1. San Yehovah du gi yu?

FA YU kon tron wan Yehovah Kotoigi? A fosi sani na taki yu yere a „bun nyunsu”, kande fu yu papa nanga mama, wan sma na wrokope, wan sma na skoro noso fu di wan sma kon na yu oso fu preiki gi yu (Mark. 13:10). Baka dati wan sma gebroiki furu ten èn a meki furu muiti fu studeri Bijbel nanga yu. Di yu ben e studeri, dan yu kon lobi Yehovah èn yu kon sabi taki a lobi yu tu. Yehovah hari yu kon na ini a waarheid èn now, leki wan disipel fu Yesus Krestes, yu abi a howpu fu libi fu têgo (Yoh. 6:44). A no de fu taki dati yu de nanga tangi dati Yehovah gebroiki wan sma fu leri yu a waarheid èn taki a teki yu leki wan fu en futuboi.

2. San wi o luku na ini na artikel disi?

² Now di wi sabi a waarheid, wi abi a grani fu yepi trawan fu kon nanga wi tapu a pasi di e tyari wi go na têgo libi. Wi kan feni en makelek fu preiki oso fu oso, ma kande wi feni en muilek fu aksi wan sma efu a wani studeri Bijbel noso fu hori wan Bijbelstudie ibri wiki. Na so yu e firi tu? Efu dati de so, dan kande den rai na ini na artikel disi o yepi yu. Wi o luku fu san ede wi wani yepi fu meki disipel. Wi o luku tu san wi kan du efu wi feni en muilek fu hori wan Bijbelstudie. Meki wi luku fosi fu san ede wi no musu preiki a bun nyunsu nomo, ma wi musu gi sma leri tu.

3. Fu san ede wi e preiki?

³ Di Yesus ben de na grontapu, a gi den bakaman fu en wan wroko pe den ben musu du tu sani. A fosi sani na taki den ben musu preiki a bun nyunsu fu a Kownukondre èn a sori den fa den ben musu du en (Mat. 10:7; Luk. 8:1).  Fu eksempre, Yesus taigi en disipel san den ben musu du te sma ben o arki a Kownukondre boskopu, noso te den no ben o arki (Luk. 9:2-5). Di Yesus ben taki dati den ben o preiki gi „sma fu ala kondre” a ben sori nanga dati taki den ben o preiki gi furu sma na furu presi (Mat. 24:14; Tori 1:8). Awinsi sma ben o arki noso den no ben o arki, den disipel ben musu fruteri sma a bun nyunsu fu Gado Kownukondre èn san a Kownukondre ben o du.

4. Soleki fa Mateyus 28:18-20 e sori, dan san wi musu du boiti fu preiki fu a Kownukondre?

⁴ San na a di fu tu sani di Yesus taigi en disipel fu du? A taigi den taki den ben musu leri sma fu du ala den sani di a ben taigi den fu du. Son sma e taki dati a komando fu preiki èn fu gi sma leri ben de soso gi den fosi Kresten. Ma dati de so trutru? Nôno. Yesus ben sori taki a prenspari wroko disi ben o go doro teleki a ten fu wi, „te na a kaba fu grontapu”. (Leisi Mateyus 28:18-20.) A kan taki Yesus gi a komando disi di a ben sori ensrefi na moro leki 500 bakaman fu en (1 Kor. 15:6). Èn na ini na openbaring di a gi Yohanes, Yesus sori krin taki ala den bakaman fu en ben musu yepi fu leri trawan sani fu Yehovah.​—Openb. 22:17.

5. Sortu agersitori Paulus gebroiki na ini 1 Korentesma 3:6-9 fu sori taki wi musu preiki èn gi sma leri?

⁵ Na apostel Paulus ben agersi a wroko fu meki disipel nanga a wroko fu prani wan gron. Na so a ben sori taki wi musu du moro leki fu prani siri. A ben taigi den Korentesma: „Mi prani, Apolos gi watra . . . Unu na a gron fu Gado di a e wroko.” (Leisi 1 Korentesma 3:6-9.) Leki wrokoman na ini a gron fu Gado wi e prani siri te wi e preiki gi sma èn wi e gi den siri watra te wi e go baka fu gi den sma leri (Yoh. 4:35). Ma wi e hori na prakseri taki na Gado e meki a siri gro.

6. Te wi e gi sma leri, dan san wi musu yepi den fu du?

⁶ Wi e suku den sma di abi „a yoisti denki fu man kisi têgo libi” (Tori 13:48). Fu man yepi den sma disi fu tron disipel wi musu yepi den (1) fu frustan, (2) fu bribi, èn (3) fu du den sani di den leri fu Bijbel (Yoh. 17:3; Kol. 2:6, 7; 1 Tes. 2:13). Te den Bijbelstudenti e kon na den konmakandra, dan wi alamala na ini a gemeente kan yepi te wi e gi den studenti wan switikon èn te wi e sori den lobi (Yoh. 13:35). A kan taki a sma di e hori a Bijbelstudie o gebroiki furu ten èn a o meki furu muiti fu yepi a studenti fu tapu nanga falsi anbegi èn nanga takru gwenti di rutu dipi na ini en ati. Den sani disi kan „tanapu steifi leki wan fortresi” (2 Kor. 10:4, 5). A kan teki omeni mun fu tyari den kenki disi kon so taki a kan dopu. Ma a muiti di wi e meki no o de fu soso.

7. Fu san ede wi e preiki gi sma èn e gi den leri?

⁷ Fu san ede wi e preiki gi sma èn e gi den leri fu tron disipel? A fosi sani na taki wi lobi Yehovah. Te yu e gi yesi na a komando fu go preiki èn meki disipel, dan yu e sori Gado taki yu lobi en (1 Yoh. 5:3). Prakseri a sani disi: A lobi di yu abi gi Yehovah meki taki yu e preiki oso fu oso. A ben makelek fu du a sani disi? Kande yu o taki, nôno. Di yu go preiki fu a fosi leisi èn yu ben e tanapu na fesi a fosi doro, dan fa yu ben firi? Yu ben senwe? Seiker. Ma yu ben sabi taki disi na a wroko di Yesus wani taki yu du èn  yu gi yesi na a komando dati. Èn a no de fu taki dati baka wan pisi ten yu ben feni en moro makelek fu du a preikiwroko. Ma fa yu ben o feni en fu hori wan Bijbelstudie? Yu e senwe te yu e prakseri a sani disi? Kande. Ma te yu e begi Yehovah fu yepi yu fu no senwe moro èn fu abi a deki-ati fu aksi wan sma fu studeri Bijbel, dan Yehovah kan yepi yu fu de fayafaya fu meki disipel.

8. Soleki fa Markus 6:34 e sori, sortu tra sani kan meki taki wi wani gi trawan leri?

⁸ A di fu tu sani di e meki taki wi wani leri sma a waarheid na taki wi lobi den. Wan leisi di Yesus nanga en disipel ben preiki heri dei, den ben weri srefisrefi. Den ben go na wan presi pe den ben kan rostu, ma wan bigi ipi sma go miti den. Fu di Yesus ben sari den sma, meki a bigin leri den „furu sani”. (Leisi Markus 6:34.) Yesus ben du furu muiti fu leri den sma sani aladi a ben weri srefisrefi. Fu san ede? Fu di a ben sabi fa den ben e firi. A ben si fa den ben pina, a ben si taki den ben abi wan howpu fanowdu èn a ben wani yepi den. Na so a de tu nanga sma na ini a ten disi. Den abi furu problema èn den abi wan howpu fanowdu, srefi efu a gersi leki den de koloku kaba. Den de leki skapu di e waka lontu sondro wan skapuman di e tyari den. Na apostel Paulus ben taki dati den sma disi no sabi Gado èn den abi nowan howpu (Ef. 2:12). Den sma disi de tapu „a pasi di e tyari den go na dede” (Mat. 7:13). Te wi e prakseri o tranga a de fanowdu taki den sma na ini a kontren fu wi musu kon sabi Gado, dan wi o yepi den fu di wi lobi den èn fu di wi e sari den. A moro bun fasi fa wi kan yepi den na te wi e aksi den efu den wani studeri Bijbel.

9. Soleki fa Filipisma 2:13 e sori, dan fa Yehovah kan yepi yu?

⁹ Kande yu e frede fu aksi wan sma efu a wani studeri Bijbel nanga yu fu di yu sabi taki a o teki furu fu yu ten fu sreka gi a studie èn fu hori a studie. Efu dati de so, dan fruteri Yehovah fa yu e firi. Aksi en fu gi yu a firi fu suku wan sma di wani studeri Bijbel. (Leisi Filipisma 2:13.) Na apostel Yohanes taigi wi taki Gado e arki den sortu begi dati, fu di den e kruderi nanga a wani fu En (1 Yoh. 5:14, 15). Dati meki yu kan de seiker taki Yehovah o yepi yu fu kisi a firi fu yepi wan sma fu kon leri sabi en.

10-11. San kan meki taki wi e draidrai fu hori wan Bijbelstudie?

¹⁰ Wi sabi taki a prenspari srefisrefi fu gi trawan leri. Ma kande wi no man du so furu na ini a wroko fu meki disipel. Meki wi go luku wan tu sani di kan meki en muilek gi wi èn san kan yepi wi na ini den situwâsi dati.

¹¹ Kande wi no man du so furu leki wi wani. Fu eksempre, son preikiman kon owru noso den e siki. Na so a de nanga yu? Efu dati de so, dan prakseri san wi leri di a COVID-19 siki panya na heri grontapu. Wi leri taki wi kan hori Bijbelstudie tu nanga yepi fu telefon noso tablet. Sobun, yu kan hori wan Bijbelstudie aladi yu de na oso èn a sani disi kan moro makelek gi yu. Luku wan tra sani di kan yepi yu. Son sma ben o wani studeri Bijbel, ma den no man na a ten te brada nanga sisa e preiki. Ma kande den man studeri fruku mamanten noso lati na neti. Yu kan studeri Bijbel nanga wan sma na den yuru disi? Yesus ben gi Nikodeimus  leri na neti, bika na a ten dati Nikodeimus ben wani leri sani.​—Yoh. 3:1, 2.

12. San kan yepi yu fu tron wan bun leriman?

¹² Wi kan denki taki wi no man hori wan Bijbelstudie. Kande wi feni taki wi no abi nofo sabi noso ondrofeni fu studeri nanga wan sma. Efu na so yu e firi, dan luku dri sani di kan yepi yu. A fosi sani na taki Yehovah e si yu leki wan sma di bun nofo fu gi trawan leri (2 Kor. 3:5). A di fu tu sani na taki Yesus di abi ’ala makti na ini hemel èn na grontapu’ gi yu a frantwortu fu gi trawan leri (Mat. 28:18). Èn a di fu dri sani na taki Yehovah nanga den brada nanga sisa kan yepi yu. Yehovah ben yepi Yesus fu sabi san a musu taki èn a kan yepi yu tu (Yoh. 8:28; 12:49). Boiti dati, yu kan aksi a fesiman fu yu preikiwroko grupu, wan pionier, noso wan preikiman di abi ondrofeni fu yepi yu fu bigin wan Bijbelstudie èn fu hori en. Wan tra fasi fa yu kan tron wan moro bun leriman na te yu e go nanga wan fu den preikiman disi na a Bijbelstudie fu den.

13. Fu san ede wi musu de klariklari fu gi leri na wan tra fasi?

¹³ Kande wi e feni en muilek fu gebroiki nyun fasi nanga nyun wrokosani fu studeri nanga sma. A fasi fa wi e studeri nanga sma now, kon kenki. A moro prenspari buku di wi e gebroiki fu studeri nanga sma na a Koloku fu têgo-buku. Te wi e gebroiki a buku disi, dan wi musu sreka na wan heri tra fasi èn wi musu hori a studie na wan heri tra fasi leki fa wi ben gwenti na ini a ten di pasa. Wi no e leisi so furu paragraaf moro èn wi e taki moro nanga a studenti. Te wi e gi leri, dan wi e gebroiki moro felem nanga tra sani di de fu feni na tapu a website fu wi èn na ini a JW Library^® app. Efu yu no sabi fa fu gebroiki den sani disi, dan aksi wan sma fu yepi yu. Wi leki libisma lobi du sani na a fasi fa wi gwenti. A no makelek gi wi fu du sani na wan tra fasi leki fa wi ben gwenti. Ma Yehovah nanga trawan kan yepi yu so taki yu kan kon gwenti den nyun wrokosani disi èn taki yu kan feni en wan prisiri sani fu studeri nanga sma. Wan pionier ben taki dati a nyun fasi fa wi e studeri nanga sma switi gi a studenti èn gi a leriman.

14. San wi musu hori na prakseri te wi e wroko na ini kontren pe furu sma no e arki wi èn sortu deki-ati wi e kisi fu 1 Korentesma 3:6, 7?

¹⁴ Kande wi e libi na ini wan kontren pe a muilek fu feni wan Bijbelstudie. Son sma no wani arki a boskopu fu wi, noso den e gens wi srefi. San kan yepi wi fu tan howpu taki wan dei den sortu sma disi kan arki a boskopu fu wi? Hori na prakseri taki a situwâsi fu sma kan kenki esi-esi na ini a bruya grontapu disi. Kande den sma di no ben wani arki wi kan kon frustan wan dei taki den abi Gado fanowdu (Mat. 5:3). Son sma di no ben wani teki den buku fu wi fosi, bigin studeri Bijbel bakaten. Wi sabi tu taki Yehovah na a Masra fu a kotiwroko (Mat. 9:38). Yehovah wani taki wi tan prani èn tan gi watra, ma na en e meki sani gro (1 Kor. 3:6, 7). Èn wi e kisi deki-ati te wi e prakseri taki awinsi wi no abi wan Bijbelstudie now, Yehovah e blesi a muiti di wi e meki. A no e luku omeni buku wi prati gi sma noso omeni Bijbelstudie wi abi. *

15. Fa Yehovah e firi te wan sma e bigin studeri Bijbel èn te a du san a e leri?

¹⁵ Yehovah e prisiri te wan sma e bribi den sani di a e leri fu Bijbel èn te a e fruteri trawan den san dati (Odo 23:15, 16). Yu kan frustan fa Yehovah e prisiri te a e si fa sma e preiki fayafaya èn e gi trawan leri. Fu eksempre, aladi a COVID-19 siki panya na heri grontapu na ini a dienstyari 2020, toku wi ben hori 7.705.765 Bijbelstudie èn wi yepi 241.994 sma fu gi densrefi abra na Yehovah èn teki dopu. Den nyun disipel disi o studeri Bijbel nanga tra sma tu èn den o meki moro disipel (Luk. 6:40). A no de fu taki dati wi e meki Yehovah prisiri te wi e gi trawan leri so taki den tron disipel.

16. Sortu marki wi kan poti?

¹⁶ Wi musu wroko tranga fu meki disipel, ma Yehovah kan yepi wi fu gi nyunwan leri so taki den kon lobi wi hemel Tata. Yu kan poti a marki fu bigin wan Bijbelstudie awinsi nanga wán sma nomo? Kande wi o fruwondru fu si san o pasa te wi e aksi ala sma di wi e miti efu den wani studeri nanga wi. Wi kan de seiker taki Yehovah o blesi a muiti di wi e meki.

17. Fa wi o firi te wi man studeri Bijbel nanga wan sma?

¹⁷ Wi abi a bigi grani fu preiki èn fu gi trawan leri fu a waarheid. A wroko disi e gi wi furu prisiri. Na apostel Paulus di yepi furu sma na ini Tesalonika fu tron disipel, ben taki fa a ben firi: „San na a sani di e gi wi howpu, san e gi wi prisiri èn sortu pai wi kisi di o meki taki wi breiti te wi Masra Yesus kon? We, a no unu dan? Fu tru, unu na wi glori nanga wi prisiri” (1 Tes. 2:19, 20; Tori 17:1-4). Furu sma ini a ten disi ondrofeni a srefi sani. Wan sisa di nen Stéphanie, makandra nanga en masra, ben man yepi furu sma fu dopu. A sisa disi e taki: „Nowan sani e gi yu moro prisiri leki fu yepi sma fu gi densrefi abra na Yehovah.”