1. Fa wi musu feni en taki wi kan begi Yehovah?

 WI KISI wan moi grani. A grani di wi kisi na taki wi kan taki na ini begi nanga a Sma di meki hemel nanga grontapu. Prakseri san disi wani taki: Awinsi o ten èn awinsi na ini sortu tongo wi wani, wi kan taigi Yehovah san de na tapu wi ati. Wi no abi fu meki afspraak fosi nanga en fu du dati. Awinsi wi e didon na ati-oso noso awinsi wi de na strafu-oso, wi kan de seiker taki wi lobi-ati Papa o arki wi. Wi de nanga tangi trutru taki wi abi a grani disi.

2. Fa Kownu David ben sori taki a ben abi warderi gi a grani di a ben abi fu begi?

² Kownu David ben abi warderi gi a grani di a ben abi fu begi. Na ini wan singi di a ben singi gi Yehovah, a ben taki: „Meki den begi fu mi kon de leki switismeri di sma e bron spesrutu gi yu” (Ps. 141:1, 2). Na ini a ten fu David, den priester ben bron santa switismeri fu anbegi Gado. Den ben musu du sani finifini te den ben sreka a switismeri (Eks. 30:34, 35). Neleki fa den sma di ben sreka a switi smeri ben du dati finifini, na so David ben wani prakseri bun san a ben o taigi Yehovah na ini begi. Dati na wan sani di wi wani du tu. Wi wani taki Yehovah e prisiri nanga den begi fu wi.

3. Na sortu fasi wi musu begi Yehovah, èn fu san ede?

³ Te wi e taki nanga Yehovah na ini begi, dan wi musu du dati na wan lespeki fasi. Prakseri den fisyun di Yesaya, Esekièl, Danièl, nanga Yohanes ben kisi. Den no ben kisi a srefi fisyun, ma toku wan sani na ini den fisyun ben de a srefi. Ala den fisyun disi ben sori taki Yehovah na a moro bigi Kownu. Yesaya ben „si Yehovah sidon na tapu  wan hei kownusturu na wan hei presi” (Yes. 6:1-3). Esekièl ben si taki Yehovah e sidon na tapu wan hemel wagi èn „wan brenki leti ben de na en lontu. A brenki leti di ben de na en lontu ben gersi wan alenbo” (Esek. 1:26-28). Danièl ben si taki a „Graniwan di de sensi owruten” ben weri weti krosi. A kownusturu fu en ben abi faya di ben e bron (Dan. 7:9, 10). Èn Yohanes ben si taki Yehovah ben e sidon na tapu wan kownusturu. Lontu a kownusturu a ben si wan alenbo di ben gersi smaragd-ston (Openb. 4:2-4). Te wi e prakseri o furu glori Yehovah abi, dan wi e si o bigi a grani de di wi abi fu taki nanga en na ini begi. Èn dati e memre wi taki wi musu begi en na wan lespeki fasi. Ma fu san wi musu begi?

4. Te wi e luku san na den fosi sani di Yesus kari na ini a begi di skrifi ini Mateyus 6:9, 10, dan san dati e leri wi?

⁴ Leisi Mateyus 6:9, 10. Na a prenspari takimakandra di Yesus ben abi tapu wan bergi, a ben leri den disipel fu en fa den musu begi na wan fasi di e prisiri Gado. Baka di Yesus taigi den „fu dati ede un musu begi so”, dan a taki san na den moro prenspari sani di den musu kari fosi èn di abi fu du nanga den sani di Gado o du: a nen fu Yehovah di musu kon santa, a Kownukondre fu en di musu kon èn di o tyari wan kaba kon na ala den sma di e gens Gado, èn den bun sani di Gado o du gi grontapu èn gi libisma. Te wi e taki fu den sani disi na ini den begi fu wi, dan wi e sori taki a wani fu Gado de prenspari gi wi.

5. Yehovah e arki den begi fu wi te wi e aksi en sani di wisrefi abi fanowdu?

⁵ Na ini a tra pisi fu a begi Yesus sori san na wan tu bun sani di wi kan kari na ini wi begi èn di abi fu du nanga sani di wi wani gi wisrefi. Wi kan aksi Yehovah fu gi wi nyanyan gi a dei fu tide, fu gi wi pardon gi den sondu fu wi, fu no meki tesi miti wi, èn fu frulusu wi fu na ogriwan (Mat. 6:11-13). Te wi e aksi Yehovah den sani disi dan wi e sori taki wi abi a yepi fu en fanowdu, èn taki wi wani meki a e prisiri nanga wi.

6. Na soso den sani di kari na ini a begi fu Yesus wi mag kari na ini den begi fu wi? Fu san ede yu e piki so?

 ⁶ Yesus no ben wani taki den arkiman ben musu taki ibri wortu soifri di a ben kari na ini a begi. Na ini den tra begi fu Yesus, a ben kari tra sani di ben de prenspari gi en na a momenti dati (Mat. 26:39, 42; Yoh.17:1-26). Wi kan begi tu fu sani di prenspari gi wi. Te wi musu teki wan bosroiti, dan wi kan begi Yehovah fu gi wi koni nanga frustan (Ps. 119:33, 34). Te wi musu du wan muilek wroko, dan wi kan begi en fu a gi wi koni fu man du a wroko dati (Odo 2:6). Papa nanga mama kan begi gi den pikin fu den. Den pikin kan begi gi den papa nanga mama. Èn wi alamala musu begi gi den Bijbelstudenti fu wi èn gi den sma gi suma wi e preiki. Ma a no de fu taki dati a no soso aksi wi musu aksi Yehovah sani te wi e begi en.

7. Fu san ede wi musu prèise Yehovah te wi e begi?

⁷ Wi no musu frigiti fu prèise Yehovah te wi e begi. Wi abi furu reide fu prèise wi Gado. ’Yehovah, na wan bun Gado di de klariklari fu gi sma pardon.’ Yehovah ’na wan Gado di abi sari-ati nanga switifasi. En ati no e bron esi, a abi bun-ati pasa marki èn a e taki nomo fu sani di tru’ (Ps. 86:5, 15). Iya te wi e luku fa Yehovah de èn den sani di a e du, dan wi abi furu reide fu prèise en.

8. San na wan tu sani gi san wi kan taigi Yehovah tangi? (Psalm 104:12-15, 24)

⁸ Boiti taki wi e prèise Yehovah te wi e begi, wi musu taigi en tangi tu gi den kefalek bun sani di a du gi wi. Fu eksempre, wi kan taigi en tangi gi den kefalek moi kloru di bromki abi, den difrenti sortu switi sani di wi kan nyan, èn taki wi abi bun mati. Wi Papa di lobi wi gi wi ala den sani disi èn a gi wi moro sani tu so taki wi kan de nanga prisiri. (Leisi Psalm 104:12-15, 24.) Wan sani di moro prenspari leki den sani disi èn gi san wi wani taigi Yehovah tangi, na den leri di a e gi wi so taki wi kan tan abi wan tranga bribi, èn wi kan taigi en tangi gi a moi howpu di wi abi gi a ten di e kon.

9. San kan yepi wi fu no frigiti fu taigi Yehovah tangi? (1 Tesalonikasma 5:17, 18)

 ⁹ A kan pasa makelek taki wi e frigiti fu taigi Yehovah tangi gi ala den sani di a e du gi wi. San kan yepi wi fu no frigiti fu taigi en tangi? Yu kan skrifi wan tu spesrutu sani di yu ben aksi Yehovah na ini den begi fu yu. Baka dati yu kan skrifi sortu wan fu den sani disi Yehovah ben du gi yu. Dan yu kan begi en fu taigi en tangi taki a ben yepi yu. (Leisi 1 Tesalonikasma 5:17, 18.) Yu e prisiri èn yu e firi taki wan sma lobi yu te a e taigi yu tangi gi wan sani di yu du gi en. Yehovah e prisiri tu te wi no e frigiti fu taigi en tangi taki a arki den begi fu wi (Kol. 3:15). Ma san na wan tra prenspari sani gi san wi musu taigi wi Gado tangi?

10. Soleki fa wi kan si na ini 1 Petrus 2:21, dan fu san ede wi musu taigi Yehovah tangi taki a seni Yesus kon na grontapu?

¹⁰ Leisi 1 Petrus 2:21. Wi musu taigi Yehovah tangi taki a seni en lobi Manpikin kon na grontapu fu gi wi leri. Te wi e leisi fu Yesus dan wi kan leri furu fu Yehovah èn wi e leri fa wi kan meki Yehovah prisiri. Efu wi e sori taki wi e bribi na ini na ofrandi fu Krestes, dan wi kan tron wan bun mati fu Yehovah Gado èn Yehovah o feni wi bun.​—Rom. 5:1.

11. Fu san ede wi e begi na ini a nen fu Yesus te wi begi Yehovah?

¹¹ Wi e taigi Yehovah tangi taki wi kan begi en nanga yepi fu en Manpikin. Yehovah e gebroiki Yesus fu du den sani di wi aksi en. Yehovah e arki den begi fu wi di wi taki na ini a nen fu Yesus. Yesus ben taki: „Mi o du ala sani di unu e aksi na ini mi nen, so taki a Manpikin kan gi a Tata glori.”​—Yoh. 14:13, 14.

12. San na wan tra reide fu san ede wi musu taigi Yehovah tangi taki a seni en Manpikin kon gi wi?

¹² Yehovah e gebroiki na ofrandi fu Yesus fu gi wi pardon fu den sondu fu wi. Bijbel e taki dati Yesus na wi ’granpriester di e sidon na a reti-anusei fu a kownusturu fu a Moro Heiwan na hemel’ (Hebr. 8:1). Yesus na wi „yepiman na a Tata” (1 Yoh. 2:1). Wi de Yehovah tangi trutru taki a seni wan Granpriester di sabi fa wi e firi, di sabi taki wi na sondu sma èn di „e taki gi wi”! (Rom. 8:34; Hebr. 4:15) Fu di wi na sondu sma meki wi no ben o man taki nanga Yehovah na ini begi efu Yesus no ben dede gi wi. Iya, wi no abi wortu nofo fu taigi Yehovah tangi taki a seni en lobi Manpikin kon gi wi!

13. Fa Yesus sori na a neti fosi a dede taki a lobi den disipel fu en?

¹³ A neti fosi Yesus dede, a begi bun langa gi den disipel fu en. A ben aksi en Papa fu „kibri den, so taki na ogriwan no kan du den ogri” (Yoh. 17:15). A sani disi e sori o furu Yesus lobi den disipel fu en! Ensrefi ben o kisi wan hebi tesi, ma toku a ben broko en ede nanga den disipel fu en.

14. Fa wi kan sori taki wi lobi wi brada nanga sisa?

¹⁴ Neleki Yesus, wi no e prakseri soso den sani di wi wawan abi fanowdu. Na presi fu dati wi e begi doronomo gi wi brada nanga sisa. Te wi e du dati, dan wi e du san Yesus taigi wi fu du. A taigi wi taki wi musu lobi makandra. Èn na a fasi disi wi e sori Yehovah o furu wi lobi wi brada nanga sisa (Yoh. 13:34). Wi e yepi wi brada nanga sisa te wi e begi  gi den. Gado Wortu e taigi wi taki „a fayafaya begi fu wan reti-ati sma abi furu krakti èn a abi bun bakapisi”.​—Yak. 5:16.

15. Fu san ede wi musu begi gi wi brada nanga sisa?

¹⁵ Fu di den brada nanga sisa fu wi e miti furu tesi, meki den abi den begi fu wi fanowdu. Wi kan aksi Yehovah meki a yepi den fu horidoro te den siki, te wan rampu miti den, te feti de na ini a kondre fu den, te sma e frufolgu den, noso te den abi tra problema. Wi kan begi tu gi den brada nanga sisa di e wroko tranga fu yepi den wan di de na ini nowtu. Kande yu sabi wan sma di e miti den sortu problema disi nownowde. A ben o bun fu kari en nen te yu e begi gi yusrefi. Wi e sori taki wi lobi wi brada nanga sisa trutru te wi e aksi Yehovah meki a yepi den fu horidoro.

16. Fu san ede wi musu begi gi den wan di e teki fesi na ini na organisâsi?

¹⁶ Den wan di e teki fesi na ini a gemeente abi furu warderi efu wi e begi gi den, fu di den begi disi de wan yepi gi den. Na apostel Paulus ben frustan taki a ben de fanowdu taki trawan begi gi en. A ben skrifi: „Begi gi mi tu, so taki te mi opo mi mofo, mi man fruteri a santa kibritori fu a bun nyunsu sondro fu frede” (Ef. 6:19). Na ini a ten disi wi abi furu brada tu di e teki fesi èn di e wroko tranga. Wi e sori taki wi lobi den te wi e aksi Yehovah meki a blesi a wroko di den e du.

17-18. O ten wan sma ben kan aksi wi fu begi gi trawan? Èn san wi musu hori na prakseri te wi e begi gi trawan?

¹⁷ Son leisi wi e kisi a kari fu begi gi trawan. Fu eksempre, a kan taki wan sisa di e hori wan Bijbelstudie kan aksi wan tra sisa di go nanga en, fu begi na a studie. Kande a sisa disi no sabi a Bijbelstudenti bun. Dati meki a kan taki a feni en moro bun fu hori a begi na a kaba fu a studie. Te a e du dati, dan a kan taki a sabi moro bun san a musu taki te a o begi gi a studenti.

¹⁸ Kande wan brada e kisi a kari fu begi na wan preikiwroko konmakandra noso na wan gemeente konmakandra.  Den brada di kisi a grani disi musu hori na prakseri gi sortu konmakandra den e begi. Den no musu gebroiki a begi fu gi leri na a gemeente noso fu meki wan sani bekènti. Gi moro furu fu den gemeente konmakandra fu wi, wi abi feifi miniti nomo gi a singi nanga a begi. Dati meki a brada di o begi no musu „taki furu sani” spesrutu efu a musu begi na a bigin fu wan konmakandra.​—Mat. 6:7.

19. San o yepi wi fu de srekasreka te a krutudei fu Yehovah bigin?

¹⁹ O moro a krutudei fu Yehovah e kon krosibei, o moro a musu prenspari gi wi fu begi. Na fu dati ede Yesus ben taki: „Fu dati ede, tan na ai èn begi ala ten taki unu man lowe gi ala den sani di musu pasa” (Luk. 21:36). Iya, te wi e begi doronomo dan dati o yepi wi fu tan na ai èn wi bribi o tranga. Na a fasi disi wi o de srekasreka te a dei fu Gado bigin.

20. San wi musu du so taki den begi fu wi kan de leki wan switismeri gi Yehovah?

²⁰ Fu san wi taki na ini na artikel disi? Wi taki dati a de tumusi prenspari fu abi furu warderi gi a grani di wi abi fu begi. Den moro prenspari sani di wi musu taki na ini den begi fu wi musu abi fu du nanga den sani di Yehovah abi na prakseri fu du. Wi kan taigi Yehovah tangi gi en Manpikin èn gi a Kownukondre fu en. Wi musu taigi en tangi gi den brada nanga sisa fu wi. Èn a no de fu taki dati wi kan begi tu gi den sani di wi abi fanowdu ibri dei, èn wi kan aksi Yehovah tu fu gi wi wan tranga bribi. Te wi e prakseri bun san wi o taki na ini den begi fu wi, dan wi e sori taki wi abi furu warderi gi a grani di wi abi fu begi. Dan den wortu fu wi o de leki wan switismeri gi Yehovah. Iya, den o „gi en prisiri”.​—Odo 15:8.