Mi papa ben de wan owruman na ini a kerki na ini a birti fu wi. Dati meki ibri wiki a ben e seni mi nanga mi sisa go na sonde-skoro na kerki. Baka dati wi ben e go nanga en na kerki 11 yuru mamanten. Èn bakadina wi ben e go nanga mi mama na a Kownukondre zaal. A ben makelek fu si den difrenti na mindri den tu bribi disi.

Mi mama ben fruteri den bun mati fu en, Bob nanga Marion Hutcheson, den nyun sani san a ben leri èn densrefi tron Yehovah Kotoigi tu. Na ini 1958 famiri Hutchesons tyari mi nanga den dri boi fu den go na a „Goddelijke wil”-kongres di ben hori na ini New York City. A kongres disi ben hori aiti dei langa. Now fosi mi e frustan o furu muiti den ben meki fu tyari mi go èn dati ben de wan fu den moro moi sani san pasa na ini mi libi.

Di mi ben yongu wi ben e libi na wan boitipresi èn a ben switi gi mi fu sorgu gi den meti. Mi ben denki srefi fu tron wan datra di e luku meti. Mi mama ben taki fu a sani disi nanga wan owruman fu a gemeente. Na wan switi fasi a brada memre mi taki wi e libi na ini „den lasti dei” èn a aksi mi sortu bakapisi a ben o abi gi mi nanga Yehovah efu mi ben bosroiti fu go na universiteit wan tu yari (2 Tim. 3:1). Na so mi bosroiti fu no go na universiteit.

 Now mi ben e aksi misrefi san mi ben musu du te mi kaba middelbaar skoro. Mi ben e go na ini a preikiwroko ibri weekend, ma mi no ben e prisiri fu du a preikiwroko èn mi no ben e si leki mi ben o man pionier tu. Na a pisi ten dati mi papa nanga mi omu, di no ben de Yehovah Kotoigi, gi mi a deki-ati fu go wroko gi wan bigi verzekering bedrijf na ini Toronto. Mi omu ben abi wan hei posisi drape, dati meki mi teki a wroko.

Mi ben e gebroiki furu fu mi ten fu du mi wroko di mi ben de na ini Toronto èn mi ben e moksi furu nanga sma di no ben de Yehovah Kotoigi. Den sani disi ben meki taki mi ben e misi konmakandra nanga den preikiwroko. Na ini a bigin mi ben e tan nanga mi opa di no ben de wan Kotoigi, ma baka di a dede mi ben abi fu suku wan tra presi fu tan.

Famiri Hutchesons, di ben tyari mi go na a kongres na ini 1958, ben de leki wan papa nanga mama gi mi. Den aksi mi fu kon tan na ini den oso èn den yepi mi fu tron wan moro bun mati fu Yehovah. Mi nanga John, wan fu den boi fu den, dopu na ini 1960. John bigin pionier èn a sani dati ben gi mi deki-ati fu du moro na ini a preikiwroko. Den brada na ini a gemeente ben si taki mi ben e go na fesi èn te fu kaba mi kisi a frantwortu fu teki fesi na a konmakandra di wi e kari now a Wi Kresten libi nanga a preikiwroko konmakandra.

Na ini 1966, mi trow nanga Randi Berge, wan fayafaya pionier sisa di ben e angri fu dini pe moro yepi de fanowdu. Wi kring-opziener ben poti prakseri na wi èn a gi wi deki-ati fu go yepi a gemeente fu Orillia na ini Ontario. Na so wi teki ala wi sani èn wi gwe.

Di wi doro na ini Orillia, mi bigin wroko makandra nanga Randi leki gewoon pionier. A ben meki mi kisi a srefi faya di a ben abi fu du a wroko disi! Di mi bigin du a wroko disi nanga mi heri ati, mi kon abi moro prisiri fu gebroiki Bijbel fu yepi sma fu frustan den tru tori fu Bijbel. A ben gi wi furu prisiri fu yepi wan trowpaar na ini Orillia fu kenki den libi èn fu kon dini Yehovah.

Wan leisi di wi go na Toronto, wi miti Arnold MacNamara, di ben de wan fu den brada di ben e teki fesi na Betel. A aksi wi efu wi ben wani du a spesrutu pionierwroko. Direk mi piki: „Iya seiker, solanga un no seni wi go na Kibek!” Mi ben bigin denki a srefi fasi leki den Ingrisitongo sma di ben e tan na ini Kanada. Den no ben e denki bun fu den sma na ini Kibek di ben e taki Fransitongo. Na a ten dati sma ben e opo densrefi teige lanti èn den ben wani taki Kibek prati fu Kanada.

Ne Arnold taigi mi: „Nownow Kibek na a wan-enkri presi pe a bijkantoro e seni spesrutu pionier go.” Mi piki wantewante taki wi ben o go. Mi ben sabi kaba taki Randi ben o wani go dini drape. Bakaten mi kon si taki disi ben de wan fu den moro bun bosroiti di wi teki na ini wi libi!

Wi kisi Fransi les so wan feifi wiki, èn baka dati mi, Randi nanga ete wan trowpaar go na Rimouski, di de so wan 540 kilometer na a noord-owstusei fu Montreal. Wi ben musu leri furu sani ete. Dati ben de krin fu si di mi leisi wan tu bekendmaking na a konmakandra. Na presi fu ben taki dati wi o kisi fisiti fu brada nanga sisa fu Oostenrijk na a kongres di ben e kon, mi ben gebroiki wan srefi sortu wortu di ben wani taki dati wi ben o abi wan tu stroisi-fowru leki fisitiman.

Di wi ben e dini na ini Rimouski wi kisi yepi fu brada nanga sisa Huberdeaus nanga den tu meisje fu den èn ete fo fayafaya sisa di no ben trow. Famiri Huberdeaus ben abi wan oso di ben abi 7 sribikamra èn ala den pionier di ben e libi drape ben e yepi fu pai a yuru-oso makandra. Wi ben e kari en a White House fu di a ben abi weti pilari na fesisei fu na oso. Furu leisi so wan 12 te go miti 14 sma ben e libi drape. Leki spesrutu pionier mi nanga Randi ben gwenti fu preiki na mamanten, bakadina èn na neti. Dati meki wi ben breiti taki ala ten wan sma ben de fu go nanga wi na ini a preikiwroko, srefi na ini winter te a presi ben kowru.

Wi ben kon gwenti den pionier disi so te taki den ben kon de leki wi famiri. Son leisi wi ben e meki wan udufaya na dorosei noso wi ben abi dei pe wi ben e bori makandra. Wan fu den brada ben sabi prei poku bun, dati meki furu leisi wi ben e singi èn dansi tapu sonde neti.

Furu sma na ini Rimouski ben wani sabi moro fu Bijbel. Na ini feifi yari nomo wi ben man si fa difrenti Bijbelstudie ben e go na fesi èn dopu. A ben gi wi furu prisiri fu si fa a gemeente ben gro. Te fu kaba wi ben abi so wan 35 preikiman.

A preikiwroko na ini Kibek leri wi furu sani. Wi si fa Yehovah yepi wi na ini a preikiwroko èn fa a sorgu gi san wi ben abi fanowdu. Wi leri tu fu kon lobi a Fransitongo, den sma di e taki a tongo dati èn a kulturu fu den. Disi yepi wi fu kon lobi tra kulturu tu.​—2 Kor. 6:13.

Baka dati a Bijkantoro seni wi go na a foto Tracadie di de na a owstusei syoro fu New Brunswick. Wi no ben fruwakti a sani disi. Na pas wi ben teken wan kontrakt fu yuru wan oso èn mi ben e gi les na skoro wan tu dei na ini a wiki. Boiti dati, wan tu fu den Bijbelstudie fu wi ben bigin pas nanga a preikiwroko èn wi ben e bow wan nyun Kownukondre zaal.

Wi begi a heri weekend fu a tori èn wi go luku a foto Tracadie. A ben de heri tra fasi leki Rimouski. Ma wi bosroiti fu go yepi drape fu di wi ben e frustan taki na Yehovah ben wani taki wi go. Wi libi ala sani gi Yehovah èn wi si fa a sorgu taki ala  sani waka bun (Mal. 3:10). Fu di Randi lobi Yehovah trutru, meki a no ben denki ensrefi nomo èn a no ben e teki sani tumsi seryusu tu. Disi ben meki en moro makelek gi wi fu froisi.

Robert Ross ben de a wan-enkri owruman di ben e dini drape. En nanga en frow Linda, ben pionier drape èn baka di den kisi den fosi pikin den bosroiti fu tan yepi drape. Den gi mi nanga Randi so furu deki-ati. Aladi den ben abi wan pikin boi, tog den ben de fayafaya na ini a preikiwroko èn den ben sori switifasi gi wi.

Baka di wi dini so wan tu yari na ini Tracadie, wi kisi wan tra wroko baka di wi no ben fruwakti. Wi kisi a kari fu go dini na ini a kringwroko. Wi dini 7 yari na ini na Ingrisitongo kring èn baka dati wi go dini na ini a Fransitongo kring na ini Kibek. Brada Léonce Crépeault ben de a distrikt-opziener fu wi na ini Kibek. A ben lobi fu prèise mi te mi ben hori lezing, ma bakaten a ben lobi fu aksi mi: „Fa yu ben kan hori en na so wan fasi taki sma kan si fa den kan fiti san den leri?” a A sani disi yepi mi fu poti prakseri na a fasi fa mi e hori lezing èn fu du en na so wan fasi taki a makelek fu frustan.

Wan fu den wroko di mi ben kisi fu du èn san mi no o frigiti noiti, na wan san mi ben musu du na a „Zegevierend geloof”-Internationaal kongres di ben hori na ini Montreal na ini 1978. Mi ben musu wroko na a nyanyan afdeling èn wi ben e fruwakti so wan 80.000 sma. Ma sani ben seti tra fasi a leisi disi. Ala sani ben nyun: den sani di wi ben musu gebroiki fu sreka a nyanyan, den nyanyan san wi ben musu sreka èn a fasi fa wi ben musu sreka en. Wi ben abi 20 bigi friezer, ma son leisi den no ben wroko bun. Wi no ben man go seti ala sani na ini a stadium a dei na fesi, fu di sma ben yuru en fu hori sport. Na pas mindrineti fosi a dei fu a kongres wi ben man bigin sreka sani drape èn wi ben abi fu leti den onfu fosi son opo fu ben kan meki brede nanga te gi den sma! Wi ben weri, ma mi leri furu fu a tranga wroko fu den brada nanga sisa di ben kon yepi. Mi leri furu tu fu a lepi fasi fu den èn taki den no ben e teki ala sani tumsi seryusu. Wi ben man wroko bun nanga makandra èn te leki now wi nanga den na bun mati. A ben gi furu prisiri fu de na so wan prenspari kongres na ini Kibek, a srefi presi pe hebi tesi ben miti den brada nanga sisa na a ten fu 1940 te go miti 1950!

 Mi leri furu tu fu den tra owruman na a kongres di ben hori na Montreal. Wan leisi David Splane, di e dini now na ini a Tiri Skin, ben e teki fesi na a kantoro di e orga den kongres. Na a kongres di ben hori baka a wan dati den brada ben aksi mi fu du a wroko dati, ma David yepi mi fu du a wroko.

Na ini 2011, baka di wi dini 36 yari na ini a kringwroko, den aksi mi fu yepi leki wan fu den leriman na a Skoro gi gemeente owruman. Na ini tu yari mi nanga Randi sribi na tapu 75 difrenti bedi, ma dati ben de noti te wi luku den blesi di wi kisi. Na a kaba fu ibri wiki, den owruman ben e warderi en srefisrefi fu di den ben e si taki a Tiri Skin ben wani taki den de bun mati nanga Yehovah.

Bakaten mi gi leri na a Skoro gi Kownukondre preikiman. Furu leisi den studenti ben e firi leki den weri tumsi èn den ben denki taki den no ben o man du ala sani fu di a schema fu den ben druk. Den ben sidon so wan 7 yuru na ini klas fu kisi les, den ben musu gebroiki so wan 3 yuru ibri neti fu meki den huiswerk èn ibri wiki den ben musu hori 4 noso 5 prati. Mi nanga a tra brada di ben e gi den leri ben sori den taki den no ben o man du ala den sani disi efu Yehovah no yepi den. Ibri leisi baka mi ben si fa den studenti ben e prisiri te den ben si taki den ben man du moro leki san den ben denki, fu di den ben frutrow tapu Yehovah.

Fu di mi mama ben e poti prakseri na trawan meki dati yepi den Bijbelstudie fu en fu go na fesi. A yepi mi papa tu fu kenki a fasi fa a ben e denki fu waarheid. Dri dei baka di mi mama dede, a kon arki wan lezing sondro taki wi ben fruwakti dati. Èn a tan kon na den konmakandra na ini den 26 yari di pasa. Noiti mi papa dopu, ma den owruman fu a gemeente taigi mi taki ala ten en ben de a fosi sma di ben doro na den konmakandra ibri wiki.

Mi mama ben de wan bun eksempre tu gi mi nanga den sisa fu mi. Ala den dri sisa fu mi nanga den masra fu den e dini Yehovah fayafaya. Tu fu den e wroko na Betel. A wan de na a Betel fu Portugal èn a trawan de na Haiti.

Now mi nanga Randi e dini leki spesrutu pionier na ini Hamilton na Ontario. Di wi ben e du a kringwroko wi ben lobi fu go nanga tra brada nanga sisa na den gobaka nanga Bijbelstudie fu den. Ma now wisrefi e prisiri fu si fa wi eigi Bijbelstudie e go na fesi. O moro wi e tron bun mati fu wi brada nanga sisa na ini wi nyun gemeente, o moro wi e kisi deki-ati te wi e si fa Yehovah e horibaka gi den na ini bun ten èn na ini takru ten.

Wi e warderi en trutru taki so furu sma ben broko den ede nanga wi na ini den ten di pasa. Dati meki wisrefi e pruberi fu sori taki wi e ’broko wi ede trutru’ nanga trawan. Wi e pruberi fu gi den deki-ati fu kon lobi Yehovah moro nanga moro (2 Kor. 7:6, 7). Fu eksempre, na ini wan osofamiri pe a mama, a boi nanga den tu meisje ben e du a furuten diniwroko, wi aksi a papa efu oiti a ben denki fu du a pionierwroko. A taki dati a ben e horibaka gi dri pionier. Dati meki mi aksi en: „Yu man horibaka gi den na wan moro bun fasi leki fa Yehovah e du dati?” Mi gi en deki-ati fu firi a prisiri san den e firi. Siksi mun baka dati a tron wan pionier.

Mi nanga Randi o tan „fruteri den sma di musu kon ete” fu den „bigi sani” di Yehovah du èn wi howpu taki densrefi o prisiri fu dini Yehovah leki fa wi e prisiri fu du dati.​—Ps. 71:17, 18.