1. Fa Kresten musu de leki wan bon? (Luku a prenki.)

 OITI yu si san e pasa nanga wan krontobon te a winti e wai en? A e boigi, ma a no e broko. Disi e leri wi taki son bon man du wan prenspari sani di e yepi den fu tan gro: Den man boigi. Efu wi leki Kresten e dini Yehovah nanga prisiri, dan wi musu wani boigi tu. Fa so? Wi musu man fiti wisrefi te a situwâsi fu wi kenki. Boiti dati, wi musu lespeki a fasi fa trawan e si sani èn den bosroiti di den e teki.

2. Sortu fasi o yepi wi fu fiti wisrefi te a situwâsi fu wi kenki, èn san wi o luku na ini na artikel disi?

² Leki futuboi fu Yehovah, wi wani de sma di e fiti densrefi. Boiti dati, wi wani abi sakafasi èn wi wani sori trawan taki wi e hori den na prakseri. Na ini na artikel disi, wi o si fa den fasi disi yepi wan tu Kresten di a situwâsi fu den kenki. Wi o luku tu fa den fasi disi kan yepi wi. Ma meki wi go luku fosi san wi kan leri fu Yehovah nanga Yesus di e sori wi moro bun leki iniwan sma fa fu fiti wisrefi.

3. Sortu buweisi wi abi taki Yehovah de klariklari fu fiti ensrefi?

³ Bijbel e taki dati Yehovah de „wan Stonbergi” fu di a e tanapu kánkan èn a no e degedege (Deut. 32:4). Ma a man fiti ensrefi tu. Aladi furu sani e kenki na ini a grontapu disi, toku Yehovah e fiti ensrefi èn a e sorgu taki ala den sani di a pramisi e kon tru. Fu di Yehovah meki libisma leki fa a de, meki wi man fiti wisrefi tu te sani e kenki na ini wi libi. Na ini Bijbel wi e feni gronprakseri di e yepi wi fu teki koni bosroiti awinsi sortu problema e miti wi. A fasi fa Yehovah de  èn den gronprakseri di a gi wi e buweisi taki aladi a de „wan Stonbergi”, toku a man fiti ensrefi.

4. Gi wan eksempre fu sori taki Yehovah no e fruwakti tumusi furu fu sma. (Lefitikus 5:7, 11)

⁴ Yehovah ala ten e du sani di bun dorodoro èn a de klariklari fu fiti ensrefi. A no e fruwakti tumusi furu fu libisma èn a no strak tumusi. Luku fa Yehovah sori den fasi disi nanga den Israelsma. A no ben fruwakti a srefi ofrandi fu ibri sma, awinsi na pôtisma noso gudusma. Na ini son situwâsi a ben e gi pasi taki ibri sma tyari na ofrandi di a ben man gi.​—Leisi Lefitikus 5:7, 11.

5. Gi wan eksempre fu sori taki Yehovah abi sakafasi èn sari-ati.

⁵ Fu di Yehovah abi sakafasi èn sari-ati, meki a no strak tumusi. A ben de krin fu si taki Yehovah abi sakafasi, di a ben de fu pori na ogri-ati pipel fu Sodom. Yehovah meki den engel fu en taigi a reti-ati man Lot fu lowe go na den bergi. Lot ben frede fu go drape. Dati meki a begi taki en nanga en osofamiri kisi na okasi fu lowe go na Sowar, wan pikin foto di Yehovah ben o pori. Yehovah ben kan hori nomo taki Lot musu du soifri san a ben taigi en fu du. Na presi fu dati a gi Lot primisi fu go na Sowar, èn a no pori a foto dati (Gen. 19:18-22). Hondrohondro yari baka dati, Yehovah sori sari-ati gi den sma fu Ninefei. A seni a profeiti Yona go drape fu taigi den sma taki heri esi a foto nanga den ogri-ati sma na ini ben o kisi pori. Ma di den sma fu Ninefei sori berow, Yehovah sori sari-ati gi den èn a no pori a foto.​—Yona 3:1, 10; 4:10, 11.

6. Gi wan tu eksempre di e sori taki Yesus de klariklari fu fiti ensrefi neleki fa Yehovah e du dati.

⁶ Neleki Yehovah, Yesus ben de klariklari fu fiti ensrefi. Gado ben seni en kon na grontapu fu preiki gi „den lasi skapu fu a pipel fu Israel”. Ma a sori taki a ben de klariklari fu fiti ensrefi te a ben e preiki gi sma. Wan leisi, wan uma di no ben de fu Israel, begi Yesus fu dresi na umapikin fu en di ’wan ogri yeye ben e pina kefalek’. Yesus sori sari-ati gi na uma èn a dresi na umapikin fu en (Mat. 15:21-28). Luku wan tra eksempre. Wan pisi ten na fesi, Yesus taki dati efu wan sma e taki dati a no sabi en, dan a o taki tu dati en no sabi a sma dati (Mat. 10:33). Ma a ben taki dati a no sabi Petrus di Petrus taki dri leisi taki a no sabi en? Nôno. Yesus ben sabi taki Petrus ben abi berow fu a sani di a du èn taki a ben abi bribi. Baka di Yesus kisi wan opobaka, dan a go na Petrus. A musu de so taki Yesus taigi Petrus taki a gi en pardon èn taki a lobi en.​—Luk. 24:33, 34.

7. Fa wi wani taki tra sma musu si wi, soleki fa Filipisma 4:5 e sori?

⁷ Soleki fa wi si kaba, dan Yehovah Gado nanga Yesus Krestes de klariklari fu fiti densrefi. Fa a de nanga wi? Yehovah wani taki wi de klariklari fu fiti wisrefi. (Leisi Filipisma 4:5.) Wi kan aksi wisrefi: ’Sma  e si mi leki wan sma di mi man fiti ensrefi, di no strak tumusi, èn di e lespeki a fasi fa trawan e si sani? Noso den feni taki mi strak tumusi, taki mi no e hori trawan na prakseri, noso taki mi tranga-ede? Mi de nomonomo taki trawan du sani soleki fa mi wani? Noso mi e arki trawan fu man du sani soleki fa den wani te dati fiti?’ O moro wi de klariklari fu fiti wisrefi, o moro wi e teki na eksempre fu Yehovah nanga Yesus. Meki wi luku tu situwâsi pe a bun fu fiti wisrefi. Dati na te a situwâsi fu wi kenki èn te a fasi fa sma e si sani e difrenti fu a fasi fa wi e si sani.

8. San kan yepi wi fu fiti wisrefi te a situwâsi fu wi kenki? (Luku a futuwortu.)

⁸ Wi musu man fiti wisrefi te a situwâsi fu wi kenki. Den kenki dati kan tyari problema kon gi wi di wi no ben fruwakti noiti. Kande wi e kon siki wantronso. Noso kande wantronso bigi kenki e kon na ini na ekonomia noso a regering di kan meki a libi hebi gi wi (Preik. 9:11; 1 Kor. 7:31). A kan muilek srefi gi wi efu na organisâsi gi wi wan tra toewijzing. Awinsi fa a no fa, wi kan fiti wisrefi na nyun situwâsi efu wi e du den fo sani disi: (1) frustan taki yu situwâsi kenki èn teki en leki fa a de, (2) luku go na fesi, (3) tan poti prakseri na bun sani, èn (4) du sani gi trawan. b Meki wi go luku wan tu eksempre di e sori fa son brada nanga sisa kisi wini fu di den du den sani disi.

9. San wan zendeling trowpaar du di den kisi problema di den no fruwakti?

⁹ Frustan taki yu situwâsi kenki èn teki en leki fa a de. Emanuele nanga Francesca ben musu go dini leki zendeling na ini wan tra kondre. Na a ten di den bigin leri a tongo èn den bigin leri sabi den brada nanga sisa na ini a nyun gemeente fu den, dan a COVID-19 siki panya. A sani disi meki taki den ben musu tan fara fu tra sma. Syatu baka dati Francesca en mama dede sondro taki den fruwakti dati. Francesca ben e angri fu de nanga en famiri, ma a COVID-19 siki tapu en fu go na den. San den du di den problema disi miti den? A fosi sani, na taki Emanuele nanga Francesca begi Gado fu gi den koni fu horidoro ibri dei èn fu no bruya. Yehovah gebroiki en organisâsi fu piki den begi fu den na a yoisti ten. Fu eksempre, den ben kisi deki-ati fu san wan brada ben taki na ini wan felem: „O moro esi wi e fiti wisrefi na a nyun situwâsi fu wi, o moro esi wi e kisi prisiri baka. Dan wi o man gebroiki a situwâsi dati fu du san wi musu du.” c A di fu tu sani, na taki den kisi deki-ati fu preiki moro bun nanga yepi fu telefon èn den ben man opo wan Bijbelstudie srefi. A di fu dri sani, na taki den gi den brada nanga sisa na okasi fu yepi den èn den ben de nanga tangi gi a lobi di den sori den. Wan heri yari langa, wan sisa di ben hori den na prakseri ben e seni wan syatu boskopu gi den ibri dei nanga wan Bijbeltekst. Te wi e fiti wisrefi tu na a nyun situwâsi fu wi, dan wi o breiti nanga sani wi man du.

10. Fa wan sisa fiti ensrefi di wan bigi kenki kon na ini en libi?

¹⁰ Luku go na fesi èn tan poti prakseri na bun sani. Christina na wan sisa fu Rumeinia di e libi na ini Yapan. A sisa disi ben sari di na Ingrisitongo gemeente fu en  tapu. Ma a no tan prakseri fa sani ben de fosi. Na presi fu dati a bosroiti fu go na a Yapantongo gemeente drape èn a du ala muiti fu preiki na ini Yapantongo. A aksi wan uma fu a presi pe a ben e wroko fosi, fu leri en fu taki Yapantongo moro bun. Na uma ben wani yepi Christina èn a ben feni en bun fu gebroiki a Bijbel nanga a Koloku fu têgo!-brochure fu leri Christina Yapantongo. Boiti taki Christina leri taki Yapantongo moro bun, na uma ben wani sabi moro fu waarheid. Kenki kan kon na ini wi libi di wi no ben fruwakti. Ma te wi e tan luku go na fesi èn te wi e tan prakseri bun sani, dan dati kan tyari blesi kon di wi no ben fruwakti.

11. San yepi wan trowpaar di ben abi moni problema?

¹¹ Du sani gi trawan. Wan trowpaar di e libi na ini wan kondre pe lanti tapu a wroko fu wi bigin abi moni problema di na ekonomia fu a kondre no ben e drai bun srefisrefi. Fa den fiti densrefi? A fosi sani di den du, na taki den pruberi fu libi wan simpel libi. Wan tra sani di den du, na taki den no tan poti prakseri na den eigi problema, ma den bosroiti fu gebroiki moro ten na ini a preikiwroko so taki den ben kan yepi trawan (Tori 20:35). A masra e taki: „Fu di wi ben e teki prati furu na a preikiwroko, meki wi no ben abi so furu ten fu prakseri den problema fu wi èn wi ben abi moro ten fu du san Gado e aksi fu wi.” Te a situwâsi fu wi e kenki, dan wi musu hori na prakseri o prenspari a de fu tan yepi trawan, spesrutu nanga yepi fu a preikiwroko.

12. Fa na eksempre fu na apostel Paulus kan yepi wi fu fiti wisrefi na ini a preikiwroko?

¹² Wi musu man fiti wisrefi tu na ini a preikiwroko. Wi e miti sma fu difrenti bribi, di abi difrenti denki, èn di de fu difrenti presi nanga kulturu. Na apostel Paulus ben man fiti ensrefi èn wi kan leri fu na eksempre fu en. Yesus ben poti Paulus leki „wan apostel gi den trakondre sma” (Rom. 11:13). Dati meki Paulus ben preiki gi Dyu, Grikisma, konisma, pôtisma, tiriman, èn gi kownu. Fu di Paulus ben wani doro na ati fu den difrenti sma disi, meki a tron „ala sani gi ala sortu sma” (1 Kor. 9:19-23). Te a ben e taki nanga sma, dan a ben e hori na prakseri pe den ben e komoto èn san den ben e bribi. Disi yepi en fu fiti ensrefi èn fu taki nanga ibri sma na wan fasi di ben o meki taki den wani sabi moro fu Gado. Wi o man preiki moro bun tu te wi e fiti wisrefi èn te wi e pruberi fu denki san na a moro bun fasi fu yepi ibri sma.

13. Nanga san wi musu luku bun soleki fa 1 Korentesma 8:9 e sori?

¹³ Te wi de klariklari fu fiti wisrefi, dan dati e yepi wi tu fu lespeki a fasi fa trawan e si sani. Fu eksempre, sonwan fu den sisa fu wi lobi poti make-up, ma trawan no lobi dati. Son Kresten e dringi pikinso sopi ten na ten, ma trawan no e dringi sopi srefisrefi. Ala Kresten wani de gosontu ma den e gebroiki difrenti sortu datrayepi. Efu ala ten wi feni taki wi abi leti èn efu wi e pruberi fu overtoigi wi brada nanga sisa fu du san wi e du, dan wi kan meki trawan naki futu èn wi kan tyari pratifasi kon. Wi no ben o wani dati kwetikweti! (Leisi 1 Korentesma 8:9; 10:23, 24) Meki wi go luku tu eksempre di o sori wi fa Bijbel gronprakseri kan yepi wi fu fiti wisrefi na ini a gemeente so taki freide kan tan.

14. Sortu Bijbel gronprakseri wi musu hori na prakseri te wi e bosroiti san wi o weri èn fa wi o moi wisrefi?

 ¹⁴ Den krosi di wi e weri èn a fasi fa wi e moi wisrefi. Yehovah no e poti wet gi wi fu sori wi sortu krosi wi musu weri, ma a e gi wi gronprakseri di o yepi wi ini a tori disi. Wi musu weri krosi di fiti gi anbegiman fu Gado, di e sori taki wi e fiti wisrefi, taki wi no e denki tumusi furu fu wisrefi, èn taki wi de „nanga krin frustan” (1 Tim. 2:9, 10; 1 Petr. 3:3). Dati meki wi no wani weri krosi di e hari sma prakseri tumusi. Bijbel gronprakseri o yepi owruman tu fu no poti wet gi sma fu sori den sortu krosi den musu weri noso fa den musu seti den wiwiri. Fu eksempre, owruman na ini wan gemeente ben wani yepi wan tu yongu brada di ben koti den wiwiri leki wan tu pôpi sma, ma a fasi fa a wiwiri ben de no ben netjes. Fa den owruman ben kan yepi den sondro fu meki wan wet? A kring-owruman ben taigi den owruman fu taigi den brada: „Efu yu de tapu a podium èn den sma e poti moro prakseri na yu wiwiri leki na den sani di yu e taki, dan wan sani no bun na yu krosi èn na a fasi fa yu e moi yusrefi.” A rai disi yepi den yongu brada fu frustan san den ben musu du èn den owruman no ben abi fu meki wan wet. d

15. Sortu Bijbel wet nanga gronprakseri e yepi wi te wi musu teki bosroiti di abi fu du nanga a gosontu fu wi? (Romesma 14:5)

¹⁵ A gosontu fu wi. Ibri Kresten musu bosroiti gi ensrefi fa a o sorgu gi a gosontu fu en (Gal. 6:5). Te Kresten musu bosroiti sortu datrayepi den o teki, dan den musu gi yesi na den wet fu Bijbel di e taigi wi fu no teki brudu èn fu tan fara fu sani di abi fu du nanga falsi gado (Tori 15:20;  Gal. 5:19, 20). Ma na ini tra situwâsi den srefi kan bosroiti sortu datrayepi den o teki. Son sma di siki e suku yepi soso na datra, ma trawan e teki tra sortu yepi. Kande wi e bribi taki wan spesrutu sortu yepi bun noso a no bun. Awinsi fa a no fa, wi musu lespeki a reti di wi brada nanga sisa abi fu teki den eigi bosroiti te a abi fu du nanga a gosontu fu den. Dati meki a bun fu hori den sani disi na prakseri: (1) Na Gado Kownukondre wawan o dresi ala siki fu ala ten (Yes. 33:24). (2) Ibri Kresten musu „de seiker” taki a e teki a yoisti bosroiti te a abi fu du nanga a gosontu fu en. (Leisi Romesma 14:5.) (3) Wi no e krutu sma èn wi no e du sani di kan meki den naki futu (Rom. 14:13). (4) Kresten e sori lobi gi makandra èn den e frustan taki a wánfasi na ini a gemeente prenspari moro a fasi fa den e si sani (Rom. 14:15, 19, 20). Efu wi e hori den sani disi na prakseri, dan wi o man abi wan bun matifasi nanga den brada nanga sisa fu wi èn wi o man yepi fu meki freide tan na ini a gemeente.

16. Fa wan owruman kan sori taki a de klariklari fu fiti ensrefi te a e wroko makandra nanga tra owruman fu a gemeente? (Luku den prenki.)

¹⁶ Owruman musu de klariklari fu fiti densrefi so taki den kan de wan bun eksempre gi trawan (1 Tim. 3:2, 3). Fu eksempre, wan owruman no kan fruwakti taki ala ten den tra owruman e si sani soleki fa en e si sani, soso fu di a owru moro den. A e frustan taki a yeye fu Yehovah kan meki taki wan fu den owruman e taki wan sani di e yepi a skin fu teki wan koni bosroiti. Èn efu moro furu fu den owruman feni en bun fu teki wan bosroiti di Bijbel no e krutu, dan wan owruman di de klariklari fu fiti ensrefi o horibaka gi a bosroiti dati, awinsi a e si sani tra fasi.

17. Sortu blesi Kresten e kisi te den de klariklari fu fiti densrefi?

¹⁷ Kresten e kisi furu blesi te den de klariklari fu fiti densrefi. Wi o man feni en moro bun nanga wi brada nanga sisa èn freide o de na ini a gemeente. Wi e prisiri nanga a pipel fu Yehovah di e kon fu difrenti kulturu èn di abi difrenti fasi. Ma san moro prenspari, na taki wi breiti fu sabi taki wi e teki na eksempre fu Yehovah, a Gado fu wi, di de klariklari fu fiti ensrefi.