1. Fu san ede a bun fu sreka wisrefi gi rampu?

 TE WI de srekasreka gi wan sani, dan dati kan kibri wi libi. Fu eksempre te wan rampu pasa, dan moro furu fu den sma di e tan na libi èn e yepi trawan, na den wan di ben sreka densrefi na fesi. Wan organisâsi na ini Europa di e pruberi fu yepi sma, ben taki: „Te sma sreka densrefi bun na fesi, dan dati kan kibri den libi.”

2. Fu san ede wi musu sreka wisrefi gi a bigi banawtu? (Mateyus 24:44)

² A „bigi banawtu” o bigin wantronso (Mat. 24:21). Ma a bigi banawtu no o skreki ala sma, fu di tra fasi leki den rampu di e miti sma, wi sabi taki a bigi banawtu o kon. Sowan 2000 yari pasa, Yesus ben warskow den bakaman fu en fu de srekasreka gi a dei disi. (Leisi Mateyus 24:44.) Efu wi de srekasreka, dan a o moro makelek gi wi fu pasa a muilek ten dati èn fu yepi trawan fu du a srefi.​—Luk. 21:36.

3. Te wi leri fu horidoro, fu sori sari-ati èn fu abi lobi, dan fa dati o yepi wi fu de srekasreka gi a bigi banawtu?

³ Luku dri fasi di o yepi wi fu de srekasreka gi a bigi banawtu di o kon. San wi o du efu wi yere taki wi musu preiki wan hebi krutuboskopu aladi sma o frufolgu wi? (Openb. 16:21) Fu man gi yesi na Yehovah, wi o abi fu horidoro èn frutrow tapu Yehovah taki a o kibri wi. San wi o du efu wi brada nanga sisa lasi ala noso sonwan fu den gudu fu den? (Hab. 3:17, 18) Sari-ati o meki taki wi o yepi den nanga san den abi fanowdu. Te den kondre o kon feti nanga Gado pipel, dan kande wi o abi fu libi nanga furu brada nanga sisa na ini wan pikin presi. Fa wi o du efu dati pasa? (Esek. 38:10-12) Na a bigi lobi di wi abi gi den, o yepi wi fu pasa a muilek ten dati.

4. Fa Bijbel e sori taki wi musu horidoro, sori sari-ati nanga lobi?

 ⁴ Gado Wortu e gi wi deki-ati fu tan horidoro, fu abi sari-ati èn fu sori lobi. Lukas 21:19 e taki: „Te unu horidoro, dan unu o kisi libi.” Na Kolosesma 3:12 skrifi: „Un musu abi trutru sari-ati.” Èn 1 Tesalonikasma 4:9, 10 e taki: ’Gado srefi leri unu taki un musu lobi makandra. Ma wi e gi unu rai, mi brada, fu tan lobi makandra moro.’ Den tekst disi ben skrifi gi Kresten di ben e horidoro kaba èn di ben e sori sari-ati nanga lobi. Ma den ben musu tan sori den fasi disi. Wi musu du a srefi. Fu man du dati, wi o go luku fa den fosi Kresten ben sori den fasi disi. Dan wi o si fa wi kan teki na eksempre fu den so taki wisrefi kan de srekasreka gi a bigi banawtu.

5. San yepi den fosi Kresten fu horidoro di den kisi problema?

⁵ Den fosi Kresten ben musu horidoro (Hebr. 10:36). Boiti taki den ben abi den srefi problema di furu sma na ini a ten dati ben abi, den ben e kisi tra problema tu fu di den ben e dini Yehovah. Furu fu den ben e kisi frufolgu. Boiti taki den Dyu fesiman nanga den Rome tiriman ben e meki a libi hebi gi den, den ben e kisi gens fu den eigi famiri tu (Mat. 10:21). Srefi na ini a gemeente den ben musu sorgu taki den falsi leri fu son sma di ben fadon komoto na bribi èn di ben e suku fu tyari pratifasi kon, no swaki a bribi fu den (Tori 20:29, 30). Toku den Kresten dati horidoro (Openb. 2:3). San yepi den? Den ben prakseri den tori fu sma na ini Bijbel di ben horidoro, soleki Yob (Yak. 5:10, 11). Den ben begi Gado fu gi den krakti (Tori 4:29-31). Èn den ben hori na prakseri taki Yehovah o blesi den efu den horidoro.​—Tori 5:41.

6. Te yu luku san Merita du fu horidoro, dan san dati e leri yu?

⁶ Wi kan horidoro tu te wi e studeri èn e denki dipi fu eksempre fu sma di ben horidoro na ini Bijbel èn na ini den buku fu wi. Na dati yepi Merita, wan sisa na ini Albania fu horidoro di en famiri ben e du ogri-ati sani nanga en. A e taki: „A tori fu Yob na ini Bijbel gi mi furu deki-ati. Yob nyan furu pina èn a no ben sabi srefi suma e du ala den sani nanga en. Tog a taki: ’Mi o tai hori na Gado teleki mi hari mi lasti bro!’ (Yob 27:5) Te mi prakseri den tesi fu Yob, dan den di fu mi na noti. Yob no ben sabi suma e tesi en, ma mi sabi suma e tesi mi.”

7. Awinsi wi no e kisi hebi tesi now, toku san wi musu leri fu du?

⁷ Te wi abi a gwenti fu begi Yehovah èn fruteri en ala den broko-ede fu wi, dan dati e tranga wi tu fu horidoro (Fil. 4:6; 1 Tes. 5:17). Awinsi yu no e kisi hebi tesi now, toku a bun fu begi Yehovah fu yepi yu efu yu e broko yu ede nanga wan sani noso efu yu no sabi san yu musu. Te yu abi a gwenti fu begi Gado fu yepi yu nanga den pikinpikin problema di yu abi now, dan yu no o draidrai fu begi en te yu o kisi bigi problema na ini a ten di e kon. Te dati o pasa, dan yu no o tweifri taki Yehovah sabi o ten èn fa a musu yepi yu.​—Ps. 27:1, 3.

8. Fa na eksempre fu Mira e sori taki efu wi e horidoro now, dan wi o man du dati te tesi o miti wi na ini a ten di e kon? (Yakobus 1:2-4) (Luku a fowtow.)

⁸ A o moro makelek gi wi fu pasa a bigi banawtu efu wi e horidoro now te wi e kisi tesi (Rom. 5:3). Fu san ede wi kan taki dati? Furu brada nanga sisa taki dati  ibri leisi te den pasa wan tesi, dan dati e yepi den fu horidoro te den kisi wan tra tesi. Te den si fa Yehovah e yepi den fu horidoro, dan dati e tranga a bribi fu den taki Yehovah de klariklari fu yepi den. A bribi dati e yepi den fu horidoro te wan tra tesi kon. (Leisi Yakobus 1:2-4.) Mira, wan pionier na ini Albania, taki dati fu di a horidoro di a kisi problema na ini a ten di pasa, meki dati yepi en fu horidoro te a e kisi problema now. Son leisi a e firi leki na en wawan abi so furu problema. Ma dan a e prakseri o furu Yehovah du gi en na ini den 20 yari di pasa. Dan a e taigi ensrefi: ’Tan horidoro. No tapu fu dini Yehovah now, baka di a yepi yu fu pasa so furu problema.’ Yu srefi kan prakseri fa Yehovah yepi yu na ini a ten di pasa fu horidoro. Yu kan de seiker taki a e si o furu muiti yu e du fu horidoro èn taki a o blesi yu gi dati (Mat. 5:10-12). Dan te a bigi banawtu doro, yu o man tan horidoro fu di yu ben leri fu du dati kaba.

9. Fa a gemeente fu Antiokia na ini Siria sori sari-ati?

⁹ Luku san pasa baka di den Kresten na ini Yudea ben kisi fu du nanga wan bigi angriten. Di a gemeente na ini Antiokia fu Siria yere fu na angriten, dan a no de fu taki dati den ben firi sari gi den brada nanga sisa na ini Yudea. Ma a no dati wawan, den du wan sani fu yepi den. Den „bosroiti taki ibriwan fu den ben o seni san den man gi, fu yepi den brada di ben tan na Yudea” (Tori 11:27-30). Aladi den brada nanga sisa di ben kisi fu du nanga angriten ben e libi fara, toku den Kresten na ini Antiokia ben de klariklari fu yepi den.​—1 Yoh. 3:17, 18.

10. Fa wi kan sori sari-ati te rampu miti wi brada nanga sisa? (Luku a fowtow.)

¹⁰ Na ini a ten disi wi kan sori sari-ati tu te wi yere taki rampu miti wi brada nanga sisa. Kande wi kan aksi den owruman efu wi kan yepi nanga wan project. Wi kan gi moni fu horibaka gi a wroko, noso wi kan begi gi den brada nanga sisa disi (Odo 17:17). b Fu eksempre, na ini 2020 di a COVID-19 pandemie bigin, dan na organisâsi seti moro leki 950 Rampu Komte na heri grontapu fu yepi den brada nanga sisa di ben abi yepi fanowdu. Wi abi furu warderi gi den brada nanga sisa di e yepi te wan rampu de. Fu di den abi sari-ati gi den brada nanga sisa, meki den e yepi den nanga sani di den abi fanowdu, den e yepi den fu tan dini Yehovah èn son leisi den e meki den oso nanga den Kownukondre zaal di broko.​—Luku 2 Korentesma 8:1-4.

11. Fa wi e gi wi hemel Tata grani te wi e sori sari-ati?

¹¹ Te wi e sori sari-ati baka te wan rampu pasa, dan tra sma e si a muiti di wi e meki fu yepi trawan. Fu eksempre, na ini 2019, a bigi draiwinti Dorian ben broko wan Kownukondre zaal na ini Bahamas. Di den brada nanga sisa ben e meki a zaal baka, den aksi wan aannemer omeni a ben o teki fu du wan tu wroko di ben musu du. A man disi di no de wan Kotoigi taigi den: „Unu no abi fu pai . . . gi den wrokosani, a wroko nanga den materiaal. . . . Mi wani du disi gi na organisâsi fu unu. Mi lobi a fasi fa unu e yepi den mati fu unu.” Furu sma na ini a grontapu  disi no sabi Yehovah. Ma furu fu den e luku san Yehovah Kotoigi e du. A moi fu sabi taki te wi e sori sari-ati, dan dati e hari sma kon na a Gado di „abi bun furu sari-ati”!​—Ef. 2:4.

12. Te wi e sori sari-ati now, dan fa dati e sreka wi gi a bigi banawtu? (Openbaring 13:16, 17)

¹² Fu san ede wi o abi fu sori sari-ati na a ten fu a bigi banawtu? Bijbel e sori taki den wan di no e horibaka gi den tiriman o kisi problema now, ma owktu na a ten fu a bigi banawtu. (Leisi Openbaring 13:16, 17.) A kan taki wi brada nanga sisa o abi yepi fanowdu fu man tan na libi. Te Krestes Yesus, wi Kownu kon fu krutu sma, dan wi wani meki a si wi leki sma di e sori sari-ati. Dan a o gi wi a kari fu „teki a Kownukondre”.​—Mat. 25:34-40.

13. Soleki fa Romesma 15:7 e sori, dan san yepi den fosi Kresten fu sori moro lobi gi makandra?

¹³ Ala sma ben sabi taki den fosi Kresten ben lobi makandra. Ma a ben makelek gi den fu sori a lobi dati? A gemeente na ini Rome ben abi difrenti sortu sma. Boiti den Dyu di ben sabi a Wet fu Moses èn ben e gi yesi na a wet disi, yu ben abi sma fu tra kondre di ben abi tra gwenti èn wan tra kulturu. Son Kresten ben de srafu èn trawan no ben de srafu. Kande sonwan ben de basi fu den srafu. Fa den Kresten dati ben man sori lobi gi makandra aladi den ben e difrenti so? Na apostel Paulus ben gi den a deki-ati fu „teki makandra nanga prisiri”. (Leisi Romesma 15:7.) San dati wani taki? A Griki wortu di vertaal dyaso, abi fu du nanga a sori di wan sma e sori switifasi gi wan trawan noso a teki di a e teki en na ini en oso. Fu eksempre, di Oneisimus, wan srafu fu Fileimon, ben lowe, dan Paulus taigi Fileimon fu „gi en wan switikon”. Sobun, a ben musu teki en baka nanga prisiri (Fileim. 17). Priskela nanga Akwila ben sori switifasi gi Apolos fu di den „tyari en go na den oso” fu leri en moro fu a Kresten bribi (Tori 18:26). Den Kresten dati no ben meki kulturu noso tra sani prati den, ma den ben e teki makandra nanga prisiri.

14. Fa Anna nanga en masra sori lobi?

¹⁴ Wi srefi kan sori lobi gi wi brada nanga sisa te wi e leri sabi den èn wi e teki den leki wi mati. Te wi e du dati, dan den o sori lobi gi wi tu (2 Kor. 6:11-13). Luku san Anna nanga en masra ondrofeni. Syatu baka di den kisi wan nyun toewijzing fu go dini ini West-Afrika leki zendeling, dan a COVID-19 pandemie bigin. Dati meki den no ben man miti nanga den brada nanga sisa fu den na ini a nyun gemeente. Fa a zendeling paar disi ben o man sori lobi gi den brada nanga sisa? Den ben e gebroiki Internet fu taki nanga den èn den fruteri den taki den e angri fu leri sabi den moro bun. A sani disi ben naki den brada nanga sisa ati èn now den bigin bel den furu èn den e seni sms gi den. Fu san ede a trowpaar disi du muiti fu leri sabi den brada nanga sisa? Anna e taki: „Mi no man frigiti a lobi di brada nanga sisa sori gi mi nanga mi famiri na ini bun ten èn na ini muilek ten. Na dati e pusu mi fu sori lobi baka.”

15. San yu leri fu na eksempre fu Vanessa di ben leri fu lobi ala den brada nanga sisa? (Luku a fowtow.)

¹⁵ Furu fu wi de na ini gemeente di abi brada nanga sisa fu difrenti kulturu èn di abi difrenti fasi. Wi kan sori lobi gi den alamala te wi e poti prakseri na den bun fasi fu den. Wan sisa di nen Vanessa, di e  dini na ini Nyun Zeeland ben feni en muilek fu de bun nanga son sma na ini en gemeente. Baka wan pisi ten a bosroiti fu no wai pasi moro gi brada nanga sisa di abi fasi di a no lobi, ma na presi fu dati a ben o meki ten fu leri sabi den moro bun. Di a du dati, a kon si san Yehovah lobi fu den brada nanga sisa disi. A e taki: „Sensi di mi masra tron kring-opziener, wi e moksi nanga moro furu brada nanga sisa di abi difrenti fasi. A no muilek gi mi moro fu feni en nanga den. Now mi lobi en taki difrenti sma de na ini na organisâsi. Yehovah srefi lobi en tu fu di na en e hari den sma disi kon na en fu dini en.” Te wi e leri fu si trawan leki fa Yehovah e si den, dan wi e sori taki wi lobi den.​—2 Kor. 8:24.

16. Fu san ede a o de prenspari fu sori lobi na a ten fu a bigi banawtu? (Luku a fowtow.)

¹⁶ Na a ten fu a bigi banawtu a o de prenspari fu sori lobi. Fa Yehovah o kibri wi te a ten dati doro? Luku san Yehovah ben taigi en pipel fu du di Babilon fu owruten ben kon feti nanga den: „Mi pipel, un go na ini un kamra èn tapu den doro. Un go kibri fu wan syatu pisi ten, teleki mi ati no bron moro” (Yes. 26:20). Kande wi o abi fu du a srefi sani disi te a bigi banawtu bigin. Kande den „kamra” abi fu du nanga den gemeente fu wi. Te a bigi banawtu doro, Yehovah pramisi taki a o kibri wi te wi e tan dini en makandra nanga wi brada nanga sisa. Fu dati ede a no sari fu de bun nomo nanga wi brada nanga sisa, ma wi musu du tranga muiti nownow fu abi bigi lobi gi den. Kande na dati o meki taki wi o man tan na libi!

17. Efu wi sreka wisrefi now, dan san wi o man du te a bigi banawtu bigin?

¹⁷ „A bigi dei fu Yehovah” o de wan muilek ten gi libisma (Sef. 1:14, 15). A pipel fu Yehovah o abi en muilek tu. Ma efu wi sreka wisrefi now, dan wi no o bruya èn wi o man yepi makandra. Wi o man horidoro awinsi sortu problema e miti wi. Te wi brada nanga sisa abi en muilek, dan fu di wi abi sari-ati gi den wi o du muiti fu yepi den nanga san den abi fanowdu. Èn efu wi leri fu sori lobi gi wi brada nanga sisa, dan wi o man tan lobi den na ini a ten di e kon. Te wi e du dati, dan Yehovah o blesi wi nanga têgo libi na ini wan grontapu pe wi o frigiti ala rampu nanga banawtu di ben miti wi.​—Yes. 65:17.