1, 2. Fu san ede Gado ben e si Danièl leki wan ’man di a ben lobi srefisrefi’ èn fa wi kan gi yesi na Gado leki Danièl?

DI DEN Dyu go na Babilon leki katiboman, den si taki a foto ben lai nanga popki fu falsi gado èn taki sma ben e du afkodrei. Ma toku den futuboi fu Gado, soleki Danièl nanga den dri mati fu en ben weigri fu meki den Babilonsma kenki den (Dan. 1:6, 8, 12; 3:16-18). Danièl nanga den mati fu en ben teki a bosroiti fu tan dini Yehovah wawan èn fu si en leki den Patu-bakriman. Na so den ben man tan gi yesi na en. Aladi Danièl tan na Babilon a moro bigi pisi fu en libi, toku wan engel fu Gado ben taki dati Danièl ben de wan „man di Gado lobi srefisrefi”.​—Dan. 10:11, 19.

² Na ini Bijbel ten, wan patu-bakriman ben e kwinsi a klèidoti go na ini wan baki di ben abi a srefi vorm leki a sani di a ben wani meki. Na ini a ten disi, den tru anbegiman fu Yehovah e si en leki a Moro Hei Tiriman èn den sabi taki neleki wan patu-bakriman, a abi a makti fu kenki libisma leki fa a wani. (Leisi Yeremia 18:6.) Gado abi a makti tu fu kenki ibriwan fu wi. Ma toku a e gi  wi na okasi fu teki wi eigi bosroiti èn a no e dwengi wi fu gi yesi na en. Meki wi go luku now fa wi kan de leki safu klèidoti na ini Gado anu. Wi o taki fu dri sani: (1) Sortu fasi kan tapu wi fu teki a rai fu Gado? (2) Fa wi kan leri fu abi moi fasi di e yepi wi fu gi yesi na Gado èn fu de leki safu klèidoti? (3) Fa papa nanga mama kan gi yesi na Gado te den e yepi den pikin fu den fu kenki?

3. San kan meki wi ati kon tranga? Gi wan eksempre.

³ Odo 4:23 e taki: „Kibri yu ati, moro iniwan sani di de fu kibri, bika na drape den rutu fu a libi de.” Sobun, efu wi no wani taki wi ati kon tranga, dan wi musu luku bun taki wi no e kisi heimemre, taki wi no abi a gwenti fu du sondu èn taki wi bribi no kon swaki. Den sani disi kan meki taki wi trangayesi Gado èn taki wi opo wisrefi teige en (Dan. 5:1, 20; Hebr. 3:13, 18, 19). Na dati pasa nanga Kownu Usia fu Yuda. (Leisi 2 Kroniki 26:3-5, 16-21.) Fosi, a ben e „du san Yehovah feni bun” èn a „ben e meki muiti doronomo fu dini Gado”. Ma „di a kisi furu makti, a kon abi bigifasi”, aladi na Gado ben gi en a makti disi. A pruberi srefi fu bron switismeri na ini a tempel, wan wroko di den priester fu a famiri fu Aron wawan ben mag du. Di den priester kon taki nanga en fu a tori, Usia ati kon bron nanga den fu di a ben abi heimemre. San ben de a bakapisi? Gado meki a kisi bigi syen èn te fu kaba a dede leki wan gwasiman.​—Odo 16:18.

4, 5. San kan pasa te wi no e luku bun nanga heimemre? Gi wan eksempre.

⁴ Efu wi no e luku bun nanga heimemre, dan wi srefi kan bigin ’denki moro fu wisrefi leki san de fanowdu’ èn kande wi no wani teki Bijbel rai srefi (Rom. 12:3; Odo 29:1). Luku a tori fu wan owruman di nen Jim. Wan dei den owruman ben abi wan konmakandra, ma Jim no ben agri nanga den tra owruman fu wan tori di ben abi fu du nanga a gemeente. A e taki: „Mi taigi den brada taki den no abi lobi, ne mi gowe libi a konmakandra.” Sowan siksi mun baka dati, a froisi go na wan tra gemeente, ma a no kisi a grani fu dini drape leki owruman. A e taki: „Mi ati ben bron srefisrefi. Fu di mi ben e hori nomo taki den trawan no ben abi leti, meki mi tapu nanga a tru anbegi.” Tin yari langa, Jim no ben e dini Yehovah moro. A e taki: „Mi ben mandi èn mi ben feni taki na Yehovah meki taki sani waka so. Na ini ala den yari dati, den brada kon luku mi èn den pruberi fu taki nanga mi, ma mi no ben wani a yepi fu den.”

⁵ A tori fu Jim e sori taki heimemre kan breni wi so te taki wi no e si moro taki san wi e du, no bun. A kan meki taki wi e tron leki tranga klèidoti di no bun fu gebroiki (Yer. 17:9). Jim e taki: „Na soso den fowtu fu tra sma mi ben e si.” A pasa wan leisi kaba taki wan tra Kresten hati yu firi noso taki yu lasi wan grani? San yu du? Yu kisi heimemre? Noso yu ben feni en moro prenspari fu kon bun baka nanga yu brada èn fu tan dini Yehovah?​—Leisi Psalm 119:165; Kolosesma 3:13.

6. San kan pasa te wi abi a gwenti fu du sondu?

⁶ Efu wan sma abi a gwenti fu du sondu noso efu a e kibri srefi san a e du, dan a o muilek gi en fu teki Bijbel rai. A no o si en leki wan bigi sani fu du wan ogri. Wan brada ben taki dati baka wan pisi ten a no ben e kisi konsensi fonfon moro te a ben e du wan ogri (Preik. 8:11). Wan tra brada di ben kon abi a gwenti fu luku porno, taki bakaten: „Mi ben bigin krutu den owruman.” A takru gwenti fu en ben meki taki a bribi fu en kon swaki. Te fu kaba, a kon na krin san a ben e du èn den owruman gi en a yepi di a ben abi fanowdu. A no de fu taki dati wi alamala  abi sondu. Ma efu wi e bigin krutu trawan noso wi e taki bun fu wan ogri di wi e du, na presi fu aksi pardon èn fu suku yepi, dan kande wi ati kon tranga kaba.

7, 8. (a) Fa den Israelsma sori taki den ati kon tranga fu di den no ben abi bribi? (b) San wi kan leri fu a tori disi?

⁷ Na eksempre fu den Israelsma di Yehovah ben frulusu fu Egepte, e sori fa sma ati kan kon tranga te den no abi bribi. Den Israelsma ben si fa Gado du omeni wondru fu yepi den. Sonwan fu den wondru disi ben kefalek srefisrefi. Ma di den doro na a Pramisi Kondre, den sori taki den no abi bribi. Na presi fu frutrow tapu Yehovah, den kon frede èn den bigin krutu Moses. Den ben wani drai go baka srefi na Egepte pe den ben de srafu fosi. A sani disi hati Yehovah trutru. A ben taki: „O langa den sma disi o tan wisiwasi mi?” (Num. 14:1-4, 11; Ps. 78:40, 41) Fu di den ati ben kon tranga èn den no ben abi bribi, meki den dede na ini a gran sabana.

⁸ Now di wi e doro a nyun grontapu, wi srefi musu sori tu efu wi abi bribi. A bun fu ondrosuku fa a de nanga a bribi fu wi. Fu eksempre, kande wi kan luku fa wi e denki fu den sani di Yesus taki na Mateyus 6:33. Aksi yusrefi: ’Den sani di mi wani du èn den bosroiti di mi e teki, e sori taki mi e bribi trutru san Yesus taki dya? Mi no o go na den konmakandra noso na a preikiwroko soso fu di mi wani wroko moro moni? San mi o du te a wroko fu mi e teki furu fu mi ten nanga mi krakti? Mi o meki a grontapu disi kenki mi kon tron leki fa a wani noso mi o meki a tapu mi fu dini Yehovah?’

9. Fu san ede wi musu ’tan ondrosuku efu wi de na bribi’ èn fa wi kan du disi?

⁹ Luku wan tra eksempre. Kande wan futuboi fu Yehovah e trangayesi den wet fu en fu di a abi takru mati, a e bumui nanga sma di puru fu a gemeente èn a e luku noso arki sani di no fiti. Na so a e sori taki en ati e kon tranga. Aksi yusrefi: ’Na disi e pasa nanga mi tu?’ Efu wi si taki wi abi a problema disi tu, dan wi musu ondrosuku wi bribi wantewante! Bijbel e taki: „Tan ondrosuku efu unu de na bribi. Tan buweisi sortu sma unu de” (2 Kor. 13:5). De eerlijk nanga yusrefi. Abi a gwenti fu ondrosuku yusrefi nanga yepi fu Gado Wortu.

10. San kan yepi wi fu de leki safu klèidoti na ini Yehovah anu?

¹⁰ Gado e yepi wi fu tan de leki safu klèidoti èn dati meki a gi wi en Wortu, a Kresten gemeente nanga a preikiwroko. Neleki fa watra e meki klèidoti kon safu, na so wi srefi o tron leki safu klèidoti tu na ini Yehovah anu, te wi abi a gwenti fu leisi Bijbel ibri dei èn fu denki dipi fu den sani di wi e leisi. Yehovah ben wani taki den kownu fu Israel ben musu skrifi a Wet fu en abra gi densrefi èn den ben musu leisi en ibri dei (Deut. 17:18, 19). Den apostel ben frustan taki fu man du a preikiwroko fu den bun, a ben prenspari fu leisi Gado Buku èn fu denki dipi fu en. Na ini den brifi fu den, den gebroiki pisi fu den Hebrew Buku fu Bijbel hondrohondro leisi èn te den ben e preiki gi sma, den ben e gi den deki-ati fu leisi Bijbel tu èn fu denki dipi fu en (Tori 17:11). Na ini a ten disi, wi srefi e si o prenspari a de fu leisi Gado Wortu ibri dei èn fu denki dipi fu en (1 Tim. 4:15). Te wi e du dati, dan wi e sori Yehovah taki wi abi sakafasi èn taki wi wani de leki safu klèidoti na ini en anu.

11, 12. Fa Yehovah kan gebroiki a Kresten gemeente fu kenki ibriwan fu wi? Gi wan eksempre.

¹¹ Yehovah e gebroiki a Kresten gemeente fu kenki ibriwan fu wi. Jim, a brada di wi ben taki fu en kaba, bigin kenki a denki fu en di wan owruman ben poti prakseri na en. Jim e taki: „Noiti a taigi mi taki a fowtu de  na mi èn noiti a krutu mi. Na presi fu dati, a taki fu den bun sei fu a tori èn a sori taki a ben wani yepi mi trutru.” Baka sowan dri mun, na owruman gi Jim wan kari fu kon na wan konmakandra. Jim e fruteri: „Den brada nanga sisa gi mi wan switikon. A lobi di den sori, yepi mi fu drai kon baka. Mi bigin si taki a no de so prenspari fa mi e firi. Fu di den brada nanga mi lobi wefi, di tan dini Yehovah na ini ala den yari, yepi mi, meki mi bribi kon tranga baka. Mi kisi furu deki-ati tu di mi leisi den artikel di nen ’Jehovah no e froedini foe kisi pori nen’ nanga ’Dini Jehovah na wan loyaal fasi’ na ini A Waktitoren fu 15 november 1992.”

¹² Baka wan pisi ten, Jim tron owruman baka. Sensi a ten dati, a yepi tra brada di ben abi den srefi sortu problema èn a yepi den fu kon abi wan tranga bribi baka. A e taki: „Mi ben denki taki mi ben abi wan bun matifasi nanga Yehovah, ma dati no ben de so. Mi ben meki heimemre tapu mi fu si san ben de moro prenspari èn mi ben poti prakseri nomo na den fowtu fu tra sma. Mi sari taki disi pasa nanga mi.”​—1 Kor. 10:12.

13. Sortu moi fasi wi e kisi te wi de na ini a preikiwroko èn sortu wini wi e kisi fu dati?

¹³ Fa a preikiwroko kan kenki wi kon tron moro bun sma? Te wi e fruteri trawan a bun nyunsu, dan dati kan yepi wi fu kon abi sakafasi èn fu kisi den difrenti fasi fu Gado en santa yeye (Gal. 5:22, 23). Prakseri sortu moi fasi yu leri na ini a preikiwroko. San moro prenspari na taki te wi e sori den moi fasi di wan Kresten musu abi, dan sma o wani arki a boskopu fu wi èn a kan meki taki son sma o denki tra fasi fu wi. Fu eksempre, di wan uma taki grofu nanga tu Kotoigi fu  Australia, den arki en na wan lespeki fasi. Ma fu di na uma disi ben sari bakaten taki a taki so nanga den Kotoigi, meki a skrifi wan brifi gi a bijkantoro. A taki: „Mi wani aksi den tu sma disi pardon. Na heimemre meki taki mi taki so grofu nanga den. Ma den sori sakafasi èn den ben abi furu pasensi. Na wan don sani mi du di mi yagi tu sma di ben e preiki Gado Wortu.” Yu denki taki na uma ben o skrifi a sani disi efu den tu preikiman disi ati ben bron awinsi pikinso srefi? Kande a no ben o du dati. Iya, a preikiwroko e tyari wini kon gi wi èn gi tra sma.

14. San papa nanga mama musu du efu den wani yepi den pikin fu den fu tron moro bun sma?

¹⁴ Furu pikin abi sakafasi èn den de klariklari fu leri sani (Mat. 18:1-4). Dati meki koni papa nanga mama kan pruberi fu leri den pikin fu den a tru leri fu Bijbel èn fu yepi den fu kon lobi den leri disi te den yongu ete (2 Tim. 3:14, 15). Ma efu papa nanga mama wani du dati bun, dan den tru leri disi musu saka go dipi na ini den eigi ati èn den musu du san den e leri. Dan den pikin fu den no o yere a tru leri nomo, ma den o si tu sortu bun bakapisi a abi. Boiti dati, den o si taki papa nanga mama e piri-ai gi den fu di den lobi den, leki fa Yehovah lobi den.

15, 16. Fa papa nanga mama musu sori taki den e frutrow tapu Gado te wan pikin fu den puru fu a gemeente?

¹⁵ Ma aladi son pikin leri a tru anbegi yonguyongu kaba, toku te den e gro kon bigi, den e gowe libi Yehovah noso den musu puru fu a gemeente. Te disi e pasa, a hebi gi a heri osofamiri. Wan sisa fu Zuid-Afrika taki: „Di den puru mi brada fu a gemeente, a ben gersi leki a dede. A sani disi broko mi ati srefisrefi!” Ma san a sisa disi nanga en papa nanga mama du? Den du san Bijbel e taki. (Leisi 1 Korentesma 5:11, 13.) En papa nanga mama e taki: „Wi bosroiti fu du san Bijbel e taki fu di wi ben sabi taki te wi ben o du sani soleki fa Gado wani, dan wi ben o abi bun bakapisi. Wi ben sabi tu taki te wan sma puru fu a gemeente, dan dati na wan fasi fa Gado e strafu en. Wi ben de seiker taki Yehovah e strafu sma fu di a lobi den. Noiti a e strafu den tumusi hebi. Dati meki wi no ben e bumui nanga a boi fu wi, boiti te a ben de fanowdu trutru fu taki fu wan prenspari tori na ini a famiri.”

¹⁶ Fa a manpikin fu den ben e firi? Bakaten a taki: „Mi ben sabi taki mi famiri no ben e teige mi, ma taki den ben e gi yesi na Yehovah èn na en organisâsi.” A taki tu: „Te yu e si taki yu no abi nowan tra sma fu horibaka gi yu, dan yu o begi Yehovah fu a yepi yu èn yu o aksi en pardon. Dan fosi yu o si taki yu abi en fanowdu trutru.” Yu kan frustan fa a famiri disi ben breiti di a yongu man disi tron wan Kotoigi baka! Iya, te wi e gi yesi na Gado ala ten, dan sani o waka bun gi wi.​—Odo 3:5, 6; 28:26.

17. Fu san ede wi musu kon abi a gwenti fu gi yesi na Yehovah èn sortu wini disi o tyari kon gi wi?

¹⁷ A profeiti Yesaya ben taki na fesi taki na a kaba fu a katibo na Babilon, den Dyu ben o sori berow èn den ben o taki: „Yehovah, yu na wi Tata. Wi na klèidoti èn yu na wi Patu-bakriman. Na yu meki wi alamala.” Baka dati den ben o begi Yehovah: „Grantangi, memre taki wi alamala na yu pipel” (Yes. 64:8, 9). Te wi e sori sakafasi neleki den Dyu disi èn wi kon abi a gwenti fu gi yesi na Yehovah, dan a o lobi wi, neleki fa a ben lobi a profeiti Danièl. Boiti dati, Yehovah o tan gebroiki en Wortu, en santa yeye nanga en organisâsi fu kenki wi. Dan wán dei o kon taki wi no o abi nowan sondu moro èn wi o man tanapu na en fesi leki „pikin fu Gado”.​—Rom. 8:21.