu denki taki wi prenspari fu di wi tranga, fu di wi kisi bun skoroleri, fu di wi de fu wan spesrutu kondre noso fu di wi gudu. A no den sani disi e meki taki Yehovah kan gebroiki wi. Fu taki en leti, furu fu den anbegiman fu  Yehovah ’a no sma di libisma e si leki koniman. Furu fu wi a no sma di abi makti noso sma fu wan prenspari famiri.’ Na presi fu dati Yehovah e gebroiki „den swaki sani fu grontapu” (1 Kor. 1:26, 27). Sobun, awinsi yu no abi den sani di kari na a bigin fu a paragraaf, toku yu kan dini Yehovah. Te wi no abi den sani di sma na ini grontapu e si leki prenspari sani, dan wi o si fa Yehovah o gi wi krakti. Fu eksempre, efu yu e frede fu taki nanga sma di e spotu a bribi fu yu, dan aksi Yehovah fu gi yu a deki-ati fu taki fu a bribi fu yu (Ef. 6:19, 20). Efu yu abi wan seryusu siki, dan aksi Yehovah fu gi yu a krakti fu preiki so furu leki yu man. Ibri leisi te yu e si fa Yehovah yepi yu, yu o kisi krakti èn yu bribi o kon moro tranga.

10. Fu san ede wi musu studeri den bun eksempre na ini Bijbel, soleki den wan di kari na Hebrewsma 11:32-34?

¹⁰ Paulus ben lobi studeri Gado Wortu èn a leri furu fu den anbegiman fu Yehovah di ben de bun eksempre. Di Paulus skrifi wan brifi gi den Hebrew Kresten a aksi den fu prakseri den someni sma di tan dini Yehovah. (Leisi Hebrewsma 11:32-34.) Wan fu den sma disi ben de Kownu David. A no ben kisi gens soso fu den feanti fu en, ma srefi fu den mati fu en. Te wi e luku a tori disi fu David, dan wi o man frustan fu san ede na eksempre fu en ben gi Paulus deki-ati. Wi o si tu fa wi kan teki na eksempre fu Paulus.

11. Fu san ede a ben sori leki David ben swaki? (Luku a fowtow na tapu a kafti.)

¹¹ Goliat di ben de wan tranga fetiman ben si David leki wan pikin swaki boi. Di Goliat si David, a „bigin wisiwasi en”. Goliat ben bigi moro David, a ben abi moro bun fetisani èn a ben de wan bun fetiman. Ma David ben de wan boi di noiti no feti na ini a legre èn a no ben abi bun fetisani. A ben sori leki David ben swaki, ma a ben tranga. David ben frutrow tapu Yehovah èn Yehovah ben gi en a krakti fu kiri Goliat.​—1 Sam. 17:41-45, 50.

12. Sortu tra problema David ben abi?

¹² David ben abi wan tra problema di ben kan meki a firi leki a swaki. David ben wroko tranga gi Saul, a sma di Yehovah ben poti leki kownu fu Israel. Na a bigin Kownu Saul ben lespeki David. Ma bakaten Saul kon kisi heimemre èn a bigin dyarusu tapu David. Saul no ben libi bun nanga en èn a ben wani kiri David srefi.​—1 Sam. 18:6-9, 29; 19:9-11.

13. San David du di Kownu Saul ben wani du ogri nanga en?

¹³ Aladi Kownu Saul no ben libi bun nanga David, toku David tan sori lespeki gi en fu di a ben de a kownu di Yehovah ben poti (1 Sam. 24:6). David no ben ati bron nanga Yehovah fu di Saul ben libi so nanga en. Na presi fu dati, David ben abi a frutrow taki Yehovah ben o gi en a krakti fu horidoro.​—Ps. 18:1 nanga den biginwortu fu a Psalm.

14. Fa Paulus en situwâsi ben de a srefi leki a di fu David?

¹⁴ Na apostel Paulus ben de na ini a srefi situwâsi leki David. Den feanti fu Paulus ben abi makti moro en. Furu fu den kerki fesiman nanga den politiekman no ben lobi en. Furu leisi den fon en èn den poti en na strafu-oso. Neleki fa a ben de nanga David, son mati fu Paulus no ben libi bun nanga en. Son sma na ini a gemeente ben gens en srefi  (2 Kor. 12:11; Fil. 3:18). Ma Paulus no ben lasi-ati. A ben tan preiki aladi sma ben gens en. A ben tan lobi den brada nanga sisa fu en, awinsi den ben du hati sani nanga en son leisi. Ma san moro prenspari na taki a tan dini Yehovah te na a dede fu en (2 Tim. 4:8). A ben man du disi fu di a no ben frutrow tapu en eigi krakti nanga koni, ma a ben frutrow tapu Yehovah.

15. San wi musu du te sma e gens wi?

¹⁵ Sma na yu skoro, sma na wrokope noso yu famiri di no de Kotoigi e kosi yu, noso den e frufolgu yu? Wan sma na ini a gemeente du wan hati sani nanga yu? Efu dati de so, dan prakseri na eksempre fu David nanga Paulus. Neleki den yu kan tan ’du bun fu wini na ogri’ (Rom. 12:21). Te sma e gens yu, yu no o feti nanga den neleki fa David ben feti nanga Goliat. Ma yu o pruberi fu yepi den fu kon sabi moro fu Yehovah nanga Bijbel. Yu kan du dati te yu e gebroiki Bijbel fu piki den aksi fu sma, te yu e tan sori lespeki nanga switifasi gi den sma di no e libi bun nanga yu èn te yu e du bun gi ala sma, srefi den feanti fu yu.​—Mat. 5:44; 1 Petr. 3:15-17.

16-17. San Paulus no frigiti noiti?

¹⁶ Fosi na apostel Paulus tron wan disipel fu Krestes a ben de wan yonguman di no ben lespeki den bakaman fu Yesus èn a ben frufolgu den (Tori 7:58; 1 Tim. 1:13). Yesus srefi ben abi fu tapu Paulus fu frufolgu a Kresten gemeente. Yesus ben taki nanga Paulus komoto fu hemel èn a meki en kon breni. Efu Paulus ben wani si baka, a ben musu go suku yepi na den srefi sma di a ben frufolgu. A sori sakafasi èn a go suku yepi na wan disipel di nen Ananias. A man disi yepi Paulus fu si baka.​—Tori 9:3-9, 17, 18.

¹⁷ Bakaten Paulus tron wan memre fu a Kresten gemeente èn furu sma ben sabi en. Ma noiti a frigiti san Yesus leri en di a ben de na pasi fu go na Damaskus. Paulus tan sori sakafasi èn a teki a yepi fu  den brada nanga sisa. A ben taki dati den ben e ’trowstu en trutru’.​—Kol. 4:10, 11.

18. Fu san ede a kan muilek son leisi fu teki a yepi fu trawan?

¹⁸ San wi kan leri fu Paulus? Di wi bigin moksi nanga Yehovah en pipel wi ben suku yepi na trawan fu di wi ben sabi taki wi ben musu leri furu ete (1 Kor. 3:1, 2). Ma fa a de now? A kan taki wi e dini Yehovah furu yari kaba èn wi abi furu ondrofeni. A sani disi kan meki taki wi no wani a yepi fu trawan, spesrutu fu den wan di no e dini Yehovah so langa leki wi. Ma Yehovah e gebroiki wi brada nanga sisa fu gi wi deki-ati (Rom. 1:11, 12). Sobun, efu wi wani kisi krakti fu Yehovah, dan wi musu meki den brada nanga sisa yepi wi.

19. Fu san ede Paulus ben man du so furu sani gi Yehovah?

¹⁹ Paulus du wan tu moi sani, baka di a tron wan Kresten. Fa a ben man du den sani disi? A ben leri taki a no prenspari pe wan sma komoto, o tranga a sma de, omeni skoroleri a kisi noso omeni moni a abi. Efu wan sma abi sakafasi èn a e frutrow tapu Yehovah a man du furu bun sani. Wi alamala kan teki na eksempre fu Paulus (1) te wi e frutrow tapu Yehovah, (2) te wi e teki na eksempre fu sma na ini Bijbel èn (3) te wi e teki a yepi fu wi brada nanga sisa. Te wi e du dati, dan awinsi o swaki wi de, Yehovah o gi wi krakti.