1. San Yehovah du syatu baka di Adam nanga Eva sondu? (Genesis 3:15)

 NO LANGA baka di Adam nanga Eva sondu, Yehovah taki wan prenspari profeititori di ben o gi den bakapikin fu den howpu. A sani di Yehovah taki skrifi na ini Genesis 3:15.​—Leisi en.

2. Fu san ede a profeititori disi de so prenspari?

² A profeititori disi di de na ini a fosi Bijbel buku, prenspari srefisrefi. Fu san ede? Fu di wi kan taki dati den wortu na ini a tekst disi na a boskopu fu Bijbel, èn ala den tra Bijbel buku abi fu du nanga dati. A boskopu disi na taki Gado ben o seni wan Frulusuman di o kiri Didibri nanga ala den ogri sma di e waka na Didibri baka. Dati o de wan bigi blesi gi den sma di lobi Yehovah!

3. Sortu aksi wi o piki na ini na artikel disi?

³ Na ini na artikel disi wi o piki dri aksi di abi fu du nanga a profeititori di skrifi na ini Genesis 3:15: Fu suma a profeititori disi e taki? Fa a profeititori disi e kon tru? Sortu wini wi e kisi fu den sani di Yehovah du fu meki a profeititori kon tru?

4. Suma na „a sneki”, èn fa wi du sabi dati?

⁴ Genesis 3:14, 15 e taki fu a „sneki”, den „pikin” fu a sneki, wan „uma”, nanga a „pikin” fu na uma. Bijbel e  yepi wi fu sabi ibriwan fu den. * Kon meki wi taki fosi fu „a sneki”. Wan trutru sneki no ben o man frustan san Yehovah ben taki na ini a dyari fu Eden. Sobun, a ben musu fu de so taki Yehovah ben taki nanga wan sani di abi frustan. Nanga suma Yehovah ben taki? Openbaring 12:9 e sori krin suma na a sneki. Drape a e taki dati „a fosi sneki” na Satan Didibri. Ma suma na den pikin fu a sneki?

5. Suma na den pikin fu a sneki?

⁵ Son leisi te Bijbel e gebroiki a wortu „pikin”, dan a abi fu du nanga sma di e denki èn e du sani so precies leki wan tra sma, taki a gersi leki a sma dati na den papa. Sobun, den pikin fu a sneki na den ogri engel nanga libisma di no wani horibaka gi Yehovah Gado èn di e gens Gado pipel neleki fa Satan e du dati. Den pikin fu a sneki na den engel di gowe libi hemel na ini a ten fu Noa, nanga den ogri libisma di e tyari densrefi leki Didibri di de leki den papa.​—Gen. 6:1, 2; Yoh. 8:44; 1 Yoh. 5:19; Yud. 6.

6. Fu san ede wi kan taki dati „na uma” no kan de Eva?

⁶ Meki wi luku now suma na a „uma”. Na uma no kan de Eva. Fu san ede? Wan reide na taki a profeititori e taki dati a pikin fu na uma ben o „masi” na ede fu a sneki. Wi ben taki kaba taki a sneki na a ogri engel Satan. Nowan sondu bakapikin fu Eva ben o man masi Satan. Sobun, suma ben o kiri Satan?

7. Soleki fa Openbaring 12:1, 2, 5, nanga 10 e sori, dan suma na a uma di kari na ini Genesis 3:15?

⁷ A lasti buku na ini Bijbel e taigi wi  suma na a uma di kari na ini Genesis 3:15. (Leisi Openbaring 12:1, 2, 5, 10.) Na uma disi a no wan trutru uma dyaso na grontapu. A mun de na ondro en futu èn a abi twarfu stari na tapu en ede leki wan kownu-ati. Na uma no e kisi wan gewoon pikin. A pikin fu en na a Kownukondre fu Gado. A Kownukondre de na ini hemel. Dati meki na uma disi musu de na ini hemel tu. Na uma na a pisi fu Yehovah en organisâsi di de na hemel. Dati na ala den engel di e gi yesi na Gado.​—Gal. 4:26.

8. Suma na a moro prenspari bakapikin fu na uma, èn o ten a tron dati? (Genesis 22:15-18)

⁸ Gado Wortu e yepi wi fu sabi suma na a moro prenspari bakapikin fu na uma. A ben musu de wan bakapikin fu Abraham. (Leisi Genesis 22:15-18.) Soleki fa a profeititori disi ben taki na fesi, dan Yesus ben de wan bakapikin fu a getrow man dati (Luk. 3:23, 34). Ma a pikin na ini a profeititori no ben o man de wan libisma fu di a ben musu kiri Satan Didibri. Di Yesus ben owru sowan 30 yari, dan Gado salfu en nanga santa yeye. Di Gado salfu Yesus, a tron a moro prenspari bakapikin fu na uma (Gal. 3:16). Baka di Yesus dede èn a kisi wan opobaka, dan Gado „gi en glori nanga grani” èn a kisi „ala makti na ini hemel èn na grontapu”. A kisi makti tu fu „tyari wan kaba kon na den wroko fu Didibri”.​—Hebr. 2:7; Mat. 28:18; 1 Yoh. 3:8.

9-10. (a) Suma na den bakapikin fu na uma tu, èn o ten den tron dati? (b) San wi o luku now?

⁹ Ma boiti Yesus, tra sma ben o de bakapikin tu fu na uma. Na apostel Paulus ben taki suma na den bakapikin disi di a taigi den Dyu nanga den trakondre sma di de salfu Kresten: „Efu unu na fu Krestes, unu na trutru bakapikin fu Abraham èn sma di sa kisi a gudu di Gado pramisi” (Gal. 3:28, 29). Te Yehovah e salfu wan Kresten nanga en santa yeye, dan a sma dati e tron wan bakapikin fu na uma. Sobun, a pikin na ini a profeititori na Yesus Krestes nanga den 144.000 sma di o tiri makandra nanga en (Openb. 14:1). Den alamala e denki èn e du neleki den Papa, Yehovah Gado.

¹⁰ Now di wi si suma na den sma di kari na ini Genesis 3:15, wi o luku fa Yehovah e meki a profeititori disi kon tru èn sortu wini wi e kisi fu dati.

11. San a wani taki dati a sneki ben o gi a pikin fu na uma mankeri „na en bakafutu”?

¹¹ Soleki fa a profeititori na ini Genesis 3:15 ben taki, dan a sneki ben o gi a pikin fu na uma mankeri „na en bakafutu”. Satan du dati di a gebroiki den Dyu nanga den Romesma fu kiri a Manpikin fu Gado (Luk. 23:13, 20-24). Te wan sma kisi wan mankeri na en bakafutu, dan wan pisi ten a no man waka bun. Na so Yesus no ben man du noti di a ben didon dri dei na ini a grebi.​—Mat. 16:21.

12. Fa èn o ten Yesus o masi na ede fu a sneki?

¹² A profeititori na ini Genesis 3:15 ben sori taki Yesus no ben o tan na ini a grebi fu ala ten. Fu san ede wi kan taki dati? Fu di a profeititori e taki dati a pikin fu na uma ben o masi na ede fu a sneki. Fu man du dati Yesus ben o abi fu kon na libi baka. Èn Yehovah gi en libi baka. Na a di fu dri dei Yesus kisi wan opobaka fu libi na ini hemel leki wan  yeye di no man dede moro. Gado poti a dei kaba te Yesus o kiri Satan (Hebr. 2:14). Krestes nanga den wan di o tiri makandra nanga en o kiri den pikin fu a sneki. Dati na ala den feanti fu Gado na grontapu.​—Openb. 17:14; 20:4, 10. *

13. Sortu wini wi e kisi fu den sani di Yehovah du fu meki a profeititori kon tru?

¹³ Sma di gi den libi abra na Gado e kisi wini fu den sani di Yehovah du fu meki a profeititori kon tru. Yesus kon na grontapu leki wan libisma. Den sani di Yesus du leki wan libisma e sori wi fa Yehovah de (Yoh. 14:9). Na eksempre fu Yesus yepi wi fu kon sabi Yehovah Gado èn fu lobi en. Wi e kisi wini tu fu den sani di Yesus leri wi èn fu a fasi fa a e tiri a Kresten gemeente na ini a ten disi. A leri wi san wi musu du efu wi wani Yehovah prisiri nanga wi. Èn a mankeri di Yesus kisi na en bakafutu tyari wini kon gi wi alamala. Fu san ede wi kan taki dati? Baka di Yesus kisi wan opobaka, Yehovah teki na ofrandi fu Yesus di e „krin wi fu ala sondu”.​—1 Yoh. 1:7.

14. Fa wi du sabi taki a profeititori di Yehovah taki na ini a dyari fu Eden no ben o kon tru wantewante?

¹⁴ Den wortu di Yehovah gebroiki di a taki a profeititori na ini a dyari fu Eden e sori taki ala den pisi fu a profeititori no ben o kon tru na a ten dati. A ben o teki ten fosi na uma ben o kisi a pikin di Gado pramisi. Wan heri pisi ten ben o pasa fosi Didibri ben o tyari den bakaman fu en kon na wán èn fosi a feantifasi na mindri den tu grupu ben o de krin fu si. A bun taki wi sabi san a profeititori wani taki, fu di a e yepi wi fu frustan taki a grontapu fu Satan no o lobi wi. Bakaten Yesus ben taigi den bakaman fu en tu taki den sma fu a grontapu ben o teige den (Mark. 13:13; Yoh. 17:14). Spesrutu na ini den wán hondro yari di pasa wi si fa a pisi dati fu a profeititori kon tru. Fu san ede wi kan taki dati?

15. Fu san ede a grontapu fu Satan e teige wi moro leki fosi? Fu san ede wi no abi fu frede Satan?

¹⁵ Syatu baka di Yesus tron Kownu fu Gado Kownukondre na ini 1914, a trowe Satan kon na grontapu. Now Satan mag kon na ini a birti fu grontapu nomo teleki a o kisi pori (Openb. 12:9, 12). Ma a no e sidon wakti nomo. Satan e atibron srefisrefi èn a e puru en atibron tapu a pipel fu Gado (Openb. 12:13, 17). Na fu dati ede a grontapu fu Satan e teige wi moro leki fosi. Ma wi no abi fu frede Satan nanga den bakaman fu en. Wi kan taki a srefi sani di na apostel Paulus ben taki: „Efu Gado de nanga wi, dan suma sa man du wi wan sani?” (Rom. 8:31) Wi e frutrow tapu Yehovah nanga wi heri ati fu di furu fu den sani di ben taki na fesi na ini Genesis 3:15 kon tru kaba.

16-18. Sortu wini Curtis, Ursula, nanga Jessica kisi fu di den kon frustan a profeititori na ini Genesis 3:15?

¹⁶ A pramisi fu Yehovah di skrifi na ini Genesis 3:15 kan yepi wi fu horidoro awinsi sortu problema wi e kisi. Curtis di de wan zendeling na ini Guam, e taki: „Son leisi den problema di mi kisi na ini mi libi ben meki en muilek gi mi fu tan gi yesi na Yehovah. Ma fu di mi ben e denki  dipi fu a profeititori na ini Genesis 3:15 meki mi man tan frutrow mi hemel Papa.” Curtis e wakti a ten te Yehovah o tyari wan kaba kon na ala den problema fu wi.

¹⁷ Wan sisa di nen Ursula èn di e tan na ini Bavaria e taki dati fu di a e frustan a profeititori na ini Genesis 3:15, a de seiker taki na Gado meki sma skrifi Bijbel. A ben naki en ati fu si taki ala den tra profeititori fu Bijbel abi fu du nanga a profeititori disi. A e taki tu: „Mi kon lobi Yehovah moro di mi kon frustan taki a du wan sani wantewante fu gi wi howpu.”

¹⁸ Jessica, wan sisa fu Mikronesia, e taki: „Mi sabi ete fa mi ben firi di mi kon sabi den tru tori fu Bijbel fu a fosi leisi. A profeititori na ini Genesis 3:15 ben e kon tru. A profeititori e memre mi taki Yehovah no ben wani taki wi ben musu abi problema na ini a libi. A profeititori disi tranga mi bribi tu taki te mi e dini Yehovah, mi o abi a moro bun libi nownow kaba èn sosrefi na ini a ten di e kon.”

19. Fu san ede wi kan de seiker taki a lasti pisi fu a profeititori o kon tru?

¹⁹ Na ini na artikel disi wi si taki Genesis 3:15 e kon tru na ini a ten disi. Wi sabi suma na a pikin fu na uma èn suma na den pikin fu a sneki. Yesus, a moro prenspari bakapikin fu na uma, kon na libi baka èn now a de wan makti Kownu di no man dede noiti moro. Now Yehovah teki bijna ala den sma di o tiri makandra nanga Yesus. Fu di a fosi pisi fu a profeititori kon tru kaba, wi kan de seiker taki a lasti pisi di e taki dati Yesus o masi na ede fu a sneki o kon tru tu. Den futuboi fu Gado o prisiri srefisrefi te Satan no o de moro! Ma now wi no musu gi abra. Wi kan frutrow wi Gado. Nanga yepi fu a pikin fu na uma a o blesi „ala den pipel fu grontapu”.​—Gen. 22:18.