1. Sortu tru tori yu leri di yu bigin studeri Bijbel?

 YU E memre den sani ete di yu leri di yu bigin studeri Bijbel? Kande yu ben fruwondru fu kon sabi taki Gado abi wan nen. Kande yu ben breiti di yu leri taki Gado no e pina sma na ini helfaya. Èn a ben musu fu naki yu ati di yu kon sabi taki den lobiwan fu yu di dede o kisi wan opobaka èn taki yu o libi nanga den na ini wan paradijs na grontapu.

2. Boiti taki yu leri sabi den tru tori fu Bijbel, na sortu tra fasi yu go na fesi? (Efeisesma 5:1, 2)

² O moro yu ben e studeri Gado Wortu, o moro yu kon lobi Yehovah. A lobi dati gi yu deki-ati fu du san yu leri. Yu gebroiki Bijbel gronprakseri fu teki moro bun bosroiti. Yu leri fu denki èn fu du san bun fu di yu ben wani plisi Gado. Neleki fa wan pikin e teki na eksempre fu en papa nanga mama di lobi en, na so yu ben e teki na eksempre fu yu hemel Papa.​—Leisi Efeisesma 5:1, 2.

3. San wi kan aksi wisrefi?

³ Wi ben kan aksi wisrefi: ’A lobi di mi abi gi Yehovah kon moro tranga now leki na a bigin? Sensi di mi dopu mi kon de moro leki Yehovah, spesrutu na ini a fasi fa mi e sori lobi gi mi brada nanga sisa?’ Efu „a lobi di yu ben abi biginbigin” kon kowru pikinso, dan no lasi-ati. Wan srefi sortu sani ben pasa nanga den fosi Kresten. Ma Yesus no libi den èn a no o libi wi tu (Openb. 2:4, 7). A sabi taki wi kan leri fu kon abi a lobi baka di wi ben  abi na a bigin di wi kon na ini waarheid.

4. San wi o luku na ini na artikel disi?

⁴ Na ini na artikel disi wi o luku fa wi kan kon abi moro lobi gi Yehovah nanga trawan. Baka dati wi o luku sortu blesi wi srefi èn trawan o kisi te wi e du dati.

5-6. (a) Sortu problema Paulus kisi na ini en diniwroko? (b) San yepi en fu tan dini Yehovah go doro?

⁵ Na apostel Paulus ben de koloku fu di a ben e dini Yehovah, ma a ben kisi furu problema tu. Furu leisi Paulus ben musu teki waka go na farawe presi èn a no ben makelek fu du disi na ini a ten dati. Son leisi te Paulus ben teki waka, dan ’ogri ben kan miti en na tapu liba èn fufuruman ben suku fu du en ogri’. Tra leisi baka, gensman ben fon en srefi (2 Kor. 11:23-27). Èn a no ala ten den Kresten brada nanga sisa ben sori warderi gi a muiti di a ben e meki fu yepi den.​—2 Kor. 10:10; Fil. 4:15.

⁶ San yepi Paulus fu go doro na ini a diniwroko fu Yehovah? Den sani di Paulus ondrofeni èn den sani di a leisi na ini Bijbel, leri en furu fu a fasi fa Yehovah de. Den sani dati meki taki Paulus ben de seiker taki Yehovah Gado lobi en (Rom. 8:38, 39; Ef. 2:4, 5). Èn en srefi ben kon lobi Yehovah nanga en heri ati. Paulus ben sori taki a lobi Yehovah ’di a dini den santawan èn a tan dini den’.​—Hebr. 6:10.

7. San na wán fasi fa wi kan kon abi moro lobi gi Yehovah?

⁷ Wi kan kon abi moro lobi gi Gado te wi e studeri en Wortu fayafaya. Te yu e leisi Bijbel, dan pruberi fu si san ibri pisi e leri yu fu Yehovah. Aksi yusrefi: ’Fa a tori disi e sori mi taki Yehovah lobi mi? Te mi e luku a tori disi, dan sortu reide mi abi fu lobi Yehovah?’

8. Fa begi kan yepi wi fu kon abi moro lobi gi Gado?

⁸ Wan tra fasi fa wi kan kon abi moro lobi gi Yehovah na te wi e begi en ibri dei èn e fruteri en fa wi e firi trutru (Ps. 25:4, 5). Yehovah fu en sei o piki den begi fu wi (1 Yoh. 3:21, 22). Khanh, wan sisa na ini Asia, e taki: „Na a bigin, den sani di mi ben kon sabi fu Yehovah, ben meki taki mi lobi en. Ma mi kon lobi en moro di mi si fa a piki den begi fu mi. Disi meki taki mi ben wani du sani di a feni bun.” b

9. Fa Timoteyus sori taki a ben kon abi moro lobi gi den brada nanga sisa fu en?

⁹ Wan tu yari baka di Paulus tron wan Kresten, a miti wan yongu man di nen Timoteyus. Timoteyus ben lobi Yehovah èn a ben lobi tra sma. Baka wan tu yari Paulus taigi den Filipisma: „Mi no abi nowan tra sma di e denki leki fa [Timoteyus] e denki èn di o sorgu trutru gi den sani di abi fu du nanga unu” (Fil. 2:20). Na ini a tekst disi Paulus no ben prèise Timoteyus fu di a ben orga sani bun noso fu di a ben de wan bun takiman, ma a prèise en fu di a ben man si taki Timoteyus ben lobi den brada nanga sisa trutru. A no de fu taki dati den gemeente pe Timoteyus ben e go, no ben man wakti taki a kon drape na den.​—1 Kor. 4:17.

10. Fa Anna nanga en masra sori lobi gi den brada nanga sisa?

 ¹⁰ Wi e suku fasi tu fu yepi wi Kresten brada nanga sisa (Hebr. 13:16). Luku na eksempre fu Anna di wi ben taki fu en kaba na ini na artikel na fesi. Baka di wan bigi winti ben wai, en nanga en masra go luku wan Kotoigi osofamiri èn den kon si taki a dak fu na oso fu den ben fadon broko. Disi meki taki a famiri no ben abi krin krosi. Anna e taki: „Wi teki den krosi fu den, wi wasi den, wi triki den, wi fow den èn wi tyari den go baka gi a famiri. A no ben de wan bigi sani gi wi, ma disi meki taki wi de heri bun mati nanga den te na a dei fu tide.” A lobi di Anna nanga en masra abi gi den brada nanga sisa meki taki den yepi den nanga wan sani di den ben abi fanowdu na a momenti dati.​—1 Yoh. 3:17, 18.

11. (a) Fa trawan e firi nofo tron te wi e sori taki wi lobi den? (b) Soleki fa Odo 19:17 e taki, dan san Yehovah o du te wi e sori lobi gi trawan?

¹¹ Te wi e libi bun nanga trawan èn wi e sori lobi gi den, dan den kan si taki wi e denki èn du sani leki Yehovah. Èn kande den o warderi a muiti di wi du moro leki san wi sabi. Khanh, di wi ben kari kaba, e prisiri trutru te a e prakseri den wan di ben yepi en. A sisa disi e taki: „Mi de nanga bigi tangi èn mi lobi ala den sisa di ben tyari mi go na ini a preikiwroko. Den kon teki mi na oso, den tyari mi go nyan wan sani, den tyari mi go baka na oso èn den sorgu taki nowan sani miti mi. Now mi e frustan taki den ben musu du furu muiti fu du ala den sani dati. Ma toku den du en èn den du en nanga lobi.” A no de fu taki dati a no ala sma o taki wi tangi gi den sani di wi du gi den.  Khanh e taki disi fu den sma di ben yepi en: „Mi winsi taki mi ben kan pai den baka gi ala den bun sani di den du gi mi, ma mi no sabi pe den e libi now. Ma Yehovah sabi èn mi e begi taki a pai den baka gi mi.” Khanh abi leti. Yehovah e si ala den sani di wi e du gi trawan, srefi efu na wan pikin sani nomo. Yehovah e si ala den sani dati leki wan warti sani èn leki wan paiman di a o pai baka.​—Leisi Odo 19:17.

12. Fa brada kan sori lobi gi a gemeente? (Luku den prenki.)

¹² Efu yu na wan brada, dan fa yu kan sori lobi gi trawan èn du sani fu yepi den? Wan yongu brada di nen Jordan ben aksi wan owruman fa a ben kan yepi moro na ini a gemeente. Na owruman ben prèise en gi a muiti di a ben e du kaba fu go na fesi èn a gi en wan tu rai fa a kan du moro. Fu eksempre, a taigi Jordan taki a ben o bun fu doro fruku na a Kownukondre zaal fu taki trawan odi, fu gi piki na den konmakandra, fu preiki moro nanga en preikiwroko grupu èn fu suku fasi fu yepi trawan nanga den sani di den abi fanowdu. Di Jordan du den sani disi, dan a leri fa fu du wan tu sani moro bun, ma a leri tu fa fu abi moro lobi gi den brada nanga sisa. Jordan leri taki wan brada musu yepi trawan kaba fosi a tron wan dinari. Èn te a tron wan dinari, a e go doro fu yepi den.​—1 Tim. 3:8-10, 13.

13. Fa lobi yepi Brada Christian fu dini baka leki owruman?

¹³ Ma fa a de efu yu ben dini fosi leki dinari noso leki owruman? Yehovah no frigiti a wroko di yu ben du fosi èn fa yu ben e du a wroko dati nanga lobi (1 Kor.  15:58). A e si a lobi tu di yu e tan sori gi trawan. Wan brada di nen Christian ben lasi-ati di den ben puru en leki owruman. Ma a e taki: „Fu di mi lobi Yehovah, meki mi bosroiti fu du ala san mi man fu dini Yehovah awinsi mi lasi mi grani.” Baka wan pisi ten den poti en baka leki owruman. Christian e taki: „Mi ben frede pikinso fu dini baka leki owruman. Ma efu Yehovah wani taki mi du en, dan mi o du dati fu di mi lobi en èn mi lobi mi brada nanga sisa.”

14. San yu leri fu den sani di wan sisa fu Georgia taki?

¹⁴ Den futuboi fu Yehovah e sori lobi tu gi tra sma di no de Kotoigi (Mat. 22:37-39). Fu eksempre, Elena, wan sisa na ini a kondre Georgia, e taki: „Na a bigin, na lobi gi Yehovah wawan ben meki taki mi ben e preiki gi sma. Ma o moro mi ben kon lobi mi hemel Papa, o moro mi ben kon lobi tra sma. Mi ben denki sortu problema den ben kan abi èn fu san mi ben kan taki nanga den fu man doro den ati. O moro mi ben denki so fu den, o moro mi ben wani yepi den.”​—Rom. 10:13-15.

15-16. Soleki fa den prenki e sori, sortu blesi wi o kisi te wi e sori lobi gi trawan?

¹⁵ Te wi e sori wi brada nanga sisa taki wi lobi den, dan a no den wawan e kisi wini fu dati. Di a COVID-19 siki panya  na ala sei, dan wan brada di nen Paolo nanga en wefi yepi furu owru sisa fu preiki nanga den telefon noso tablet. Wan fu den sisa di ben feni en muilek na a bigin, ben kon leri bakaten fa fu wroko nanga en telefon. Disi meki taki a ben man gebroiki en telefon fu kari den famiriman fu en kon na a Memrefesa. Siksitenti famiriman fu en ben kon na a konmakandra di ben hori na Internet. A sisa disi nanga den famiri fu en kisi wini trutru fu a muiti di Paolo nanga en wefi ben meki fu leri den fa fu preiki nanga yepi fu telefon. Bakaten a sisa disi skrifi Paolo taki: „Grantangi taki yu leri den owruwan fa fu wroko nanga a telefon noso tablet fu den. Noiti mi o frigiti fa Yehovah e sorgu gi wi èn o furu muiti unu du fu yepi wi.”

¹⁶ Den sortu ondrofenitori disi leri Paolo wan prenspari sani. A sani disi memre en taki lobi prenspari moro sabi noso den sani di wan sma man du. A e taki: „Fosi mi ben e dini leki kring-owruman. Tide na a dei, mi e frustan taki aladi den preikiman frigiti den lezing di mi ben hori, den no frigiti den sani di mi du gi den.”

17. Suma o kisi wini tu te wi e sori lobi gi trawan?

¹⁷ Te wi e sori lobi gi trawan, dan wi srefi e kisi wini na ala sortu fasi. Jonathan, di e libi na ini New Zeeland, e taki dati a sani disi tru. Wan satra bakadina di a son ben faya, a ben si wan pionier brada na sei pasi di ben e preiki en wawan. Jonathan bosroiti fu wroko nanga a pionier tapu satra bakadina. Na a ten dati a no ben sabi ete fa en srefi ben o kisi wini fu a bun sani disi di a du. Jonathan e taki: „Na a ten dati mi no ben lobi a preikiwroko. Ma di mi si fa a pionier ben e gi leri èn fa a ben abi bun bakapisi na ini a preikiwroko, dan mi kon lobi a preikiwroko trutru. Mi feni wan bun mati tu di yepi mi fu go na fesi na yeyefasi, fu lobi a preikiwroko, èn fu kon moro krosibei na Yehovah.”

18. San Yehovah wani taki wi du?

¹⁸ Yehovah wani taki wi alamala kon abi moro lobi gi en nanga trawan. Soleki fa wi leri, dan wi kan kon abi moro lobi gi Yehovah te wi e leisi en Wortu, te wi e denki dipi fu en, èn te wi e begi en ibri dei. Wi kan kon abi moro lobi gi wi brada nanga sisa te wi e yepi den nanga sani di den abi fanowdu. O moro wi lobi Yehovah nanga wi brada nanga sisa, o moro wi o kon krosibei na den. Èn wi o abi den mati dati fu têgo!