FU SAN EDE yu kan de seiker taki Yehovah e broko en ede nanga yu trutru? We, na fu di Bijbel e taki dati krin. Na 1 Petrus 5:7 skrifi: „Trowe ala un hebi na en tapu, bika a e broko en ede nanga unu.” San na wan tu sani di e sori taki Yehovah Gado e broko en ede nanga yu?

Gado abi den moi fasi di yu wani taki wan bun mati musu abi. Nofo tron a de so taki te sma e sori switifasi gi makandra èn den lobi fu gi makandra sani, dan den e tron bun mati. A no muilek fu si taki Yehovah abi switifasi èn taki ibri dei a e gi libisma sani. Luku wan eksempre: „A e meki a son fu en opo gi ogri sma èn gi bun sma. A e meki alen fadon gi sma di e du san reti èn gi sma di no e du san reti” (Mat. 5:45). San alen nanga son e du? We, wan fu den sani na taki Gado e gi alen nanga son fu ’meki taki sma abi bun furu nyanyan èn taki den e firi prisiri’ (Tori 14:17). Yehovah e sorgu taki grontapu e gi nofo nyanyan èn wi sabi taki wan switi nyanyan na wan fu den sani di e meki taki wi e prisiri.

Dan fu san ede so furu sma no abi nyanyan? Na fu di furu tiriman e prakseri nomo fa den kan kisi makti èn fa den kan meki moni, na presi taki den e luku san den kan du gi den sma fu meki a libi moro bun. Dyonsro Yehovah o puru ala den gridi tiriman disi èn na presi fu den a o poti en  Manpikin fu tiri en Kownukondre na hemel. Na a ten dati, ala sma o abi nofo fu nyan. Ma solanga a ten dati no doro, Gado e sorgu gi den futuboi fu en (Ps. 37:25). Disi no e sori taki a e broko en ede nanga wi?

Wan bun mati e meki ten gi yu. Kande a e taki nanga yu omeni yuru fu den sani di un ala tu lobi. Wan bun mati o arki bun te yu e fruteri sortu problema nanga broko-ede yu abi. Yu denki taki Yehovah e arki yu na a fasi disi tu? Iya, na dati a e du! A lobi arki den begi fu wi. Dati meki Bijbel e taigi wi fu „tan begi”. Iya, wi e kisi deki-ati srefi fu „begi doronomo”.​—Rom. 12:12; 1 Tes. 5:17.

O langa Yehovah wani arki den begi fu yu? Wan eksempre na ini Bijbel e gi wi a piki tapu na aksi disi. Fosi Yesus teki den apostel fu en, ’a begi Gado heri neti’ (Luk. 6:12). A kan taki na ini a begi fu en, Yesus kari furu fu den disipel fu en na den nen. A taki fu den bun fasi nanga den swakifasi fu den èn a aksi en Papa fu yepi en fu luku sortuwan fu den a ben musu teki. Di dei broko, Yesus ben sabi taki a ben teki den disipel di ben bun nofo fu de en apostel. Yehovah, a Gado „di e arki begi”, e prisiri fu arki ala begi di sma e taki nanga den heri ati (Ps. 65:2). Srefi te wan sma e begi omeni yuru fu wan sani di e moro en, toku Yehovah no e fruferi fu arki en.

Son leisi srefi bun mati feni en muilek fu gi makandra pardon. A e pasa taki sma di ben de mati fu makandra langa kaba, no wani de mati moro fu di a hebi gi den fu gi makandra pardon. Ma Yehovah no de so. Bijbel e gi ala reti-ati sma deki-ati fu aksi Gado pardon, fu di „a o gi den pardon nanga en heri ati” (Yes. 55:6, 7). San meki Gado man du dati?

A man du en fu di a abi lobi moro ala sma. A lobi grontapu so te taki a gi en Manpikin Yesus fu frulusu libisma fu sondu èn fu den  takru bakapisi di sondu tyari kon gi den (Yoh. 3:16). Fu taki en leti, a lusu-paiman e du moro srefi. Nanga yepi fu Krestes ofrandi, Gado e gi sma di a lobi, pardon nanga en heri ati. Na apostel Yohanes ben skrifi: „Gado e du ala ten san a e pramisi èn a e du san reti. Sobun, efu wi taki krin san na wi sondu, dan a o gi wi pardon fu den sondu fu wi” (1 Yoh. 1:9). Fu di Gado e gi sma pardon, meki den kan tan de mati fu en. Wi no breiti nanga disi?

Wan tru mati e yepi den mati fu en te den abi en fanowdu. Yehovah e du dati tu? Bijbel e taki: „Awinsi [wan futuboi fu Gado] fadon, toku a no o tan didon leki na fringi sma fringi en na gron, bika Yehovah e hori en anu fu a opo tanapu” (Ps. 37:24). Yehovah e yepi den futuboi fu en na difrenti fasi. Luku wan tori di pasa na Sint Croix, wan Caraibisch èilanti.

Fu di wan meisje di ben de wan Kotoigi no ben wani singi gi a fraga, meki den pikin fu en skoro ben wani dwengi en fu du dati. Baka di a begi Yehovah fu a yepi en, a bosroiti fu taki fu a tori. Di a ben musu taki fu wan tori na fesi klas, a fruteri fu san ede a no e singi gi a fraga. A gebroiki Mi buku nanga Bijbel tori fu taki fa a tori fu Sadrak, Meisak nanga Abedneikow yepi en fu teki so wan bosroiti. A taki: „Yehovah yepi den dri Hebrew man disi fu di den no ben wani anbegi wan popki.” Baka dati a meisje disi gi den pikin fu en klas a buku. Erfu fu den pikin ben wani wan. Di a kon si taki Yehovah gi en a krakti nanga a koni fu taki fu so wan muilek tori, a ben breiti trutru.

Efu yu ben tweifri taki Yehovah e broko en ede nanga yu, dan denki dipi fu Bijbeltekst soleki Psalm 34:17-19, 55:22 nanga 145:18, 19. Aksi brada nanga sisa di e dini Yehovah langa kaba, fa a sorgu gi den. Te yu wani taki Gado yepi yu nanga wan tori, dan begi en fu dati. Dan yu srefi o si taki Yehovah ’e broko en ede nanga yu’.