Yehovah wani taki tu sma di trow de koloku èn taki den tan lobi makandra den heri libi langa (Mat. 19:4-6). Efu yu wani trow, dan fa yu kan feni wan bun trowpatna? Fu di Yehovah na wi Mekiman, meki a sabi soifri san wi musu du fu man abi wan koloku trowlibi. Sobun, te yu e gebroiki den gronprakseri di a gi wi, dan yu o de koloku trutru. Meki wi luku wan tu fu den gronprakseri dati.

A fosi sani di wi musu frustan, na disi: „Na ati na a moro bedrigi sani di de èn a ogri srefisrefi” (Yer. 17:9). Te tu sma di wani trow e hori nanga makandra, dan fosi yu denki den firi fu den kan kon so tranga, taki a muilek gi den fu denki krin èn fu teki koni bosroiti. Efu tu sma e bosroiti fu trow soso fu di den no man hori densrefi, dan a sani disi kan tyari bigi problema kon gi den bakaten (Odo 28:26). Dati meki a no de wan koni sani efu wantewante den e bigin du sani di e sori den moro dipi firi fu den, noso den e pramisi makandra sani, aladi den no sabi makandra bun ete.

Odo 22:3 e taki: „A koniwan si taki ogri o miti en èn a go kibri, ma a sma sondro ondrofeni waka go doro èn dati meki a musu kisi strafu.” Ma fa a de nanga den website pe sma kan go fu suku wan trowpatna? A fowtu fu suku wan trowpatna tapu den website disi? A sari fu taki dati son sma di miti wan sma tapu Internet èn di bigin hori nanga en sondro fu sabi en, kon si bakaten taki a sma dati ben kori den. Wan tra sani, na taki son sma tapu Internet e gebroiki wan falsi nen èn den no e poti den eigi fowtow. Dan den e fruteri trawan ala sortu sani fu puru moni na den skin. Son leisi den sma disi ben taki srefi dati den na Kotoigi.

Luku ete wan tra sani: Sonwan fu den website di e yepi sma fu feni wan trowpatna e gebroiki wan computer programa fu luku suma kan trow nanga suma. Ma buweisi no de taki den programa disi man yepi sma fu feni wan bun trowpatna. Yu ben o meki wan computer programa di libisma meki teki so wan prenspari bosroiti gi yu? Yu denki taki dati ben o de wan koni sani fu du? Fa wan computer programa kan bun moro Bijbel gronprakseri?​—Odo 1:7; 3:5-7.

Wan fu den gronprakseri disi skrifi na Odo 14:15: „Wan sma sondro ondrofeni e bribi ala san sma e taki, ma a koniwan e  luku bun pe a e poti en futu.” Fosi yu bosroiti fu trow nanga wan sma, yu musu leri sabi en bun. Ma a sani disi kan muilek te yu e miti a sma soso tapu Internet. A kan taki unu e seni fowtow gi makandra, taki unu skrifi san unu lobi èn san unu no lobi, èn unu e taki furu nanga makandra tapu Internet. Ma srefi te yu e du dati, yu kan taki dati yu sabi a sma trutru? Son sma di ben denki taki den feni wan bun trowpatna ben skreki srefisrefi di den miti a sma te fu kaba.

A psalm skrifiman ben taki: „Mi no sidon nanga sma di lobi lei. Mi no e moksi nanga sma di e hoigri” (Ps. 26:4). Furu sma di e go tapu den website di e yepi yu fu feni wan trowpatna e si en leki wan gewoon sani fu fruteri lei fu meki a gersi leki den na wan bun sma. Te den de tapu Internet, dan den no e sori fa den de trutru, ma den e kibri den takru fasi fu den. Dati meki a bun aksi yusrefi den sani disi: Aladi son sma e taki dati den na Yehovah Kotoigi, yu sabi seiker taki den na dopu Kresten? Den na lepi Kresten? Den abi wan bun matifasi nanga Yehovah? Sma e lespeki den na ini a gemeente fu den? Noso den e du don sani èn den na „takru kompe” srefi? (1 Kor. 15:33; 2 Tim. 2:20, 21) Den mag trow soleki fa Bijbel e sori? A prenspari fu sabi den sani disi. Ma fa yu o kon sabi den sani disi efu yu no taki nanga tra Kotoigi di sabi a sma disi bun? (Odo 15:22) Èn a no de fu taki dati wan trutru anbegiman fu Yehovah no ben o denki srefi fu „kon de wán” noso fu trow nanga wan sma di no de na bribi.​—2 Kor. 6:14; 1 Kor. 7:39.

A de krin taki omeni sani kan miti wan sma te a e go suku wan trowpatna tapu wan website. Moro bun fasi de fa yu kan leri sabi wan sma di kan tron wan bun trowpatna gi yu. Pe yu kan miti so wan sma? Nofo tron Yehovah Kotoigi e leri sabi makandra te den e go na gemeente konmakandra, kring konmakandra, kongres nanga tra presi.

Ma te wi no man kon makandra soleki now di a COVID-19 virus panya na ala sei, dan nanga yepi fu Internet nanga computer programa wi e hori wi gemeente konmakandra èn na so yu kan leri sabi tra Kotoigi di no trow ete. Drape yu kan yere èn si fa den e hori lezing èn fa den e gi piki di e sori o tranga a bribi fu den de (1 Tim. 6:11, 12). Baka a konmakandra unu kan taki nanga makandra na ini breakout room efu yu gemeente e gebroiki dati. Te yu e kon makandra nanga tra Kotoigi tapu Internet fu taki tori noso fu abi prisiri, dan yu kan luku fa a sma di yu lobi e tyari ensrefi te a de nanga tra sma èn yu kan si sortu fasi a abi (1 Petr. 3:4). Baka wan pisi ten te unu kon sabi makandra moro bun, dan unu o man si efu unu ala tu e denki a srefi fu son sani, efu unu wani du den srefi sani na ini a libi èn efu a ben o bun fu trow nanga makandra.

Te sma di e suku wan trowpatna e meki Bijbel gronprakseri tiri den, dan dati o yepi den fu abi wan koloku trowlibi. Den o ondrofeni san na odo disi e taki: „Efu wan sma feni wan bun wefi [noso masra], dan a feni wan bun sani èn Yehovah o feni en bun.”​—Odo 18:22.