1. San na a wani fu Yehovah na ini a ten disi?

 NA INI a ten disi, Gado wani taki a bun nyunsu fu a Kownukondre musu preiki na heri grontapu (Mark. 13:10; 1 Tim. 2:3, 4). A wroko disi na fu Yehovah èn a prenspari so te, taki a poti en lobi Manpikin fu teki fesi. Fu di Yesus na wi Fesiman, meki wi kan de seiker taki wi o man klari a wroko fosi a kaba doro, soleki fa Yehovah wani.​—Mat. 24:14.

2. San wi o luku na ini na artikel disi?

² Na ini na artikel disi wi o luku fa Yesus e gebroiki „a koni srafu di de fu frutrow” fu gi sma leri fu Gado Wortu èn fu orga den bakaman fu en fu du a preikiwroko di noiti ete ben du na so furu presi na grontapu (Mat. 24:45). Wi o luku tu san ibriwan fu wi kan du fu horibaka gi Yesus èn gi a koni srafu.

3. Sortu makti Yesus kisi?

³ Fa wi kan de seiker taki Yesus e tiri a preikiwroko? Syatu bifo Yesus opo go na hemel, dan a ben kon makandra nanga wan tu fu den getrow futuboi fu en tapu wan bergi na ini Galilea. A taigi den: „Mi kisi ala makti na ini hemel èn na grontapu.” Ma luku san a taigi den baka dati: „Fu dati ede, go na sma fu ala kondre èn meki den tron disipel” (Mat. 28:18, 19). Sobun, fu di Yesus kisi ala makti, meki wan fu den sani di a musu du na fu tiri a preikiwroko.

4. Fu san ede wi kan de seiker taki Yesus e tiri a preikiwroko ete?

 ⁴ Yesus ben taki dati den bakaman fu en ben o preiki a bun nyunsu èn den ben o meki disipel na ini „ala kondre”. A ben taki tu dati a ben o de nanga den bakaman fu en „ala dei te na a kaba fu grontapu” (Mat. 28:20). Den wortu disi e sori krin taki a preikiwroko ben o go doro te na ini a ten fu wi èn taki Yesus ben o tiri a wroko dati.

5. Fa wi e yepi fu meki den wortu fu Psalm 110:3 kon tru?

⁵ Yesus no ben e broko en ede taki nofo wrokoman no ben o de na a kaba fu a sistema disi. A ben sabi taki a sani di a psalm skrifiman ben taki ben o kon tru. A psalm skrifiman ben taki: „Na a dei di yu o tyari a legre fu yu go na feti, a pipel fu yu o de klariklari fu go tu” (Ps. 110:3). Efu yu e teki prati na a preikiwroko, dan yu e horibaka gi Yesus èn gi a koni srafu. Boiti dati, yu e yepi fu meki a profeititori dati kon tru. A wroko e go na fesi, ma a no makelek ala ten.

6. San na wan sani di e meki en muilek gi Kownukondre preikiman fu preiki a boskopu na ini a ten disi?

⁶ Wan sani di e meki en muilek gi Kownukondre preikiman fu preiki a boskopu, na taki sma e gens den. Sma di drai baka gi Yehovah, kerki fesiman nanga politiekman fruteri sma furu lei fu a wroko fu wi. Efu den famiriman fu wi, den sma di wi sabi èn sma na wi wrokope e bribi den lei disi, dan den kan poti druk na wi tapu fu meki wi tapu fu dini Yehovah èn fu tapu nanga a preikiwroko. Na ini son kondre sma e tapu skreki gi wi, skowtu e grabu den brada nanga sisa fu wi èn den e poti den na strafu srefi. Den sani disi no e fruwondru wi. Yesus ben taki: „Na ini ala kondre sma o teige unu fu mi nen ede” (Mat. 24:9). Den sortu ogri disi di sma e du nanga wi, e sori krin taki Yehovah feni wi bun (Mat. 5:11, 12). Na Didibri e meki sma gens wi. Ma Yesus makti moro en. Yesus e yepi wi fu preiki a bun nyunsu gi sma fu ala kondre. Meki wi go luku fu san ede wi kan taki dati.

7. Sortu buweisi e sori taki Openbaring 14:6, 7 e kon tru?

⁷ Wan tra sani di e meki en muilek gi wi fu preiki a Kownukondre boskopu na taki sma e taki furu difrenti tongo. Na ini na Openbaring di Yesus ben gi na apostel Yohanes, Yesus ben taki dati a sani dati no ben o man tapu wi fu preiki a bun nyunsu. (Leisi Openbaring 14:6, 7.) Fa so? Wi e gi so furu sma leki wi man na okasi fu kon yere a Kownukondre boskopu. Na ini a ten disi, sma na heri grontapu kan go tapu a website fu wi, jw.org, fu leisi sani di abi fu du nanga Bijbel èn den sani disi de fu feni na ini moro leki 1000 tongo. A Tiri Skin gi primisi fu vertaal a Koloku fu têgo!-buku na ini moro leki 700 tongo. A buku disi na a moro prenspari buku di wi e gebroiki fu meki disipel. Tapu a website disi yu abi sosrefi felem gi den dofuwan èn sani na ini braille gi den breniwan. Wi e si taki Bijbel profeititori e kon tru. Sma di „komoto na mindri ala den pipel di e taki difrenti tongo,” e leri fu taki a „soifri tongo” fu Bijbel (Sak. 8:23; Sef. 3:9). Wi man du ala den sani disi fu di na Yesus Krestes e tiri a wroko.

8. San na a bakapisi fu a preikiwroko fu wi?

⁸ Na ini a ten disi moro leki 8.000.000  sma na ini 240 kondre de na ini Yehovah en organisâsi èn ibri yari dusundusun sma e teki dopu. Ma san moro prenspari na taki den disipel disi kisi „nyun fasi” (Kol. 3:8-10). Furu fu den no e du sani moro di no fiti, den no e du ogri-ati sani moro, den no e desko sma moro èn den no e gi grani moro na a kondre fu den. A profeititori di skrifi na Yesaya 2:4 e kon tru. A e taki: „Den no o leri fu feti moro.” Fu di wi e du tranga muiti fu kisi nyun fasi, meki wi e yepi fu hari sma kon na Yehovah en organisâsi èn wi e sori taki wi e waka baka wi Fesiman Krestes Yesus (Yoh. 13:35; 1 Petr. 2:12). Ala den sani disi e pasa fu di Yesus e gi wi a yepi di wi abi fanowdu.

9. Soleki fa Mateyus 24:45-47 e sori, dan san ben o pasa na a ten fu a kaba?

⁹ Leisi Mateyus 24:45-47. Yesus ben taki dati na a ten fu a kaba a ben o poti wan „koni srafu di de fu frutrow” fu gi den bakaman fu en leri fu Bijbel. Sobun wi ben o fruwakti taki a srafu ben o wroko tranga na ini a ten disi. Èn na so a de tu. Wi Fesiman gebroiki wan pikin grupu fu salfu man fu gi Gado pipel nanga sma di wani leri sabi Gado „nyanyan na a reti ten”. Den man disi no e si densrefi leki basi fu a bribi fu trawan (2 Kor. 1:24). Na presi fu dati den e frustan taki Yesus na a ’fesiman nanga edeman’ fu en pipel.​—Yes. 55:4.

10. Sortuwan fu den buku na ini a prenki meki taki yu bigin dini Yehovah?

¹⁰ Sensi 1919, a koni srafu sreka difrenti buku di ben o yepi nyun sma fu kon sabi a waarheid fu Bijbel. Na ini 1921, a srafu sreka a buku De Harp Gods, fu yepi sma di ben wani sabi moro fu kon sabi den prenspari tru tori fu Bijbel. Baka wan  pisi ten den sreka moro buku. Sortu buku yepi yu fu kon sabi èn fu kon lobi wi hemel Papa? Kande yu studeri a „God zij waarachtig” buku, noso De waarheid die tot eeuwig leven leidt. Noso kande a ben de wan fu den buku disi: Joe kan libi foe têgo na ini wan paradijs na grontapoe, Sabi di e tjari joe go na têgo libi, San Bijbel e leri wi trutru?, San Bijbel kan leri wi?, noso a moro nyun buku fu wi Yu kan de koloku fu têgo! Ala den buku disi ben meki fu yepi wi fu meki disipel èn den kon na doro na a yoisti ten.

11. Fu san ede a prenspari taki wi alamala e kon sabi Yehovah nanga Bijbel moro bun?

¹¹ Den nyun sma di wani sabi moro a no den wan-enkri sma di musu kon sabi Yehovah nanga Bijbel moro bun. Wi alamala musu du dati. Na apostel Paulus ben skrifi: „Tranga nyanyan na gi lepi sma.” Paulus ben taki tu taki te wi e du den sani di wi e leri fu Bijbel, dan dati ben o yepi wi fu kon „sabi san bun èn san no bun” (Hebr. 5:14). Na ini a muilek ten disi, a no makelek ala ten fu gi yesi na den wet fu Yehovah fu di so furu sma e du sani di no fiti. Ma Yesus e sorgu taki wi e kisi a yeye nyanyan di wi abi fanowdu fu tan abi wan tranga bribi. A yeye nyanyan disi komoto fu Bijbel, a Wortu fu Gado di skrifi nanga yepi fu santa yeye. A koni srafu di e wroko na ondro a tiri fu Yesus, e sorgu taki a pipel fu Gado e kisi a nyanyan di den abi fanowdu.

12. Fa wi gi Gado nen grani neleki Yesus?

¹² Neleki Yesus, wi gi Gado nen a grani di a musu kisi (Yoh. 17:6, 26). Fu eksempre na ini 1931, wi teki a nen Yehovah Kotoigi èn a nen disi teki puru fu Bijbel. Na so wi sori taki Gado nen prenspari gi wi èn wi wani taki sma musu kon sabi taki wi e tyari a nen dati (Yes. 43:10-12).  Èn sensi oktober fu a yari dati, a nen fu Gado skrifi tapu a kafti fu ibri Waktitoren. Boiti dati, a Bijbel​—Nyun-Grontapuvertaling poti a nen fu Gado baka na ala presi pe a musu de na ini a Wortu fu en. Disi de heri tra fasi leki den kerki fu a Krestenhèit di puru Yehovah en nen na ini furu fu den Bijbel fu den.

13. Fu san ede yu de seiker taki Yesus e gebroiki a koni srafu di de fu frutrow na ini a ten disi? (Yohanes 6:68)

¹³ Nanga yepi fu „a koni srafu di de fu frutrow”, Yesus seti wan bigi organisâsi na grontapu fu gi sma deki-ati fu kon na ini a tru anbegi. Fa yu e si na organisâsi dati? Kande yu e prakseri den wortu fu na apostel Petrus di ben taigi Yesus: „Na suma wi musu go? Yu abi wortu di e gi sma têgo libi” (Yoh. 6:68). Pe ibriwan fu wi ben o de efu wi no ben kon leri sabi Yehovah en organisâsi? Nanga yepi fu na organisâsi, Krestes e sorgu taki wi abi ala san di wi abi fanowdu fu man tan gi yesi na Gado. A e leri wi tu fu du a preikiwroko fu wi bun. Boiti dati a e yepi wi fu kisi „nyun fasi” so taki Yehovah kan breiti nanga wi.​—Ef. 4:24.

14. Fa yu kisi wini fu den rai di Yehovah organisâsi gi na a ten fu a COVID-19 pandemie?

¹⁴ Yesus e gi koni rai na ini muilek ten. Wi si fa den rai dati yepi wi di a COVID-19 pandemie bigin. Aladi furu sma na grontapu no ben sabi san fu du, Yesus sorgu taki wi kisi krin rai di ben o kibri wi gi a siki dati. Wi kisi deki-ati fu weri mondkap te wi ben go na strati èn fu no kon tumusi krosibei fu trawan. A Tiri Skin memre den owruman fu tan poti prakseri na ala sma na ini a gemeente fu  kon sabi san den abi fanowdu fu kibri densrefi, fu tan gosontu èn fu tan krosibei na Yehovah (Yes. 32:1, 2). Wi kisi moro rai nanga deki-ati tu nanga yepi fu den update fu a Tiri Skin.

15. Fa na organisâsi bosroiti fu hori konmakandra èn fu du a preikiwroko na a ten fu a pandemie? San ben de a bakapisi?

¹⁵ Na a ten fu a COVID-19 pandemie, wi kisi krin rai tu fa fu hori gemeente konmakandra èn fa fu du a preikiwroko. Heri esi wi bigin go na den Kresten konmakandra, den bigi konmakandra nanga den kongres nanga yepi fu Internet. Wi skrifi brifi tu gi sma fu preiki gi den èn wi preiki tu nanga yepi fu telefon. Yehovah blesi a muiti di wi meki. Furu bijkantoro taki dati a nomru fu preikiman na ini a kontren fu den kren srefisrefi. Fu taki en leti, furu sma ben abi moi ondrofeni na a ten disi.​—Luku a faki „ Yehovah e blesi a preikiwroko fu wi”.

16. Fu san wi kan de seiker?

¹⁶ Kande son sma ben feni taki na organisâsi ben strak tumusi te a abi fu du nanga den rai di a ben gi na a ten fu a pandemie. Ma ibri leisi baka a kon na krin taki den rai dati ben de koni rai (Mat. 11:19). Èn te wi e prakseri a lobi-ati fasi fa Yesus e tiri a pipel fu en, dan wi de seiker taki awinsi san e pasa na ini a ten di e kon Yehovah nanga en lobi Manpikin o de nanga wi.​—Leisi Hebrewsma 13:5, 6.

17. Fa yu feni en fu abi Yesus leki yu Fesiman?

¹⁷ Wi breiti srefisrefi taki Yesus na wi Fesiman. Wi de na ini wan organisâsi di de na ini wánfasi aladi sma fu difrenti kulturu, kondre nanga tongo de na ini. Wi e kisi furu rai fu Gado Wortu èn wi e leri fu du a preikiwroko bun. Ibriwan fu wi e kisi leri fa fu kisi nyun fasi èn wi e leri fu lobi makandra. Wi abi ala reide fu meki bigi, fu di Yesus na wi Fesiman!