1. Fu san ede Yehovah na a Bigi Patu-bakriman?

NA INI november 2010, sma na Londen, Ingrisikondre, ben de klariklari fu pai sowan 70 milyun Amerkan dala gi wan bun owru Sneisi vaas. A moi fu si taki wan patu-bakriman kan meki wan pisi klèidoti, wan bunkopu sani di de fu feni na ala sei, kon tron wan kefalek moi sani di diri srefisrefi. Ma nowan patu-bakriman koni leki Yehovah, a Bigi Patu-bakriman. Na a kaba fu a di fu siksi dei di Gado meki sani, a ’teki klèidoti fu a gron’, dan a meki wan man di no ben abi nowan fowtu. Gado meki en na so wan fasi taki a ben man sori den moi fasi fu en Mekiman (Gen. 2:7). Dati meki a fiti taki Bijbel e kari a man disi di no ben abi nowan fowtu èn di ben meki fu klèidoti, „a manpikin fu Gado”.​—Luk. 3:38.

2, 3. Fa wi kan de leki den Israelsma di ben sori berow?

² Ma di Adam trangayesi en Mekiman, a no ben de Gado manpikin moro. Toku na ini ala den dusundusun yari, furu bakapikin fu Adam ben e si Gado leki den Tiriman (Hebr. 12:1). Fu di den saka densrefi na ondro a Mekiman fu den, meki den sori taki den no ben wani taki Satan tiri den, ma den ben wani Yehovah  leki den Papa èn leki den Patu-bakriman (Yoh. 8:44). A fasi fa den gi yesi na Gado, e meki wi prakseri san den Israelsma di ben sori berow, ben taki. Na Yesaya 64:8 wi e leisi: „Yehovah, yu na wi Tata. Wi na klèidoti èn yu na wi Patu-bakriman. Na yu meki wi alamala.”

³ Na ini a ten disi, ala tru anbegiman fu Yehovah e meki muiti tu fu gi yesi na en èn fu abi sakafasi neleki den Israelsma di ben sori berow. Den e si en leki wan grani fu kari Yehovah den Papa èn fu gi yesi na en leki den Patu-bakriman. Yu e si yusrefi leki safu klèidoti na ini Gado anu èn yu wani gi en na okasi fu meki yu tron wan moi prapi? Yu e si ibriwan fu yu Kresten brada nanga sisa leki wan prapi di Gado no kaba meki ete? Fu kan du disi, meki wi go luku dri fasi fa Yehovah e du en wroko leki Patu-bakriman. Wi o si fa Gado e luku suma a wani kenki, fu san ede a e kenki den kon tron moro bun sma èn fa a e kenki den.

4. Fa Yehovah e luku suma a wani hari kon na en? Gi wan eksempre.

⁴ Te Yehovah e luku libisma, a no e luku fa wan sma fesi tan, ma a e ondrosuku fa na ati de. (Leisi 1 Samuel 16:7b.) Na dati a du di a seti a fosi Kresten gemeente. A hari furu sma kon na en nanga en Manpikin, aladi trawan ben e wisiwasi den sma disi kande (Yoh. 6:44). Wan fu den sma di a hari kon na en, na Saulus di ben de wan Fariseiman fosi. A man disi ’ben e taki ogri fu Gado, a ben e frufolgu sma èn a no ben abi syen’ (1 Tim. 1:13). Ma Yehovah „di e ondrosuku sma ati” no ben e si Saulus leki wan pisi klèidoti di a no man gebroiki (Odo 17:3). Na presi fu dati, a ben e si Saulus leki safu klèidoti di a ben kan meki tron wan bun prapi. Dati meki a „teki a man disi fu go” preiki gi „den trakondre sma, den kownu nanga den Israelsma” (Tori 9:15). Sonwan fu den sma di Gado ben e si leki bun prapi ’di a ben kan gebroiki gi wan prenspari wroko’, ben de drunguman, fufuruman nanga sma di ben e du hurudu fosi (Rom. 9:21; 1 Kor. 6:9-11). Di den sma disi studeri Gado Wortu, den leri sabi en èn den poti bribi na ini en. Na so den gi en na okasi fu kenki den.

5, 6. Te wi e si Yehovah leki wi Patu-bakriman, dan fa wi o denki fu (a) den sma na ini a kontren fu wi? (b) wi Kresten brada nanga sisa?

⁵ Fa den sani di wi taki te nanga now, kan yepi wi? Fu di wi e bribi taki Yehovah man si fa sma ati de èn taki na ensrefi e bosroiti suma a wani hari kon na en, meki wi no e krutu sma na ini wi kontren noso na ini wi gemeente. Luku a tori fu wan man di nen Michael. A e taki: „Te Yehovah Kotoigi ben e kon na mi oso, mi ben e drai gowe èn mi ben e du leki mi no si den. Mi ben grofu kefalek! Bakaten mi miti wan osofamiri di mi ben lobi fu di den ben abi bun maniri. Ne wan dei mi skreki di mi yere taki den na Yehovah Kotoigi. A fasi fa den ben e tyari densrefi meki taki mi ben wani kon sabi fu san ede mi no ben lobi Yehovah Kotoigi. Mi ben kon si taki mi ben e du so fu di mi no ben sabi furu fu Kotoigi èn mi ben e bribi san sma taigi mi fu den.” Fu di Michael ben wani kon sabi san tru, meki a bigin studeri Bijbel. Bakaten a dopu èn a tron wan pionier.

⁶ Te wi e si Yehovah leki wi Patu-bakriman, dan dati o kenki a fasi tu fa wi e si wi Kresten brada nanga sisa. Yu e si den leki fa Gado e si den? Yu e si den leki wan prapi di a no kaba meki ete? Gado kan si fa wan sma ati de èn fa wan sma kan tron, baka te a kenki en kon tron wan moro bun sma. Dati meki Yehovah no e denki takru fu sma èn a no e luku den fowtu di den e meki now fu di den na sondusma (Ps. 130:3). Neleki en, wi no musu denki takru fu den futuboi fu en. Ma  te wi brada nanga sisa e meki muiti fu tron moro lepi Kresten, dan wi musu horibaka gi den. Na so wi e wroko makandra nanga wi Patu-bakriman (1 Tes. 5:14, 15). Owruman di de „mansma di abi spesrutu koni”, musu de wan bun eksempre na ini a tori disi.​—Ef. 4:8, 11-13.

7. Fu san ede yu e warderi en te Yehovah e gi yu piri-ai?

⁷ Kande yu yere a sani disi kaba: ’Noiti mi ben frustan fu san ede mi papa nanga mama ben strafu mi son leisi, teleki mi srefi kisi pikin.’ Te wi kon moro bigi, wi e kon frustan moro bun taki wi ben kisi piri-ai fu di wi papa nanga mama lobi wi. Sobun, wi e kon si piri-ai neleki fa Yehovah e si en. (Leisi Hebrewsma 12:5, 6, 11.) Iya, fu di Yehovah lobi den pikin fu en, meki a abi a pasensi fu kenki wi kon tron moro bun sma. A wani taki wi koni, taki wi de koloku èn taki wi lobi en (Odo 23:15). A no lobi te wi e pina èn a no wani taki wi dede leki sondari di no abi berow.​—Ef. 2:2, 3.

8, 9. Fa Yehovah e gi wi leri na ini a ten disi èn fa a o tan gi wi leri na ini a ten di e kon?

⁸ Wan ten ben de taki wi ben abi furu fasi di Gado no ben feni bun èn dati meki ’en ati ben bron nanga wi’. Kande wi ben e tyari wisrefi leki meti srefi! Ma na fu di Yehovah yepi wi, meki wi kenki èn wi kon abi moi fasi di a lobi (Yes. 11:6-8; Kol. 3:9, 10). Dati meki wi e libi now na ini wan agersi paradijs pe ibri dei Yehovah e yepi wi fu kenki kon tron moro bun sma. Aladi na soso ogrisma de na wi lontu, toku wi no e frede èn wi de koloku. Èn awinsi wi gro kon bigi na ini wan osofamiri pe lobi no ben de èn pe sani no ben e go bun, toku now wi abi brada nanga sisa di lobi wi trutru (Yoh. 13:35). Wi srefi leri fu lobi tra sma tu. Boiti dati, wi kon sabi Yehovah èn now wi e firi taki a lobi wi leki wan Papa.​—Yak. 4:8.

⁹ Te wi de na ini a nyun grontapu, dan wi o kisi moro wini fu na agersi paradijs. Na a ten dati, wi o de na ini wan trutru paradijs tu di Gado Kownukondre o tiri. Yehovah o meki a heri grontapu kon bun baka èn a o tan yepi libisma fu tron moro bun sma. Boiti dati, a leri di a o gi den, o moi so kefalek taki nownowde wi no man frustan fa a o de (Yes. 11:9). Gado o meki wi frustan nanga wi skin kon de sondro fowtu. Na so fasi wi o man frustan moro bun san a e leri wi èn wi o man du ala sani soleki fa a wani. Sobun, meki wi tan gi yesi na Yehovah. Na so wi e sori en taki wi e frustan taki na fu di a lobi wi, meki a e yepi wi fu kenki.​—Odo 3:11, 12.

10. Fa Yesus sori taki a ben abi pasensi nanga koni neleki a Bigi Patu-bakriman?

¹⁰ Wan koni patu-bakriman sabi ala sani fu a klèidoti di a o gebroiki fu wroko. Na so Yehovah sabi ala sani fu wi tu èn dati meki a man kenki wi kon tron bun sma. (Leisi Psalm 103:10-14.) A sabi den swakifasi fu wi, a sabi san wi man du èn san wi no man du, èn a sabi sortu muiti wi e meki fu tron lepi Kresten. Na den sani disi a e hori na prakseri te a e kenki ibriwan fu wi. Te wi e luku a fasi fa Yesus ben de nanga den apostel fu en, dan wi kan si heri bun fa Yehovah e denki fu den futuboi fu en di abi sondu. Den apostel fu Yesus ben e meki fowtu èn furu tron den ben e strei nanga makandra suma fu den ben de a moro bigiwan. Efu yu ben drape èn yu ben o si fa den apostel e meki bigi trobi, san yu ben o denki fu den? Yu ben o si den leki sma di abi safri-ati èn di Gado ben kan kenki ete? We, Yesus no ben e denki takru fu den. A ben sabi taki te a ben o gi den rai na wan switi fasi èn nanga pasensi, èn te den ben o si fa ensrefi abi sakafasi, dan dati ben kan yepi den fu kenki (Mark. 9:33-37; 10:37, 41-45; Luk. 22:24-27). Baka di  Yesus kisi wan opobaka èn den apostel fu en kisi a santa yeye, a no ben prenspari moro gi den suma na a moro bigiwan, ma den ben poti prakseri na a wroko di Yesus ben gi den fu du.​—Tori 5:42.

11. Fa David sori taki a ben wani taki Yehovah kenki en èn fa wi kan de leki en?

¹¹ Na ini a ten disi, Yehovah e gebroiki en Wortu, en santa yeye nanga a Kresten gemeente fu kenki den futuboi fu en. Gado Wortu kan kenki wi te wi e teki ten fu leisi en, te wi e denki dipi fu en èn te wi e aksi Yehovah fu yepi wi du san wi e leri. David ben skrifi: „Te mi e didon na tapu mi bedi, mi e prakseri yu. Mindrineti mi e denki dipi fu yu” (Ps. 63:6). A ben taki tu: „Mi o prèise Yehovah, a Gado di gi mi rai. Iya, te neti mi niri piri-ai gi mi” (Ps. 16:7). Dyaso a wortu „niri” abi fu du nanga den moro dipi prakseri fu wan sma. Sobun, David ben denki dipi fu den rai fu Yehovah èn a ben meki disi kenki den prakseri fu en, awinsi a ben hebi gi en son leisi fu teki a rai (2 Sam. 12:1-13). Iya, fu di David ben abi sakafasi èn a ben e gi yesi na Gado, meki a de wan moi eksempre gi wi. Yu e denki dipi tu fu Gado Wortu èn yu e meki den rai fu en abi krakti tapu den moro dipi prakseri fu yu? Yu musu meki moro muiti fu du dati?​—Ps. 1:2, 3.

12, 13. Fa Yehovah e gebroiki en santa yeye nanga a Kresten gemeente fu kenki wi?

¹² A santa yeye man kenki wi na difrenti fasi. Fu eksempre, a kan yepi wi fu kisi den moi fasi fu Gado di wan Kresten musu abi (Gal. 5:22, 23). Wan fu den moi fasi disi na lobi. Wi lobi Gado èn wi wani gi yesi na en. Wi wani taki a kenki wi fu di wi sabi taki den sani di a e aksi fu wi no hebi. A santa yeye kan gi wi a krakti tu fu feti nanga a pori denki fu a grontapu disi so taki a no kenki wi (Ef. 2:2). Di na apostel Paulus ben yongu, a denki fu den heimemre Dyu kerki fesiman ben abi furu krakti na en tapu. Bakaten a skrifi: „Mi man du ala sani nanga yepi fu a sma di e gi mi krakti” (Fil. 4:13). Sobun, neleki Paulus, meki wi tan aksi Gado fu gi wi a santa yeye fu en. Yehovah o arki den begi fu den safri-ati sma.​—Ps. 10:17.

 ¹³ Yehovah e gebroiki a Kresten gemeente nanga den owruman fu yepi ibriwan fu wi fu tron wan moro bun sma. Fu eksempre, efu den owruman e si taki a bribi fu wi e kon swaki, dan den e pruberi fu yepi wi, ma den no e du dati nanga den eigi koni (Gal. 6:1). Na presi fu dati, na wan sakafasi den e aksi Gado fu gi den koni èn fu yepi den fu man si sani krin. Fu di den e hori na prakseri san ibriwan fu wi abi fanowdu, meki den e gebroiki Bijbel nanga den buku fu wi fu ondrosuku fa den kan yepi wi. Na so den e sori taki den wani du san den aksi Gado na ini begi. Disi kan meki taki den man yepi ibriwan fu wi na a yoisti fasi. San yu o du te den kon taki nanga yu fu den krosi fu yu? Yu o teki a rai fu den èn yu o si taki den e du en fu di den lobi yu èn fu di den wani yepi yu? Yu o si en leki wan fasi fa Gado e sori taki a lobi yu? Te yu e du dati, dan yu e sori taki yu wani de leki safu klèidoti na ini Yehovah anu èn taki yu wani meki a kenki yu kon tron wan moro bun sma.

14. Aladi Yehovah na wi Patu-bakriman, toku fa a e sori taki a no e dwengi wi fu kenki?

¹⁴ Te wi e frustan fa Gado e kenki wi, dan dati kan yepi wi fu libi bun nanga wi brada nanga sisa. Wi no o denki takru tu fu den sma na ini a kontren fu wi èn fu wi Bijbelstudie. Wan patu-bakriman no e diki klèidoti puru na ini a gron, dan a e bigin meki wan sani fu en wantewante. Nôno, a e sreka a klèidoti fosi fu di a e puru den pikinpikin ston na ini nanga tra sani di no bun. Na wan srefi sortu sani Gado e du tu. Fosi a kenki sma, a e sreka den fu di a e sori den sortu fasi fu libi a feni bun. A no e dwengi den fu kenki, ma densrefi kan bosroiti sortu kenki den o tyari kon so taki den libi kan kon krin.

15, 16. Fa Bijbelstudenti e sori taki den wani taki Yehovah kenki den kon tron moro bun sma? Gi wan eksempre.

¹⁵ Luku a tori fu Tessie, wan sisa fu Australia. A sisa di studeri nanga en, e taki: „A no ben muilek gi Tessie fu frustan den sani di a ben e leri na ini Bijbel. Ma a no ben e go na fesi. A no ben e kon na den konmakandra srefi! Sobun, baka di mi begi fu a tori, mi bosroiti taki mi ben o tapu nanga a studie. Ne wan moi sani pasa. Di mi ben o studeri nanga Tessie wan lasti leisi, a fruteri mi ala san de tapu en ati. A taki dati a ben e firi leki wan hoigriman fu di a ben lobi dòbel, aladi a ben sabi taki dati no bun. Ma now a ben bosroiti fu tapu nanga a takru gwenti disi.”

¹⁶ Syatu baka dati, Tessie bigin go na den konmakandra èn a bigin sori den moi fasi fu wan Kresten srefi di den mati fu en ben e spotu en. A sisa e taki: „Baka wan pisi ten Tessie dopu èn bakaten a tron wan gewoon pionier, aladi a ben abi yongu pikin ete.” Iya, te sma di e studeri Bijbel e bigin kenki den libi fu prisiri na ati fu Gado, a o hari den kon na en èn a o yepi den fu kenki kon tron moro bun sma.

17. (a) Fa yu feni en taki Yehovah na yu Patu-bakriman? (b) Fu sortu sani wi o taki moro fara na ini a tra artikel?

¹⁷ Te na a dei fu tide, patu-bakriman e teki den ten fu meki prapi nanga moi vaas nanga anu ete. Yehovah srefi e teki en ten fu kenki wi kon tron moro bun sma. A e hori pasensi nanga wi te a e gi wi rai èn a e luku san wi o du nanga a rai dati. (Leisi Psalm 32:8.) Yu man si fa Yehovah e poti prakseri na yu? Yu man si fa a e hori yu na ini en anu fu di a wani kenki yu kon tron wan moro bun sma? Efu yu man si dati, dan sortu moi fasi o yepi yu fu tan de leki safu klèidoti na ini Yehovah anu? Efu yu no wani de leki tranga klèidoti di Yehovah no man gebroiki, dan sortu fasi yu no musu abi? Fa papa nanga mama kan wroko makandra nanga Yehovah te den e yepi den pikin fu den fu kenki? Na ini a tra artikel wi o taki fu den tori disi.