1-2. Na sortu fasi wi kan taki dati wan Kresten de leki wan bun hei gebow? (1 Korentesma 15:58)

 NA INI 1978, sma ben meki wan bun hei gebow na Tokio, Yapan. A ben abi 60 verdieping. Sma ben aksi densrefi fa a gebow ben o man tan tanapu fu di gronseki ben pasa furu na ini a foto dati. San den sabiman du fu lusu a problema? Den meki a gebow na so wan fasi taki a tranga, ma a man beni pikinso tu efu a gron e seki. Kresten de neleki a gebow dati. Fa so?

² Wan Kresten musu tanapu kánkan, ma a musu man beni tu. Wan Kresten musu tranga èn a musu tan gi yesi na den wet fu Yehovah èn libi soleki fa Gado wani. (Leisi 1 Korentesma 15:58.) So wan sma de „klariklari fu gi yesi” èn a no o trangayesi Gado wet. Ma na a tra sei a no musu de wan sma di e hori nomo na san a e prakseri. A musu fiti ensrefi tu te a bun fu du dati na ini wan spesrutu situwâsi noso te a de fanowdu srefi (Yak. 3:17). Wan Kresten di leri fu si sani na a yoisti fasi disi, no o strak tumsi. Ma a no abi a denki tu taki a mag du ala sani. Na ini na artikel disi wi o luku fa wi kan tanapu kánkan. Wi o luku feifi sani tu di Satan e gebroiki fu meki en muilek gi wi fu tanapu kánkan èn wi o si fa wi kan kakafutu gi den sani di a e pruberi.

3. Sortu wet Yehovah gi na ini Tori fu den apostel 15:28, 29?

³ Yehovah na a moro heiwan di abi a reti fu meki wet, èn ala ten a e sorgu taki den wet fu en no muilek gi en pipel  fu frustan (Yes. 33:22). Fu eksempre, a tiri skin na ini a fosi yarihondro ben kari dri fasi fa den Kresten ben musu tan tanapu kánkan: (1) drai baka gi afkodrei, anbegi Yehovah wawan, (2) lespeki a wet fu Yehovah taki brudu santa èn (3) fu libi wan krin libi soleki Bijbel e taki. (Leisi Tori fu den apostel 15:28, 29.) Fa Kresten na ini a ten disi kan tan gi yesi na Yehovah na ini den dri afersi disi?

4. Fa wi e sori taki wi e anbegi Yehovah wawan? (Openbaring 4:11)

⁴ Wi no e du afkodrei, wi e anbegi Yehovah wawan. A ben taigi den Israelsma fu anbegi en wawan (Deut. 5:6-10). Èn di Yesus kisi tesi fu Didibri, dan Yesus ben taki krin taki na Yehovah wawan wi musu anbegi (Mat. 4:8-10). Fu dati ede wi no e anbegi kerki-popki. Èn wi no e si libisma leki gado, soleki kerki-fesiman, politiekman, noso pôpi sportman, pokuman, noso sma di e prei na ini felem. Wi e tanapu na a a sei fu Yehovah èn wi e anbegi soso a wan di „meki ala sani”.​—Leisi Openbaring 4:11.

5. Fu san ede wi e lespeki a wet fu Yehovah di e taki dati a libi nanga brudu santa?

⁵ Wi e lespeki a wet fu Yehovah di e taki dati a libi nanga brudu santa. Fu san ede? Fu di Yehovah e taki dati brudu na libi, di de wan tumsi moi kado fu en (Lef. 17:14). A fosi leisi di Yehovah gi libisma pasi fu nyan meti, a taigi den fu no nyan a brudu (Gen. 9:4). A ben taki a sani disi ete wan tron di a gi den Israelsma a Wet fu Moses (Lef. 17:10). Èn a ben meki a tiri skin na ini a fosi yarihondro taigi ala Kresten fu „tan fara . . . fu brudu” (Tori 15:28, 29). Wi e tan gi yesi na den wortu disi te wi musu suku datrayepi. b

6. San wi musu du fu man libi wan krin libi soleki fa Yehovah wani?

⁶ Wi e du soifri fa Yehovah wani taki wi musu libi wan krin libi (Hebr. 13:4). Na wan agersifasi Paulus e gi wi a rai fu „kiri” den difrenti pisi fu wi skin. Dati wani taki dati wi musu du ala san wi man fu puru iniwan sondu firi di wi abi. Wi no e luku sani noso du sani di kan meki wi go du hurudu (Kol. 3:5; Yob 31:1). Te wi abi a firi fu du wan sani di no bun, dan wantewante wi e weigri fu prakseri fu sani noso fu du sani di kan pori a matifasi di wi abi nanga Gado.

7. San wi musu bosroiti fu du, èn fu san ede?

⁷ Yehovah wani taki wi ’gi yesi na en nanga wi heri ati’ (Rom. 6:17). Den wet fu en bun gi wi ala ten èn wi no kan kenki den wet fu en (Yes. 48:17, 18; 1 Kor. 6:9, 10). Wi e suku fu plisi Yehovah èn wi wani abi a srefi denki leki a Psalm skrifiman di taki: „Mi meki mi ati gi yesi na den markitiki fu yu mi heri libi langa, iya, teleki mi dede” (Ps. 119:112). Ma Satan o pruberi fu meki en muilek gi wi fu tanapu kánkan. Sortu sani a e gebroiki fu du dati?

8. Fa Satan e gebroiki frufolgu fu meki en muilek gi wi fu tanapu kánkan?

⁸ Frufolgu. Didibri e du ogri nanga wi èn a e poti druk na wi tapu so taki wi no tanapu kánkan moro. A wani „swari”  wi, so taki wi no de mati fu Yehovah moro (1 Petr. 5:8). Fu di Kresten na ini a fosi yarihondro ben tanapu kánkan, meki sma tapu skreki gi den, den fon den, èn den kiri den (Tori 5:27, 28, 40; 7:54-60). Na ini a ten disi Satan e tan frufolgu wi na a fasi disi. Wi kan si disi krin na ini den ogri-ati sani di sma e du nanga wi brada nanga sisa na Rosiakondre èn na tra kondre. Wi e si dati tu te sma e gens wisrefi.

9. Gi wan eksempre di e sori taki wi musu luku bun nanga triki.

⁹ Triki. Boiti frufolgu, Satan e gebroiki „triki” tu (Ef. 6:11). Luku na eksempre fu Brada Bob di ben de na ati-oso fu du wan bigi oparâsi. A ben taigi den datra taki a no ben o teki brudu awinsi san o pasa. A datra di ben o du na oparâsi agri fu lespeki en bosroiti. Ma a neti bifo na oparâsi, wan tra datra go na Bob baka di en famiri go na oso. A taigi Bob taki den no ben o gebroiki brudu kande ma den ben o abi en krosibei efu a de fanowdu. Kande a datra ben denki taki Bob ben o kenki en prakseri efu en famiri no ben de nanga en. Ma Bob tanapu kánkan, a taigi en taki den no ben musu gi en brudu awinsi san o pasa.

10. Fu san ede libisma denki kan meki wi fadon? (1 Korentesma 3:19, 20)

¹⁰ Libisma denki. Efu wi e luku sani libisma fasi, dan a sani dati kan meki wi drai baka gi Yehovah èn den wet fu en. (Leisi 1 Korentesma 3:19, 20.) Nofo tron „a koni fu a grontapu disi” e gi sma deki-ati fu du san densrefi wani, na presi fu arki Gado. Wan tu Kresten na Pergamum nanga Tiatira ben teki a denki abra fu den sma na ini den kondre dati di ben anbegi falsi gado èn di ben du hurudu. Yesus ben gi ala tu gemeente seryusu rai fu di den ben si taki seks hurudu ben feni presi na den mindri ma den no ben du noti fu tapu en (Openb. 2:14, 20). Na ini a ten disi sma kan kori wi fu teki fowtu denki abra. Famiriman nanga sma di wi sabi kan meki wi denki taki wi no musu de so strak èn taki wi mag pasa den wet fu Yehovah. Fu eksempre, den kan taki dati yu no abi fu libi wan krin libi èn taki den wet fu Bijbel a no gi a ten disi moro.

11. San wi no musu du efu wi wani tanapu kánkan?

¹¹ Kande son leisi wi e denki taki Yehovah no e taigi wi krin fa sani musu waka. A kan pasa srefi taki wi wani go „du sani di no skrifi na ini den Santa Buku” (1 Kor. 4:6). Den kerki fesiman na ini a ten fu Yesus ben meki a fowtu disi. Boiti a Wet fu Gado, densrefi ben meki wet di ben de leki wan hebi lai na tapu sma skowru (Mat. 23:4). Nanga yepi fu en Wortu èn nanga yepi fu en organisâsi Yehovah e taigi wi krin fa sani musu waka. A no de fanowdu fu poti moro sani na tapu den sani di Yehovah taki (Odo 3:5-7). Fu dati ede wi no e du sani di no skrifi na ini Bijbel, èn wi no e meki wet gi afersi pe brada nanga sisa mag teki den eigi bosroiti.

12. Fa Satan e gebroiki „soso takitaki di e bedrigi sma”?

¹² Bedrigifasi. Satan e gebroiki „soso takitaki di e bedrigi sma” èn „den sani di e tiri grontapu” fu kori sma èn fu tyari pratifasi kon na mindri sma (Kol. 2:8). Na ini a fosi yarihondro wan tu fu den sani dati ben de filosofia di komoto fu libisma denki, Dyu leri di no komoto fu Gado Wortu, èn sosrefi a leri taki Kresten musu hori densrefi na a Wet fu Moses.  Den sani disi ben kori sma fu no poti prakseri na Yehovah, a Sma di e gi koni. Na ini a ten disi Satan e gebroiki telefisi, radio, nanga Internet fu panya tori sondro taki den abi buweisi fu dati, èn sosrefi falsi nyunsu di politiekman wani taki wi musu bribi. Yu ben abi furu fu den sortu tori disi na a ten fu a COVID-19 pandemie. c Yehovah Kotoigi di arki den rai fu na organisâsi fu wi kon si taki a no ben de fanowdu fu bruya leki den sma di ben arki den nyunsu di no tru.​—Mat. 24:45.

13. Fu san ede wi musu luku bun taki sani no puru wi prakseri?

¹³ Sani di e puru a prakseri. Wi no musu frigiti fu poti prakseri na „den moro prenspari sani” (Fil. 1:9, 10). Te wi e meki sani puru wi prakseri, dan wi e lasi furu ten nanga krakti di wi ben kan gebroiki gi moro bun sani. Aladei sani soleki nyan, dringi, prisiri nanga wroko kan puru wi prakseri efu wi e meki den tron den moro prenspari sani na ini wi libi (Luk. 21:34, 35). Boiti dati, ibri dei wi e yere nyunsu fu sma di e protesteer, èn politiekman di e strei nanga makandra. Wi musu sorgu taki den sani disi no puru wi prakseri. Efu wi no luku bun, wi kan teki sei na ini wi ati. Satan e gebroiki ala den fasi disi fu meki wi kon swaki so taki wi no du moro san bun. Meki wi luku fa wi kan kakafutu gi den muiti di a e meki èn fa wi kan tan tanapu kánkan.

14. San na wán sani di kan yepi wi fu tan tanapu na a sei fu Yehovah?

¹⁴ Prakseri fu san ede yu gi yusrefi abra na Yehovah èn teki dopu. Yu ben du den sani dati fu di yu ben wani tanapu na a sei fu Yehovah. Prakseri baka san overtoigi yu taki yu feni a reti pasi. Yu ben kon sabi soifri suma na Yehovah èn yu kisi lespeki gi en èn yu kon lobi en leki yu hemel Papa. Yu ben kon abi bribi èn yu kisi deki-ati fu abi berow. Lobi na ini  yu ati meki taki yu tapu nanga sani di no bun, èn yu go libi soleki fa Gado wani. Yu ben firi bun di yu kon frustan taki Gado gi yu pardon (Ps. 32:1, 2). Yu go na den Kresten konmakandra èn yu bigin fruteri trawan fu den tumsi moi sani di yu leri. Leki wan dopu Kresten yu e waka a pasi now di e go na libi, èn yu o du ala san yu man fu tan na tapu a pasi dati​—Mat. 7:13, 14.

15. Fu san ede a bun fu studeri èn fu denki dipi fu san wi leisi?

¹⁵ Studeri Gado Wortu èn denki dipi fu en. Neleki fa wan bon kan tanapu steifi te den rutu fu en e go dipi na ini a gron, na so wi kan tanapu kánkan tu efu wi abi wan tranga bribi na ini Gado Wortu. Te wan bon e gro, dan den rutu fu en e go moro dipi èn den e panya go moro fara. Te wi e studeri èn e denki dipi fu san wi leisi, dan a bribi fu wi e kon moro tranga èn wi e kon si moro krin taki a moro bun fu libi leki fa Gado wani (Kol. 2:6, 7). Prakseri fa den wet èn den rai fu Yehovah ben kibri den dinari fu en na ini owruten èn fa a yepi den. Fu eksempre, Esekièl ben luku fini di wan engel ben e teri o bigi a tempel na ini a fisyun ben de. A fisyun disi ben gi Esekièl krakti èn a e leri wi fa wi kan hori wisrefi na den wet fu a tru anbegi. d (Esek. 40:1-4; 43:10-12). Wi kan kisi wini tu te wi e teki a ten fu denki fu den moro dipi sani na ini Gado Wortu.

16. Fa a tranga lobi di Bob abi gi Yehovah ben de wan kibri gi en? (Psalm 112:7)

¹⁶ Kon lobi Yehovah nanga yu heri ati. Kownu David ben taki dati ala ten a o tan lobi, di a singi: „Mi o tan lobi yu nanga mi heri ati, mi Gado” (Ps. 57:7). Wi kan lobi Yehovah nanga wi heri ati tu. Wi kan du dati te wi e frutrow dorodoro na en tapu. (Leisi Psalm 112:7.) Luku fa disi ben yepi Bob di kari na a bigin fu na artikel disi. Di den fruteri en taki den ben o hori brudu krosibei efu den ben abi dati fanowdu, dan sondro draidrai a taki dati efu den ben o gi en brudu, a ben o  gwe libi na ati-oso wantewante. Bakaten Bob taki: „Noiti mi tweifri na san mi ben o du èn mi no ben frede san ben o pasa.”

17. San wi kan leri fu na ondrofenitori fu Bob? (Luku a fowtow.)

¹⁷ Bob no ben tweifri fu di langa ten bifo a go na ati-oso a ben teki a bosroiti fu tanapu kánkan. Na a fosi presi, a ben wani meki Yehovah ati prisiri. Na a di fu tu presi, a ondrosuku finifini san Bijbel nanga den Bijbel publikâsi e taki fu a libi nanga brudu di de santa sani. Na a di fu dri presi, a ben abi na overtoigi taki Yehovah ben o blesi en efu a gi yesi na En. Wi owktu kan tanapu kánkan awinsi sortu tesi miti wi.

18. Fa na eksempre fu Barak e leri wi fu frutrow tapu Yehovah? (Luku a prenki na tapu a kafti.)

¹⁸ Frutrow tapu Yehovah. Luku fa Barak ben abi bun bakapisi fu di a ben frutrow tapu a tiri fu Yehovah. Na a ten dati, den Israelsma no ben abi nowan schild nanga nowan lansri, ma toku Yehovah taigi en fu go feti nanga den srudati fu a legre-edeman Sisera fu Kanan, aladi den ben abi furu fetisani (Krut. 5:8). A profeiti-uma Debora ben taigi Barak fu saka kon fu den bergi go miti Sisera nanga den 900 asiwagi fu en. Drape pe a gron ben plata a ben o muilek gi den Israelsma fu feti nanga den srudati na ini den asiwagi. Ma toku Barak gi yesi. Di den srudati saka fu Tabor-bergi, Yehovah meki hebi alen saka kon. Den asiwagi fu Sisera fasi na ini a tokotoko, èn na so Yehovah meki Barak wini a feti (Krut. 4:1-7, 10, 13-16). Yehovah o meki wi wini tu efu wi e frutrow na en tapu èn tapu a tiri di a e gi nanga yepi fu en organisâsi.​—Deut. 31:6.

19. Fu san ede yu wani tanapu kánkan?

¹⁹ Solanga wi e libi na ini a grontapu disi, wi o abi fu tan feti fu tanapu kánkan (1 Tim. 6:11, 12; 2 Petr. 3:17). Meki wi abi a fasti bosroiti fu no degedege te sma e frufolgu wi, te sma e gebroiki triki, te sma wani kori wi fu teki libisma denki abra, èn te sani wani puru wi prakseri (Ef. 4:14). Na presi fu dati, meki wi tanapu kánkan èn tan dini Yehovah fayafaya, èn meki wi gi yesi na En ala ten awinsi san e pasa. Ma na a srefi ten wi no musu du sani pasa marki, ma wi musu fiti wisrefi. Na ini na artikel di e kon wi o taki fa Yehovah nanga Yesus na den moro bun eksempre fu sma di ben fiti densrefi.