1-2. Fa den wortu fu Yehovah na ini Yesaya 65:16, 17 e gi wi deki-ati fu no gi abra?

„NO GI ABRA!” Dati ben de a nen fu a kongres fu 2017. Na a kongres dati wi leri fa wi kan horidoro te wi abi problema. Now wi de fo yari moro fara èn te nanga now wi e horidoro na ini na ogri grontapu disi.

² Sortu problema yu ben abi na ini a ten di pasa? Wan famiriman noso wan bun mati fu yu lasi libi? Yu abi wan siki di kan meki taki yu dede? A libi kon muilek fu di yu e kon owru? Wan rampu pasa na ini a kontren pe yu e tan? Sma du ogri nanga yu noso den frufolgu yu? Noso wan takru siki soleki COVID-19 meki taki yu e pina? Wi no man wakti a dei te ala den problema disi no o de moro. Wi o frigiti den èn noiti moro den o kon baka.​—Leisi Yesaya 65:16, 17.

3. San wi musu du èn fu san ede?

³ A libi ini a grontapu disi muilek èn a o kon moro muilek na ini a ten di e kon (Mat. 24:21). A de krin taki wi musu leri fu tan horidoro. Fu san ede? Fu di Yesus ben taki: „Te unu horidoro, dan unu o kisi libi” (Luk. 21:19). Te wi e luku fa tra sma di abi den srefi sortu problema leki wi e horidoro, dan dati o yepi wi fu tan horidoro tu.

4. Fu san ede wi kan taki dati Yehovah na a moro bun eksempre fu wan sma di e horidoro?

⁴ Suma na a moro bun eksempre fu wan sma di e horidoro? Dati na Yehovah Gado. A piki disi e fruwondru yu? Kande. Ma te yu denki a tori, dan yu no o fruwondru moro. A grontapu disi de na ini a makti fu Didibri èn a lai problema. Efu Yehovah wani a kan pori na ogri grontapu disi wantewante, ma a o du dati na ini a ten di e kon (Rom. 9:22). Nownowde wi Gado e horidoro teleki a dei doro di a poti fu pori na ogri grontapu disi. Meki wi go luku neigi situwâsi pe Gado e horidoro.

5. Fa sma gi Gado porinen èn fa yu feni dati?

⁵ Sma gi Yehovah porinen. Yehovah lobi en nen èn a wani meki ala sma lespeki en (Yes. 42:8). Ma na ini den 6000 yari di pasa, sma pori a bun nen fu Yehovah (Ps. 74:10, 18, 23). A sani disi bigin na ini a dyari fu Eden di Didibri (san wani taki: Ogri-ati leiman) ben taki dati Gado ben hori wan sani na baka gi Adam nanga Eva, wan sani di den ben abi fanowdu fu man de koloku (Gen. 3:1-5). Sensi a ten dati sma lei gi Yehovah taki a no wani gi libisma san den abi trutru fanowdu fu man de koloku. A ben hati Yesus taki sma ben gi en Papa porinen. Fu dati ede a leri den disipel fu en fu begi: „Wi Tata na hemel, meki yu nen de santa.”​—Mat. 6:9.

6. Fu san ede Yehovah meki furu ten pasa fu sori taki en wawan abi a reti fu tiri hemel nanga grontapu?

⁶ Furu sma no wani Gado leki tiriman. Yehovah wawan abi a reti fu tiri hemel nanga grontapu èn a fasi fa a e tiri na a moro bunwan (Openb. 4:11). Ma Didibri pruberi fu kori engel nanga libisma fu denki taki Gado no abi a reti dati. A tori disi no ben man seti na ini wán dei. Yehovah na wan koni Gado. Dati meki a gi pasi taki libisma tiri densrefi èn a meki furu ten pasa so taki den kan si taki sani no o waka bun te den no e arki den Mekiman (Yer. 10:23). Fu di Gado abi pasensi, meki nowan sma o man tweifri moro efu a abi a reti fu tiri. Ala sma o sabi taki a tiri fu Yehovah na a moro bunwan èn taki en Kownukondre wawan kan meki trutru freide de na grontapu.

7. Suma opo densrefi teige Yehovah èn san a o du nanga den?

⁷ Sonwan fu den pikin fu en opo densrefi teige en. Di Yehovah meki engel nanga libisma, den ben bun dorodoro, den no ben abi nowan fowtu. Ma dan wan engel opo ensrefi teige Yehovah. Na engel disi tron Satan (san wani taki: Gensman). A kori Adam nanga Eva di no ben abi sondu, fu opo densrefi teige Yehovah. Bakaten tra engel nanga libisma du dati tu (Yud. 6). Te fu kaba srefi den Israelsma di Gado ben teki leki en eigi pipel, drai baka gi Yehovah èn go anbegi falsi gado (Yes. 63:8, 10). A sani disi hati Yehovah trutru. Ma toku a hori ensrefi èn a o tan horidoro teleki a ten doro fu pori ala sma di opo densrefi teige en. Dan Yehovah nanga den sma di e tai hori na en o breiti taki ogridu no de moro.

8-9. Sortu lei sma e fruteri fu Gado èn san wi e du te wi yere dati?

⁸ Den lei di Didibri e tan fruteri. Satan ben taki dati a reti-ati man Yob ben e dini Yehovah soso fu kisi wini gi ensrefi, èn te yu luku en bun a taki dati fu ala den reti-ati futuboi fu Gado (Yob 1:8-11; 2:3-5). Satan e taki den ogri sani disi te na a dei fu tide (Openb. 12:10). Wi kan yepi fu sori taki Satan na wan leiman te wi e horidoro na ini muilek situwâsi èn te wi e tai hori na Yehovah fu di wi lobi en. Yehovah ben blesi Yob fu di a ben horidoro èn a o blesi wi tu.​—Yak. 5:11.

⁹ Satan e gebroiki fesiman fu falsi kerki fu leri sma taki Yehovah na wan takru-ati Gado èn taki na en e meki libisma pina. Sonwan fu den e taki srefi dati te wan pikin dede, dan na Gado teki en fu di a abi moro engel fanowdu na ini  hemel. Dati na wan bigi lei! Wi sabi taki Yehovah no de so. Te wi abi wan seryusu siki, noso te wan lobiwan fu wi dede, dan noiti wi e taki dati na Gado du en. Na presi fu dati wi e bribi taki wan dei o kon te Yehovah o puru siki nanga dede. Wi e fruteri iniwan sma di wani arki taki Yehovah na wan lobi-ati Gado. Te wi e du dati, dan Yehovah kan piki a sma di e spotu en.​—Odo 27:11.

10. San Psalm 22:23, 24 e leri wi fu Yehovah?

¹⁰ A e si fa den futuboi fu en di a lobi e pina. Yehovah na wan Gado di abi sari-ati. A e hati en te wi e bari krei fu di wi e nyan pina, kande fu di sma e frufolgu wi, fu di wi siki noso fu di den swakifasi fu wi e moro wi. (Leisi Psalm 22:23, 24.) Yehovah e firi a pen fu wi, a wani yepi wi èn a o yepi wi seiker. (Luku Eksodes 3:7, 8; Yesaya 63:9.) Wan dei sa kon pe a „o figi ala watra puru na [wi] ai èn dede no o de moro. Nowan sari, noso krei, noso pen no o de moro.”​—Openb. 21:4.

11. Fa Yehovah e denki fu den reti-ati futuboi fu en di dede?

¹¹ A e misi den mati fu en di dede. Fa Yehovah e denki fu den reti-ati man nanga uma di dede? A e angri fu si den baka! (Yob 14:15) Yu man frustan fa Yehovah e misi en mati Abraham? Noso Moses nanga suma a ben taki „langalanga”? (Eks. 33:11) Èn Yehovah musu fu angri fu yere baka fa David nanga den tra psalm skrifiman o singi den moi singi fu prèise en! (Ps. 104:33) Aladi den mati disi fu Gado dede kaba, toku Yehovah no frigiti den (Yes. 49:15). A e memre ala sani fu den. Bijbel e taki dati „gi en den alamala e libi” (Luk. 20:38). Wan dei o doro te a o meki den kon na libi baka. Dan a o yere  baka fa den e begi nanga wan krin ati èn a o teki na anbegi fu den. Efu yu lasi wan lobiwan na ini dede, dan den sani disi kan trowstu yu.

12. Sortu sani e meki Yehovah firi sari na ini den lasti dei disi di lai ogridu?

¹² A e si fa ogri-ati sma e kwinsi trawan. Di sma opo densrefi teige Yehovah na ini a dyari fu Eden, dan a ben sabi taki a situwâsi na grontapu ben o kon moro ogri fosi a ben o kon bun baka. Yehovah e teige na ogridu nanga a kruktudu di lai na grontapu now. Ala ten a e firi gi den swakiwan di no man opo taki gi densrefi, gi den pikin di no abi papa nanga mama, èn gi den uma di masra dede kaba (Sak. 7:9, 10). Èn wan sani di e hati Yehovah srefisrefi na te a si fa sma e kwinsi den futuboi fu en èn e poti den na ini strafu-oso. Yu kan de seiker taki a lobi unu alamala di e horidoro neleki en.

13. Sortu tegu sani Gado e si te a e luku libisma èn san a o du?

¹³ Sma e du hurudu moro nanga moro. Gado meki libisma leki fa ensrefi de, ma Satan breiti efu a kan meki sma du hurudu. Di Gado ben „si taki libisma ben e du bun furu ogri” na ini a ten Noa, dan a „hati Yehovah taki a ben meki libisma poti na grontapu èn a ben e sari srefisrefi” (Gen. 6:5, 6, 11). A de so taki grontapu kon moro betre sensi a ten dati? Kwetikweti! Didibri musu fu prisiri te a e si fa sma e du hurudu na ala sortu fasi, sosrefi taki mansma abi seks nanga mansma, umasma nanga umasma, èn taki den sani disi kon tron ala dei sani (Ef. 4:18, 19). Satan breiti srefisrefi te a kan meki sma di e anbegi Yehovah du wan seryusu sondu. Te a pasensi fu Yehovah o kon na wan kaba, dan a o pori ala sma di e du hurudu èn di no wani kenki. Na so a o sori fa a e teige hurudu.

14. San sma e du nanga grontapu èn nanga den meti?

¹⁴ Libisma e pori grontapu. Te libisma e tiri tra libisma, dan sani ’no e waka bun gi den’. Ma boiti dati, den no e sorgu bun gi grontapu nanga den meti soleki fa Yehovah ben wani (Preik. 8:9; Gen. 1:28). Son sabiman e warskow taki den sani di libisma e du kan meki taki baka wan tu yari, wán milyun sortu meti no o de moro. Dati meki libisma e broko den ede nanga a tori disi. Koloku taki Yehovah pramisi taki a o „pori den wan di e pori grontapu” èn taki a o meki heri grontapu tron wan paradijs.​—Openb. 11:18; Yes. 35:1.

15-16. San o yepi wi fu horidoro neleki Yehovah? Gi wan eksempre.

¹⁵ Prakseri ala den bigi problema di wi Papa na ini hemel si na ini den dusundusun yari di pasa. (Luku a faki „ Na ini sortu situwâsi Yehovah e horidoro”.) Yehovah kan tyari wan kaba kon na ogridu na iniwan ten di a wani. Ma fu di a abi pasensi meki wi e kisi wini fu dati. Luku wan eksempre. Kon meki wi taki dati datra taigi wan trowpaar taki a beibi fu den di no gebore ete e siki, èn taki te a beibi gebore a o abi problema èn a no o libi langa. Ma toku a papa nanga a mama breiti te a pikin gebore, awinsi a o hebi gi den fu sorgu a pikin. Fu di den lobi en, meki den e horidoro awinsi fa a pikin e siki èn den e du ala san den man fu gi en wan bun libi.

¹⁶ Na so a de tu nanga ala den bakapikin fu Adam nanga Eva. Den gebore na  ini sondu. Toku Yehovah lobi den èn a e yepi den (1 Yoh. 4:19). A papa nanga mama fu na eksempre di wi gi, no man du noti fu meki a pikin fu den kon gosontu baka. Ma Yehovah abi a makti fu yepi den pikin fu en di e pina. A poti wan dei pe a o tyari wan kaba kon na ala sani di e meki libisma pina (Mat. 24:36). Fu di Yehovah abi lobi, meki a e horidoro èn wi musu horidoro tu solanga a de fanowdu.

17. Fa den sani di Hebrewsma 12:2, 3 e taki fu Yesus kan yepi wi fu horidoro?

¹⁷ Yehovah na a moro bun eksempre fu wan sma di e horidoro. Yesus ben horidoro tu neleki en Papa. Di Yesus ben de na grontapu a ben horidoro srefi di sma ben taki ogri fu en, di den du sani fu gi en syen èn di den anga en na wan pinapostu. A nyan ala den pina disi fu yepi wi. (Leisi Hebrewsma 12:2, 3.) A de krin taki a fasi fa Yehovah horidoro ben de wan bun eksempre gi Yesus fu horidoro tu. Na eksempre fu Yehovah kan gi wi krakti fu horidoro tu.

18. Fa 2 Petrus 3:9 e yepi wi fu frustan sortu wini sma e kisi fu di Yehovah abi pasensi?

¹⁸ Leisi 2 Petrus 3:9. Yehovah sabi san na a moro bun ten fu tyari wan kaba kon na a ogri grontapu disi. Fu di a horidoro nanga pasensi, meki furu sma ben man kon sabi en. Now wan bigi ipi fu milyunmilyun sma e anbegi èn e prèise en. Den alamala breiti taki Yehovah horidoro so taki den ben kan gebore, den ben kan leri fu lobi en èn den ben kan gi densrefi abra na en. Te Yehovah o blesi milyunmilyun sma di horidoro te na a kaba, dan a o de krin fu si taki Yehovah ben abi leti di a bosroiti fu horidoro.

19. Sortu fasti bosroiti wi musu abi èn sortu blesi wi o kisi?

¹⁹ Te wi e luku na eksempre fu Yehovah, dan wi e leri fa fu horidoro nanga pasensi èn nanga prisiri. Aladi Satan meki someni sari sani pasa, toku Yehovah e tan „a koloku Gado” (1 Tim. 1:11). Wi srefi kan tan koloku aladi wi e wakti nanga pasensi te Yehovah o meki en nen kon santa, te a o sori taki en wawan abi a reti fu tiri, èn te a o tyari wan kaba kon na ala ogridu nanga ala problema di wi abi now. Meki wi abi a fasti bosroiti fu horidoro fu di wi sabi taki wi Papa na hemel e horidoro tu. Efu wi horidoro, dan wi o si fa den wortu disi o kon tru: „Koloku fu a sma di e tan horidoro te tesi miti en, bika te Yehovah feni en bun, dan a o pai en nanga libi di a pramisi den wan di e tan lobi en.”​—Yak. 1:12.